طلعة برية رائـــعـــة ... لكن ليه ما تغدوا ؟؟

[أبو هيلة]

حياكم الله ...
هذي سالفة يرويها خوي لي يقول :
مرة كنا ناوين على كشتة لأحد الفياض ..
مشوا بحفظ الله من الفجر وبعد مسافة وقفوا للفطور وجمعوا شوي حطب ..
كملوا مشيهم .. إلى ان وصلوا للمكان اللي يبغونه ..
من ضمن الكشاتة .. واحد والله أعلم إن أمه يوم كانت حامل فيه متنسية بفلفل حااار .. هالرجال ما شاء الله عليه طبااااخ ويضبط الكبسة .. لكنه عصبي شوي بس http://www.mekshat.com/vb/images/icons/icon10.gif ..
طبعه ما يحب أحد يقربه اذا صار يطبخ ويدبره .. يكيف لحاله بس أنت حط عنده الأغراض وخله ..
الرحلة هذي تسلط عليه واحد منهم كل شوي وجاي فاتح القدر وآخذ له مرقة (( الماء زايد ، الملح ناقص ))
خوينا يتصبر يتصبر لكن أبو طبيع ... المهم أبو الشباب قام ومسك القدر وقلبه على الأرض
والله يا جماعة هذا اللي صار .. راحت الكبسة وانحاست الكشتة ..
بصراحة ما ادري من الملام هالمتطفل .. أم خوينا العصبي ؟؟
وبصراحة الواحد اذا صار فالبر كيف يضيق صدره ويعصب .. ياخي رووق و انبسط .

[maysarh]

ههههههههههههههههههههههه

[ابرق العزاف]

الا المتطفل اللى لوني حاااااااااضر
كان قطعت الجريد عن ظهره!!!!!!

[يمك ادروبي]

أعتقد ان المتطفل هو الغلطان

[ابو سمر]

المتطفل غلطان ، خاصة أن الطباخ تم فحص طبخه من قبل ، خلوا الطباخ يحوس بيديه ورجليه حتى يطلع طبخن زين ..

شكرا لك .

[راكان المطيري]

كلهم غلطانين
والطباخ ماله داعي يقلب القدر

[ابوعبدالله 2]

الصراحه ما له داعي هالملقوف الشرهه على اخوياه الي اخذوه معهم ويعرفون انه ملقوف هذا يحوس الدنيا اجل وش يسوي اذا شبو الضو والله ان يخلصه عليهم بخمس دقايق وبعد كذا خلهم يغنون العب يالزرق تحياتي للجميع

[نجد 2007]

موقف عجيب وغريب
وكلا الاثنين غلطان
واعتقد انها ماتوصل لدرجة انه يكب غداء اخوياه عيب علية والله
والشرهة على إلى يخاوي مثلهم

[مطر مكة]

واعيباه
الغلط عليهم الاثنين

[سلومي سار]

من وجهة نظري الغلط على اخوياه الي معه والاثنان في حكم الخصوم

[خوي_الذيب]

:):):):):):):):):):)
صحيح يحصل مثل هذا كثير

ذكرتني بقصة الأحمق والبخيل

اصطحب أحمقان وبينما هما يمشيان في الطريق يوما قال أحدهما للآخر تعال نتمنى . فقال الأول أتمنى ان يكون لي قطيع من الغنم عدده 1000 وقال الآخر اتمنى أن يكون لي قطيع من الذئاب عدده 1000 ليأكل أغنامك ، فغضب الأول وشتمه ثم تضاربا ، مر جحا وسألهما فحكيا له قصتهما وكان جحا يحمل قدرين مملوءين بالعسل فأنزل القدرين وكبهما على الأرض وقال لهما اراق الله دمي مثل هذا العسل إن لم تكونا أحمقين

[صاحب الجيب]

وعليكم السلام ورحمة الله وبركاته

مساك الله بالخير أخوي أبو هيلة

من وجهة نظري أن الغلطان أنتم اللي تاخذون معكم واحد علة ما دام الطباخ قايم باللازم وتعرفون شغله كان مسكتو الملقوف وربطتوه

وخيرها في غيرها وعساك على القوة

[سيد النشاما..]

ذكرتني بواحد لاطلع معنا ( عموما طلعاته معنا قليلة )

فعندما أكلف بتجهيز الغداء أو العشاء وجيت أطبخ لهم الكبسة جاك يدربي راسه هالرجال ...... ويبدأ يطرح الاقتراحات ووجهات النظر !!!!!!
مثلا: كما أتذكر بعض كلامه ذالك اليوم>>> (( المعجون أحمسه مع البصل . نزل اللحم والرز مرة وحدة بالكاتم واكتمه مرة وحدة وقم بحساب الدقايق .وش رايك تزود البهارات . شكلها ناقصة ؟؟ ....... الخ ))

[برقن سرى]

:no2: الله يلوم اللي يلوم الطباخ
ياإخوان إذا صار رفيقكم طباخ وعليه الكلام فلاأحد يقول له شي أبدا ولاأحد يجي لعفشه وطبخه
قد يكتم ويكتم وتصير نهايتها مثل خوينا ...
:no2:

ومن المعايشة ألاحظ الرجال صح واللي يعرف السلوم والعرف مايتدخل فيما لايعنيه .

وقس على ذلك أهل الكيف والشاهي ... كل فيما يخصه ... :)

[رحال عمان]

الإثنين غلطانين وبالذات الطباخ شايف نفسه . ليش يدفع الثمن الجميع لو إنه سواها معاي بعمره لا يفكر يجلس في مجلسنا ... عندنا مثل يقول " يوم ما تحشم الكلب إحشم راعيه " وأخونا ما سوى لكم إعتبار والله يعينكم

[مستقنص]

السلام عليكم ورحمة الله وبركاته

مساك الله بالخير يا ابو هيله

بصراحه المتطفل اخطا بحق الطباخ كثير ولقافته مهيب في محلها
اذا الطباخ استشاره في شي يخص الطبخ وقتها عادي انه يفزع له

الطباخ كان المفروض مايستعجل يكمل طبخته ويطنشه ويتغدون ويعينون من الله خير بعدها يتناقشون معه ويقومون عليه حق او يحرمونه من الطلعات معهم وان جت الثنتين فهي ازين يستاهل
اذا كانو طبعا مجموعه كاشتين

تخيل الموقف كاشت ومعك مجموعه والغداء اللي معكم طبخ متعوب عليه ينكب قدامك بسبب تطفل احد واستعجال الطباخ بصراحه فشيله بعدين هذي نعمة الله

وحتى ولو كانوا شخصين لحالهم مهما كان مايكب الغداء اصرف شي يسويه يتركه ولا يكمله وحتى اذا كمله المتطفل ماياكل منه الطباخ ويقوم عليه حق
هذا افضل حل.

هذي وجهة نظري

وشكرا
اخوك

ذرى

[ابو عبدالملك 2]

اللغلطان القدر اللي قاعد بين هالمهبل

[راعي البرهـ]

المفروض الطباخ يوم نشب اخويه في حلقه انسحب من الطبخ وخلا هم يتصرفون الله يهديه يكب نعمت الله

[صحيح]

انا اشوف ان كلهم غلطانيين وبالنسبة للطباخ أقوله لا تنسى حديث الرسول صلى الله عليه وسلم ( ليس الشديد بالصرعة وأنما الشديد الذي يملك نفسه عند الغضب) فالمفروض خلا المتطفل يسوي ألي يسوي ولا لقاله بال وأشيد بالكلام الأخوة ان هذه النعمة حرام تنكب كذا .
وتقبل مروري وتحياتي صحيح

[رحـ R ـال]

ياووو والله يا هو عصبي وما يمزح ..

[أبو هيلة]

اللغلطان القدر اللي قاعد بين هالمهبل

ههههههههههههههههههههههههههه
حرام عليك لا تظلمهم كلهم .

[أبو هيلة]

حياكم الله يالغالين ...
وبيض الله وجيهكم يالوجيه السفرة على ردودكم والرائــعة و أكثر من رائعة ...
وبصراحة اذا اجتعموا مثل هالاثنين في طلعة اكيد راح تنحاس ..
واحد يحب يستهبل ومزحه ثقيل والثاني اعوذ بالله لا أحد يقربه ..

[مجتهد***]

طلعة حلوة

عندنا من هذي الأشكال كثير
بس ما نخليهم ندلخ بينهم ونحاول نبعدهم عن بعض

يعني إذا كان الطباخ مشغول في الطبخ نلهي المتطفل ( الملقوف ) و بكذا نرتاح

[altheeeb79]

أيهما أكثر فائده
و

يبرد الكبد

أنا أرى عدم مرافقة المتطفلين ذوي العقول الغير ناضجه0

[عزيز نجد]

ذكرتني بسالفة هاكا الشيبان اللي طالعين للبر واحد منهم شقردي وهو الظاهر انه اكبرهم مغير يزبط لهم الكبسه ويدبر عيشتهم , المهم معهم واحد متركي هناك ومغير يوجه الشايب , حط كذا سو كذا وهو ما يتزحزح عن مكانه :
قام المعزب وكفا القدر باللي فيه وقال للرجال تعال الله لايهينك زين غداك انت .

ترى يا اخوان كثر العذربه والتوجيهات اللي ما لها سنع تربك الواحد خاصة من الانسان اللي ما يجي من وراه نفع . ودمتم بود

[غيث 6]

والله ياخوي ابوهليله انا دايم في طلعاتي اذا اني طبخت ماحب اي واحد يتدخل في شغلي واذا احد غيري مسك الطبخ اذا حب مني اي مساعدة انا حاظر لاكن فتح القدر وانا اطبخ هذا شي يمكن يدلي للزعل لا كن الطباخ ايضن غلطان ليش يكب الغدا مهما وصلت الامور لانه الحين معناتها خرب الطلعة والكشته وزعلو الربع كلهم وتقبل مروري