كشاف برايت لايت Britelite

[نمر بن حثلين]

السلام عليكم ورحمة الله وبركاته

اقدم لكم نوعيه من الكشافات قويه وسعرها معقول جدا ( ثلث قيمة الميقا لايت :confused: )

الكشاف ماركته اسمها برايت لايت Britelite
الشركه المانيه
لكن الكشاف والكرتون ما كتب عليه وين صناعته
لذلك قد تكون الصناعه تجميع صيني

يتوفر من الكشاف احجام مختلفه ويوجد انارة صفرا وانارة بيضا وصغير وكبير
وتتراوح الاسعار بين 150 ريال الى 80 ريال

انا اخذت واحد انارته بيضا موديله KAMPER LED
بطاريته تشحن على الكهربا والبطاريه قوتها 1300 امبير
تشحن لمدة 8 ساعات على كهربا 220
يعمل لمدة 1.30 ساعه
هيكل الكشاف مصنوع من المنيوم الطائرات
ومكتوب على الكرتون ان عمر اللمبه 100 الف ساعه ومهيب الظنه شكلهم ينصبون :p
سعره 115 ريال
ويوجد عند محلات التلفزيونات والاجهزه المنزليه
وما يجي معه شاحن سياره

ومداه قوي لدرجة انه اذا نورت به الاماكن القريبه يتعب العين
ومكتوب على الكرتون يوصل كيلو و200 متر بس اعتقد انه مبالغه
بس الكشاف مهب سهل يروح بعيد والتجربه خير برهان
لاحد يقول وهقتنا جرب همن قرر انت تشتري ولا لا :no:

http://greee7.googlepages.com/202.jpg

http://greee7.googlepages.com/200.jpg

http://greee7.googlepages.com/201.jpg

[قروي الأول]

هل تتوافر قطع غيار له وهل له ضمان وأين يوجد

[ولد وايل]

اين يباع اخي والف شكر لك وبيض الله وجهك

[( برى بحرى)]

قواك الله وما قصرت

دائما اشوف فى محلات الاجهزه الكهربائيه

بس شكلى باخذ واحد لان قرب الوسم

تحياتى

[هاوي البر]

الكشاف عندي وممتاز من ناحية قوة الاضاءة بس للاسف ما يجي معه شاحن سيارة
وفيه معلومه اضافية هي ان للاكشاف لمبة احتياطية تاتي في غطى الكشاف من اسفل
شكرا لك اخي على هذا الموضوع

[عجاج]

انا عندي نفس الكشاف هذا الحجم الصغير منه توي مشتريه بسعر 80 ريال
وفيه ضمان على اللمبة لمدة سنة

الصحيح انه ممتاز جدا وقواك الله طال عمرك

[الساهر2003]

السلام عليكم
استخدمة الكشاف وصحيح انه ممتاز لكن كثر خرابه في فيش الشاحن داخل الكشاف واكثر من مرة حاولت اصلاحه في محلات الاكترونيات ولم انجح وكثيرا مايطلب شمعة
وانتهة المشكلة بالاستغناء عنه بالماقلايت الشحن ب 370 ريال وقوي جدا ومتوفر قطع الغيار والصيانة وامريكي
مع اطيب تحية للجميع

[نمر بن حثلين]

هل تتوافر قطع غيار له وهل له ضمان وأين يوجد


على كلام البياع يقول القطع متوفره ومدري عنه هو صادز ولا يصرف بضاعته

عموما من الكتالوج هذولا الوكلاء حقينه

http://greee7.googlepages.com/203.jpg

[نمر بن حثلين]

اين يباع اخي والف شكر لك وبيض الله وجهك

حياك الله يا راعي الـ FJ :p

يباع اخوي عند حقين الالكترونيات واتوقع البطحا ما تخلى

وهلابك

[نمر بن حثلين]

قواك الله وما قصرت

دائما اشوف فى محلات الاجهزه الكهربائيه

بس شكلى باخذ واحد لان قرب الوسم

تحياتى


الله يقويك اخوي ولا قصرت
واصبر لحد ما نتاكد من الاخ الي يقول خرب عنده لا يصير فيه مشكله

[نمر بن حثلين]

الكشاف عندي وممتاز من ناحية قوة الاضاءة بس للاسف ما يجي معه شاحن سيارة
وفيه معلومه اضافية هي ان للاكشاف لمبة احتياطية تاتي في غطى الكشاف من اسفل
شكرا لك اخي على هذا الموضوع


هلا بك يا خوي
شاحن السياره ما اعتقد انه مهم بالحيل لانك صعبه بتخليه يشحن بالموتر 8 ساعات والسويتش عليه
ثانيا المحولات متوفره يعني ما تبلش بشحنه

وبسئلك ياخوي الكشاف كم لك مشتريه ونوره ابيض ولا اصفر وهل حصل له مشكله ؟

[نمر بن حثلين]

انا عندي نفس الكشاف هذا الحجم الصغير منه توي مشتريه بسعر 80 ريال
وفيه ضمان على اللمبة لمدة سنة

الصحيح انه ممتاز جدا وقواك الله طال عمرك


اهلا بالاستاذ عجاج
طبعا الي عندك اصغر شي لانك دايم تدور الرخيص مع ان دراهمك ماهنا اكثر منهن :no:

[نمر بن حثلين]

السلام عليكم
استخدمة الكشاف وصحيح انه ممتاز لكن كثر خرابه في فيش الشاحن داخل الكشاف واكثر من مرة حاولت اصلاحه في محلات الاكترونيات ولم انجح وكثيرا مايطلب شمعة
وانتهة المشكلة بالاستغناء عنه بالماقلايت الشحن ب 370 ريال وقوي جدا ومتوفر قطع الغيار والصيانة وامريكي
مع اطيب تحية للجميع


وعليكم السلام
هلا اخوي
تجربه مفيده لاني الحقيقه ما اشتريته الا من مده بسيطه
وش نوع الي كان معك اصفر ولا ابيض
وكم قعد معك قبل يخرب
وهل تتوقع ان فيه خلل مصنعي او ان النوعيه كلها كذا
وجربت تروح لوكيله وشفت له قطع وصيانه ولا ماله ؟

[ولد وايل]

بيض الله وجهك والله يرزقك من فضله .0000000000000000

[الساهر2003]

له موزع في البطحا في سوق الهنود يبيع الشمعات فقط اذا توفرت ويغثك مايوفرها واللي كان عندي اصغر شيي ويشتغل نص ساعة بالكثير فقط وصحيح قوي لكن عيوبه كثيره والقطه ارهم من عند قطع الغيار الخاص بالاكترونيات عند سوق الزل واستخدمت كثير من الكشفات وكلها ليست بجودة الماقلايت وتوفر القطع

[نمر بن حثلين]

ولد وايل

حياك الله يا بعدي وهلا بك

الساهر
الله يجزاك خير
الي عندي المقاس الوسط ولمبته بيضا
على الله يصمل ولا يفشلنا

[دوادماوي]

ماقصرت أخوي ..

الحقيقة كشاف رائعة ..

لاهنت على الموضوع ...

تحياتي لك ...

[وقيان]

يعطيك العافية ماقصرت

[فتى احد]

السلام عليكم ...

أتفق معكم أن البرايت لايت قوي لكن خراب شمعته كل أبو دايم يخرب وتتعب تدور عليه لكن الماق لايت لاتدور له بديل خاصة اللي يشحن وقيمته بالدمام حوالي 400 ريال .

[هاني 15]

السلام عليكم

ان عندي كشاف مثله (برايت لايت) نوره ابيض (زنن) والصراحه ممتاز وكثر من زملاي معهم مثله البعض له معه اكثر من سنه ماتغير ولا طلب شي

ويوم اشتريه جاء معه شاحن بيت وشاحن سياره ويجي عده احجام وسعره ممتاز ( الي معي مشتريه بي 145 فيه ارخص وفيه اغلا على حسب الحجم )

تحيااتي

[بن معدل]

الاصفر مجربه من تقريبا اربع سنوات ما في كلام بس عذروبه البطارية تخرب

[ابودعسان]

انا اكتشفت ان سبب خراب البطارية اني اخليه بدرج السياره من حراره الشمس

[فهد الفراج]

الكشاااف حلو انا مجربه
بس عيبه انه ضاع مني
وموقع الي يبيعونه في البطحاء
في العماير الي شمال خياطين الشرع الي في الغرابي

[بواردي تربة]

الكشاف جداً ممتاز لة معي اكثر من سنتين واكرفة وما عمرة قال تعبت هههه ما شاءالله علية

عذروبة اذا طلعت للبر وفضي الشحن ما ينشحن بشاحن السيارة محتاج 220 فولت يعني لازم نركب في الموتر محول من 12 الي 220

[باشا]

كشاف عملي ونوره رائع بالإضافة الى أن سعره معقول جدا

[د. ابوداحم]

يعطيك العافيه ...

الكشاف هذا معي ومع كثير من الزملاء ... اسم الموديل ( dream led )

طبعا هو عملي مرررره . الله يجزا اللي دلنا عليه خير . وفيه ميزه . اذا ضاع عنك احد من اخوياك في الليل .. وطلب الوصف وهو قريب . شغل الكشاف وارفع النور في السما . وحرك الكشاف . بيقولك خويك . عرفت المكان خلاص .

هذا والله اعلم

[MRJOoOoOJ]

هلا وغلا

نمر بن حثلين كثر الله خيرك وجزاكم من واسع ابوابه

مشكور وماقصرت والكشاف ان شاء اللله شاريه

[سالم11]

الكشاف رائع وعملي وشاحن الجوال الكبير يشحنه

[ابوحسن ...]

معي واحد لاكن مدري وش ماركته بس على العموم السوق كله صيني نادر تلقى اصلي بس الكشاف بطل معاه شاحن سياره وشاحن بيت لون الشمعه ابيض ويقولون ابوهنود كيلو يوصل بس ماضنتي له معي 3 شهور ميه ميه
ضمان سنه سعره 110 ريال بعد حب خشوم ههههههه لابس ع شان محل خوي بالبطحاء

[اصيل نجد]

ياشباب صحيح من قال ان كشاف الماقلايت قوي بس 6شهور وتصير البطاريه تضعف يعني اول ماتشتريه يشحن مثلا سته ساعات وتستعمله ساعه طبعا قوي بعد الساعه يصير اضعف وبعد مده يشحن 6 ساعات وفرغ الشحن بسرعه يعني رح اشتر بطاريه جديده بقيمه كشاف جيباس او غيره لاان بطاريه الماقلايت 130 ريال يعني بصراحه مايستاهل هالقيمه وعلى فكره شحن السياره ماهو قوي زي شاحن الكهرباء يعني السياره فقط اسعاف ويخلص بسرعه وانا اكلمك عن تجربه خمس سنوات مع الماقلايت صرفت عليه تقريبا مرتين غيرت بطاريه اعاده شحن فيه افضل منه هو جيباس سعره 80 ريال ممتاز جداجدا مع واحد من الزملاء له تقريبا اربع شهور ويمدحه كثير ونوره ابيض بس عيبه ماتحكم بالنور يعني مايفرش على فكره فيه محلات وكالات للكشافات انواع واشكال كثيره موجودين بالرياض شارع عمر المختار خلف البنك الاهلي فيه كم محل تحياتي لكم

[بريمي]

( الموضوع صار له ثلاث سنوات )!!
لكن على العموم..
البرايت لايت كشاف ممتاز وعملي وجربته من أكثر من سنتين

[أبوعبدالعزيز6]

فيه افضل منه هو جيباس سعره 80 ريال ممتاز جداجدا مع واحد من الزملاء له تقريبا اربع شهور ويمدحه كثير ونوره ابيض بس عيبه ماتحكم بالنور يعني مايفرش

جربت الجيباس لمدة سنة كاملة .. على العكس تماما .. نوعية رديئة جدا .. وأعطاله كثير وخرب معي ما كمل السنة مع العلم أن عليه ضمان سنة ..

[ابوصالح77]

( الموضوع صار له ثلاث سنوات )!!
لكن على العموم..
البرايت لايت كشاف ممتاز وعملي وجربته من أكثر من سنتين
جزاه الله خير راعي الموضوع
فعلا ممتاز وميزته يجي مقاسات كثيرة وعذروبه ما معه شاحن سيارة

[ابو فص فص]

هذه النوعية ممتازة مع ان صناعته صيني لكن شركة المانية

والان طلع نوعيات بلس تعطي اضاءه قوية جد

وفيه احجام ومقاسات مناسبة

لكن لو يطلعون معه شاحن على السيارة كان لا تتعداه