................ الفزعه يا الرجاجيل.......................

[ابو هلال2008]

:confused: لو سمحتم ابغاء عزبه بر تكفي 8اشخص بارحه :confused:

القيمه


الجوده


تحياتي

[ناصرالربيعان]

انت باي بلد عشان نقووول لك

إذا بالرياض او القصيم بس انت قوووووول

[NissaN 1990]

يا أخي الفاضل أبو هلال2008 أسعد الله مساءك بكل خير بخصوص العزبه يا أخي الفاضل ما أنصحك بأنك تشتري الجاهزه لأن العزبه ما هي مثل الفراش حق النوم أو الخيمه أو الرواق أو أغلب أغراض البر....
العزبه يا أخي الفاضل أنا أنصحك بأنك تاخذلك صندوق فاضي سواء كان من الحديد أو الخشب أو البلاستيك وأفضل هذي الأنواع الثلاثه البلاستيك لأنه خفيف وقوي ورح فصل عليه أطلق قماش بالسوق مع المخابي والسحابات ما يكلفك كله إذا طارت وبالغ راعي المحل بياخذ عليك 50 ريال
وبعدين رح لقط الأغراض مثل القدور الأباريق والصحون من محلات الأواني المنزليه ماتكلفك 200 ريال وخذلك من محلات أبو ريالين علب فارغه حقت البهارات والرز والقهوه والشاهي وإلخ......
أو خل حق الخيام يفصلك بعد حق المعاميل اللي تكلمنا عنها أتمنى أني أفدتك ولا طولت عليك وللمعلومية هذي أوفر من الجاهزه بكثير والجاهزه لازم تضيف عليها مستحيل تلقى شي كامل من غير ما تضيف عليها وسعرها ماراح يقل عن 500 ريال أما عن الدافور رح للحراج وخذلك واحد نضيف ورخيص هذا رايي وكل واحد له وجهة نظره أنا أتكلم من واقع تجربه
أما عن الجودة فهذي ما راح تلقى أفضل من جودتها وأقل من سعرها

[إعصار]

هلا وغلا ..

الحذر ثم الحذر تأخذ عزبة جــاهزة لازم انت تجمعها ..


أسمع ياخوي مع ان طلبك غير محدد .. يعني عزبة قهوة وشاهي .. ولا طبخ .. ولا جميع طبخ وشاهي وقهوة ..


ـــــــــــــــــــ


نصيحتي لك جمع عزبة طبخ لحالها .. وعزبة القهوة لحالها ..


كلامي هنا عن عزبة الطبخ ..:


_ بخصوص الشنطة (العزبة ) خذ صندوق أو شبك ولبسة قماش تنزاني .. واذا تبى تريح بالك خذ شنطة جاهزة بس تكون فاضية عشان ترتاح من غثاء التفصيل .. عندك شنطة السنيدي زينة .. تلقاها عند برق الحيا الدائري الشرقي مخرج 15 .. وبلتقى عندهم كل شي للبر يعني يمديك تكمل العزبة من الى عندهم بس الله يعينك على السعر ..



_ بخصوص الدافور عندك بريموس السويدي ولا الهندي .. ولا الايطالي ارخص ..


_ القدر عندك السيف دام العزبة لـ 8 رجاجيل يكفيك 9لتر تلقاه حول 90 ريال ..ولا خذ لك الايطالي سب بس غالي مرررررة سب 350 ريال ...



_ والباقي من محلات الاواني المنزلية .. صحون .. ملاعق .. سكاكين .. قلاية .. غضار .. كيسان .. سمط بلاستيك .. صحون بلاستيك .. ملاس .. الخ ...



تفضل الرابط بيفيدك بأذن الله تعالى ..
http://www.mekshat.com/vb/showthread.php?t=72495 (http://www.mekshat.com/vb/showthread.php?t=72495)


...



نتظر باقي الشباب يفيدونك بأذن الله ..:)

[العودالازرق]

أخي في الغرابي تلقاها مثر الجراد المنتشر أو في محطات الخطوط السريعة
اسعارها متفاوته

[هدد ؟؟؟]

انصحك بما في الرابط اللي بالمشاركه رقم 4 وبالنسبة للشنطه حقت العزبة لازم تكون من شراع تنزاني 303(لأنه ضد الماء وقوي).
وافصل عزبة الطبخ عن عزبة القهوه والشاهي . عشان لاصارت الطلعه خفيفه ما تضطر تاخذ كل العزبه.
وأغراض الشوي مع عزبة الطبخ في شنطة مستقله عشان لاصارت الطلعه شوي ماتاخذ كل العزبه أيضاً .
وأنصحك بمحل البريه ترا راعي الحلال بالمحل وتراه نصوح وشغله زين .إذا بغيت وصفه أبشر.

[هدد ؟؟؟]

http://www.mekshat.com/vb/showthread.php?s=&threadid=4080
http://www.mekshat.com/vb/showthread.php?s=&threadid=23027

[NuMaS]

أهـلـين أخـوي

رأيي من رأي الشـباب أحـذ تأخـذ عـزبـة جـاهـزة أبـد

خـذ صـندوق على مزاج وإشـتر أغـراضك من المحلات

وأحياناً الواحد يلقى أغـراض في بيته زايــده يحطها بالعزبة

تقـبـلـوا مـروري و تحــيـاتي ،،،

ســبحانك أللهم لا إلـه إلا أنت أســتغفرك وأتـوب إلـيــك ،،،

[ابو هلال2008]

السلام عليكم ورحمه الله وبركاته

مشكورين على الردود الجميله

ولكم خالص تحياتي