عندما يتركك اصدقاؤوك وحيدا في البر بحجة ان معك سيارتك الخاصة!! [الأرشيف]

مشاهدة النسخة كاملة : عندما يتركك اصدقاؤوك وحيدا في البر بحجة ان معك سيارتك الخاصة!!

الرسن

28/12/2007, 10:58 PM

هذا ماحصل لواحد من الشباب ربعي طالع مع زملاءه للبر وتحديدا جهة النفود الكبير
كان متواعد مع اصحابه على احداثية معينة في ثالث ايام عيد الأضحى في النفود الكبير عند عرق المظهور على ماظن هم سبقوه بسيارتهم وقال عندي التزام في مناسبة وانا اجيكم في المكان والاحداثية المعينة وما كان معه للأسف جهاز ايكوم
المهم خلص صاحبنا التزامه الاجتماعي ومسك الخط باتجاه ربعه في النفود ووصل لهم حسب الوقت المحدد وعلى الاحداثية المحدده وكان ذلك ليلا فحدالله على السلامة وهنأوه بالسلامة وبات معهم ليلته على ضو ونار الغضى والارطى ووسعو الصدر واصبحو وتمشو في النفود ساعة هنا وساعات هناك غيرو الجو وتعدل مزاجهم بالرغم من البرد وكان الاتفاق بينهم انهم يقعدون ثلاث ايام بعد وصول صاحبنا لهم الا انهم اختصروها الى يوم ونصف اي ليلة ويوم كامل دون الممسى الا انهم امسو في طريق العودة بين حائل والقصيم في احد الشعبان مما اربك البرنامج الخاص بصاحبنا وجعله يضرب اخماسا بأسداس طيب ليش وش المبرر قالو ملينا شبعنا نفود وطعوس طيب ياجماعة كان اتفاقنا ثلاث ايام بعد وصولي قال لنا يوم ونصف والآن لنا يوم ثالث صعبه نطول اكثر من كذا ياجماعه انا لوحدي وانتم ثلاثه يجي منكم واحد معي والله يسهل عليكم قالوا بصوت واحد لا يعني لا اعذرنا جينا مع بعض نرجع مع بعض وانت جاي على سيارتك دبر عمرك الدنيا ماهي خلية.
السؤال وش السوات مع اصحاب التوهيقة ذولي اللي ضارب لهم الرجال 500كيلو عشان يجلس معهم وجايب الخير كله معه الماء واللحم وجميع مستلزمات البر وحاجاته مع ان الرجال خفيف نفس وتنشرى مخوته الا ان الشباب غيرو رايهم فجأه دون سبب واضح وحتى الان رفيقنا مصدوم من حركتهم ومو مصدق اللي صاير مع العلم بأنهم يعتبرون ماحصل امر طبيعي وكأن ماصار شيء.

انتظر اراؤكم ومرئياتكم عن مثل هذا الموقف او حتى مواقف مماثلة فالتجارب مدارس حية يستفيد منها الجميع

تحياتي ومعالسلامة

راعيية

28/12/2007, 11:42 PM

واللة المشكلة صحيح اللة يعوضك .

مشعل العيسى

29/12/2007, 12:08 AM

الظافر

29/12/2007, 03:27 AM

خويك ما قصر وبيض الله جهه ومعليش الدنيا دروس والانسان عليه ان يعرف اخوياه وهذي فرصه له هو حتي يعرفهم زين .

هوى الشرق

29/12/2007, 10:25 AM

كثير تحصل لكن وش تسوي تقعدهم غصب !!
على ما قال خوينا الدنيا دروس ، اختار الصديق المناسب
يا الله انا جاهز يأي وقت تبي اخوك هوى الشـــــرق

Khalid AlGhamdi

29/12/2007, 10:38 AM

سليمان911

29/12/2007, 10:39 AM

اسوي طلعه ثانيه واقولهم يجون
واتفق معهم نقعد 3 ايام اذا وصلو اخوياه
يقعد معهم 5 ساعات ولا 8 ساعات ويعود
طبعن لازم المكان يكون بعييييد علشان يعرفون ويحسون بطعم السحبه

ابو_هيا

29/12/2007, 10:50 AM

اخوي يمكن اللي أثر على اخوياه شدة البرد لأن اعتقد البرد الشديد دخل ثاني ايام العيد وهو اللي خرب عليهم البرنامج

انا كنت في التنهات ثالث ايام العيد مع ان التنهات اقرب من مكانكم الا ان البرد كان فيها شدييييييييييد جدا والمشكله الشباب اللي معي ماكانوا عاملين حسابهم في الحطب والملابس

الرسن

29/12/2007, 03:37 PM

واللة المشكلة صحيح اللة يعوضك .

شكرا على التعليق ياراعيية

الرسن

29/12/2007, 03:40 PM

والله اذا كان الكلام صحيح فالتصرف غريب جداً ... والمفروض من رفيقك انه يوم شاف الشباب معزمين على المشي انه مشى معهم وبلعها ... وبعدين تفاهم معهم ...

عموما... رفيقك رايته بيضاء ..

اخي الغالي : الرسن ...

كما اعمار الشباب اللي كاشتين ؟

غيثة
شكرا.. طبعا هو مشى معهم وش تبيه يقعد في النفود لوحده طبعا ذي صعبه.
اعمار الشباب اصغرهم 35سنة يعني شيبان يعني تعدو مرحلة المراهقة.
ولي ملاحظة ياغيثة تشوفها في نصك المقتبس باللون الاحمر اتمنى ان نتجاوز مثل هذا.
معالسلامة

راس الرعيلة

29/12/2007, 04:00 PM

يا رجال وسع صدرك

والله قد ضربت مشوار( 1100) كم
ألف ومأئة كيلو

مشواااااااااااااااااار ولا معي إلا شخص واحد فقط في الطريق

والباقين نتقابل معهم هناك

مدة الرحلة المتفق عليها أربعة أيام

ما أمدانا نشم الهوا يومين إلا الباقين يقولون مشينا خلاص (ملو نفس حالة رفيقك)

المهم يا رجال بلعتها و حاولت أتناسها

لكن زي ما قال ابو معاذ:

إذا جاك تصرف غريب من أحد أخوياك حاول تدور له عذر

_ _ _ _
مشكور على الموضوع

مشعل العيسى

29/12/2007, 04:13 PM

غيثة
شكرا.. طبعا هو مشى معهم وش تبيه يقعد في النفود لوحده طبعا ذي صعبه.
اعمار الشباب اصغرهم 35سنة يعني شيبان يعني تعدو مرحلة المراهقة.
ولي ملاحظة ياغيثة تشوفها في نصك المقتبس باللون الاحمر اتمنى ان نتجاوز مثل هذا.
معالسلامة

اخوي الرسن ... انا يوم كتبت ان كان كلامك صحيح ... انا ما اكذبك والله وحاشاك والرجاجيل شرواك ما يكذبون... وان شاء الله انا متجاوزين مثل هذا ولا تفهمني غلط ... لكن اقصد انا كان هذا حاصل ... وانا اخوك ودك تقابل الشباب كلهم وتأخذ منهم كلهم لان ممكن فيه شي زيادة ماذكر ... لان ممكن فيه سبب ما ذكر .... وودك وانا اخوك ان الواحد يلتمس لاخوانه العذر ...

عموماً .. اخوي الرسن .. كان جاء في خاطرك شي ...ابشر بالحق وما يلحق ...

الفتكي

29/12/2007, 10:29 PM

السلام عليكم
كل عام وانتم بخير
شوف اخوي الرسن انا اتوقع كلامك فيه لغز صح والا نفود المظهور غرب قبه وليس في النفود الكبير

أطخم واحد

29/12/2007, 10:44 PM

أكيد الشباب ملوا من القعده

ودايم اللي يلحق الكشته عقب يومين ثلاثه تصير معه هالسوالف

لأن النفس تمل سبحان الله

بس المفروض منهم انهم غيروا المكان

أقل شي علشان خويهم اللي لحقهم

والله مهيب زينه في حقهم

القصبي

30/12/2007, 01:55 AM

هلا بخوي الرسن والله شغلهم غلط
بس ترى الدعوى مشاكل وفية اسباب واشياء
شكل راعي السالفة انت صح هههههه المهم
ابقول لك اللي انا اشوفها ومن وجه نظري واعتقد بدون زعل لان الموضوع انت حاطة للمناقشة اولا
1- لية ماراح خويك اللي حاصلة لة السالفة معهم او لية هم ماانتظروة الين يخلص من المناسبة ثم يجي معهم كلها انتظار يوم وترى العطلة طويلة الرجل مسكين ماسك 500 كيلو وبلحالة انواع الخوف والقلق وفي الاخير تجازونة بالرجعة للرياض لة كذا
2- اذا انتم مالين من النفود اقل شي غير المكان يمكن تستاسع صدوركم اولا؟؟
3- لية ماراح خويك معهم احسن من الجلوس لوحدة لو اني قاطع 1000 كيلو والله برجع معهم
4- اذا رجعت للرياض وخلصت من النفود انتبة تقطع علاقتك بربعك ولو انك تكرهم نصيحة لوجة الله لاتقطع علاقتك مع ربعك يمكن يجي يوم ويصير مسؤل في بلدية وتقول يليتني ارجع العلاقة او اي شي انا قد سافرت مع ناس طلع الشيب فيني يوم رجعنا الرياض ماعلمتهم ان شفت منهم اشياء شينة وبلعتها على قولتكم بس اذا قالو لي هاة تبي نسافر معنا اقول لهم اسمحولي وبس

التمَاري

30/12/2007, 04:22 PM

القصبي

31/12/2007, 03:36 AM

[quote=التماري;1304586]

الرسن

08/01/2008, 12:34 AM

خويك ما قصر وبيض الله جهه ومعليش الدنيا دروس والانسان عليه ان يعرف اخوياه وهذي فرصه له هو حتي يعرفهم زين .

الظافر
مشكور وزي ماقلت الدنيا دروس الله يعطيك العافية
معالسلامة

الرسن

08/01/2008, 12:37 AM

كثير تحصل لكن وش تسوي تقعدهم غصب !!
على ما قال خوينا الدنيا دروس ، اختار الصديق المناسب
يا الله انا جاهز يأي وقت تبي اخوك هوى الشـــــرق

هوى الشرق
يالله ان تحييه مخوتك على العين والراس بس نبي نعرفك اول قبل سذا عشان تحلو الطلعات مع جنابك ياهوى الشرق.
معالسلامة

الرسن

08/01/2008, 12:42 AM

الحقيقة ان الواحد يجيه من خويه بعض الاحيان تصرف غريب مايتوقعه منه لكن يدور له العذر .

وانا مثل الاخ غيثه اتسائل ! كم اعمار الشباب ؟ لانه غالباً ماتصدر الا من شباب صغار السن ولا لهم تجربه ومعرفه

ابومعاذ
يالله ان تحييه وش يسوي الواحد برفيقه اذا صار على وزنيته وعارفين بعض لازم يصبر ويتحمل لكن المشكلة لما تصير المشكلة من مجموعة هنا السؤال
وبالنسبة للاعمار فهم فوق الثلاثين عاما ومثل مايقولون لاتشره.
معالسلامة

alkongrs

08/01/2008, 12:43 AM

ما فيه الى خيار واحد يجي يرده لهم بنفس الطريقه الي صلحوه لوه والحركات هذي اتخلي الواحد مو ينصدم تقفل اذا سمع اسم الرجال والله

ولد وايل

08/01/2008, 12:49 AM

بخصوص هالموضوع

هذا نص بسيط لبركات الشريف ينصح ابنه بما تحمله كلمات هذا الموضوع

ووصيك زلات الرفيق أن عثا فيك
ما زال يغطاها الشعر فاحتمل ذاك

راعه ولو ما شفت إنه مراعيك
عساك تكسر نيته عن معاداك

وإحذر عدوك لو ظهر لك مصافيك
خلك نبيه وراقبه وين ما جاك

لا تامنه واطلب من الله ينجيك
ويكفيك ربك شر ذو لا وذولاك

شفني أنا يا بوك بآمرك وانهيك
عن التعرض بين الاثنين حذراك

إذا حضرت اطلابه به شرابيك
اسع لهم بالصلح واللاش يفداك

قرن زاهر

08/01/2008, 02:03 AM

اخوي الرسن يمكن احد الشباب جاه اتصال جوال خاص من العائله
تعرف بعض الاتصالات تخرب المزاج وتقلب ابو الرحله
والله لا يجب مكروه

وبعدين ما دام الشباب اصغرهم عمره 35
اكيد طرى عليهم العيال وام العيال
زي مال قال شاعرنا المحبوب حمد السعيد
ياالشيح ماقصدي ملل يوم انا أصيح
ياالشيح شوق لديرتي وأنت مزينك
يطري علي خالد عقب وقفة الريح
واهل دمعآ لو تحـسـه يحـزنـك
أنا تحضـن وهـم وأفز وأطيـح
وأنت السحـاب وكل نجمه تحـضنـك

خالد ولد حمد السعيد الله يشافيه

هاوي القنص123

12/01/2008, 10:06 PM

السلام عليكم صراحة حركه بايخه بس يمكن اخطأ عليهم بشي وازعلو منه

أبو يحيى

20/01/2008, 09:52 AM

هذي الحركة تمر كثير معنا .
لكن خلاااااااااااااااااص اتجنب الرجال اللي من هالنوعية, و خاصة بالمشاوير الطويلة.

يا جماعة تخيلوا مره طلعنا و كانت الذبيحة مقسمه وجبات على يومين .................. رجعنا بنص الذبيحة. كله من هالنوعية اللي ذكر خوينا.

T U R K I 0 9 0

20/01/2008, 10:07 AM

والله وانا اخوك هذي تصير دائم يمكن ملل يمكن طرى لهم شي ثاني لكن ابي انبهك لحاجه انت قلت وانتم راجعين هم 3 في سياره وحده وانت لحالك وقلت لهم واحد يجي ورفضوا هذي هي الشينه واللي تزعل بس رجعتهم بدري اشوفه انها عاديه وتقدر تمشيها وتصير

والدنيا وانا اخووووك بتشوف فيها العجايب ومش اللي تقدر تمشي علشان ترتاح

االديحاني

21/01/2008, 07:09 AM

اضرب عليهم جلي ( دليت من قائمة الاصدقاء )

الفيصل555

23/01/2008, 02:14 AM

السلام عليكم ورحمة الله وبركاته

صراحة تقهر بس حلها بسيط

اتصل على واحد امووووووووووون علية بقوه وأعطيه الأحداثيات إذا كان معه جهاز أو أواعده عن معلم بارز ولو أرجع 200 ولا 250 كيلو لين أقابله واكمل الرحله معه وبالنسبه للشباب الاولين لا سلام ولا كلااام

الساهر2003

23/01/2008, 02:36 AM

نصيحة للجميع ولي شخصيا الامور الصغيره نخليها تمشي وان شاءالله ان هذه من الامور الصغيرة واما الزلات الكبيرة فيجب الوقفة معها والمحاسبة افضل من السكوت وبعد المحاسبة لك الخيار في الترك او المتابعة معهم
والنصيحة هي اتباع حديث الرسول صلى الله عليه وسلم
ماكان اللين في شيء الا زانه
وبعض الناس في الوقت الحالي يحسب الطيب ضعف في الشخصية او صح في العقل والبحر له مد وجزر وياما انصدمنا في مثل هذه الامور واكبر منها لكن مالنا الا الصبر ونخلي البعارين تمر الشكوا لله هذه الدنيا دواره
مع اطيب تحية للجميع

علاوي المكاوي

03/02/2008, 12:09 AM

أجهز لهم خرجة على الخرطوم في السودان وأدخلهم رحلة قنص في البر 500 كيلوا جلد وأجلس معاهم لين يرقدون وأسحب نفسي على مطار الخرطوم وعينك ماتشوف إلا السعودية وأخليهم يعرفون إن الله حق

camaro

03/02/2008, 03:21 PM

الله المستعان عليهم

سبحان الله وبحمده
سبحان الله العظيم

الرسن

23/02/2008, 09:06 PM

اود ان اشكر الجميع على تفاعلهم مع الموضوع بردودهم وتعليقاتهم ولي عودة للتعليق على جميع الردود وللجميع اقول شكرا جزيلا ومعالسلامة

الفتكي

23/02/2008, 10:03 PM

السلام عليكم
يا خوي كثير مايحصل من هذولا وانا اغلب الاوقات اذهب في سيارتي لوحدي معهم خوفا من هالاشكال لكن احسن له انه يبلعها ويسكت ويحطها بصدره عشان اذا قلو له مشينا يقول اني مشغول والمره الثانية انه لايتعدى معهم البلد الذي يسكنون فيه ولايتعدى وقته معهم من الصباح حتى الليل اما من ناحيه انه رجع معهم والله غبي والله لأكمل المشوار لوحدي اخليه كل يوم في مكان او مدينه والشمال مشاء الله مايمله الواحد حتى لو جلس شهر كامل.

عجمي

23/02/2008, 10:05 PM

خويك ما قصر وبيض الله جهه ومعليش الدنيا دروس والانسان عليه ان يعرف اخوياه وهذي فرصه له هو حتي يعرفهم زين .
اوافقة اخوي الظافر الراي
والمفروض يعرف الشخص أصحابة قبل لايقع الفاس بالراس
وكل غلطة بتعلومة

سولاف

23/02/2008, 10:11 PM

التصرف غريب من رجال بالعمر هذا بس ازين شي لاتحاسب احد ولاتقول شي اتركهم واترك صحبتهم حتى يحسوبتصرفهم وارفض اي روحات معهم اوطلعات ويكون الاعتذار بطريقة مقبولة ودون تحسيسهم انكم مخطين اومسوين شي ويعوضك الله احسن منهم ويردهم لك باحسن مماكانوا ان كانوا متفقين عليك يبي يسلطهم الله على بعض ويسخرهم لك وحنا بالمدرسة تصير معنا امور تقريبا مثل هذي وان كانت مب كشتات
وكما قال الشافعي
اذا المرء لايراك الا تكلفا
فدعه ولاتكثر عليه التأسفا
ففي الناس ابدال وفي الترك راحه
الى ان يقول
سلاما على الدنيا اذا لم يكن بها
صديق صدوق صادق الوعد منصفا
ادري داخله عرض بس من واقع تجربة حبيت افيد

راعي النفيد

23/02/2008, 10:38 PM

قصيدة ابا الضلعان ((بن ريس ))

قل هيه هلا ياشايبات المحاقيب ### أقفن من عندي جداد الأثاري

اقفـن بالرخـصه كمايقفي الذيب ### الى طالع الشاوي بليل ٍ غداري

لكن صــفق اذيالهن بالعـراقيب ### رقاصة تبغي بزينه تماري

يابن رخـيّص كـب عنـك الزواريب### عمارنا يابن رخيّص عواري

خويننا ما نصــلبه بالمـصاليب ### ولايشتكي منّادروب العزاريخـويّ

لزماً تجيـك امي بكـبده لواهـيب### تبكي ومن كثر البكاماتداري

تنشدك باللي يعلم السـر والغيب ### وين ابني اللي لك خوي ٍمباري

قل له قعد في عاليات المـراقيب ###في قتةٍ ٍماحوله الاالحباري

يتنا خـويه لين يبـدي به الطيب ### والا يجيه منا الصواديف جاري

وان كان ماقمنا بحـق المـواجيب ### حرمن علينا لابسات الخزاري ...

وينهم عن هالرجال من اجدادنا (ولاكن دور لخويك عذر دئمآ وابحث عن القصور فى نفسك)
وسلامتكم واعذروني عن التقصير....

الرسن

04/03/2008, 09:13 PM

اسوي طلعه ثانيه واقولهم يجون
واتفق معهم نقعد 3 ايام اذا وصلو اخوياه
يقعد معهم 5 ساعات ولا 8 ساعات ويعود
طبعن لازم المكان يكون بعييييد علشان يعرفون ويحسون بطعم السحبه

سليمان
لا مايصير يارجال الا خلنا اطيب منهم ومامثل الطيب مع الناس وهو اللي يبقى بارك الله فيك. اشكر لك تعاطفك.
معالسلامة

اخوي يمكن اللي أثر على اخوياه شدة البرد لأن اعتقد البرد الشديد دخل ثاني ايام العيد وهو اللي خرب عليهم البرنامج

انا كنت في التنهات ثالث ايام العيد مع ان التنهات اقرب من مكانكم الا ان البرد كان فيها شدييييييييييد جدا والمشكله الشباب اللي معي ماكانوا عاملين حسابهم في الحطب والملابس

ابوهيا شكرا للاضافة
نعم كان البرد شديد في تلك الايام بس مااعتقد حسب مافهمت منه ان البرد سبب لقطع الرحلة عموما تبقى المودة قائمة وعادة المياه الى مجاريها.
معالسلامة

يا رجال وسع صدرك

والله قد ضربت مشوار( 1100) كم
ألف ومأئة كيلو

مشواااااااااااااااااار ولا معي إلا شخص واحد فقط في الطريق

والباقين نتقابل معهم هناك

مدة الرحلة المتفق عليها أربعة أيام

ما أمدانا نشم الهوا يومين إلا الباقين يقولون مشينا خلاص (ملو نفس حالة رفيقك)

المهم يا رجال بلعتها و حاولت أتناسها

لكن زي ما قال ابو معاذ:

إذا جاك تصرف غريب من أحد أخوياك حاول تدور له عذر

_ _ _ _

مشكور على الموضوع

ياراس الرعيلة مشكور على الاضافة
ومثل ماتفضلت إذا جاك تصرف غريب من أحد أخوياك حاول تدور له عذر وهذا اللي حصل عادة المياه الى مجاريها.
معالسلامة

Qosmio

05/03/2008, 10:05 AM

أأخي الكريم...
السلام عليكم ورحمة الله وبركاته...
أخي الكريم بالنسبة لقصة صاحبك وربعه اللي طلع معهم... أخي الكريم... قيلت من قبل... يعرف الرجل في السفر... وهذه الطلعة تعد سفراً لبعدها عن المباني السكنية...
أخي إذا كانوا ربعه قد ابدوا له الإعتذار فلا بأس من فعلهم..
لكن إذا كان ردهم كما ذكرت (انت معك سيارتك وتصرف) فهذا الغلط بعينه...
واقولك ولصاحبك (الخير أطيب من الردى) فقل لصاحبك أن يجعل الخير دائماً أمام عينيه وأن يحتسب الأجر....
فعلى صاحبك أن لا يزعل ولا يتضايق... وليعلم أن خير صديق في هذا الزمان (الكتاب) فلا صديق أفضل منه.
فهذه القصة لم تحصل لصاحبك فقط قد حصلت لغيرك...
أذكر لك قصة واحد ( يقول اتفقت أنا ويا جماعة إنا نروح يم... الجبله اللي وراء الدوادمي... وكنا مجموعتان... إثنان بالعاصمة الرياض... والبقية بخارج الرياض وكان... الذي يحكي القصة كان بالرياض... يقول اتفقت انا وصاحبي اخاوية يعني يمر علي يوم الأربعاء صباحاً بعد أن أستأذن من دوامي... وفعلاً استأذنت من الدوم وكان في ذلك الوقت ما فيه جوالات... كان معي بيجر وهو ما معه... يقول استأذنت ورحت يم البيت وكان البيت بجنب الطريق الدائري الشمالي وقريب من طريق الملك فهد يعني قريب من طريق الخروج من الرياض... ومرت الساعة العاشرة والحادية عشرة وووو ولم يأت فقال قلت خيراً إن شاء الله، يقول فلما أتت الساعة السابعة مساءً قام من اتصل على البيجر وكلمني وقال موجود بالرياض قلت نعم قال سوف امر عليك لتشاركني السفر إلى الأهل تعرفون صاحبنا مهوب من أهل الرياض لكن طبيعة العمل اتت به للرياض... يقول فمر عليه فذهب معه ولم وصلا انزله ببيت اهله يقول صاحبي فأخذت سيارة اخي وذهبت لإستراحة أحد الأخوة فأت شخص ودخل وقال لي اهااا انت موجود ما رحت مع فلان وفلان في رحلتهم للجبله....
يقول صاحبي تفاجأت من كلامه وتقلبت الدنيا بوجهي.... هل ذهب فلان معهم أم حصل له ظرف ولم يأتي وذلك دليل على أنه لم يمر علي... يقول صاحبي... فلما أتى الأسبوع القادم اتضح لي أنا صاحبنا ذاهبن معهم... يقول صاحبي فلما سألته لماذا ما مريت علي حسب الموعد... ولا بعد استأذنت من المدير بعد حبة خشم
تدروووون وش كان رده
7
7
7
7
7
7
7
7
7
7
(ياخوي نسينك)
يا شباب وهل هذا رد وهل يعقل أن ينسى وهل هذا عذر وكيف طابت له الرحلة وهو فاعل فعلته... ---------------------------------------
الزبدة من هذه القصة
أن تخدع بأشخاص..... من اشكالهم الله عطاهم بسطة في الجسم... وهيبة في الوجه... وخشونة بالصوت,,,, وناس لا جسم ولا ولا ولا ولا ولكن يبقى الفارق الواحد هول (حسن الخلق والمصداقية والكرم والشهامه)... التي قد تكون في رجل لا يملك المال ولا البسطه في الجسم ولا ولا... ولكن رجل نعم الرجل....
------------------------------------------------
قل لصاحبك يصبر ويحتسب الأجر...