وش اللي ما تاكله من الذبيحة ؟

[hawawi]

السلام عليكم ورحمه الله

كيفكم مع البرد يا مكشاتيين :)

موضوعي عن الشي اللي ما تاكله من الذبيحه .

في ناس اجزاء من الذبيحه مستحيل تاكل منه مثل ناس ماتاكل من الراس وناس ماتاكل من القلب وغيره

انا سبحان الله ما اكل من لحمة الرقبه .. حتى عند الجزار اخليه يقطعها وياخذها .

واحب لحمه .. الظهر:)

شاركونا

[الوسيطاء]

الرئه والخصاوي وانت بكرامه والباقي يوكل بتلذذ

[hawawi]

حياك الله اخوي الوسيطاء
الرئه في ناس تقطعها مع المقلقل كبد او لحم
شكرا لمشاركتك

[abo fasil]

السلام عليكم ورحمة الله

بالنسبة لي لحمة الظهر وبس ,,,,,,,,,,
ياخي لها طعم غير الزبيحة كلها

[shaheenshah]

احسن ما في الذبيحه الظهر والكتف
اما الراس والرئه ولحمة الرجل اللي تلمصق بعض الناس يسمونها (الموزه)الله يكرم النعمه

[hawawi]

السلام عليكم ورحمة الله

بالنسبة لي لحمة الظهر وبس ,,,,,,,,,,
ياخي لها طعم غير الزبيحة كلها

هلا ابوفيصل .. نفس الشعور :)

شكرا للمشاركه

[hawawi]

احسن ما في الذبيحه الظهر والكتف
اما الراس والرئه ولحمة الرجل اللي تلمصق بعض الناس يسمونها (الموزه)الله يكرم النعمه

هلا شاهين .. شكرا للمشاركه

[مكشاتي غير]

ما احب الكبد بالمره

مع ان كل الاهل يتسابقون عليها واستغرب على وش

سبحان الله

[hawawi]

غريبه اخوي مكشاتي .. ما توقعت احد ما ياكل الكبد !

طيب جرب :)

[جلوبلستار]

الكرشه
ــــــــــــ

[فل اوبشن]

امنعني من الرجل والرقبة والرئه <<< مابقي شي يالاخ

والباقي يسلفط سلفطة في البطن ..

[hawawi]

الكرشه
ــــــــــــ

^
^
اجل ما تعرف التقاطيع :d

[hawawi]

عليك بالعافية فل اوبشن (http://www.mekshat.com/vb/member.php?u=23049)

شكرا للمشاركه

[كناري2]

اسمع يا هواوي

اذا كانت اللحمة مطبوخة عند آخر مطعم(قهوة) في عقبة ظلع .. اكلها كلها دون تمييز..مع التعراش(التحشاش)
:d :d :d

[بلاتين]

الرئه مافيه احد ياكلها .:no2:
الموزه = اخر الساق مااحرص :mad:

الكرشه بس مع المندي الي تجي زي سلك التلفون :D

والباقي كله زين ...

تحياتي ,,,

[a.الخثلان]

الكرشه بس مع المندي الي تجي زي سلك التلفون :D


تحياتي ,,,


ههههههههههههههههههههههههههههههههههههههههههههههه :D

أضحك الله ضرسك


الحقيقة موضوع جميل في غرابة السؤال

لكن الي ما فيه أمل آكله والله لا يحدني عليها

الرية والطحال والعين خصوصا إذا بقت الرموش ( شعر ) :D


وأزين شيء الكتف ولحمة الصدر

[وسيـع البـنايد]

الريـه - الخـصى ( اعزكم الله ) - الراس - المقـادم - الكرش - القصبان

[أحب القمرا]

....الجلد ....
وبلقا له طبخه

[ابوفهيدان]

عليك بالجنيبات واول الظهر من عقب الرقية ومجمع الماء عند الكلاوي
اما الرئة والرقبة اللهم لك الحمد نعمة
بس لاذبحت الذبيحة ثم جمعت الكراعين المشلوطة علي الفحم
والكرش والمصارين والراس وكثرت البهار عليها ويا البصل وجاتك مرقة صفرا ومالحة ياسلام
بس والله ياناس احب اشوفها واحب اطبخها بس عندي قرحة في المعدة وقولون وحرمتني منها وصرت اخاف من النعمة لاشفتها نسأل الله العافية لي ولكم

[هدد 001]

السلام عليكم
الرئه _ العين _ الخصا اعزكم الله _ الكلى
والباقي ماكول
ودمتم بود

[أبوعبدالرحمن1]

أما أنا (واعوذ بالله من كلمة أنا ) الرئه والبنكرياس والمخ ما آكلو الله يديم النعمه وشكرا .

[يزيد_1977]

الرئه ماكلها والخصى اعزكم الله ماكلهن

[الملاح ابوفلاح]

السلام عليكم يا مكشاتيون اخوكم ابو فلاح ما يرمي من الذبيحة شي ابد ما عدا القرون والاظفار والشعر اوالصوف
كل حاجة لها عندي طبخة اذا حبيتوا نجعل لها موضوع مستقل اذا وافق اخونا الهواوي يحفظ الله واياكم

[waleed_458]

الرئه والعين والمخ

[hawawi]

السلام عليكم يا مكشاتيون اخوكم ابو فلاح ما يرمي من الذبيحة شي ابد ما عدا القرون والاظفار والشعر اوالصوف
كل حاجة لها عندي طبخة اذا حبيتوا نجعل لها موضوع مستقل اذا وافق اخونا الهواوي يحفظ الله واياكم


اي والله يابوفلاح .. عزالله انك جبتها ... حطها بموضوع مستقل .. خلنا نستفيد لاهنت.

[العبيات]

جوعتونا يالربع

بالنسبة لي جميع اللحم ما عدا لحمة الراس

وأفضل شئ الضلوع و الكتف

الكرشة و المصارعين ... ما تصلح

[hawawi]

^
^
وين المصارعين بالذبيحه خلنا نجرب :D:p

[عشانا]

كل شئ بالذبيحة حلال اكله ناكله

[راف]

أما أنا (واعوذ بالله من كلمة أنا ) الرئه والبنكرياس والمخ ما آكلو الله يديم النعمه وشكرا .

وين يصير البنكرياس بالذبيحة ما عمري شفته

بالنسبة لي كل الذبيحة طيبة بس على الشغل!!

اللهم ادمها نعمة وأمنعها من الزوال

[كاشخ 24 ساعه]

انا لا يمكن اكل من الراس وحتى ان لقيت صحن فيه الراس لا اكل منه ابدا

[البدر2]

....الجلد ....


وبلقا له طبخه




اذا لقيت الطبخة لا تنسانا

[ابن مرصوع]

بالنسبة لي انا

احسب عندك
- الرقبة
- الريه
- الطحال
والباقي يوكل وخص رقاق اللحم

[اشهب]

القرون
ماذكر مره اني خليتهم
دايم اخلي القصاب يكسرهم ويحسحس الراس
فيه مره كسرهم واخذتهم لان شكلهم حلو وتحسفت فيهم

[ebn-aljazerh]

أنا عن نفسي ما أرجع من الذبيحة شي
إلا الحبل و الجلد

[شقران نجد]

هلا بأخوي الهواوي
انا ما اكل منها الا الظهر فقط والباقي ما اكله

[nashad]

اسمحوووووووووووووولي
انا اموت في الكرشه والكلاوي والكبد حتى ولو نيه
والخصاوي حلوه بس وهي مشويه
اما اللي ما اكله الرئه والطحال
اما غير ذلك اكل كل شي(آفه ما يبقي شي)

[سندهم]

وين يصير البنكرياس بالذبيحة ما عمري شفته

بالنسبة لي كل الذبيحة طيبة بس على الشغل!!

اللهم ادمها نعمة وأمنعها من الزوال

______________________________________

قصد أخوي :راف بالبنكرياس يعني (المرارة, =المريرة ) اللي شابكة بالكبد

وهو صادق المريرة إن قطعتها خربت ماحولها )على إسمها .

بالنسبه لى : الرئة إطشها فقط

[مكشاتي غير]

غريبه اخوي مكشاتي .. ما توقعت احد ما ياكل الكبد !

طيب جرب :)

جربت وعدة مرات

ما يازتلي ابد

[rahl]

الرئه هى التي يتم رميها ولاناكلها

[العنووود]

فيه اشياء كثيرررره بالخروف ما اكلها بس الطامه الكبرى لو دخلت الكرشه بيتي قسم بالله تجيني حاله هستره من ريحتها المميته :no:
وكله كوم واشوف راس الخروف فوق الصحن والله اني اكره الخروف كله:(
http://www.kshcool.com/stock_photos/s_www.kshcool.com_117.jpg

[hawawi]

اسمحوووووووووووووولي
انا اموت في الكرشه والكلاوي والكبد حتى ولو نيه
والخصاوي حلوه بس وهي مشويه
اما اللي ما اكله الرئه والطحال
اما غير ذلك اكل كل شي(آفه ما يبقي شي)

هههههههه الله لايضرك ماشاءالله

شكرا لكل من شارك

[كيميائي]

عندي كلها تؤكل ماعدا ( رئة + خصاوي + بعض المصير)

وأفضل مافي الذبيحة ما اقترب من العظم وأوصي بالظهر والضلوع

[al-jattal]

السلام عليكم ورحمة الله وبركاته

بلنسبة للحمة الطيبة هي الحمة الضلوع
وهي الي تقدم للضيف
=) وهي الافضل عندي

[الكهف1]

القرون ما احبها

[hawawi]

ما اعتقد القرون فيها شي .. الا اذا عند ابوفلاح كلام ثاني :)

[الغدير]

اطيب ما في الذبيحة
اذا كانت سمينة وفي موسم الربيع
واذا كنت جوعان وبصحة
الكتف ومن ثم اجزاء من الضلوع و لحمة صغيرة اسفل الظهر بداخل البطن
ومن ثم الظهر
وعلى العموم الناس في مايعشقون مذاهب فالبعض يحب اللسان والعيون والكلاوي والكبود (وما اذم الطيب من هالاجزاء)
و كلها طيبة ورزق من الله ولايجوز ذم اي جزء

[مزاجي رايق]

السلام عليكم
ما احب اللحم اللي يتلاصق في يديك تقول كنه مدهون بصمغ

لكن إذا تبي نصيحه وحاد خبره

أحسن اماكن اللحم في الذبيحه

اولا الظهر هذا يعلو ولا يعلى عليه اذا مسكت الملعقه ووخرت طبقة الشحم اللي عليه وقطعت اللحمه بالملعقه لاني يبي يصير حااار ناارر

وبعدين اذا قطعتها تجي اللحمه في يدك زي الحلاوة واذا اكلتها تقول كأنه بسكوت غاطه في شاهي من الليونه اللي فيها ولا ينشب في ضروسك ولا شي
واذا خلص اللحم اللي في المنطقة هذي لايفوتك اللي تحته اللي تدخل اصابعك بين الضلوع علشان تطلع اللحم اللي تحت ... هذا مهوب لين وبس هذا يمكن يموع في أثمك قبل لا تبلعه.

والمكان الثاني اللي تحت الذنبه تلقاه ابيض مرررره هذا أيضاً راائع ولذيذ

وناهيك عن الضلولع اذا اخذتلك كم ضلع وقعدت تمزمز عليهم ( ولازم تطلع صوت وأنت تمزمز الضلوع)

وعموما خذها قاعده اللحم ما يكون حلو وطعم ألا إذا اختلط بعظم أو يكون الشحم فوقه

بس عاد الله يعينك على الكلسترول


بس دواه( الكلسترول) كم بياله شاهي أخضر مر بعد الأكل

[أبوعبدالله النهدي]

عندي الكبد لا أستيغها بالمره ...سبحان الله !
شكرا أخي على موضوعك .

[المحذوف]

احب شيء عندي الكبده بس بشرط تكون نيه يعني من الجوف الى البطن ثم تلحقها باربع وريقات بصل اخضر 0 اطعم من الكافيار ولو اني ما ذقته0

[hawawi]

اخوي مزاجي رايق (http://www.mekshat.com/vb/member.php?u=71510)
شكرا على تفاصيل الخبره :)

ماشاء الله تبارك الله
اذواق مختلفه .. وفعلا اشعر بالغرابه من بعض الردود
خصوصا اللي ما ياكلون الكبد

شكرا لكم

[عقام جدة]

هلا اخوي هواوي اذا ماتحب لحمة الرقبة انا ماأسمع فيها
وقولي وين تذبح وانا اجي اخذ الرقبة منك هههههههههه

[ابوحماد]

أطعم شي في الذبيحة الرقبة