شباب الفزعه تكفون عمود الكرنك طاح [الأرشيف]

مشاهدة النسخة كاملة : شباب الفزعه تكفون عمود الكرنك طاح

ناوي نيه

10/02/2008, 12:53 AM

السلام عليكم
عندي جمس ونيت وعمود الكرنك طاح من وراء والمشكله يوم نزلت تحت السياره
ابي اربطه لقيت العمود متعدي الدفرنس الخلفي يعني متعدي القاعد حقته ودفيت العمود على داخل
دخل وجا على مكانه مدري هو كذا
واخاف انضر شي ثاني والله لايهينكم داخلن على الله ثم عليكم
جمس مديل 2002

.أبوعبدالرحمن

10/02/2008, 06:44 PM

اتمنى تراجع لك ورشة مظبوطة

ايضا اتمنى من اهل الخبرة يفيدونك

لن أمل من العطاء

10/02/2008, 08:23 PM

يا حبيبي هذا عمود الكردان

عمود الكرنك يأتي داخل المحرك ولا يمكن يخرج من المحرك او يطيح

طبيعي جدا كل السيارات كذا يخرج من مكانه خاصة اذا كان دفع رباعي

اعيد لك هذا اسمه عمود الكردااااااااااان

لن أمل من العطاء

مكشات عنيزه

10/02/2008, 09:02 PM

السلام عليكم اخوي
انت مشكلتك اولا مع عامود الكردان
وعامود الكردان ما يطيح الا بحالتين يا الصليب خربان ولا انه انكسر
واستبعد الاحتمال الثاني لانه صعب وقوعه
فاذا كنت تبي الشور دق على صطحه ولا تحركه
لان فيه احتمال انه يطيح وانت تمشي فيمكن انه ينحاس توازنه
و يمكن يحوس شي داخل القير
و يمكن شي داخل الدفرنس

أسد تميم

10/02/2008, 09:30 PM

Abu Saad

10/02/2008, 10:44 PM

عمود الكردان : من القير للدفرنس الخلفي ويرى بمجرد القاء نظرت تحت السيارة .
عمود الكرنك : داخل المكينه وهو الذي يقوم بتحريك البساتم طلوعا ونزولا وعليه السبايك .
، بخلاف عمود البلوف الذي تحت الغطاء والخاص بتحريك البلوف طلوعا ونزولا .

نرجع لعمود الكردان وهو المقصود عندك ، طيحته نوعين النوع الاول هوين والنوع الثاني خطير جدا .
طبعا مايطيح الا اذا انكسر الصليب الي ماسكه بالكارونه حقت الدفرنس الخلفي وهذي هي الكسره الهينه يعني الموتر تطيح عموده وتسحب بالارض من جهة الدفرنس الخلفي ولكنها لاتزال متصله بالقير .
الطيحة الخطيره انه ينكسر الصليب الامامي الي ماسك عمود الكردان بالقير فعندها وخصوصا اذا كنت مسرع ممكن يحدث عمليت شقلبه فوق تحت (انقلاب للسيارة) حمانا الله وياك والقارئي .
وغالب حالات كسر الصليب تكون في الامريكي وقليله في الونيتات اليابانية .
ولتلافي هذه المشكلة يقوم اهل الجموس ( ايام زمان) بوضع حديده مقوسه تربط من تحت بحيث تكون تحت عمود الكردن متلقفه لها فيما لو طاحت بحيث ماتقلب الموتر ، وبعضهم يحط سلسلة .. الخ .
اتمنى اني اعطيتك نبذه ولو بسيطه .. وليس الخبر كالمعاينة .
والسلام عليكم

ناوي نيه

10/02/2008, 11:12 PM

يعطيكم الف عافيه وكلكم ماقصرتو وانا الحمدلله يالله يالله لقيت القطعه المنكسره والثانيه منعفطه ومالقيت
انشالله بكره بروح التشليح واللحمدلله انا الحين ركبته بس امشي شوي شوي لين الاقي القطعه الثانيه
وشكرا على التنبيه انا مدري ليش الى الان ماسكه كرنك هههههههههههه
وماقصرتو شباب كفيتو ووفيتو

الدحبول

12/02/2008, 11:59 AM

الحمد الله على سلامة وماتشوف شره انت ويلي ركب معك
انصحك تمشي عليه إلى الورشة ولا تسرع عليه أكثر من 60
هذي بسبب إهمالك تغير الصليبات هذي لابد من تغيرها في حال ظهور صوت طقطقة يوم تمشي
ويفض تشيكة كل ماتغير زيت
من ناحية التسمية
عمود كردان
عمود شفت

شروكي ربع

13/02/2008, 04:43 PM

افادوك الشباب ..

وبالنسبة انت تقول انك لقيته متعدي الدفرنس , هذا طول الله عمرك في العمود نفسه ..

يجي فيه مساحة بسيطة تقدر تطول العمود وتصره على حسب موترك ..

وممكن حطوها للي بيرفع الموتر او اذا كان هناك اختلاف في الصنع بسيط .

بحيث ان ممكن يكون دفرنس متقدم في موتر ومتأخر بموتر آخر ..

وبالتوفيق يالغالي ..

ناوي نيه

13/02/2008, 11:21 PM

يعطيكم العافيه بيض الله وجيهكم
الحمدلله لقيت القطعه في التشليح وركبته بس احس اذا حطيته بول احس فيه زي الرجه وانا امشي
تصدقون ان التشليح اغلى من الوكاله القطعه في الوكاله 17 ريال التشليح قديمه ب25 ريال

الدحبول

14/02/2008, 12:28 PM

شيك على كرسي القير
والصليبات
أو القطعة يلي من تشليح