ضغطي اررررتفع.. القهوة ماهي راضيه تضبط.. تكفوون الطريقه

[safeyr]

السلام عليكم ورحمة الله وبركاته
اخواني واخواتي هذه اول مشاركه لي مع اني اتابع منتداكم من زمان
واطلب منكم طلب صغير ;)
طريقة القهوة العربية
صراحه انا اتجننت :confused: ماهي راضيه تضبط معاي
مره تطلع حاره زي الفلفل.. مره صفراء زي السن توب.. مره مالها طعم ولا شي كانها مويه:confused:
اشتريت كل شي وماضبطت
جربت انواع البن ومافاد
اخذت بن جاهز وبن ني وحمصته وكانك يازيد ماغزيت
اخرتها امس اشتريت ترمس جديد للقهوة قلت يمكن العيب فيه :D
ويوم ذقتها اترفع ضغطي HHH كانها شطه حاره:mad:
واقوم وارمي التلاجه من الشباك وقلت ماعاد راح اسوي مع اني مغرم بالقهوه
المهم الله يرحم والديكم
ساعدووووووووووني واشرحوا لي بالممل زي يوم تشرحوا للبنقالي وفسروا كل شي بالملي
وقولوا اش افضل انواع البن والهيل وكل شي
انتظر ردكم باسرع وقت والف شكر

[العنووود]

السلام عليكم انا من عشاق القهوه العربيه وبرضووو من المبدعات فيها ماشاء الله لاقوة الابالله اهم مافي الموضوع هو اختيار القهوه والبن افضلها بلا منازع (الخولانيه) سعرها غالي ونادره لوجود لان اصلا قليله في بلدها المصدر اليمن


الدرجه الثانيه (الهرري) وهذا اللي استخدمه اشتريه حب خيشه 5 او 10 كيلو ومستحيل اشتريه جاهز بعدين بقول السبب


انقيه بالبيت حب القهوه - فيه حبات بيضاء لازم ننقيها هذي الحبوب لو انطحت مع حب الهيل تعطي طعم مراره
احمسها بالبيت واحط فوقها مستكه وشيبه بعد ما تنحمس اوديها للمطحنه يطحنونها ناااااعم


بالنسبه للزعفران طبعا الاجود هو الايراني واللي ماتعرفونه ان الزعفران الممتاز ماينباع الا في ايران نادر التصدير انا اشتريه منهم ب 400 ريال يبيعوها في المعارض اللي تقام بالشرقيه



بالنسبه للهيل فالافضل هو الامريكي فيه درجات 1 و2 و 3 وطبعا كلهم من نفس النبته بس الحبات صغيره وكبيره انا استخدم رقم واحد قيمة الكرتون ن 280 الى 300 ريال



وسلامتك

[مطحن]

السلام عليكم ورحمة الله وبركاته

اخوي ابسالك بالبداية ..... وشلووووووون تطلع القهوه حاره مثل الشطه!!!!!!!!!!!!!!!!!!!!

على العموم،،، طريقتي بطبخ القهوه

تسخن الماء بالملقمة وبعد ما يفوح تظيف القهوه وتخلية الى ان يبدأ يطبخ وتقصر النار شوي بحيث انه ما يفور... وتخليه يطبخ لمدة 10 دقايق... وبعدها تبعد الملقمة عن النار وتخلية لمدة 5 دقايق تصفي ... بعدها تكون مجهز الدله وفيها البهار ... من هيل وزعفران و و و و... تصب القهوه من الملقمه على الدله وبعد تحط الدله على النار الى ان تبدا تفوح (تغلي) بعدها ابعد الدله عن النار وخله دقيقه او دقيقتين بهذا تكون القهوه جاهزه ... وليتك اذا جربت تعطين خبر هل نجحت الطريقة معك والا لا .......

اخوك عبدالرحمن

[كشته 111]

اخي السفير مع شكري وتقديري للاخت العنود والاخ مطحن ودي اضيف الرابطين التاليين لاخوة لنا في المنتدي ادلوا مشكورين بدلوهم في موضوع القهوة والروابط هي :


http://www.mekshat.com/vb/showthread.php?t=70788


http://www.mekshat.com/vb/showthread.php?t=109645&highlight=%CA%D5%E1%ED%CD+%DE%E5%E6%C9


واذا زبطت القهوة اللي علي كيفك اعزمني والتمر اللي يحبه قلبك من عندي ,,,,

[هايبر]

أوخي.
أهم شي هو وزن كمية الماء والقهوه والهيل .وأنا بعطيك مقياس أستخدمه دايم وهو كالاتي:-
1-مقدار الماء تقيسه بالدله دلتين ماء .تعبي الدله وتصبها في البراد ثم تعبيها مره ثانيه وتصبها في البراد كذا تم وزن الماء .
2- مقدار القهوه المقياس فنجال صيني .تحط فنجال ونص صيني من القهوه على الماء.وتتركه يغلي أول ما يغلي تنقص النار عليه علاشان ما يكمل الماء.
3- خله 15 دقيقه من يغلي
4- بعدها طف النار على القهوه وخله 3 دقايق علاشان تركد القهوه في البراد
5-علا بال ما تركد القهوه جهزالدله مقياس الهيل ملعقه واحده مع زعفران قليل بالمره (شي لايذكر) لانه لوزاد بتطلع مره
6- صب القهوه على الدله وحطها على نار خفيفه لين تغلي ثم قرب التمر ومعها العافيه.
جربها وعطنا النتائج طبعا كل مره راح تكون أفضل من اللي قبلها.

بس أنا أخاف إن ربعك يبلشون بك بعد ما يشربونها بيقولون ما نبي إلا قهوتك هههههههه

[الناب]

عرفت علتك لا تكثر هيل:no2:

مايلزم
قهوه حراري حمسه وسط ( أو درجه 2)
هيل
مسمار (عويدي قرنفل)
شوية حليب مراعي أو أي نوع عشان ما تطلع حاره فلفل

طريقة العمل: :D

1_ عب البريق (براد ونص ماي) تقريبا.

2_ أذا غلى الماي حط فنجال ونص قهوه وخلها على نار هاديه مدة (عشر دقايق).

3_ حط في (البراد)الدله هيل ( تغطي فيه قاع الدله ) أو تقريبا ملعقه وحده بالحجم العادي مليانه.

4_ 5أو6 حبات مسمار.

5_ ملعقة حليب صغيره عشان ما تصير فلفل :p

6_ وشوية زعفران


بعدين أول ما تخلص العشر دقايق زل القهوه في البراد

وبالهنا والشفا



أتمنى من الله عزوجل وفيت
لأني زيك يالله تعلمت

[عاشق السيل]

وعليكم السلام ورحمة الله وبركاته ،،

أولا أشكر الشباب كلهم على ماقدموه لك يالغالي وبصراحة ماعطونا فرصة !!!!

ثانيا ناوي أحط لك الرابط الخاص بموضوعي عن القهوة لكن أخوي الغالي (( كشتة111 )) سبقني الله يبيض وجهه ،،

ثالثا أحب أفيدك إني من أصحاب الكيف بالقهوة ولاأرضى بغير البن الهرري وارد باشنفر والهيل الهندي حبته نحيفة لكنها قوية الريحة أما الأمريكي حبته تملى العين لكنها باردة بعض الشي ،،

وبالنسبة للطبخ ( وباختصار شديد ) لازم تخلي القهوة تطبخ على النار لمدة لاتقل عن ربع ساعة وبعدين لازم تخليها تصفي أكثر من خمس دقايق وبعدين زلها على الدلة ويكون فيها الهيل المطحون وردها على النار وشلها أول ماتغلي وبألف عافية ،،،

ماجبت جديد لكن تقبل مروري يالغالي ....

[راعي البرقا]

ماقصروا الجماعه .وإذا ضبطت لا تنسى تعزمنا

[safeyr]

الف شكر لكل الاعضاء اللي مروا وردوا:good:

اسف اتاخرت بالرد

انا سويت تقريبا نفس وصفاتكم.. شوفوا اش سويت واحكموا
جبت بن هرري ني ونظفته بالماء وبعدين حطيته بالبلكونه قدام الشمس عشان يتجفف
وكل شوي وانا معلق نفسي بالبلكونه:j عشان اشوف اش صار

المهم المغرب اليوم قمت وحمصت البن وحطيت ورقتين شيبه او البعض يسميها شنه لتعطير البن

وطحنتهم لما صاروا ثقيله شويه يعني مو بودره
وحطيت الماء في ابريق مخصص للقهوه (شوفتوا العنايه كيف:good2: )
وحطيت لتر ونص (جبت قزازه للمقاس باللتر من المختبر بالعمل عشان اوزن القهوه) :D الله بخترع صاروووخ
وحطيت على الماء شوية زعفران عشان يخللي اللون ابيض شوي
بعدين حطيت 3 ملاعق كبار من البن المطحون وخليتها تغلي 20 دقيقه
من هنا وانا كل شوي عند الفرن ابغى اشم ريحه قهوه يالربع.. والله ما اشم شي كاني محرق كفرات:confused:
ريحه ماهي ريحة قهوة ميه ميه .. ريحه تحرق
المهم قلت باكمل وعلى الله
خليتها 20 دقيقه .. وحطيت بالترمس حق القهوه ملعقه كبيره هيل مطحون بالبيت وملعقه كبيره كوفي ميت و3 مسامير مطحونه
وبعد ماخلصت الـ 20 دقيقه حقت غليان القهوه خليتها تركد شوي 5 دقايق
بعدين صبيتها بالترمس عن طريق الصفاية
بعدين اجي اجرب القهوه
اللون ميه ميه بالمبيض طلعت جنان
بس الطعم
الله يخلف
ما هي طعم قهوه:no2:
عاد زميلي بالشقه تجنن وقال شوف انا عندي الحل
مو احنا غيرنا اباريق والبن والهيل وكل شي؟
ما بقي الا تغير (الفرن) خخخخخخخخخخخ:D

باختصار لاني طولت.. انا احس ان العيب بالبن.. لان البن من يوم يغلي ماله ريحة حلوه
يا اني ما اعرف احمسها زين يا مدري ايش اسوي
بكره باسوي اخر محاوله وباصور لكم الطريقه.. وياليت في اختراع يخليكم تشمون الريحه بالنت
وابغى تجاوبوني على بعض الاسئله
* هل في زعفران مطحون؟؟ ام تقصدون اللي زي الاعواد او الشعر؟
* لماذا نبرد البن بعد الطحن؟ مو احنا بنغليها ؟
* اللي يعرف مكان يبيع افضل بن بجده يقول.. لو الكيلو بالف باشتريه:bounce:

وسلااااااااااااااااااامتكم

[الناب]

أنت من قلت غسلت ومويه....

أنا قلت أحلق أشنبي أذا طلعت القهوه زينه

يا أخي كاتبين أسماء البن كلها الغالي و النفيس
والهيل وحتى الزعفران الأيراني

أي هذا ألي زي الشعر وفيه مطحون.....

و الشباب حاطيين ألف طريقه للعمل وروابط

على الأقل جرب من المكتوب موشي جديد


روح أسأل عن الحامص الزينه ألي عندكم أكيد بتلاقي....الزين

البن = حرري أو هرري
الهيل = الهندي أو الأمريكي
الزعفران = أيراني أي نوع
السمار = ألي عندك

وروح جرب طريقتي بتعجبك أن شاء الله
على فكره أنا أحب الهيل كثير ممكن تحط نص الكميه كافي يعني نص ملعقه

أذا ظبط معك الجاهز بيظبط معك الحماس وغيره لا تستعجل

[ali123_sa]

ياخوي مقاديرك كثيرة وتراها قهوة

اترك الغسيل واتجه فورا الى الهندي وخذ قهوة هرري مطحون جاهز وسو القهوة مثل ماقال الاخوة ولكن تابع معي تبي القهوة اللي تضرب بالراس حط بس هيل بالدلة وخل القهوة تطبخ ربع ساعة وبعدين خلها تركد شوي وبشويش حطها بالدله مع الهيل وبنفس المقادير اعلاه ... وادعيلي

لاتحط شيبه ولا كوفي ميت ولا اي شئ بس هيل وقهوة وممكن تحط مسمار حاجة بسيطه اذا كنت تحبه اما انا ما احب المسمار وسلملي على الهيل وترى اذا كثرت هيل مرة خربت الطبخة .

[عاشق السيل]

أخوي سفير ،،

برضو مافيك حيلة !!!

أكثر من واحد كتب لك الطريقة وكلهم يتفقون على طريقة وحدة وأنت للأسف ماطبقتها !!!!!!

عموما لاتشيل هم ولايضيق صدرك والتزم بالاتي :

أول شي اشتر بن هرري وارد باشنفر و لاتغسل القهوة لأنك تخربها ، ثاني شي احمس القهوة بدرجة متوسطة باللون ولازم تقلبها صح وقت الحمس علشان كل الحبوب تاخذ نفس اللون ،، ثالثا القهوة لازم تبرد لأنك مستحيل تطحنها حارة واحتمال تكسر الطاحونة عليك إذا كانت حارة !! رابعا الطحن يكون ناعم جدا علشان يتغلغل وقت الطبخ ،، خامسا اختر ماء نقي وصحي للطبخ علشان تلقى الطعم المطلوب ،، سادسا بعد الطبخ لمدة 15ـ20 دقيقة خلها تصفي 5ـ8 دقايق وبعدين زلها على الدلة ويكون فيها هيل مطحون ( ويفضل الهندي ) بمقدار ملعقة واحدة فقط بدون أي إضافات وخاصة ((((( الكافي ميت )))))) حتى الزعفران والمسمار إبعد عنها لو أول مرة على الأقل ،، سابعا حط الدلة على النار وخلها حتى تغلي وأول ماتغلي على طول شلها وبرضو خلها دقيقتين فقط ( تركد ) وبعدين حط الليفة وبألف عافية ،،

وإذا ركبت راسك وسويت غير هالطريقة لاتقول ليش مافيه طعم يصك الراس !!!!

أمزح معك بس تكفى علمنا بالنتايج وأنا متأكد إنك تبي تدعيلي ،،،،،

[safeyr]

مشكوووووووووورين
الناب / عاشق السيل
انا سويت نفس طريقتكم بس حبيت اغسل البن بناء على نصائح لقيتها بالنت
فقلت فوق وصفتكم .. زيادة الخير خيرين
والا اللي سويته نفس طريقتكم بالضبط
بس خلاص ماعاد اغسل البن

وبأجرب الليله
واذا نجحت ابشروا .. اوريكم النتائج
وتراكم كلكم معزوووووووومين عندي..
شكرا

[سامي العنزي]

السلام عليكم ورحمة الله وبركاته ..
كيف الحال اخوي safeyr عساك بخير طيب ان شاء الله ..
الشباب المكشاتيه والله ماقصروا الله يعطيهم الف عافيه .
انا بعطيك شرح بسيط مع شوية صور متواضعه .

أهم شي انت لاتكبر السالفه وتخلي صنع القهوه شبه مستحيله .. خلاص اتفقنا .

1- جيب القمقوم وحط به ماء على حسب الدله اللي عندك .
واهم شي نوع القهوه طبعا الأخوان ماقصروا عطوك جميع الأنواع لكن بالنسبه لي النوع المفضل
واللي يعدل الراس ( هرري باشنفر ).
وهاذي صوره له .

http://www.mekshat.com/pix/upload02/images64/mk35261_shnfr.jpg

2- وافضل انواع الهيل الهيل الهندي بجميع انواعه ( فرحانه ) لاتكثر منه تراه قوي النكهه .
وهاذي صوره له طال عمرك .

http://www.mekshat.com/pix/upload02/images64/mk35261_frhan.jpg

3- والأهم هنا حمسة القهوه تكون بني شبه غامق يعني وسط ماهي خفيفه ولا غامقه .
وهاذي صوره للحمسه .

http://www.mekshat.com/pix/upload02/images64/mk35261_hmshti.jpg

4- واطحن القهوه ( مطحنه كهربائيه ) مع شوية قرنفل . مسمار 10 - 12 حبه على حسب الرغبه .
وهاذي صوره لها .

http://www.mekshat.com/pix/upload02/images64/mk35261_tahon.jpg

5- بعد ماتطحن القهوه حطها بالقمقوم وخلها تطبخ لمدة 10 - 15 دقيقه بالكثير .
وبعدين طال عمرك خلها تركد وهذا اهم شي عشان تجيك قهوه صافيه .
وحط الهيل بالدله والف صحه وهناء عليك اخوي الغالي .

http://www.mekshat.com/pix/upload02/images64/mk35261_loon.jpg


صحيح اني كثرتها عليكم بس والله تحمست مع الموضوع .

تقبل تحيات اخوك سامي العنزي .

[ali123_sa]

الله العالم وش صار معك .

[راعي البرقا]

ههههههه إلا الحين أنت والقهوه ياخي والله الشباب ماقصروا كتبوا و صوروا الطريقه من الألف إلى الياء وش تبي بعد و ماأقول إلا الله يحفظك .

[الدبل الثقيل]

ياخوي عندنا في جدة بافرط عنده بن يمني خولاني يجي منه كيس مقفل وزنه كيلو ومنقى سعره يمكن 35 او يمكن زاد ... الصراحه بن طيب ... وفيه افضل منه بالنسبه لي وهو البن الهندي وماتحصله الابالرياض او القصيم مع ان وكيله المستنير في جدة ... وفيه بن هندي وارد اللهيبي بحايل .

[ali123_sa]

صحيح ان البن الجيد يضفي طعما مميزا للقهوة ولكن أي بن في العالم لايخرج القهوة عن مسماها فهي تظل قهوة .... ولكن لو جبت اغلى نوع وكان صانع القهوة مش ولابد فلا بد ان القهوة مش ولابد خاصة ان القهوة حساسة شوي ويبيلها من يوزنا وزن والنظافة مهمة في القهوة والدلال وكذلك جسم الانسان كذا يقولن ..!!

[safeyr]

اهلين ومرحبتين
المعذره تأخرت عليكم
ابشركم سويت نفس اللي طلبتوه وطلعت الحمدلله
يعني ممتازه
بس عندي ملاحظه صغيره.. القهوة يوم انها تنطبخ على النار
العادة عند الناس ان البيت كله يتعطر برائحتها.. لكن حاولت اكثر من مره وريحتها شوي ثقيله .. ماتحس انها ريحة قهوة خصوصا لما تقرب منها بالضبط
لكن اقول الحمدلله .. الظاهر كثر التكرار يعلم الواحد.. تخيلو صرت باليوم الواحد اسوي القهوة اربع مرات!!
بس للتجربه
واشكر العضو سامي العنزي.. ورحت شريت كيس قهوة هرري نفس اللي بالصوره
واوعدكم المره الجايه .. اصور الطريقه ولكن مع بعض الاضافات من بعض الاخوان.. وصراحه طلعت ميه ميه
شكرا لكم

[المتكي]

الحمد لله على السلامة اخوي السفير .. اهم شيء ان القهوة ضبطت .. تراني انا واخواني وعيال جيرانا متابعينك.. وناوين نجيك بمعاميلنا نزين لك القهوة حياً على ا لهواء لو ما زبطت معك :) هلا بك اخوي

[جوافه]

تيب

بقولك عندنا بجده ورح محامص الرفاعي وووووووووووووووووووووو سوق الاهدل ايضا مليان وووووووووووووواذا بغيت شي حاضرين حتا الطريقه واذا تبي تعال نصلحها ونتقهو سوا خخخخخخخخخ

[الأبرق2008]

الحقيقة ماقصرتو جميعا
وللمشاركة فقط غسل القهوه بعد تنقيتها من الشوائب وخلافة وتترك حتى تجف ثم تحمس حسب رغبة الشخص وافضل حمسة الوسط

ثم طحنها بالبيت وتكون مجروشه مقاس الدلة العادية فنجال ونصف قهوة تضاف على ويكون الماء دفئى تتركك على النار حتى تطبخ ثم يقصر على النار شوي لمدة 7 دقائق حتى لاتكون (مرة من كثر الطبخ )
تترك لمدة 3 دقائق حتى تصفى ثم تزل على الدلة التي بها ملعقة صغيرة من الهيل او اكثر حسب رغبة الهيالة وقليل من الزعفران توضع على النار حتى تقلب مرتين ثم تقدم بالهنا والشفاء
ملاحظة ( التمر لازم يكون سكري او خلاص اصفر )

[الناب]

الحمد لله أخيرا والله يا السفير أني لما قريت أطلعت ميه ميه فرحت من جد :good:

وعلى فكره القهوه لها أربع أوقات في اليوم الواحد :D :D
ننتظر الصور :cool:

[المكشوح]

الغالي انت انشالله خل اقهوة تنضبط معاك اول وريحة القهوة اللي تبيها تملى البيت خلها بعدين قزر حالك باي عطر بريحة القهوة لين تضبط معاك والله يوفقك وترى انا من قطر وكل اهل قطر معاك وقريب بينزل برنامج بالجزيرة عن موضوعك :)
ربي يوفقك

[نجدي أصلي]

أخواني أحب أن أضيف معلومة بسيطة بخصوص الزعفران حيث سبق واشتريت نوع أسمه ( الذهب الأحمر red gold ) ممتاز جدا حسب التجربة ، من بوابة البحرين وهو نادر لازم تبحث عنه

[السنع كله]

الماء الماء لابد يكون نظيف ولا له ريحه او لون او طعم لان القهوة حساسة وترى القهوة انواع منها ملا يحتاج الا فوح واحد فقط ومنها مايحتاج خمس دقائق لا اكثر لانه يغير طعمها 000نسيت اقول نظافة الابريق من الصابون لان البعض يغسله ولا ينظفه من ريحة الصابون 00الليفه لا بد من العناية بها

[ابومدين]

افااا كلش الا القهوه
الشباب ماقصرو وبيعينك الله

[safeyr]

السلام عليكم
ابشركم من تاريخ الموضوع ب 2008 الى اليوم 2012
وبعد 4 سنوات
والجميع مازال ينتظرني
اعود لكم:lr
بعدما تزوجت:heart::heart:
وصرت اب:hot:
وابشركم
صرت اضبط القهوه احسن من ام العيال:D
وكل اللي بالمنتدى على عيني وراسي معزومين عندي
حيااااااااااااااااااكم الله جميعا

[ابن هويشل]

ما شاء الله

بارك الله لك وبارك عليك وجمع بينكم في خير

ونا اشهد ان القهوه تصليحها فن وذوق

وهي فخر للي يتقن إصلاحها

شكرا لك أخي"safeyr"

[الفرناس]

على البركة الزواج
اكاد اجزم انك محترف في القهوة الحين
بيض الله وجيه كل من ادلى بدلوه في الشرح الوافي

ترى اربع سنين مهي بسيطة يعني بكالريوس مع مرتبة الشرف
الله يوفقك اخوي ويرزقك الذرية الصالحة ويسعدك يارب

[راكان 111]

وش تبي في القهوه والمشاكل كبتشينو مكينه خاص له وريح بالك

[abu-khuzaim]

تدري ان قريت كل الردود ... ومانتبه للتاريخ ....الا يوم قلت ان الموضوع له اربع سنوات خخخخخ

احس اني تاثرت وشوي بصيح خخخخخخخ...

مبروك الزواج وعقبال ماتعلم ام العيال .... وتجيك القهوة الزينه الين عندك :)