من خبيب الريم تغطيه لسباق المزايين ((( صور)))

[((( الحر)))]

الحاقاً لموضوع اخوي عروان عن اقامة سباق المزايين للابل البكار والقعدان في منطقة خبيب الريم وبالتحديد في مزرعة لامير محمد بن سعود الكبير على طريق الرياض الطائف...!!!

ذهبت يوم الخميس الموافق 20/8/1424هـ بعد الظهر الى الموقع ووصلت قبل صلاة العصر الاذواد والاحواش على يسار الخط عند كبري مخرج خبيب الريم قبل مزرعة الخالديه ومنطقة السباق يمين والمدخل حق المزرعه طريق سيدين فيه نقطة تفتيش...!!!
ومن يوم وصلنا والعالم زحمه الله لايوريك ناس على رجليهم وناس بالسيارات واقفين على الجسر تشوفهم قبل تاصل المخرج بكيلوات...!!!
وحنا نجي وندخل مع العالم الي بالسيارات وعدد السيارات الي تنتظر الدخول حوالي 200سياره او اكثرومحل السباق بعيد عن الطريق حوالي 3 كم يعني لازم تروح بسيارك والشرطه حاطين نقطه من داخل المزرعه ولا يمر الا سياره ورى سياره بس وبكذا صارت الزحمه الي كأنك بالدائري حق الرياض وصار اغلب الشباب يقفون سيارتهم على الخط السريع ويروحون على رجليهم للنقطه ويركبون مع السيارات الي تطلع من النقطه وتدخل المزرعه وتشوف السيارات والفزعات والله بعض السيارات الحوض ماتاخذ غير مافيه من الركاب بالحوض والجيوب وحتى الوايتات وكأنك تشوف ايام الحج حتى ان بعض اهل السيارات يقولون توصيل بخمسه ريال...!!!
بعد حوالي ساعه الا ربع دخلنا من عند النقطه ثم انطلقنا الى الموقع حق السباق ووصلنا وصلينا مع جماعه هناك ودخلنا الى الموقع والعالم معنا مثل السيل وطبعاً فيه تنظيم وتوزيع للمسابقه ممتاز لانهم حاطين شبوك كبيره بمساحة حوالي 100×100 وكل شبك فيه لون من الابل
الوضح ....ثم ....المجاهيم....ثم....الصفر....ثم....الشعل والحمر
وكل شبك مقسوم قسمين قسم قعدان وقسم بكار
وامام كل شبك خمسه شبوك صغيره فيها الفائزين من 1 الى 5
يعني فاز...
خمسه من الوضح قعدان الاول بشبك والثاني بشبك........الى الخامس
وخمس من الوضح بكار
وخمس من المجاهيم قعدان
وخمس من المجاهيم بكار......وهكذا الى نهاية الشبوك.....

تمشينا ومرينا على كل القعدان والبكار الفايزه بالمسابقه وصراحة حضور كثيف بالمره والعالم على بعض وكل شبك تلقى العالم عليه زحمه يناضرون ثم يروحون للي بعده والتصوير والكمرات كثيره...!!!


فيه شبك للمجاهيم مفتوح والناس ماصدقوا خبر ويدخلون يتمشون فيه ويتفرجون على البكار ولا يطلعونهم الا بسيارات الشرطه...!!!

حاولت اعرف اسماء الي فازو بالمسابقه ولاكن ماعرفت احد واغلب الي موجودين اسالهم مايعرفون لاكن اعتقد ان فيهم دواسر ومطران وسبعان ...!!!

الشرطه رايحه جايه بالموقع للتنظيم ومن قبل المغرب بشوي وهي تطرد الناس تبيهم يطلعون...!!!
وفي مقابل الشبوك الجوائز للفايزين واقفات صف سياره ...
5 جيب شاص اللون ابيض
5جيب شاص اللون بيج
5جيب ربع ابيض
5جيب ربع بيج
دداسن غمارتين وغماره حقيقه ماعديتهن
وخلفهن ثلاث او اربع تريلات محمله شعير
ومع غروب الشمس حركو الناس وطلعو بنفس طريقة الدخول سياره سياره
ووقفنا بالنفود الي جنب المزاحميه وصلينا المغرب والعشاء وسمرنا هالك الليله الى الساعة 11 وسرينا وسلامتكم.....!!!

مشاهدات من السباق الرحله.......
اغلب الي جو متاخرين مادخلو لان الشرطه سكرت البوابه0
افراد الشرطه اخلاقهم تجاريه الظاهر انهم من الفجر وهم على رجليهم واقفين وينظمون السير 0
دخولنا من المواقف الى منطقة السباق من فتحات تحت الشبك مافيه بوابات... وياولد امسك عقالك0
تواجد بالموقع ولد الامير محمد بن سعود الكبير والله ماعرف اسمه...
اذا ركب الشباب بالسيارات علشان توصلهم الى السباق او الى البوابه بالاحواض تسمع منهم عبارات غريبه يستحون يقولونها وهم يمشون....... ليش
اغلب الحضور بالزي الرسمي ( ثوب وشماغ ) لان فيه دعايه منتشره ان الدخول لازم يكون بالزي الرسمي...!!!
الي بالبوابه كثير والي بالمواقف اكثر والي داخل بالسباق عالم كانهم سيل... سبحان محصي خلقه..!!!.

بعد ماسمرنا ومشينا من موقعنا بالنفود حوالي 20 كم اكتشف احد الشيبان الي معي انه ناسي جواله بمحلنا واضطرينا نرجع ... والشرهه على عياله المفروض يربطون جواله بثوبه...ههههههههه...!!!
هذا ماوجدت وتحياتي للجميع ...!!!

وهذي الصور ارجو ان تحوز على اعجابكم...!!!

دخول لموقع السباق
http://www.mekshat.com/pix/upload/images2/w1.jpg

تجمهر على الفائز الاول من الوضح
http://www.mekshat.com/pix/upload/images2/w3.jpg

حضور كثيف
http://www.mekshat.com/pix/upload/images2/w4.jpg

0
0
يتبع

[((( الحر)))]

0
0
تابع لما قبله

الاولى من الصفر
http://www.mekshat.com/pix/upload/images2/w7.jpg

الخمس الاوئل
http://www.mekshat.com/pix/upload/images2/w8.jpg
الخمس الاوائل وضح
http://www.mekshat.com/pix/upload/images2/w13.jpg

الخمسه الاوائل من المجاهيم
http://www.mekshat.com/pix/upload/images2/w14.jpg

ايضا الخمسه الاوائل من المجاهيم
http://www.mekshat.com/pix/upload/images2/w15.jpg

لم تفوز بالسباق وراعيها زعلان بالمره
http://www.mekshat.com/pix/upload/images2/w16.jpg

0
0يتبع

[((( الحر)))]

0
0
تابع لما قبله

التسريحه حلوه ولاكن ماشفعت له بالفوز
http://www.mekshat.com/pix/upload/images2/w19.jpg

الاولى
http://www.mekshat.com/pix/upload/images2/w20.jpg

ماشاء الله الاولى والله تستاهل.
http://www.mekshat.com/pix/upload/images2/w24.jpg

الخمس الاوائل
http://www.mekshat.com/pix/upload/images2/w25.jpg

جانب من الجوائز
http://www.mekshat.com/pix/upload/images2/w27.jpg

جانببين من الجوائز جيوب شاص وربع
http://www.mekshat.com/pix/upload/images2/w28.jpg

جانب من الجيوب شاص وربع
http://www.mekshat.com/pix/upload/images2/w29.jpg

جانب من الدداسن وفي الخلف تريلات الشعير
http://www.mekshat.com/pix/upload/images2/w30.jpg

وتقبلو تحياتي

اخوكم ((( الحر)))
21/8/1424

[المري]

ماأقول الا الله يرحم والديك ويخليك لعين ترجيك


عسى الله انك ماقصرت اخوي ((( الحر ))) وكثر الله من امثالك...


بس صور المجاهيم ماصورتها زين مصورها وراسها في الحوض...


ماشاء الله على الصفر


وماشاء لله على ذا الاوضح

اخوي ((( الحر ))) لنا قعود كان مع القعدان المجاهيم بس ماحالفه الحظ ورجعناه


أمس للشرقية ... وخيرها بغيرها...


اخوك / المري

[ابو عمر اللاحم]

يا علك تسلم يا ابو محمد على هالتغطيه الشامله والله يجزاك خير و ما قصرت .

بس عساكم لقيتو جوال الشايب .

تقبل تحياتي ،،،،

[معمرها]

......بسم الله الرحمن الرحيم........



السلام عليكم ورحمة الله وبركاته .............


ــــــــ:: يعطيك ألف عافيه اخي

((( الحر)))


على نقلك الحدث الجميل
مع صور كمان هذا الجميل منك


شـــكـــراُ

[حفرلوجيا]

الحقيقة تمنيت من الجوايز اللي شفناها ( وحدة على الأقل ) لأخوي الحر .. ليش؟
يمين بالله تصورت بعد اطلاعي على موضوعة ذا إني كنت معهم ( بموقع الحدث ) .. مع اني ماعتبت خبيب الريم ..
شرح معلوماتي شبه كامل حتى عن مايدور بين جمهور الحضور..
كل صورة ( بغض النظر عن الجودة ) تتضمن موضوع .. وتعطي معلومات .. وشرح مناسب عليها..

خاص لأخوي الحر :
ياليت هالشيبان ماهم معك .. أكيد هم اللي ماسمحوا لك تروح للجنة السباق عل شان تنشب بنحورهم ويعطونك البيانات الرسمية حول المسابقة والفائزين ..وتحطها بالموضوع .. لكن تدري أشوى إنها ماصارت لأنك لو كملتها مسحت بعض صحفنا البلاط وزعلوا .. اللي مايجيبون لنا تحقيق متعوب عليه..

عاجل لاخواننا المشرفين
حطوا بالكم لاتخطف جرايدنا أخونا الحر .. وقعوا عقد معه .. وأقترح مقدم العقد البكرة اللي فازت بالمركز الأول
يستاهل ونص

[صقر]

تسلم اخوي (((الحر))

تغطيةوافية شاملة وبارك الله فيك.

مشكور وبارك الله فيك..

[قتال]

السلام عليكم ورحمة الله وبركاته ،،،

تسلم أخوي ((( الحر))) على السبق الصحفي ..

وعلى السرد الرائع للموضوع .. مشكوور يا الغالي ..

[ابو سلطان العتيبي]

أخي ((( الحر )))

عز الله انك حر، أسم على مسمى

سلمت يمينك على الكتابة والصور المتسلسلة.

جزاك الله خير.

بس ليش زعلت أخونا المري ولا صورت له المجاهيم زين !!!
مري ومجاهيم وش خليت !!! والله والنعم.

ويالمري خيرها بغيرها و ان شاء الله يفوز قعودكم او غيره في مسابقة أم رقيبه الجاية.

اخوكم/ عقاب

[ميراج]

حر على اسمك بيض الله وجهك

انا رحت يوم الخميس ورجعت لانه ممنوع الدخول قبل الساعه ثلاث العصر ولا قدرنا نشوف الا اللى برا

انا عندى قعود ثنى رفضو يدخلونه يقولون انه ما يقبل الا من جذع ونازل.

بعد موضوعك كنى داخل للعرض ما قصرت

تقبل تحيات اخوك ابو طارق

[عبدالعزيز الدباسي]

تسلم يمينك يا ابو محمد على هذا الرصد الرائع للمهرجان ،،، والحقيقة مثل ما تفضل اخونا حفرلوجيا انك تستاهل وحده من هالجوائر .

بارك الله فيك وما قصرت يالغالي .

[نقا هشال]

اخوي ((( الحر)))

يعطيك الف عافيه

تغطيه ممتازه

ماقـــــصرت

[ابو ســــاره]

بدايتاً احب اهني اخونا الحـــــــــــــر علي هّذا التحرير الصحفي الذي لم اراء مثله حتى في الصحف عن الابل .
كما اود ان اطرح استفسار عن موضوع مزايين الابل حيث انه سبق وان رحت بالوالد الله يحفظه لمزايين الابل الي كان بطريق الحفر قبل كم سنة بس بصراحة ما كنت اعرف وش السالفة وكان مثل ما قال اخوي الحر زحمة عالم وما عرفنا وش الطبخة والسؤال الي ابغاء اسئلكم اخواني علي اي اساس يتم تقييم الابل .

والله يحفظكم ويرعاكم ،،،

[((( الحر)))]

بارك الله فيكم جميعاً والله ان الجهد والتعب والخساره تهون علشانكم ولاجل عيونكم تكرم كل المدن...!!!

((((((اخوي المري)))))))
تسلم وبارك الله فيك ومالك علي يمين اني مهتم بصور المجاهيم خاصة لاني اعشقهن لاكن اغلب تصويري لهن بالفيديو ونسيت الثابته لان الكمره الي معي فيديو وتلقط ثابت لاكن لعل الصوره الي بعدها تشفع شوي... بعدين مالك حق ماعلمتني انك هناك وداخل السباق بقعود.. على العموم اسال الله ان يوفقكم للفوز بالمرات القادمه...!!! وسلامك

(((((( اخوي نهار)))))))
تسلم وبارك الله فيك والجوال حق الشايب لقيناه على وجهه بالرمل وكثرنا التعليق على الشايب وقال وش يرضيكم العشاء على حسابي وعزالله انه ماقصر...!!! وسلامك

0
0
0
يتبع

[((( الحر)))]

(((((اخوي معمرها))))))
بارك الله فيك اخوي على تعليقك المميز في جميع خيام مكشات...!!!

((((((اخوي حفرلوجيا)))))))
وين يالغالي حطيتني بالسماء الله يرفع مقدارك هذا والله بعض ماعندك بارك الله فيك ويارجال لاجلكم ولاجل منتدى مكشات نرخص الغالي...
وبعدين شكلك حولنا وش دراك ان هالشايب عالني تقول وراه رحله بالمطار يالله يالله مشينا ويالله حنا وياه طلابه...!!!
0
0
0
يتبع

[((( الحر)))]

(((((اخوي صقر)))))
مشكور يالغالي وبارك الله فيك...!!!

(((((اخوي قتال)))))))
الف شكر يالغالي وبارك الله فيك...!!!

[((( الحر)))]

((((((اخوي عقاب )))))))
مشكور يالغالي وهذا من طيبك وترى المري غالي علينا جميع وياليتني محقق الي يبي لاكن على قولك خيرها بغيرها...!!!

(((((( اخوي ميراج )))))))
تسلم يابو طارق وخيرها بغيرها ولعلك تفوز بالجايات مشكور يالغالي...!!!

[((( الحر)))]

(((((((((((((((((((((((( شقردي))))))))))))))))))))
ابو عبدالله والله ماودي ارد عليك زعلتني وفشلتني المح ابزورك وقلت هالموعد له سنه خلاص جدده ياخي ولا ترى ابزعل ............ مشكور ابو عبدالله على التعليق ونشوفك قريب.........وسلامك...!!!

[((( الحر)))]

(((((((( نقا هشال)))))))
مشكور يالغالي وبارك الله فيك....!!!

(((((((اخوي ابوساره))))))))
هلا حياك الله ومشكور على هالاطراء الرائع...
السباق الي بالموضوع هو سباق المزايين من الابل ابكار وقعدان الى عمر محدد وكل لون له خمس فايزين...!!!
والسباق الي بام رقيبه قبل الحفر هذا سباق للاذواد ويقام بعد العيد انشاء الله...!!!
تحياتي للجميع
اخوكم((( الحر)))
22/8/1424

[ذيب البر]

عز الله ما قصرت بيض الله وجهك

والله ان كني حاضر نقل اكثر من رائع وتصوير اروع


لكن عندي سؤال عن الكاميرا ان كانت نيكون في نفس المشكلة الي عندي سبحان الله

تصور بالنهار كانك مصور بالليل بعض الصور مظلمة وتحتاج فلاش حتى بالنهار

وان كانت نوع ثاني فهذا شي ثاني

تحياااااااااااااااااااااااااااتي

[دغيم]

أخوي الحر
بيض الله وجهك ولك منا كل الشكر على هذا المجهود الرائع سلمت يمنك

[((( الحر)))]

((((((( اخوي ذيب البر))))))))
بارك الله فيك مشكور على مرورك وبخصوص نوع الكميره فهي كمرة فيديو سوني رقميه وفيها تصوير ثابت رقمي طبعاً...... وسلامتك0

(((((( اخوي دغيم)))))))))
ومن يقول بيض الله وجهه وتسلم بارك الله فيك...!!!

[صقر]

اخي ((( الحر)))

يبدو انك ما فهمت سؤال العضو (ابو سارة) وهو:

ما هو مقياس الجمال لدى هذه الابل؟؟

ارجو السموحة على المداخلة.

بارك الله فيك...

[سرحان]

بيض الله وجهك والله ماقصرت

[الحوّام]

عز الله انك ماقصرت

تحيات
الحوّام

[al-nashmi]

اخونا الحر ............

عفاك الله على هالتقرير الوافي عن المزاين... وبيض الله وجهك.

ومشكور ياخوي علىجهدك الكبير اللي قمت فيه.

ونا احب الابل واحب اهلها وخاصه البل الزينه ، مع اني لاملك ابل واتمنى من الله ان يرزقني بذود مجاهيم
ولا صفر مستقبلا.

وكنت مخطط على ان احضر هذا المزاين يوم الخميس ولاكن ما قسم الله جاني مسايير ونشغلت معهم.

ولكن بعد هذه صور كاني حاضره...... الله يبارك فيك...

وتقبل تحيات اخوك / النشمي

[عاشق الصفاري]

تسلم أخوي ((( الحر))) على السبق الصحفي ..

تغطيه ممتازه

ماقـــــصرت

[((( الحر)))]

((((( اخوي صقر))))))
كلامك على متمه واذا كان سوال ابو ساره عن المواصفات الجميله للبكار والقعدان والتي تؤهلها للفوز فهي مواصفات اغلبها دقيقه للعيون والانف والاذان والنحر..........الخ...!!! مما يطول الكلام فيها واذا ساعدني الله راح انزل موضوع كامل عن مواصفات الجمال عند الابل قريباً...!!! وسلامك

((((((( سرحان)))))))))
بارك الله فيك وتسلم والله...!!!

[((( الحر)))]

((((((( اخوي الحوام))))))
تسلم والله وبارك الله فيك...!!!

(((((( اخوي النشمي)))))))
أسأل الله العلي العضيم ان يرزقك ماتتمنى من الابل وان تكون عون لك على طاعة الله ... تسلم يالغالي على الرد......بارك الله فيك...!!!

[عريدان]

http://www.nsayem.com/vb/showthread.php?s=&threadid=2702

[عروان]

أحسنت اخوي الحر


صراحة تغطية جميلة سبقتني بها. أنا كنت موجود هناك من الاربعاء الى الجمعة وحضرت المزاين وكان لي صور بسيطة.


أن شاء الله راح أنزل موضوع في النتائج النهائية للمسابقة مع صور الاوائل.


تحياتي لك و يا ليت تشرفنا بشوفتك و نقوم بكرامتك.


الله يحفظك.

[((( الحر)))]

((((((اخوي عريدان)))))
مشكور على الرابط وزيادة الخير خير...!!!
وياليت تعلمني انت الي مصور او غيرك تحياتي...!!!

(((((((اخوي عروان)))))))
تسلم والله يالغالي وهذا والله من كرمك وفي انتظار موضوعك بارك الله فيك...!!!

تحياتي
((( الحر)))
29/8/1424

[عريدان]

السلام عليكم ورحمة الله وبركاته
إخواني / أخي (((الحر))) لم أكن من قام بالتصوير مع أني كنت أتمنى ذلك ولكن أحببت أن نزيد الخير خيراً.
وفقنا الله لما يحب ويرضى.

[ابو عايد]

الرسالة الأصلية كتبت بواسطة صقر
تسلم اخوي (((الحر))

تغطيةوافية شاملة وبارك الله فيك.

مشكور وبارك الله فيك..




مشكور والله اخي العزيز والغالي الحر

على هذا المجهود الرائع الذي بالفعل تشكر عليه بالفعل

ويعطيك العافيه والله لا يهينك ومن احسن الى احسن

وتقبل تحياتي // العاشق الولهان

[الشقاوي]

الأخ الحر ولد الحر يعطيك الف عافيه
لاكن يبدولي انك مارحت لموقع العرض
ليييييييش ماطلعت في عرض الصور وفيما يبدو لي والله اعلم انك قاعد مغير فروخ حمام ومرقي في
ها الدكة عند ( م ن ف و ل ): ولك مني خالص التحية,,,,,

[نيسان2004]

شكرا موضوع جيد

[Nassr]

مشكوور الله يعطيك العافيه

http://uaesm.maktoob.com/up/uploads/fdd7e6f0a4.jpg

[نور المبين]

تغطية الرائعة

[صالح الاحمد]

يالربع

المزاين عام 1424 هـ

[oالحربيo]

اخوي المبدع ((((الحـــــــــــــــــر)))) اسم على مسمى ولاهنت على النقل
ونتــــــــــــضر التغطيه القادمه لم رقيبه .....