كم مرة رميت حبارى؟؟ أدخل وشارك

[المري]

السلام عليكم ورحمة الله وبركاته... وبعد

اخواني الاعزاء حبـيــت أطرح هذا الموضوع من باب السوالف في رحلات المقانيص , وفي هذه المشاركه

حبيت اطرح موضوع (( كم حبارى رميتها ايها الصقار)) وهي بالتاكيد قد مرت على كل صقار وكل قانص

بس احد كثير واحد قليل رمية للحبارى فالبنسة لي مرة واحده وماهو أنا اللي راميها راميها خوينا اللي

معنا... واليكم القصة...


كنت ادرس في المرحلة المتوسطه وكنت متولع بالصيد الى حد الجنون وكان عندي تركية , وحر للوالد

أطال الله بعمره على طاعته , وكان معي في المدرسه زميل لي فقلت له : ويش رأيك نطلع من المدرسه

نروح للمحل الفلاني ندوج فيه اشوي ونرجع نكمل الدراسه قال: توكل على الله, ويوم رحنا على الزفلت

وفرقنا منه الى المكان المنشود وبعد اربعة كيلو قال خوي: ارجع تراني شفت جرة بس ماأدري ويش هي؟؟

ويوم رجعت فأذا هي جرة حبارى جديد نقصه يمكن ربع كيلو واذا هي شوف العين يوم قامت ونرجع منها

وعلى طول للديرة ويش الحل قال رح للبيت اخذ طيورك ونمشي لها رحنا ولقينا الوالد وواحد من الربع

ويوم شافنى زعل علي علشان المدرسه بس قلت له علىطول: ابشرو بالحبارى شوف العين , المهم اخذنا

قرناس الوالد والتركية , ورحنا ويوم جينا حروتها واذا هي درج قدام الموتر نأخذ برقع الطير وكان موسه توه

مناصف وهي ماكان يهد الين يصك ريشه, المهم ماهد عليه بعدين برقعناه واخذت التركية وطيرت الحبارى لها

وطارت على ساقتها بس ماهي بعجله المهم الحبارى تطير وتوقع والطيره ماعاد هي بصوبها المهم جودنا

الطيره وقامت الحبارى اخمرت , قام خوينا وطلع الخرازه قال ابوي : شف عساك تجنحها (( يعنى ترميها في

الجناح)) علشان نعلم التركيه رمى خوينا وماشاء الله عليه بدل الجناح جات في الثنداه...وماتت على طول


وبعدها ماجاء لها لذه مثل صيد الطير بعد نزلنا عليها بس والله حزنت ذاك اليوم !!


هذا قصتى مع رمي الحبارى


وفي انتظار مشاركاتكم....


اخوكم / المري

[الفهد]

الغالى المشرف المحترم
اولآ احب ابدى اعجابى بتوقيعك واقول امين امين
والثانية حبيت اشرك معاك بالموضوع الحلو اللى تشكر علية
انا رميت حبارى كثيرة بس صعبة اتذكر العدد
واللى ماتنسى.....
مرة طالعين ومعانا طير مهو جاهز باول الموسم ولقينا جرت حبارى و الطير ماهد عليها مهو جاهز عدل واللة واندق على الربع سيارتين وجاء بعدهم حوالى سبع سيارات مانعرفهم
المهم قلنا لهم ترا عندنا حبارى ونبى نهد وماقصرو
هدينا طير طيب طيب حيل مال واحد من الربع وكان علينا شويت حر لحقها وقام يرددها كذا مرة
ولا الحبارى كل مالها وترتفع و ةتوجة للكسارات(الدراكيل) ومرتفعة والطير ماهو قريب لها اشوى قاصتة واللة الشباب كلن راح يلوح للطير لايضيع لآن الكسارة كبيرة والطير مايبى الملواح ولا الحمامة واللة كان انسوق عليها وارميها اول افشقة ولاهمتها والثانية يوم الريش طاح منها والثالثة ولا جاية يابسة والسيارات خابرهن تسع مدرى عشر ولا اكثر من ستعش سيارة
وهذى من حوالى اربع سنين وللحين اذكرها عدل

[ميراج]

الاخ المرى حياك الله
الله يعطيك العافيه موضوع ممتاز

انافى سنه من السنين كنت قانص على الحد العرقى وكانت سنة ربيع وخير وذيك السنه كان فيه حبارى

اللى شفت انا بعينى فى اجازة عيد الفطر 19 حبارى .

اللى صار فى هاك الصباح المبارك لقيت جرت حبارى توها جديده ونقعد نقطع لها ونقصه ولا يوم تلنى طيرى وهديته وكان طير طيب أسمه ميراج وذيك السنه الطيور اللى مايروح عليها شى تروح عليها الحبارى سبق
بعد ماهديت وارفع نضرى ولا الحبارى يوم شلعت من اقصى الروض مسافة 300 متر ورتفعت بسرعه والطير
قضب الارض واطلب لها ولا نشوف هاك الجيب يبرا لنا من احد دول الخليج يوم تعدى طيرنا وكان يسوق بسرعه جنونيه وهو يهد طيره طيرى يوم شاف الطير ارتفع مع الحبارى وبسرعه تعدى طير الخليجى وواصل طرد الحبارى قال اخويى اللى يسوق ترى ورانا سيارت وهدو طيور ثلاث طيور غير اللى هدو الاول ولاكن فيها
واحد سبوق تعدى طيورهم كلها واطلب للحبارى طيرى وصل الحبارى وردها وصقرها بدت تنزل تبى الارض
قال اخويى ترى الطير اللى اطلب طيرنا تفريخ انتبه لميراج اخويى ساق بين السما والارض يوم جينا تحت الحبارى وخطفها الطير واخطاها وامد الشوزل ورميها وهى تطيح كسير ويفرمل اخويى عليه وانا احول بسرعه
وشيلها هى وكحيلان ميراج وحطه هو والحبارى فى مرتبت ورى اخويى كان منفعل مره نزل والطير التفريخ
كاتف على الطير والحبارى انا يوم شلت الطير خليت قفاى جهت الطير اللى جاينا يوم قرب الطير للرض شاته خويى برجله وطاح الطير على قفاه وقفت السيارات قبلنا 100 متر وصارو يلوحون لطيورهم ومنعت رفيقى
ما يجيهم ولا ينشب معهم وطيرهم اللى شاته اخويى ما اضن انه بيهد غير مهد مشينا والطير على الارض والله ماجانا منهم احد هذى الحبارى رميتها ووحده ثانيه رميتها لها قصه بعدين ان كان ودكم ادرجتها بكره0
وسلامتكم واسف على الاطاله

[al-nashmi]

اخونا المري شكر ا لك على المشاركه وقصه الحبارى المسكينه؟؟؟؟؟؟ ليش لان صيدها في البندق انا ارى
انه طريقه غير مناسبه وفيه نوع من الاهانه لها.....ياخي اذا معك طير فكه عليها وهي وشطارتها اما فكت عمرها ولا صادها الطير . وهذه قمه المتعه ونشوه الفرح للصقار وطيره.

انا ماني راعي طيور ولاكن استانس وافرح وانبسط واسفهل يوم الشوف الطير يصارع الحبارى وتصارعه ومره يتعلى عليها ومره تعلى عليه......شئ مايوصف ويعرفونه ويحسونه اهل الطيور والولع....

مره كنت طالع ومعي واحد من الشباب وحصلنا جره حبارى الكلام هذا قبل غياب الشمس بنص اساعه تقريبا

وقصينا الجره وغابت الشمس ماحصلناها ومن بكر الصباح كملنا البحث والقيناه مخمره ويطمر خويي يبي
يرميها بالبندق وحلف عليه ان يتركها ويالله يطيع يخليها... وأخذ ريشه الجهاز ونادي على اقرب راعي طير

وكلها نص ساعه ويجونا اهل الطيور واول واحد جانا علمناه مكانها ونروح معه ونضيعها ويفكون الطير ولحظات الا هي في السما هي وياه اهل الطيور الثانين ما فكوا طيورهم قعدوا يتفرجون....

وتعال شوف الطردي ساعه بالسماء وساعه بالارض ونا في مكان مرتفع ومبسوط.... اجل وشلون شعور راعي الطير ذيك اللحظات!!!!!!!!!!!!!!!


صادها الطير .........وحنا مشينا من عندنا ولا جيناهم خوفا من راعي الطير يقول خوذوها.



هذا رائ وتقبلوا تحيات اخوكم/ النشمي

[تالي الاولين*]

.


والله يالمري ولا يهونون الربع

اني للأسف رميتها واجد وهالكلام قبل لاصير راعي طير

واتعلق بالطيور ..

ولاكنت ادورها .. القاها صدفه وامد عليها السلاح بكل برود

الى ان طلع معي واحد من الجماعة ولقينها صدفه انا وياه وجيت برميها

ونشبلي قال خلها وخليتها عشان الرجال .. ودخلنا الديره لواحد من ربعة

صقار وطلع معنا الرجال بطيره ولقيناها ثانيه .. وهد عليها وطرحها

وكانت هذي اول حبارى اعتبر نفسي صايدها على سنع وحسيت بلذت

صيدها .. من عقبها تعلقت بالطير وشريت اول طير انقله وهو

وكري .. طبعاً هالكلام ماهوب قديم مره .. يعني من ست سنوات او

سبع .. يعني لازلت طالب في مدرسة الصقاقير .. وعندي هالحين

الطيور الى تنومس من يقنيها ولله الحمد .. وعرفت ان الحبارى مالها

الى الطير .. او خلها في حالها ..


يعطيك العافيه يالمري وانا اخوك

على هالموضوع المتميز


.

[عبدالعزيز الدباسي]

ما شاء الله اثر الربع مجتمعين بخيمة المري وانا ادور عليهم .

الحقيقة انا استانس وانبسط (( واتشقق )) اذا شفت الطير وهو يهد على الحبارى ، واستمتع بالحركات البهلوانية للطير في هدته على الحبارى ، حتى وان كنت اشوفها بالتلفزيون
انا ماني راعي طير ولا حاولت اني اقتنيه ، لاني عارف اني اقل بكثير من يعطيه الاهتمام اللازم ، وان اعطيه حقه من الرعايه . وايضا كثرة المشاغيل والارتباطات تجعل من الصعب على الواحد الاهتمام بالطير ، وانا من هواة الصيد بالبندق ،

لكن لم يسبق لي وان تطاولت على الحبارى بالرمي :good:

والحقيقة اني اغبطكم على هذه الهواية الجميلة ، والمحببة على النفس .

ومشكورين جدا على اعطائنا سواليفكم ايام الصيد ،،،

واللي حز في خاطري اللي سووه بعض الصقاقير مع اخونا ميراج ، اعقتد انها ليست من شيم الصقاقير وليست من اخلاقهم في شى .

[تواق]

ميراج انت متاكد انهم صقاره اهل طيور؟
انت متاكد انهم رياجيل يفهمون علوم الرجال قبل الصقاره؟
يشفونك هاد طيرك ويهدون كيف هاذي وثلاث طيور بعد العالم وش جاه
ياناس القنوص انسعرو ولا فيه خلالا وش القصه فهموني
ميراج بيض الله وجه خويك لاكن الطير مايستاهل لاكن هذي رساله موجه لراعيه

اخوكم تواق

[اعقاب]

اخوي المري
مدري كم العدد
لكن كنت وقتها مالي ومال الطير
اما الان فاراه من الصعب رميها
والسبب الطير

[جرناس]

عن نفسي ما قد شفت حباره كلش
بس ان رزقني الله فيها برميها ولاني مشاور ابد

[اعقاب]

اخوي جرناس
اكيد انت راعي بندق
صحيح ولا لا

[الفهد]

الاخ قرناس المحترم
واللة لما قريت ردك مت من الضحك
اللة يعزك ويسلمك ورح ارم من الحبارى قوم واقعدة ولا تشاور
فالك الصيد وعساك سالم

[المري]

مرحبا بالاخوان جميعا وماقصرتو كفيتو ووفيتو بس اريد القرناس المهاجر وأبو فيصل

وباقي الربع اشوف اسماءهم ما اندرجت في هذا الموضوع


في انتظار المزيد من القصص......


اخوكم / المري

[ابو سلطان العتيبي]

أخي المري
اخواني اعضاء المنتدى السلام عليكم ورحمة الله وبركاته

احييكم جميعا وآسف على هذا الأنقطاع الطويل وذلك بسبب طبيعة عملي وعدم دعم اللغة العربية للحاسب الالي الخاص بي، ولكن كنت معكم شبه يومي في تصفح المنتدى.

أخي المري كيف أحوالك وشلون الطيور عساها جاهزه ترى اول العبور من جهتكم والله يوفقكم وجميع الصقارين.

حبيت اشاركم في هذا الموضوع بسبب قصة حصلت لي منذ 20 سنة لم ولن انساها ابدا.

كان عندنا طير حر أشقر طلع ولا هو سبوق وتلاب لكن ماتروح عليه الحبارى بسبب طلعه البعيد وشطارة مسكه لها وان طارت ارتفع ارتفاع شاهق وخلاها على جنب كانه مايبيها وطياره بارد
لين توقع الحبارى تحسبه ماراح يجيها وهو عينه لها ثم يحول عليها ولايضيع محلها.

وفي يوم من الايام كنا قانصين ومعنا شاهين فرخ نبي لها علمه وكان معنا واحد عينه حاره طلب خوتنا ولاقدرنا نقول له لا، لقينا أثر حبارى جديد ونطلع بالطير يوم انه طلع قال اللي معانا والله اللي ليقيتوا العلمه والعشا، عرفنا انه راح يصير شيى وفعلا بعد ماراح الطير للحبارى مرها وخلاها وطيرناها له واذا الطير يوم جاه بلى كانه مرّوع ونلحقه ونقط الحمامه المهم ماطول عليكم ضاع الطير. ونقعد يومنا كله ندور الطير دون فائده ولقينا قنوص وعلمناهم القصة وطلبنا يهدون على الحبارى طيار كود يجي على الهدد وهدوا عليها ورددها الطير وراحت عليه.
المهم بعد ماراحوا منا القنوص وفي المساء واثناء دوارتنا طار منا أربع حباري ويوقعن في الجو اللي تحتنا وش السوات الشاهين مانقدر نهدها كذا وعلى أربع. والله ونحوم الشاهين ثم نمسكها ونروح على جهتهن على نصيد اللي نصيد وأمل تصويب بعضهن.
أثر الحباري اول ماوقعن درجن جاي على صدر الجو القريب منا بدل مايهربن مقفيات.
وطحنا في وسطهن وحنا على امل نلقاها في الصدر المقابل البعيد ويتكافخن الا وحده رميتها مخمر ومن الحره حطيت الشوزن في وسطها وكانت الشمس قد غابت.
وراحن الثلاث لكن الطير لقيناه بعد أسبوع ممسوك عند ناس ومن عقبها ماصاد عندنا لين بعناه وصاد عند اللي شراه.
أني آسف على الاطاله لكن كما ترون ان القصه مترابطه أحداثها.

وشكرا لكم جميعا

أخوكم عــقـاب

[المري]

مرحبا ومسهلا بعقاب وحياك الله


ومن طول الغيبات جاب الغنايم


الحمد لله على السلامه وتسلم على هذه القصه القديمه واثاريك ماأنت بصغير


قبل عشرين سنة وانت تطرد الحباري!!!!!!!


سلم لي على راعي الاباكير وعسى ريشها اكتمل ترى بدت المذاكر....


تسلم اخوي اعقاب وفي انتظار المزيد


اخوك / المري

[اعقاب]

الله يبقيك ومن يقرا على طاعته ويميتنا على الاسلام
ماني بكبير بس اسولف على الربع بعلومي قبل 30 سنه
الطيور جاهزه
الله يجمعنا على معزه وطاعه

[ابو سلطان العتيبي]

الرسالة الأصلية كتبت بواسطة اعقاب
الله يبقيك ومن يقرا على طاعته ويميتنا على الاسلام
ماني بكبير بس اسولف على الربع بعلومي قبل 30 سنه
الطيور جاهزه
الله يجمعنا على معزه وطاعه



السلام عليكم ورحمة الله وبركاته

أعتقد ان هناك لبس.......!!!!!

أخوكم عـــقــاب (oqab)

[المري]

مرحبا اخوي Oqab وماحصل الا الخير , السالفه ان فيه اخونا اعقاب توه مسجل


معنا ونتشرف به وباللي مثله وسجل اسمه اعقاب بالعربي وانت اعقاب بالانجليزي..


فمرحبا بعقاب الاول ومرحبا بعقاب الثاني....



اخوكم / المري

[اعقاب]

الله يبقي الجميع على الطاعه

تحياتي لكم جميعا

[الرماي]

الله يوفقك بذيك الوكريه
لو انك تبي بالكويت في موجوده وبسعار معقول
مثل اذا كانت مدربه حوالي 75 دينار ويمكن تحصل اقل بعد
واذا تبي من الكويت بلغني وانا حاضر

[المري]

مرحبا اخوي الرماي والظاهر انك غلطان بالعنوان لان الموضوع هذا : كم مرة رميت

حبارى؟؟؟ وانت كاتب رد على موضوع: من خبر لي وكريه للبيع...


ماحصل الا الخير ومرحبا بك اخوي الرماي...


اخوك / المري

[مثالي نجد]

السلام عليكم ورحمة الله وبركاته.... والله يا جماعة الخير أن سواليفكم جزله ومجلسكم ما يمل منه.. انا والله ماني راعي طيور لكن شوفة الطير وشكله يوسع الصدر واسفهل والله لين شفت الهدد وهالعلوم...والظاهر اني بصير مستمع لين اتعلم منكم .. وبيض الله وجيهكم على هالسوالف.

[نايف الخالدي]

السلام عليكم ورحمة الله وبركاته....
مشكور يالمري على مثل هالمواضيع وعلى طاري الرمي الحمدلله ماقد رميت ولاشفت
احد يرميها بس صارت سالفه لواحد من الربع كان يقص حبارى الى هاذا الي لاقط جرتها قبله
واحد من احد دول الخليج راح للرجال قاله عندك طير قال الرجال ايه عندي طير صايد قال اجل باتفرج قاموا يقصون الحبارى
الى هاذا هي درج ويقوم الرجال ويحذف الطير ويطلع البندق ويرميها وهي تتكبر ويجيه الطير ويوقع عليها ويقوم خوينا ويروحله
ويقوله لواني داري انك جايع كان شريتلك كرتون دجاج (من القهر) المشكله انك تشتريلك طيور بقيمه وقدرها ويجي واحد ببساطه ويرميها ..... واسف على الا طاله ومشكور يالمري
اخوك الصغير/نايف الخالدي

[رضوان]

السلام عليكم
الله يسامحنا والواحد يتعلم من الغلط متعه ومفيش حد ما يغلط لكن السالفه الا تخصنى انى فى وحده من رحلات القنص وكانت بظبط فى سنة 2003انه كان جاينى قروب من الامارت وكا نوا جايبين ظيور مشاء الله عليها
الطير الى تهده على حبارى يجيبها واذكر فى يوم قنصنا 20 والله مانا مصدقين اكن الحمدلله بس بعد ما رجعنا
خدينا الحبارى وحطينها على بعض اخدنا ما كلينا والباقى قعد على بعضه محطوط فى خيمة التموين حوالى 4 ايام نين عمل ريحه مش كويسه وهى كانت نسوه وجلا مالا ينساء والله حسيت بذنب كبير جدا لى هذه النسوه
وان شاء الله يسامحنى والواحد يتعلم من الا يحصل امعاه والسلام عليكم

[البحارى]

السلام عليكم والله احنا فى المقناص لما نخرج للقنص انلاقو اكتير من الحباره بس احنا مانمسك الا تلاته او اربعه لحفاظ على الحباره من الانقراظ واكتر الاحيا ن ماسكنا فى فيها كانت فى 2002عندنا جماعه من الخليج من قطر اتيين بطيورهن وكانت اكتريتهن جير شاهين مجرد ما يطلع من السياره رايح على الحباره مايرجع الابيها والله يحفضهن وكانت حصيلتنا فى الاسبوع على ماعتقد32 طير احباره ومشكورررين

[أبو فيصل]

السلام عليكم ورحمة الله وبركاته....
مشكور يالمري على المواضيع الزينه

[Abunaif]

يعطيكم العافية صحيح الموضوع جميل بس اعتقد انكم ما انتبهتو للتاريخ يا (مثالي نجد ـ نايف الخالدي ـ رضوان ـ البحاري ) اخر مشاركه في الموضوع سنة 2003 :))))

[رضوان]

السلام عليكم
والله انا قرية التاريخ قبل ما ارد والموضوع عجبنى وحسب ظنى مفيش مانع من الرد حتى اذا كان الموضوع
قديم ومشكور اخوى على التنبيه

[عاصفة نجد]

شوفو قصتي هذا العام اللي مضى طلعت أنا وربعي للقنص المهم أنا بصراحه ماأحب الطيور من كثر مشاكلها وماعندي وقت أراعيها وأتابعها وهذا اللي خلاني أحب عطيت الله الشوزن ولاتهون عاصفة نجد ( الخرازه )

المهم القصه تجيكم كنا برمضان ولنا حول يومين ندورعلى الفاضي بسيارتين أنا طبعاً الحمدالله مسلي نفسي بالقمري وخويي راعي الطير مغير يسولف هو وطيره مالقا شي اليوم الثاني من حرمافيه الله يجزاه خير أرتفع الضغط عندهه يدور وما حصل شي قام وأفطر الله يهديه
قال يالله بس خل نرجع لديره قلت أوكيه أنا أبتقنص قدام قال طيب وانا أبهد الطير على هالحمام ماأبيه يرجع وهو ماهد على شي
المهم رحت وهد طيره واكل من الحمام وراسلني وينك فيه قلت فالمكان الفلاني يالله أنا جايك وشوي 15 دقيقه وهو يراسلني الحق على
خير عسى ماشر بسرعه تعال أيوه وشفيه تعال وبس .
أنا قلت الرجال فيه شي الله يستر جيت يمه ألا وهو يكبس لي ويجي يمي وقولي طلع الشوزن ليه المهم ركبت معاه وش السالف أبو فلان قال لقيت حبارى وطيري ماهد عليها لني توني موكله حمامه
ظحكة عليه وقلت هذي ام خمس مشبعها من أمس وما ترد اللحم ترومي بادنات لمس
المهم رحنا وشفت الحبارى وتمنظرت فيها شوي وسميت بأسم الله ورجتها والحمدالله ماثنيتها
شفتو الفرق بين الطير والسلاح
بس على العموم الدعوه على العشق والهوايه
والمهاره موفي راعي الطير نفسه لا في طيره اذا كان طيب او لاء
أما السلاح المهاره في راعيه
وعلى العموم الله الرازق

[عاصفة نجد]

قديمك نديمك حتى ولو الجديد أغناك
ومثل هذا الموضوع ماله تاريخ ينتهي فيه
لانه موضوع شيق وفيه الواحد يتكلم على المواقف اللي حصلت معاه المفروض يقام تثبيت لمثل هذا الموضوع

[صياد ليبيا]

بالنسبة لعدد رمى الحبارى اظن انه اكثر من شعر راسى يعنى احنا ما نهد الطير الا والسلاح جاهز لسببين مهمين اولا:

لان الحبارى موجودة بكثرة عندنا ومن النادر انك تلقى طير لوحده يعنى ان ممكن تهد طيرك على محاس((جول))
يصل للعشرين والثلاثين طير واحيانا اكثر وتكون مجموعة الصيد كبيرة يعنى بدل ما تاخذ طير واحد من الجول تاخذ ستة او سبعة على حسب عدد المجموعة يعنى انت وضميرك والسبب الثانى احيانا ندخل لللاراضى الوعرة واتكون مجبر انك ترمى الحبارى قدام الطير حتى لا يضيع ذلك طبعا فى عدم وجود جهاز تتبع فى الطير المهم انا عن نفسى اقول
انا رميت الحبارى على ارتفاعات عالية وفيها شعور غير عادى طبعا مش كيف الهدد ولكن للضرورة احكام وفى موقف دايما يحصل معانا انه نهد طيرنا وتلاقى الجول كله مخمر فى جنب السيارة والله منظره حاجة لايمكن وصفها ولما يكون معاك السلاح وتكون جيد فى الرماية ممكن توقع منه اعداد كبيرة فى بعض الاحيان ناخذ من الجول من ستة الى عشر طيور وبعدين نرجع الخيمة ونكتفى بالصيد اهم حاجة فى الموضوع القناعة وتاخذ على قد ما تاكل انت وطيرك بس مش اكثر....
((صياد ليبيا))