مكشاتي يعترف : اكتشفت بالكشتة ادماني.. والسبب شوكت بستاني

[حفرلوجيا]

سلام يالربع
سنة ربيع قال صديق منعم الله عليه بكثر القروش نبي نكشت خمس أيام بالإجازة .. قلت موافق .. لكن علموني بقطتكم ووش المطلوب مني .. ( ضحك راع الفلوس ) وقال ماعليك الأمور منتهية وبعدين نتفاهم !!!!
جيتهم مجتمعين نبي نمشي ومعي فراشي .. ضحكوا وقالوا وش انت جايب ؟! .. عمى .. جايب كعك!!.. وش انتم شايفين فراش البر؟!.. قالوا ماتحتاجه .. الفرش كثيرة قدامنا مع ( شوكت البستاني ) !.. طيب .. نمشي ؟ .. قالوا خل سيارتك نبي نمشي بجيوب اللقزس .. :bounce:
وصلنا للمكان ويستقبلنا العامل الآسيوي ( شوكت البستاني ) .. طاق الخيام ومزهب كل شي .. كنا مسيان ومشتاق أبدهر بطبخ عشانا .. قالوا خل عنك .. شوكت يجهزه ( الظاهر شوكت ذا يبي يصير مالتي سستم .. يسوي كلش )..
جيت أتلقف أشوف شوكت وش يطبخ .. وأول مادخلت خيمة الطبخ وهو يهوجس ( سارح ) .. ومدخل أصبعه يدور شي(ن) بأقصه خشمه .. مثل مايسوون بعض الناس بوقفتهم عند اشارات المرور .. ( الله يحوم كبده هو ماهو اللي يكتب )..
طابت النفس وطلعت من عنده .. لكني حسيت بقشعريرة وغثيان وعيوني تزغلل .. وأتحكحك.. صار عندي مثل أعراض المدمنين :looney: ..( يمكن ذا نشقني شي وأنا ماأدري ؟ مستحيل ؟ ماشفت شي!.. وزادت حدة الأعراض ..
وأتذكر اننا اللحين الساعة تسع بالليل .. وأنا إلى الآن ماسمعت القدر الكاتم يصفر و( يتشتش ) .. ايه اللحين عرفت ..لأني بالبر أدمنت هالصوت .. عاد رجعت لشوكت وأنا اتحكحك .. بسرعة ماعندك كاتم.. قال لا .. وأضاف ( ومن واقع الخبرة الهيس ) انتا فيه مخدرات .. اعقب .. لكن ماني حوله ..
وأشوى يتفتق الذهن عن الحل ( الحاجة أم الاختراع ) .. نصيت السيارة المتشطرة وأمسك لي عود رمث وأجلس تحت الكفر انسمه ..( تششششش ) .. وأشوى ( تنعنشت ) وحسيت ان قبالي قدر كاتم أدهر به:good: .. عاد عند مابنشرت الكفر ( وأخذت الجرعة اللازمة ) تنهضت منتشى ومستحي .. خاصة يوم شفت هالشوكت قاعد يرصدني ويضحك ( مسك علي ذلة ) ..:(
قمنا الصبح وإلا شوكت مجهز لنا الماء الدافي ( قلت مالتي سستم ) توضينا وصلينا واكتشفوا الربع ان الكفر مبنشر .. ويلخسني الخبيث شوكت وحنا نصلح الكفر .. وأشوى مافضحني ..
جاء عقب الظهر وقلطوا الغداء .. واستدنيت التمر قلت لهم : ماأبي غداء هالطمل .. ويطير شوكت علي عيونه .. وأسكت ( تذكرت الساع تسع والجرعة( تششششش ) .. أهب يالبستاني (مروج ) أموره حتى بالبر .. عاد انا تراجعت وقلت : أمزح مانيب مشتهي ( ياشين كسرة العين )..
جاء الليل وبدت الأعراض وأنصى الوكر ( أقصد الكفر ) وهات يا( تششششش ) ..( ياللنشوة .. برجستون يعطيك أكثر ) :good: ..ولا من شاف بس شوكت دري ..
وعلى هالمنوال .. نقوم الصبح وشوكت مجهز كلش .. ونصلح الكفر .. والربع شاكين انه جني ( وأشوى معهم منفاخ والا كان الإدمان ودانا التهلكة ..
اليوم الأخير مليت وقلت ماتبون ( نريح شوكت ) ونسوي الغداء .. قالوا ريح بالك وحنا أكلف ماعلينا ( الله يكرمكم ) نتاغر .. تعال تاغر معنا!!!!
امحق كشتة اللي البرنامج رايح مابين تبطح وتجضع ومتاغر والكيف ( تشششش ) كفر ماهو قدر .. وحوف شوكت ..
وعند رجعتنا اختلفنا من هو يحب شوكت أكثر .. واتفقنا هم أكثر وأنا أتعس أاكثر.. ( ياولد ذا حفرلوجيا وإلا أسير الشوك ) :p .. لكن ماهي ذي المشكلة .. المطب اللي أنا فيه إن أم العيال متعودة اجي من البر ( حرش ) .. أغبر أمشق أعفن أشرس ... واللحين انا راجع أنعم أملح أنظف ألين;) .. يعني من وين جاي ؟! ماهو بر .. أخاف أنك ( مسير ) يا( الحرش ) .. بس ذي لقيت لها حل أخلي الربع ينزلوني بطرف الديرة وأتمرغ بالتراب كود تظهر علي وعثاء الكشتة..
عاد تبون الصحيح وش حلاة البر والكشتة وانت اللي تقوم بكل شؤونك بنفسك .. أنا هاج عن الديرة والوغدان والعمال .. أقوم أجيب لي عامل شوكة بحلقي ..
وسلامة الجميع

[نجمة سهيل]

صراحه شغل المطرسه:D حقت هالهنود والباكستانيين ماتجوز لي ،

طالع عمرك ان مازينت قهوتك وشاهيك وطبخك وكل شييك ... تعاونتوا عليهن انت وربعك وكرفت وتحس ان هالكرف فيه متعه ،

تحس انك طالع للبر ومستانس ، اما شغلت اجيب واحد يطبخ وواحد يغسل هذي ماتصلح:no2:

[desprado]

ما فيها شي تاخذ واحد يساعدك بس مو تخليه يسوي كل شي

[أيمن]

لا يختلف اثنان في روعة ما تخطه يمينك - أستاذنا العزيز حفرولوجيا - مما يجعلنا نبارك لأنفسنا بانضمام أمثالك ممن يملكون قلمًا سيالاً وقادًا يطرح الفائدة والفكرة بقالب جذاب مهذب محبب للنفس مما يجعله أدعى لقبوله والعمل به ..
فسر على هذا النهج مباركاً مسددا ..

تحيتي

[صقر]

الرسالة الأصلية كتبت بواسطة أيمن
لا يختلف اثنان في روعة ما تخطه يمينك - أستاذنا العزيز حفرولوجيا - مما يجعلنا نبارك لأنفسنا بانضمام أمثالك ممن يملكون قلمًا سيالاً وقادًا يطرح الفائدة والفكرة بقالب جذاب مهذب محبب للنفس مما يجعله أدعى لقبوله والعمل به ..
فسر على هذا النهج مباركاً مسددا ..

تحيتي

[((( الحر)))]

الرسالة الأصلية كتبت بواسطة أيمن
لا يختلف اثنان في روعة ما تخطه يمينك - أستاذنا العزيز حفرولوجيا - مما يجعلنا نبارك لأنفسنا بانضمام أمثالك ممن يملكون قلمًا سيالاً وقادًا يطرح الفائدة والفكرة بقالب جذاب مهذب محبب للنفس مما يجعله أدعى لقبوله والعمل به ..
فسر على هذا النهج مباركاً مسددا ..

تحيتي

اخوك((( الحر)))
12/9/1424

[الاجودي]

موضوع فله وكلامك صحيح

بس سؤالي هل انت من حايل ولا لا

[دغيم]

أخوي حفرلوجيا
الله يخليك لمن يحبك ويحتاج لك ولنا يأهل مكشات لانك بصراحه توسع صدورنا في ها الكتابه الجميله
وأقول لك شي إذا ماسويت كلش بنفسي أنا وأخوياي وإلا فلا لاكن تغسيل المواعين هو الي ماأحب أسويه
وهذا يخليك تحتاج للعامل بعض الاحيانوخاصه أذا صار المكشات قريب.

[al-nashmi]

الرسالة الأصلية كتبت بواسطة دغيم
أخوي حفرلوجيا
الله يخليك لمن يحبك ويحتاج لك ولنا يأهل مكشات لانك بصراحه توسع صدورنا في ها الكتابه الجميله
وأقول لك شي إذا ماسويت كلش بنفسي أنا وأخوياي وإلا فلا لاكن تغسيل المواعين هو الي ماأحب أسويه
وهذا يخليك تحتاج للعامل بعض الاحيانوخاصه أذا صار المكشات قريب.


وتقبل تحيات اخوك /النشمي

[Khalid AlGhamdi]

جزاك الله خير وسعت صدورنا :D

[حفرلوجيا]

أخوي نجمة سهيل :
شكرا .. ومعك على نفس التردد ومايفقع مرارتك الا اللي قلت عنهم ومطرستهم ..
أخوي desperado
شكرا .. وماودي أقولك لا بس الإستثناء الوحيد لجيبة العامل هو رحلة الصيد اذا كنت ( شوزنجي ) .. بس بشروط 1- تتوقع الصيد كثير وبهالحالة يعيقك النتف .. يقوم هالشوكة هو اللي ينتف .. 2- تعقبه بتشييك تنظيف الصيد .. ماعدا ذلك .. ينقلع
أخوي أيمن :
شكرا .. تبي الصراحة أول مرة أبلش ماأدري وش أقول .. لكن عباراتك تنم عن شخصية محبة متزنة ... ومجاملة .. أقدر لك كل حرف كتبته..
الأخوان صقر .. والحر
أشكركما .. عقدتما لساني .. أقدر لكما ذلك الإطراء .. ومني الدعاء لكما بكل ماهو خير..
أخوي الأجودي :
شكرأ .. مالك لوا ماني من حايل ولو اني كغيري من المنصفين .. يشرفني ان أكون بطبوع أهلها حيث الأصالة والكرم .
أخوي دغيم وأخوي al-nashmi :
شكرا .. وياليت صدوركم مستاسعة دوم ... والله اني مانا بعيد عنكم.. بس .. الصراحة يهون تكسير الحصا اذاكان البديل عامل لو هو يذرف نظافة .. ناخذ كلام نجمة سهيل .. وبس
أخوي MaxPower :
شكرا .. ويجزاك بمثلة يالغالي

[شبوب]

الله يرجك بس 00

كله كوووووم و كلمة ( المتااااغر ) كووووووم


يا 00 سرااااااوي

[حفرلوجيا]

أخوي شبوب :
شكرا .. هذا ومقص الرقيب هو الهاجس ولا كان شفت علوم ... المتاغر ( الله يكرم من يقرأ) يصير عندها ( اتيكيت وذرابة وحشمه;)