سيارتي لاندكروزرvxr صارت تخاف من الطعوس

[الشاهين2004]

الاخوة اعضاء مكشات عندي لاندكروزر VXR موديل 1997 خليجي اوتماتيك كانت سيارة ينغزا بها بالرمال وبدون مناسبة صرت اذا دخلت بها للرمال القريبه بالثمامة تصير هي اول سيارة تغرز ولا فيها عزم واخر صيانة لها كانت تصفية وتغيير بواجي وفلتر القير وزيوت فهل ظنكم ان البواجي تقليد علما ان البائع يقول اصليه ورحت مرة ثانيه ابشري بواجي ولقيت عندهم بواجي اصلية ويقولون ان من موديل 97 وتحت البواجي راس واحد ومن 98 وفوق البواجي راسين فوش رايكم وش اركب علما ان الثنين كلها تركب يعني السنه وحده و رجائي من عنده الحل لا يبخل علي فيه شاكرللجميع تجاوبهم

[z a n h o r]

شف يالغالي

فرق عليك عزم السياره بالقار ..؟

يمكن المشكله تكون من القير ..!

تكون تغيراته ماهي مظبوطه

بالنسبه للبواجي يذكرون ان الراسين افضل والله اعلم

[الاستاد]

اخوي تأكد من اسلاك البواجي لان العزم عندي زان بنسبة كبيره بعد تغيير اسلاك البواجي شف طرف السلك مهب اللي رايح للبوجي الطرف الثاني فكه وشف اذا فيه براسه اثر احتراق ترا بكون البلا منه
واذا بغيت تتأكد بدل اسلاكك مع جيب موديل جديد وبتلاحظ الفرق

[بدوي جنوبي]

السلام عليكم

اخي الشاهين انت عارف ان القير الاوتو يختلف عن العادي
يعني العادي اقوي ،،، عشان تحافظ علي سلامة القير والدبل والمحرك
شغل الدبل الخفيف وما يمنع تشغيل الدفلك الخلفي
http://img404.imageshack.us/img404/6498/1lockerxu2.jpg

بوضع المفتاح علي وضع RR
واذا احتجت تشغيل الامامي ما يمنع

ترا مهم جدااا تغيير فلتر الهواء من ضمن الصيانه الدورية

بالتوفيق ان شاء الله

[الشاهين2004]

الاخوه Zanhor -الاستاد - بدوي جنوبي شاكرا لكم المرور والرد

[أبو مها]

شف يا الحبيب اذا جيت تكشت اجرلك اثنين من الافغان النشاط واذا غرزت خلهم يدفون وراك
احسن من الدف لك :d امزح معاك اخوي يمكن يكون من طرمبة البنزين وكلام الاخوان الي قبلي
اعتقد هو الصحيح بس مايمنع اذا مانفع حلهم تشوف الحل الي عطيتك

واذا ما نفع معاك اي حل
يعني السيارة جايها خرعة اقراء عليها وفية عند اخوانا المصريين ( طاسة الخضة) حط فيها ماء وبعدين صبة في الرديتر وعند بعض اهل نجد اسمها طاسة الخرعة
وفي بلاد الشام اسمها طاسة الرعبة

وعطنا وش يصير معاك يا الصقار

[الدحبول]

انصحك تشيك على الكويلات أو البخاخات لانه عندي نفس موترك
بس بعد الختبارات بشيكة
انصحك تغير فلتر الهواء الاصلي ب 70 يركب من 1981 إلى 1997
فلتر بنزين
أسلاك البواجي ب 280 أصلية تركيبة 40 ريال إلى 50 ريال
وإذا مانفع سوى فحص كمبيوتر
هل تولع عندك لمبة مكينة برتقالية مكتوبة تحتها تشيك

[عاشق الفيضة]

أخوي شاهين2004 هل شيكت على زيت القير ترى إذا كان تعبان الزيت
يكون العزم ضعيف ولا تنسى فلتر زيت القير غيره مع الزيت
تقبل تحياتي

[ولد وايل]

اخي الكريم كم تحط هوا الكفرات .............

[نجم وسماء]

ياليت تساعدوني في مشكلة سيارتي اخاف يكون من القير( تماتيك )

للاسف القير ما يغير ابد يمشي بالواحد وتطلع لي في الطبلون اشارة o/D off
مع اني غيرت زيت القير والفلتر لكن ما نفع

[ولد وايل]

اذا اللمبه والعه هذي لمبة الزر اللي بالقير صح اتمنى ضغطها والتاكد

اذا ما زبتط معك افصل البطاريه قبل ما تنام واشبكا اذا صحيت وجرب اي شي راسلني عالخاص ومن عيوني

[نجم وسماء]

أخي الفاضل ولد وايل حفظك الله
نعم اللمبة التي بالقير اذا كنت ماشي تولع وتطفي لكن اذا ظغطت عليها تكون والعة على طول

[نجم وسماء]

أخي الحبيب فصلت البطارية ثم شبكتها الصباح لكن الطريقة لم تنجح
ياليت اراسلك على الخاص لكن اعتقد مشاركاتي قليلة جدا ولذلك حجبت عني الرسائل الخاصة من قبل الادارة

[أبو مها]

يالحبيب شاهين ننتظر علمنا وش صار معاك

[الشاهين2004]

شكرا للجميع المرور وشكر خاص لمن ابداء النصيحه وابشركم لقيت الخراب من البواجي والاسلاك وغيرتهم وصار كل شي تمام . تقبلو تحياتي

[أبو مها]

الحمد لله انها تمام
وحنا بالخدمة لجميع الاخوان