طالب جديد وابي اتعلم منكم

[صقار بدون صقر]

السلام عليكم
كيف حالكم اعضاء مكشات
معليش على كثر اسألتي لاكن ابي اتعلم الصقاره منكم

-اذا ماقرنست الطير وبقيت ادعيه باصيف بس دعو على الشلو والحمام وش يصير به يضره ولالا الله لا يهينكم ابي اعرف هل يطيح ريشه او يتكسر ابي اعرف بالتفصيل؟

-والسأل الثاني :مثل ماتعلمت منكم ان الحر يقرنس قبل الشاهين بشهر تقريبن طيب والوكري هل هو زي الحر او يتاخر؟
ولكم جزيل الشكر...

[خشف.]

ان شاء الله يفيدونك اعضاء الخيمه

[راشد الخلاوي]

حبيبي كل ؟؟؟؟ في وقته حلو ياحلو
/
/أما بتدعيه بلقيظ عزلله راح فيها الطوير

[صقار بدون صقر]

افا والله وين ردودكم وهالمدح الي مدحوكم فيه ماشوف احد رد علا العموم الله يسامحكم
...........
ومشكور ياخشف وراشد على الرد
لاكن يا راشد ادري ان مافي احد يدعي بالصيف لاكن ابي اعرف اذا دعيت وش يصير وش اضراره
وبعدين الوحوش الهو هذهي تطير وتصيد طول السنه ومعتمده على نفسها ماضرها وليش
سامحوني على كثره الاسئله لاكن ودي اعرف الله لايهينكم
وبانتظار ردودكم...

[عـــرادي]

صقار بدون صقر
حياك الله يالغالي
الطير لابد من تجويعه حتى يجي لدعو وإذا جوعته مايقرنس ويصير
الريش ضعيف وبعض الريش ما يطلع.
والطير الوحش يهد وهو صنيع ( عديد ) غير مجوع وهذا ما يضر الريش
وتقبل خالص تحياتي
أخوكـ عرادي ــ

[صقار بدون صقر]

مشكور يا عرادي على الرد

لاكن انت بالمقيض تعلف الطير كل يوم فريه امس علفته فريه واليوم العصر بدل ما تعطيه الفريه مباشره تلوحله بالفريه وتخليه يعلفها بدون تجويع مثل التدريب يومين ولا ثلاث

ثانيا اقصد الطير الوحش الي عايش بالبر او بالجبال في بلدنا او بالدول الافريقيه طول السنه وهي تطير وتصيد وتوكل صغارها ومعتمده على انفسها (ويوم يجي الصيف ليش ماقالت خلاص ابي ارتاح واجلس 8 شهور على الوكر ) ليش ما تقرنس نفسها وتربط نفسهها ما شوف ظرهن شي

ياليت احد يفهمني راسي يبي ينفجر من كثر مفكر بالموضوع وملقيت حل

ولا تنسون السئال عن الوكري هل يقرنس زي الحر او يتاخر زي الشاهين
بانتظار ردودكم...

[قلب ذيب]

ارحب ياصقار .
ليش مستعجل 0
كل الطيور تغير ريشها سواء كانت في الاسر ( المقيض ) او في الخلا والفيافي , فالطيور الخلويه تغير ريشها وهي في الجبال , تهد وتاكل وتعلف صغارها ولايؤثر ذلك على تغيير ريشها فهي تغيره غعلى مدار السنه , وليست بحاجه الى الوكر او الربطه كما تعتقد !.
اما الطير المأسور والذي بحوزة الصقار فبحاجه الى الربطه مهما كان نوعه ومن الافضل ربطه في القيض لأن الصقار في القيض لايحتاج الى اطلاق الصقر او القنص به , وفي حالة قيام الصقار بدعو الطير في الصيف سيؤدي ذلك الى قيام الطير بعدم حذف الريش في الصيف , لكن ستجده حاذف الريش في اول موسم المقناص عند نقلة الطير وسيؤثر ذلك على طيران الطير وطرده للطريده ,.
وربما يحتفظ الطير ببعض الريش ( النوايف - الامواس ) ويسمونه مرقع بالريش ويتم القنص به , لكن الافضل ان يحذف الطير ريشه وقت الربطه ويكون جاهز عند طلعة سهيل , وفي الدول البارده يقنصون بالطير في الصيف لكن صيفهم بارد ويحذف الطير ويبدل ريشه لكن لايكون مثل الطير المصفي الجاهز في اول الموسم .
بالنسبه للوكري فهو يحذف مثل الحر واحسن وهو طير كافة المهام --------.

[عباااااادي]

مااضيف على كلام اخوي قلب ذيب كفا وفا

[عـــرادي]

صقار بدون صقر
راح تفهم كل شي ، الطير يلوح لأنه يبي العلف اللي راح تعطيه له بعد التلويح
والطير لازم يكون جوعان حتى يلوح ، وإذا جوعة الطير راح يلوح مضبوط
بس ماراح يقرنس ( يبدل ريشه ) لأنه ضعيف والريش يحتاج أن الطير يكون
غير ضعيف ( عديد ) وإذا عطيت الطير كل يوم فريه وفكيته في الصيف ماراح
تمسكه أبد ، وتقبل خالص تحياتي
أخوكـ عرادي ــ

[صقار بدون صقر]

الله يعطيك العافيه يالعرادي وماقصرت
لاكن السراحه انا عندي وكري توني شاريه ولا عندي خبره وانا صغير بالعمر وما معي سياره ولا انا راعي طلعات ومقناص بس ادعيه بالحمام والشلو وسراحه مستخسر هالتعب بالمقيض ( اقول وشوله اربطه 8 شهور وانا ماني قانص ولا شي بس على هالحمام ) انشاء الله تكون فهمتني

واشكر الاعضاء على المرور

[وكري2007]

هلا أخوي صقار المهم يأخوي أنك أنت هاوي هذه الممارسه مو المهم أنك

لازم تقنص هذه هوايه أذا أنت حابها أما أذا أنت مثل ماقلت مستخسر هالتعب بالمقيض

يعني تبي تجرب هل تنفع معاك أو لا بس أنشاء الله مستقبلا بتقنص ومابتخلي ديره بأذن الله

وتبي الصراحه ياصقار أنا أول مابديت تعبت وتعبت الطير معي بس بالنهايه خلاص كل شي صار

عندي معروف وتمام لدرجة أني قيضت طيري بالبيت وسبحان الله والتوفيق منه نجحت معاي عملية المقيض

بالبيت عندي وتحت أشرافي وحيــــــــــــــــك بأي وقت أخوي صقار مابيقصرون معاك أخوانا,,,,,,,