حقيقة افتتاح خيمة ( كشاته اونلاين ) .. لايفوتكم بث مباشر بدون مشرفين

[حفرلوجيا]

سلام يالربع
حقيقة :
البارح في مجلس قال لي أحد الثقاة المتخصصين ( وهذي فوايد مجالس بدون حش ) إنه قرأ في أحد المجلات المتخصصة موضوعا عن تقنية جديدة ظهرت حديثا ( على نطاق ضيق ) في بعض الدول المتقدمة .. تتمثل في إمكانية الإتصال اللاسلكي ( عن بعد ) بالإنترنت .. يعني يصير جهاز الكمبيوتر المحمول ( وفق مواصفات جديدة) أشبه بالجوال ( تشبيه ضعوف ) .. تتصل بالإنترنت بعد مايشحنونه لك ( أو خل نقول يحطون لك بطاقة ) .. على شرط أن يكون كمبيوترك في منطقة التغطية ( لهذه الخدمة )..
ذلك فحوى ماشرح لي المتخصص الذي أوضح انه من المتوقع قريبا ان يبدأ انتشار هذه التقنية ليتسع نطاقها ..
لكن نسيت أقول لـ( المتخصص ) ان مكشات فيه ( سعالوه ) مايختاهم شيء.. يمكن يفيدوننا بمعلومات أوسع حول ذلك....
حقيقة ( نتمناها ) :
لو توقعنا ان هذه التقنية عندنا ( الله من بطيه ) وان كل مناطقنا تم تغطيتها ( ياهم لالي ) .. يعني معك لابتوبك وانت كاشت وتتصفح المواقع على كيفك وأنت منسدح بوسط الدهناء أو فياض لينه .. أو تشيك على إيميلك وأنت تجضع بفياض الصمان ( مت يا....... )..
حقيقة ( الله لايعوق بشر ) :
طبعا بهالحالة مكشات ( مايبي لها ) يبي يواكب هذه الثورة الاتصالية ويب يحطون لك خيمة اتوقع اسمها ( كشاته أونلاين ) أو ( كشاته لايف ) ماحنا مختلفين .. هالخيمة تستقبل مشاركات اللي كاشتين أو قانصين .. ومركبين ( أكيد ) كمرات بكمبيوتراتهم ( متوفر بها الإتصال عن بعد ) اللي شايلينه بالبر ..
وش توقعون مواضيع هالخيمة .. خذ عندك مثلا :
مشاركة بعنوان ( تمتع برمي الشوازن ) .. هذا عضو يعطينا مشاركة صوت وصورة ( لايف ) وهو يرمي فروق القميري على الساحل .. والردود تجيك مماثلة من مناطق أخرى يورونك كيف يلقطون ويسدحون الصفارى طيار..

مشاركة بعنوان ( كبسة القطا اللحين تستوي ) .. هذا عضو يشرح لنا بعد مانتف القطا وهو بوسط روضة حسناء بالصمان كيفية تجهيز كبستهن بالكاتم .. وينهي مشاركته ( اللايف ) بـ( زوم ان ) على صفيرة الكاتم .. وتجيك الرد( زوم آوت) من ذبايح معلقة يصلخونه شلة وهم بوسط عروق النفود ( كلش لايف) ويقولون خلوكم باللحم يامطاريس القطا ..

مشاركة بعنوان ( عن اذنكم هدينا طيرنا ) .. هذا عضو يتأسف ويقول ودي انتبه لطيري هديته على الحبارى وأخليكم مع رفيقي يتابع لكم بالكمرة من موقع الحدث
وهذا عضو مشارك بموضوع ( لايفوتك انحن نلقط فقع الدبدبة ).... وهلم جرا

الحقيقة المؤكدة :
الستم معي ان رواد مكشات كلهم ( مسنترين ) بهالخيمة وزهدوا بباقي الخيام .. و إن( شقردي ) وبقية المشرفين ( مع التقدير والاحترام ) .. قاعدين يهشون الذبان ..:p :p
ويكررون النداءات تلو الإستغاثة .. واتوقعهم يعلنون :
( عرض خاص : أدخل خيمتنا نكتب لك مشاركة باسمك مجانا ) .. ( لله يامحسنين عضو أو زائر لو هو حقنة يهوش ويتزعل ).. ( يامكشات يابيي اقلع هالخيمة وإلا ترانا مصبحين سوق الجردة باسطين بالخيام )
عاد انا ياواحد ابتربس عند خيمة ( كشاته لايف ) .. وخل عنك المشرفين وخيامهم .. وياسلام لو كانت هالخيمة للأعضاء فقط ويمنع دخول ( المشرفين ) ;) .... ماعدا ( السمح وأيمن مع مكشات ) .. إمعانا في ( التعذيب النفسي للبعض ) ..;) :p
لكن المشكلة اللي أتوقعها ان العضو أول مايطلع من هالخيمة ويرجع لصفحة الخيام .. وإلا هالمشرفين متلاقطيته ( عندي ... عندي .... مد أم الشحم ...) :p ...... .... أقول..... مابقى إلا ( السديريات البيض ):good: :p
وسلامتكم

[السمح]

يازينك يابوسليمان :good:
ويازين مواضيعك اللي تقطر خفة دم
أصبحت هذه المواضيع مثل الواحة في وسط الصحراء
من يشوفها الواحد طيران عليها :D
لأن الواحد يدري إن كاتبها يبي يثلج صدره بكلام مثل المطر على القلب
ما نلحق جزاك ، وعساك على القوة
وعساك واحة لمكشات دايم

أحلى تحية

[المسفهل]

والله يابوسليمان زهدتنا بمكشات وخيامه ... وحقيقة بدأت أسبح في عالم الخيال

وأسابق الزمن وأطوي الأيام طيا فبدأت أعد في نفسي مواضيع لطرحها في

خيمة ( كشاته أونلاين ) ولكني تذكرت أنه : ( يمنع دخول ( المشرفين ) .... ماعدا

( السمح وأيمن مع مكشات ) .. إمعانا في ( التعذيب النفسي للبعض ) ..

فأسقط في يدي وخرجت من هذه المشاركة أجر أذيال الخيبة .

[صقر]

صح لسانك وتسلم يمينك.

مشكور يا حفرولوجيا على هالخيال الرائع.

تسلم وبارك الله فيك..

[((( الحر)))]

اخوي حفرلوجيا والله اني اول ماشوف مواضيعك اهد عليها هدت الطير على الحبارى...!!!
تسلم يالغالي ومشاركه مميزه وجميع مشاركاتك تكتب بماء الذهب...!!!

تحياتي ((( الحر)))
14/9/1424

[بــرق الشمال]

هلا اخوي حفر لوجيا يااخوي احوليت وانا اقراء
كلماتك الرائعه وفكرتك باأسم الخيمه حلوه لا والأحلى
انه يصير باالجوال ياسلام عليك ........:good:

[خشم الحصان]

الاخوه الغالين
في الحقيقه كلام الاخ المهبل والحبيب حفرلوجيا صحيح وليس خيال فلقد شاهدة في احد القنوات وهي
العربيه مقابله مع عالم مصري بس الجنسيه امريكي (هذا وجع خيطان) وهو مكتشف هذا التقنيه
وهي عباره عن حاسب الالي يعمل بواسطة الاقمار الصناعيه وكل ما تحتاج اليه هو البرنامج واريل
صغير يشبك في الحاسب الالي لكي يتم الاستقبال ويمكن مع الوقت يتحقق كلم الاخ الحبيب حفرلوجيا
عن الخيمه البريه
اخوكم
خشم الحصان

ملاحضه
الاخ حفرلوجيا ترا البطن ملبود من النعمه يالله اقوي اتنفس وتبني اضحك ياربيه وش السوات مع
حفرلوجيا:confused:

[راعي الحزم]

هلا والله بالعزيز الغالي خيالك خصب واسلوبك جميل وكل ماتصطره أناملك رائع فشكرا لك على امتاعنا بمثل
هذه الكلمات العطرة والله ان ماقلته ليس مستحيلا فالعالم يتطور يوما بعد يوم وقد مر علينا موقف مشابه لكلامك قبل عشرين سنة عندما كنا نصتاد الارانب ليلا في جبال المدينة فقد كان الاخوة سارح ويطيل التفكير وعندما سألناه عن سبب شرود ذهنه اخبرنا انه يفكر لو ان هناك جهاز يخبرك بمكانك ويدلك على مكان الصيد
من خلال ارقام وعلامات وضحكنا منه وقلنا خلك بأفكارك التي لن تتحقق وبحمد الله هذه البوصلة والقارمن تملا الاسواق فسبحان الله الذي علم الانسان مالم يعلم فلا تستغرب شيئا في هذا الزمن

اخوي ( حفر لوجيا ) استلمت رسالتك وانتظر الرد فأنا كنت مشغولا ولم أقرأ الرسالة الا اليوم

ابشرك انت والأخوان إن الأمور زينة والجو يبشر بالخير فقد من الله على المنطقة بتشكل منخفضين على البحر الاحمر والتوقعات تشير الىاحتمالية تكون السحب الرعدية بداً من بكرة على الساحل الغربي وربما تصل السحب الى منطقة المدينة المنورة وحائل ورفحاء ( يمكن نقراْ شي في موضوع السيول والامطار في الايام القادمة ) والله كريم عندة علم الغيب وفوق كل ذي علم عليم اللهم أغثنا يا كريم

[Najd^Prince]

بسم الله الرحمن الرحيم


((^ حفرلوجيــا ^))
ياعزيزي كلامك واقع وليس من ظرب الخيال العلمي والدليل :
في أمريكا بإمكانك تصفح الانترنت من خلال كمبيوترك المحمول وانت متكي لك
في محل CaFe ,, مع العلم إن الكمبيوتر غير موصول بكيبل للتزويد بالخط :D .
(( أسأل أي واحد يدرس في أمريكا ,, ويكون في الجامعه اللي يدرس فيها CaFe ))

وهذا حصل معي شخصياً قبل سنتين ونص من الان في ولاية نيويورك
بالجزء الشمالي الشرقي من أمريكا في جامعة Rochestar .
وماعليك إلا إنك تركب قطعه صغيره جداً بالمحمول تعمل بالأشعه تحت الحمراء :rolleyes: .

7^7^7^7^7^7^7^7^7^7^7^7^7^7

(( كشاته أونلاين )) مسمى كذا :good:
وبخصوص باقي الخيام في ذلك الوقت بتحصل عليهم إعلان من المشرفين

((^ للتقبيل لعدم التفرغ ^)) لانهم بيجون مع الأون لاينيين :D .

Najd ^ Prince

[عبدالعزيز الدباسي]

يا زينك ويا زين سواليفك يا ابو سليمان ، الحقيقة شوقتن اني اشوف هالخيمة عن قريب ....

واعجبتن بمقتراحاتاك ( النفيسة ) ،،، وضيقت صدري بتعذيباتك ( النفسية ) ، الله يجازيك ... ويهد حيلك مثل هد طير الحر على موضوعك .

لكن هين على بالك ( تحتك ) باابو ياسر والسمح ،،، تحسبن ان الناس يبي يتركونك ،،،، مستحيل دا بعدك

لكن عندي لكي اقتراح ،،، وهو انك تصير مشرف على خيمة ( كشتة لايف ) وش قلت ،،، موافق ;)
-------------------


يا ليت توافق علشان القى واسطة وادخل معكم ،،، ونصير كلنا في الهوى سوى ونهش ذبابين سوى

[حفرلوجيا]

أخوي السمح :
شكرا .. زانت أيامك .. أفهم من وصفك لمواضيعي بأنها واحة أو فيضة يعني يصير لها احداثيات .. ماشي .. ترى الإحداثي دايما ثابت .. المشكلة من القراءة غير الدقيقة لبعض (الأجهزة ) :confused: ..( حتى انا مافهمت شي )... عموما كلماتك أثلجت الصدر.
أخوي المسفهل :
شكرا .. عاد مادام انك مشرف ولا انت ( اونلايني ) .. وشو له تطوي الأيام ياعيوني .. بس تدري من جد ماتكبر أي مشاركة بعيني إلا اذا رديت عليها .. ( تتعمق انت وتروح بعيد ) .. بس أحيانا مثل شقردي تقلبها ( تراجيديا) ..
أخوي صقر :
شكرا .. ومن يقول يسلم ياغالي ..عندي لك هدية تعجبك ..:good: .. بس نخليها بعد رمضان .
أخوي الحر
شكرا .. لولا انك عضو ( زميل ) وحبيب وردودك ( أكثر ) المرات ( مزاين ) .. كان وريتك
أجل مواضيعي حباري .. هاد عليها الطير يا (........) .. نسيت يـ(الصقار ) وش ( تسوي ) الحباري بعض المرات ..:mad: .. لكن مادام ( ماء ) الذهب ... تسلم ياعيوني ..
أخوي برق الشمال :
الله يحلي أيامك على حلو كلامك .
أخوي خشم الحصان :
شكرا .. اللي بطنه ملبودة من النعمة يكفيه الإبتسامة .. ويسلم هالخشم ..
أخوي راعي الحزم :
شكرا .. ( يازين ) لقبناك ( سيبويه مكشات ).. عقب موضوعك ( تصحيح كتابة عبارة إن شاء الله ) قلت هذا مرجعنا اللغوي .. لكنك قمت تخور .. أجل أعجبك ما( تصطره ) :p الأنامل .. أناملي إذا ( صطرت ) يرد علي علم ثاني ..
عاد كل ماشفت تقاريرك للطقس على أهميتها أتذكر سالفة ( مطوع القوارة ) .. اللي قال لجماعته ( واشين شي يبي يجيكم ) .. فإذا جاء مطر قال شفتوا.. وإذا جاء عجاج قال أماي قايل لكم .. وإذا صار الوضع طبيعي قال معلمكم ..
تدري خلك ( مطوع مكشات ) :good: أحسن من سيبويه ... تقبل من أخوك أرق تحية.
أخوي Najd^Prince :
شكرا .. من ردك باين ان تعليمك خواجاتي ولا نقايش معك .. لكن انحن عندنا البلوتوث أو ( الواير لس ) اللي يخليك تتكي بالكافيه بدون توصيلات .. بس المتخصص يقول شل كمبيوترك( الكبير ) وتك لو تبي بقلع وادرين ..

في كتب التراث فيه اشاره ( أ هـ ).. وتعني انتهى كلامه
----------------------- جينا البطناج والمطبات..
أخوي شقردي :
السلام على من أتبع الهدى
شكرا .. غمزاتك ترفع الحموضه إلى اللهاة ( الله لايسلم عدوك ) و يبي لنا خيمة كاملة على شان نفك ( شفرتها ) .. لكن .. أولا ابي أعلمك مابي تحكحك ولا ودي ( أتجرف ) ..
ومسألة أكون مشرف على ( كشاتة لايف ) .. فأقبل على مضض لأني ( الله يغربل عدوك ) ماني متطمن لنوع اللايف اللي تقصده:confused: .. بس قبلها أحتاج منك فزعة يا( خبير );) .. وهي :
أولا : على شان اصير مشرف لازم يصير عندي مشاركة أول ماتمسط بمكشات ( يهندسون ) سرقتها المنتديات .. وعطفا على عرضكم الخاص اللي تبي تبعدون به هش الذبان فهاأنا أزور خيمتك .. اللحين قم شف لي موضوع من وزن موضوع ( الماب سورس ) اللي سرق منك وحطه بأسمي بمكشات ..
ثانيا : على شان أصير مشرف يلزمني أطقم بلبس زيكم .. عاد الله لايهينك شف لي ( سديرية بيضاء );) ) ياأزين ( زول ) بمكشات ..:p :good:
وبعدين خل ( الكيبورد ) اللي عندك يعقل .. لاأخليه يتعاقد المفاتيح مع اللي عندي .. ولايكرر غلطته ( الكلمة الثالثة بالسطر الخامس في ردك ) .. ( لاتعدله خله تبتل على شان يعرفون المكشاتيين ان ( كيبوردك ) مثل ( بعض الناس )

[راعي الحزم]

ههههههه ياحبيلك يالحفر ابسميك الحفرلأني أحب واحد يقال له ابو سليمان يقول ان بيته بالحفر أجل بديت أخور لاتشره الايام اللى راحت صحو وضيقة صدر ( مالقاء من يعطيه وجه )
ولا انبسط لين أقراْ اعلومك اللى تذكرن بواحد من الربع اذا استدنا البريق وبدا بالخرطي تقول بالعن له رادو
يادافع البلا اما عاد اللقب الثاني فلا يصلح لي ولا أصلح له ( يا خوك ازكرتي فاضي يدور القلهي ) هاه وش رايك بسيبويه مادلا يهرج فصحى ( خذ المزبر بشناترك واجعل حندوقتيك الى قيهلي حتى لاانغي نغية الا وعيتها بحماطة جلجلالك ) وعلوم السيل اماي قايلكم رح لموضوع السيول والامطار تلقاه زاد صفحتين :row: :row:

[عبدالعزيز الدباسي]

ما يصير يا ابو سليمان حموضة والناس صيام ، صارت حموضة دبل اوفر ، ، ،
وللاسف ترا ما عندنا سديريات حنا نطقم سبور الا اثنين منا واحد لانه سمين بالحين ولا لقينا مقاسه ، والحين متفقين مع راعي خيام يفصل له ( شروال ) والثاني نحيف بالحيل والبنطلون ما يمسك الا بمشابك غسيل منول واذا حطينا له كم مشبك صار مثل اللي ( يحمضون ) الصور ويعلقونهن بحبل ويطفون الانوار .:p :p .

واشوف انك صاير مصحح لغوي ، والله انك غريب ، وش ذا التحول العجيب ،،، اخبرك مصحة نفسية ، ،،، قصدي مصلح نفسي ،،،، صرت الحين مصحح لغوي ،،،،

وبعدين يا الذهين ترا هذي لغة التشات وما فيها تعقيدات علشان ما تتعب روحك بالمراجعة (( اطول وقت للرد كتبته )) اخاف من اللي يدققون على الناس .

والحين مع مسابقة اكتشف اخطاء نحولوجيا :

عاد انا ياواحد ابتربس عند خيمة ( كشاته لايف ) -------------- والله من البربسة يوم انك تتربص: :cool: ;)

وإلا هالمشرفين متلاقطيته ----------------------- منهو اللي متلاقطيته ;) ;) :cool: :cool

(اسكت يسكت عنك ;) واغفل يغفل عنك :cool: ولا تدقق يحطونك نقتف صورة

[حفرلوجيا]

أخوي راعي الحزم :
شكرا.. وماتحب الا اللي يحبك .. بس أشوف انك مصر على السوالف عقب الشاهي .. خلك من هالأفكار ..
وبعدين مافيها شيء ( مطوع وزقرتي ) يالله من فضلك ..
---------------------- ( أهـ )
الردالثاني قريته وأنا عجل .. أخاف تفوت صلاة العصر ...
ماشفت إلا شقردي .. شاتنق .. شروال ... هذي معادلات تبي فطين يفكها :)
بعد الصلاة نكمل ان شاء الله

[حفرلوجيا]

أخوي الصغير اللي أنا خايف عليه .. شقردي
أعدت قراءة ردك بتمعن .. وأكتب وأنا .. جزع .. ومستاحش .. ومهزوز الثقة ..
مهزوز الثقة : وش مناسبة تجيب سيرة ربعك وتفضح .. هذا ( دقاق ) وذاك ( دب ) .. وتهتز الثقة أكثر لو دريت ان ( واحد ) من ( مشرفين ) مكشات خريج ( شاتنق ) .. معليش صحح اذا أنا غلطان ( لدي احساس ان الشاتنق والتدلع والرخاوة ) يمكن يكونن حول بعض .. لكن هل فيه من المشرفين ( شاتنقي ) .. أشك لأن العلوم بمكشات ماهي علوم ( تشتت ) .. المكشاتيين ( حرش ) وإن تلزز بهم ( مشتت ) ماراح يلقى سوق عندهم..:)
مستاحش : من آخر سطرين بردك .. وشايف انك ودك تحطن ( كبش :p ) فداء .. الله لايسلم ( زول:p ) عدوك ياشقردي .. لكن أشوى يوم تذكرت اني لست من خريجي ( الشاتنق ) راحت الوحشة ..
وجزع : من جزعك أشوف ( نغرت ) من جيرانك .. وتجرجرن اتعاقد الشوش معك .. ترى طول ( عمري ) ماأنا قليل شر ;) .. لكني ابسبقك يا( حلو ) وابلجأ إلى الذي ليس منه بد ;) .. يعني أبقفل الموضوع ( ايه عضو يقفل الموضوع .. ديمقراطية ) .. لأني راجعت نفسي .. وماأنا لاقي من يفزع لي ( عضو ) .. شفت وش لون فوتت عليك الفرصة تميلح قدام غيري :D :D
للمعلومية : ياشقردي فسر على كيفك وأفهما على ماتفهمها ( قلعة عدوك )
بس لي رجاء بالجيران ان لاتشطح التفسيرات

[عاشق الصفاري]

الله يرجك
يازين السوالف يابوسليمان
ومثل ما قال (((الحر)))
اخوي حفرلوجيا والله اني اول ماشوف مواضيعك اهد عليها هدت الطير على الحبارى...!!!
جزاك الله خير
والى الامام..