وينكم يا الخياله....**....نبي خبرتكم؟؟

[جارح العين]

السلام عليكم ورحمه الله وبركاته
انا مبتدا بالخيول وابي اتعلم منكم اذا ماعندكم مانع
انا اذا لكدت الخيل وقعد يخبب احس اني ابي اطيح وعلطول اوقفه ماتحمل (يعني خواف ):D
ابي اعرف الجلسه الصحيحه عشان اتوازن يعني اذا حطيت رجلي بالركابات مدري وش تسمونه وش اسوي برجولي
الزقها على بطن الخيل ولا اوديها قدام ولا كيف ؟
وبعدين مثل مقلتلكم خواف معندي جرائه وخصوصا انه بالبر مو نفوذ كله حجر يعني اذا طحت الله يعينك مسح دمانك
كيف اشيل هالخوف ؟
معليش اسالتي مدري وشلونها تحسها غبيه!!!:p
الله يعينكم علي .......
واسف على الاطاله..

[راعي البرقا]

والله أخوي اللي أعرفه من واقع خبره بسيطه يعني كم طيحه :p أهم شي لازم تثبت السرج زين ولا يكون مرتخي ومداس السرج يكون في منتصف جنب الخيل ولا يكون نازل مره يعني ماتطوله رجلك يعني تكون مسافته معقوله . ونصيحه حاول ما تركب الخيل إلا في نفود إن كنت مثلي :D. وتقبل مروري

[salem63200]

أهم شي لازم تثبت السرج زين

[a.الخثلان]

خلنا نتفلسف عليك شوي

لأننا من ربعك مهنا زود خبره بس عن قولة ما شاركنا أخونا

للعليمي أول مرة ينصح بالسرج المصري ( كلام قديم ) عشان له عروه وأحيانا بروز من قدام تقدر تتمسك فيه بيد وحده وتثبت عمرك واليد الأخرى تمسك اللجام لين تتعود على هرولة الخيل وركضه

حال الهرولة ( خصوصا ) والركض عموما حاول توقف ما تجلس

وعقبال ما نشوفك خيال مكشات

[صدر الشمالي]

وعليكم السلام ورحمةالله وبركاته

ياهلابك يالغالي انت قريب لي تبيني اجي اعلمك ماعندي مانع

بالنسبه لي اركب حرذول(بدون سرج) لاني احسه امن والامان من الله

وبالنسبه اذا تبي تتعلم بدون ماتطيح حاول ترخي اعصابك وجسمك وتكون قطعه من الحصان يعني كانك لاصق بظهره ولاتقمز وانت فوقه حاول تكون ثابت طبعا مع التعويد والركوب المستمر تتعود تثبت حالك.

وبالنسبه لوضعيت الرجول بالركاب عادي تحط رجلك وتكون على وضعها الطبيعي وحاول بالبدايه تتمشى على الحصان لين جسمك وظهرك يتعود الركوب والمرونه وبعدين اذا تبي ترتاح اكثر فوق الحصان لاتخليه يخبب خله ينطلق خله يروح يركض ترتاح اكثر وجسمك يتناسق مع الحصان عاد الله يعينك كامبتدأ لابغيت تنزل تحس رجولك ماتشيلك مرتخيه

طبعا هذا كلامي من تجربتي بالخيل وركوبي ماهو شي قريت عنه وسمعته

اتمنى اني افدتك لو بالقليل

تقبل مروري

[#الفارس#]

هلابك اخوي جارح العين
الاخوان ما قصرو

لاكن انا حسب خبرتي البسيطة
انت تقول اذا (يخبب)الحصان تحس انك بتطيح
انت حاول تفوم وتجلس مع حركت الحصان
(ما اقدر اشرحلك بلكتابة يبيلك درس نضري)
طبعن القيام والجلوس تصير بس اذا الحصان يخبب
اما اذا كان الحصان يركض خاول انك تلصق رجليك وسيقانك على جسم الخيل
وتقون راص علية بقوة كذا بيكون جسمك مع جسم الحصان وتكون الحركة
انسيابية اكثر..
ملاحظات..
1.احسن شي تاخذ درس عملي
2.اذا ركبت الركوب الي قلتلك فوق بيجيك انواع الشد العضلي وفي جميع عضلات جسمك
واي استفسار ثاني انا حاضر..
اخوك الفارس

[جارح العين]

الله يعطيكم العافيه وماقصرتوا
والي مايطيح وينفتح راسه ما يتعلم ههههه
نركب شوي شوي لين نتعلم
ومشكووورين ...........

[خيال تميم]

مساء الخير...
الأخوان ماخلو شي الله يعافيهم بس توضيح بسيطة على تعليق أخوي الفارس .
أثناء الهروله (إذا رفع رجله قم وإذا نزلة أجلس وأنت حاول تازن القيام والجلوس وهكذا)
وإذا بغيت شى أنت تأمر أمر..

[جارح العين]

الله يعطيك العافيه اخوي خيال تميم وما قصرت....

[بحر القصيد]

اخوي جارح العين



اولا ً : تعلم على شيء واحد قبل الركوب



انه عندما تسرج الحصان او الفرس وتشد على بطان السرج فالفرس او الحصان مع الشد


يقوم بحركه لا إراديه وهي شد عظلات البطن كي لاتشد على بطنه بالبطان (هذا اول شيء)


لهذا تلاحظ وجود ارتخاء وعدم ثبات فالسرج بعد الركوب لأنك تجهل ردة فعل الخيل عندما يشد عليها البطان :)


ما هو الإجراء السليم



انه بعدما تسرج الحصان او الفرس وتلجمها عليك ان تمشي معها على سبيل المثال نقول 200 او 300 متر


بعدها يبدأ الحصان او الفرس بالتنفس مع المشي حينها لايستطيع شد بطنه لذالك بعد الإنتهاء من المشي


يرجى شد البطان اي تثبيت (السرج وشده من تحت بطن الفرس او الحصان) وان يكون موقع السرج


في نهاية الظهر بإتجاه الرقبه يعني لاتحطه في نصف الظهر وتبغى ركوب سلس لأنه كل ماراح تراجع السرج


للوراء كان الركوب فيه الكثير من الوعوره على الفارس


ثانيا ً اخي تأكد أن الركابات ليست لحمل الفارس وإنما هي وسيلة الفارس للتوازن اي انه يستعيد توازنه بواسطتها


يكون الركوب تدريجيا ً كي يعتاد الفارس على الركوب ووضعياته وان لايتخطى مرحلة من مراحل


عدو الخيل إلا بإتقان حركاتها ووضعياتها


في الركوب تكون القدمين والركابات لحفظ التوازن فقط .......... واللتي يجب ان تُشد هي الركبتين تشدعلى


لجسم الفرس او الحصان وتكون القدمين كفيلة بحفظ إتزان الفارس



نصيحة أخ : ترى الخيل بهايم وأنا اخوك لاتقسى عليها في اماكن شديدة الوعوره


كي لا تكون النتائج اصابة لها او للفارس




تحية اخوك الهاجري

[جارح العين]

الله يعطيك العافيه اخوي الهاجري وتعبناك معانا
لاكن وش اسوي هذي ارضنا كلها وعره
ومشكوووووور عالمجهود الرائع

[المهاااااجر]

الي ميطيح 99 طيحه مو خيال

[عضو متميز]

بسم الله
أخوي الوضعية السليمة لركوب الخيل هو إنك تفرد ظهرك اللجام ما يكون مرتخي ولا مشدود و طرف رجلك تكون على الركيبة مو كلها حتى لو حصل شي لا سمح الله يمديك تصرف عمرك بسرعه وتكون رجول لقدام كأنك داعس بريك ((سيارة صارت))
وطول الركيبة يكون مناسب لك بحيث الزاوية الي عند ركبتك تون 140 تقريبا
أما بالنسبة للحصان إذا جا يخبخب تلاحظ في حركته إنه ينزل ويطلع فإذا جا ينزل إرفع نفسك ((كيييييف؟:يعني تدوس على الركايب فتقوم إنته))لما يطلع إنزل إنته فيرفعك مرة ثانيه هو كذا يكون مريح ظهرك ومستفيد من حركة الحصان ولما يبدأ يجري أو بالأصح يكنتر إرجع انته لوضية الركوب الأصلية تمد رجلك .... ومن قلته لك بالبداية
أوكية يا خيال وهذا إيميلي لو عندك إشكالية بأي شي بالخيل
asbahabari@hotmail.com
معاك أحمد رائد سباقات التحمل للخيل في المملكة
والسلام للقارئ

[جارح العين]

الله يعطيكم العافيه
ومشكوور اخوي احمد

[غرة فرس-]

الله يعيننا وإياك على الدبجات والطيحات

[نجم سهيل a]

أخوي صدر الشمال أنا من الشمال ودي اتعرف عليك أنا من زمان ودي اتعلم ركوب الخيل بس اليد قصريه ياخوك يعني مافي احد يعلمني وشكرا

[ابو قحط 505]

ان كانك تبغا تتعلم

ما يصلح الا اذا انت تركب معا خياله او انك تاخذ دروس ركوب

اذا انت من اهل الشرقيه ارسلي رساله على الخاص وبشر بالخير

[أبو علوى]

أولا و آخراً أطرد الخوف منك

لا تقول عن نفسك خواف ترا البرمجة العصبية بالإنسان حساسة جدا وهذا تحطيم لذاتك و هروب مؤكد من الهواية

قل : بالمقولات والجمل المثبتة والمؤكدة بالبطولة كــ ( أنا شجاع أنا بطل و هكذا) وأيضا لا تقل بالجمل الهلامية أو الموميائية وهي جمل منفية للخوف و الجبن لكنها لا تثبت كليا ما يضادها من الشجاع والبطولة كــ ( ماني بخواف أو لست جبانا )

الخلاصة مما سبق : إجعل عقلك الباطني يستقبل الإيجابيات و المثبتات و المؤكدات في حياتك اليومية و لا تجعله
محشوا بالسلبيات و المنفيات و ( اللاأدريات ) أي المترددة

و بهذا تفلح بإذن الله

بخصوص الخيل و إختلالك عليه

فالأخوان ما قصروا و عندي شي باقوله

الخيل عندما يخب طبيعي إنه ينفضك كنك ماكلك مطبات بسيارة قديمة و مراتبها حديد

لكن حاول ما تخليه يخب لأن عدو الخيل أهون و أريح على الراكب من الخبب خصوصا للغير متعودين


عليك بموازنة الركاب الثنتين على رجليك و إحذر تكون واحدة أطول من الثانية

عندما يخب الحصان و يعدي لا يلمس بطنه الركاب خل الركاب متقدم و غير ملامس لجنب الحصان و أما ركبك شدها على السرج

و ملامسة الركاب لبطن الخيل و بوضعية الضغط على بطنه من دلالات الوقوف للحصان

بخصوص شكل الخيال و الخيل يعدي يكون الخيال مدنق شوي

هذا إللي عندي واللي قبلي علمهم غانم ووافين و بيض الله وجيههم

[مجنون خيل]

انا شاب عمري 17 سنه وتو لي يمكن 7 او 8 شهور اركب الخيل

منذ الصغر وانا اعشقها ولا امتلكه والا يوجد بقريتنى خيول للاجار لاكن اعرف واحد اشتر خيل مو صحب لاكن اعرفه معرفه سطحيه يعني بيننا سلام والله وكل يوم يخلينى نتخيل على خيله

واول ما تعلمت بدون سرج هي بالبدايه تخوف لاكن تقدر تثبت نفسك اكثر من السرج والى الان ما اقدر اركبه بسرج

الحين متعلم شويتين بس لعب فيني الخيل اذاء قرب من الحوش تبعه يحك بالجادر ومرتين حك جسمه بالجدار وانا عليه اعدم ركبتي الله يهديه ويزبط


بس نصيحه اركب من دون سرج والله انه احسن بالف مرررررررررررره