فشقة تثور براس بولندي بـ( أم عشر )

[حفرلوجيا]

سلام يالربع
شاب أنا خاله بأوسط العشرينات ماهو بعيد عن قرية أم عشر ( غرب الصمان حول النفود ) قال لي سنة راحت انهم يبي يكشتون هو وربع له ( أعرف بعضهم ) ويبونك تجي .. ويعزمني نيابة عنهم ( الفرق بيني وبينهم أكثر من عشر سنين ويمكن مايحصل الإنسجام ) .. لكن مادام خال ابشر .. ومنها نتعرف على هالعقليات .
وصلتهم وتعرفت عليهم ولفت انتباهي واحد منهم يسمونه ( علي بولندي ) .. ( لابس ثوب مغربي شامر من قدام ويسحب من ورا .. وشماغ منسفه شخصية بنت البكار بطريقة عرابجه.. ويتهزع لاصار يمشي :confused: ) .. غريبة ماتركب علي بولندي .. سألت قالوا .. إذا طلعوا للصيد ياويل واحد من شلته يجيب فشق غير بولندي .. ويعتقد ان غيرهن ( طراطيع أبو ديك) :) ...( إيه اللحين ركبت علي بولندي ) ..
أصريت أركب بالسيارة اللي يسوقه البولندي .. مشينا ويرفع المسجل على ( بشير شنان ) ويتهزع وهو يسوق .. ويبدأ أول الغيث مني ( شايبهم ولازم أصير دبرة وحقنه ) .. طفيت المسجل وقلت انتبه للسياقة ( ماجاز له بس ماعلي منه :cool: )
وصلنا النفود ضحوية .. قلت أبي سيارة ابسلم على عزيز بأم عشر وأرجع قبل الظهر .. صار .
وعند رجعتي لولا ان معي ( قارمن ) كان قلت اني مضيع .. قبل وصولي لهم بحوالي خمسة كيلو أشوف جنبهم جبل أسود غريب ..
وياطول الخمسة كيلو .. ودي أشوف وش السالفة .. وصلت
إنا لله وإنا اليه راجعون .. هذا والله الغشامة والهبال .. وقل السنع .. لا .. عز الله هذي الذنوب ..

حتى لايصير الموضوع طويل .. نفصله جزء ثاني .. فصل الله راس البولندي ..
---------------------------- يتبع

[حفرلوجيا]

استلم الجزء الثاني .. وإن بغيت اقطع الأتصال اذا انت برنجي ( نسبة للبر ) أو شوزنجي ( صياد ) أو حتى ( صقار ) ..

هالجبل عبارة عن حطب : عروق ارطى يجيلهن حمولة تريلة .. نزلت زعلان : ياشينين وش طاعونكم على هالأرطى .. وحطبكم السمر اللي معكم يكفي ..
قالوا هذا علي بولندي من نزلنا وهو يجرجرهالعروق بونش الجيب .. تعال يابولندي شغلك هذا تأثم عليه وش حاجك لقطع هالعروق الله يقطع رقبك .. ذي لو بغيت تكفي أم عشر كلها ..
أقبل يتهزع بمشيته ( خفت ) لايتهور .. لكن مقيول(ن) لي إنه مؤدب .. وقف عندي وقال : اللي يسمعك يقول اني قاطع طريق أو سارق من مخباتك .. حنا بالبر ونبي نستانس لاتعقدنا .. ( هذا المؤدب ) .. لا انت ماقطعت الطريق .. بس قطعت أشجار مالك به حاجة .. هذا تخريب .. ( لكن بلعته وسكت .. يمكن يكون هذا الحطب من نصيب محتاج ) ..
بعد العصر اشرت عليهم نتمشى بالفياض اللي حول أم عشر ( أكيد بعضكم يعرفها) .. وصلنا أولها وإلى ياسلام عشب طاغي والزهر والورد ألوان .. طلبت من اللي يسوق مايدخل مالها داعي نتودس هالمنظر الجميل بالسيارة.. ننزل للفيضة رجلية .. لكن المصيبة بالسيارة اللي ورانا ( يسوقها البولندي ) انطلقت مثل الفشقة.. وتجديع وتفحيط بوسط الفيضة ( آآبوك آآبو ام جابتك يالبولندي ) .. نزلت عجل أأشر له بالشماغ .. وبعد ماطابت نفسه وشانت نفسي هجد .. أجعل الصواعق اللي تهجد راسه .. جيته بزعل ياخبل ليش كل هالحوسه ..
طير عيونه علي إذا تذكرتها اللحين احولت عيوني .. وقال ماخبل الا الخبل اللي يبي يدعي وينكد علينا كشتتنا .. ( ايه.. يبي يفلت زمام الأمر .. خلك حكيم;) :(
مد يمناك يأأحسن بولندي بأم عشر .. وتشطرت به شوي .. وأرسل من النصح اللي يناسب عربجته .. وأشوى تقل وده يعقل .. لكن فهمت منه ان التفحيط بالفيضة تعبير عن الفرحة والوناسة وان عمه ( حول الأربعين ) اللي ماهو معقد مثلي .. وبعض الكشاته يسوونه .. ( اربط جحشك عند حول أربعين )..:mad: :(
عاد بغيت نطلع من هالجو المكهرب ونبي نونس بعض .. وأطلب منهم :
ياشباب نزلوا معاميلكم وأعصبوا راس البولندي بدلة وبراد .. وحنا جالسين يقول هالخبل : شم لو مافحطت ماشميت هالروايح ( راحت روحك على هالتفكير ) ..
ويبدأ فصل جديد للقلق نزل البولندي الشوزن وتطرف .. ويدور أي شي يطير ( هدهد رماه .. صبري قال به .. جرذي تحت الطلح عطاه بولندية ) .. بجلستنا تالي اكاالنهار ذبح له يجي عشرين نفس ( هذا اللي يبي يعقل !! ) ..عاد شانت نفسي ( طول هالكشتة شاينة النفس ) .. ياشين وش مصلوحك بذبح هالطيور اللي لاتوكل ولا موذيك .. وتضييع فشق
المصيبة يوم رد بقولته ذي الشوزن عطية الله وابستانس وابرمي اللي أبي ومن يوصلها معي يجيه من الحب جانب ..!!!!!:( :mad:
اسكت أحسن لي .. الولد ذا مولي خصوصا إذا عرفتواإنه بسمرة آخر ليلة انطلق من عندنا يركض يقول ( الوداعية .. الوداعية ) .. اللوح معه جالون بنزين نثرة على جبل الحطب وولع به .. وثواني والا تقل حريق بير نفط ..
هنا طابت النفس وتمنيت نخلص وأرجع لعيالي سالم ولو ماني غانم من هالكشتة اللي كله تخريب للبيئة :(
-------------------- أمرك يا( صقر ) أبدلي بدلوي ...........( يتبع )

[حفرلوجيا]

صاحب الفكرة : العضو بمكشات أخوي صقر أمرني من أيام أكتب عن ( أعداء البيئة ) .. متضايق الحبيب من اللي يصيدون شي ماله داعي ويقطعون الشجر بزعمهم أحرار
ياخال هذا موضوع عميق .. وينقصنا كثير من الوعي .. جاء بالذاكرة ( علي البولندي )... وأظن انه يمثل نموذجا منهم .. وسأدلي بدلوي .. ولنأخذ الأمر بجدية
من أمن العقوبة أساء الأدب .. واللي مثلة لازم نلقى له حل.. وأقترح ان توضع لائحة عقوبات على أن يؤخذ بالحسبان المنهج التربوي .. تدرج وتنوع في العقوبة لـ( علي بولندي ) وفقا للتالي :
اول مرة يثور بوسط جبهته فشقة ( بولندي ) متوسع ويكون على بعد مترين من راس ماسورة الشوزن
إن تعود له وإستمر عدو للبيئة تجية العقوبة الثانية
يثور براس خشمة فشقة رقم واحد ويكون على بعد متر واحد
ان مانكل واستمر بتخريب البيئة
يثور به فشقة رقم ستة وتكون طرف الماسورة بوسط لهاته
وإن ماتاب وهذا المتوقع .. الشكوى لله ندعي له بالهداية والصلاح ... ونلجأ إلى التوعية الرادعة
وسلامتكم

[حفرلوجيا]

أحسبها لو سمحت

علي بولندي ذا يكشت للنفود عشر مرات وأكثر بالسنة .. بمجموع ثلاثين يوم تقريبا.. ( معلومة )

نفرض ان عندنا عشر بولنديين بشرق النفود ..( إفتراض حد أدنى .. غير متشائم )..

عشر بولنديين في عشر حمولة تريلة شجر أرطى يساوي مية تريلة تحرق من شرق النفود ( نتيجة متفائلة)

يوميا يزهق علي بولندي حول عشرين نفس ( شقت بعيني ) في ثلاثين يوم مضروبة في عشر جعر ( بولنديين ) .. تصير الحسبة ستة ألاف نفس ( طير وحيوان صحراوي ) تزهق في شرق النفود سنويا

هذا في شرق النفود .. وإذا حسبنا الجهات الأربع ( تعميم النتيجة ) .. والله صارت دراسة وأنا ماأدري :good:

تصبح الحسبة اربعمية تريلة + اربع وعشرين ألف نفس حيوانية.. تزهق سنويا ( بس بالنفود :( :( )

------------ ياليت يقر عقوبات لمثل هؤلاء تبدأ بالتدرج ( قلناها فوق )
وسلامة الجميع

[المسفهل]

حقيقة أحسن علينا أخونا صقر باستخراج هذه الكنوز التي كانت مدفونه برأس

المبدع حفرلوجيا وفي اعتقادي وحسب سبري لكتاباته أن هناك كنوزا كثيرة

لم تكتشف بعد ، وأنه لم يحصل العثور على مدافنها الغامضة ومساربهاالملتوية

فنحتاج إلى فزعتكم يالاخوان في استثارة هذا الصيد السمين

واستخراج هذا الكنز الثمين .

[القماري]

سلمت ياحفرلوجيا
مواضيع متعوب عليها وتصلح تتألف في كتاب ( حفرلوجيا والأرض)
وبعدين وراء أخوياك ، مرة بولندي ومرة سكران؟ :D

[desprado]

ما ودكم تدلوني عل البولندي علشان انصحه لكم وشرط ما عاد يطلع البر

[صقر]

تسلم تسلم يابو سليمان

ومبروك الوسام وتستاهل.

الحقيقة اشكرك اخوي حفرلوجيا على الطرح الرائع والسرد السلس...

كما اشكرك على تلبية الطلب والذي نسأل الله ان يجعله في موازين اعمالك.

قصة تحصل دائما ونرى بأعيننا عبث العابثين بالبيئة دون رادع أو حياء

أتمنى ان يكون لهؤلاء رادع ذاتي بحيث نحافظ على هذه الثروة البيئية لأبنائنا

والله يجزاك خير ويسمح دروبك ويرزقك الجنة على هالرائعة...

[القناص]

ازملاي

والله ان حفرولوجيا كاتب خفيف على القلب
الله يوفقه
عزيزي حفرولوجيا
حط على اعداء البيئة تكفى
ما عندنا الا شجرتين في هالبر وبيمتسعونها
اجل لو نقول اطلعوا بشتلات للبران والوديان وازرعوها
وش بتصير ردة فعلهم
يا كافي! بشهبون البران اكثر من شهابها
يا مغيث اغثنا
استغفر الله لي ولكم:good:

[((( الحر)))]

الرسالة الأصلية كتبت بواسطة صقر
تسلم تسلم يابو سليمان

ومبروك الوسام وتستاهل.

الحقيقة اشكرك اخوي حفرلوجيا على الطرح الرائع والسرد السلس...

كما اشكرك على تلبية الطلب والذي نسأل الله ان يجعله في موازين اعمالك.

قصة تحصل دائما ونرى بأعيننا عبث العابثين بالبيئة دون رادع أو حياء

أتمنى ان يكون لهؤلاء رادع ذاتي بحيث نحافظ على هذه الثروة البيئية لأبنائنا

والله يجزاك خير ويسمح دروبك ويرزقك الجنة على هالرائعة...

سر على هذا المنهاج بارك الله فيك

تحياتي..... اخوك ((( الحر)))
18/9/1424

[عبدالعزيز الدباسي]

تسلم الأيادي يا ابا سليمان على هذا الطرح ، وبارك الله في جهودك ، ،

وللاسف أن أمثال هؤلاء بازدياد ، وما نراه من تطاول على البيئة من هذه الفئة لهو افساد في الارض وإتلاف للزرع ، وفيها مخالفة لامر الله حيث استخلفنا في الارض وأمرنا أن نصلح فيها ولا نفسد ومن اعظم المفاسد المتعلقة بالبيئة هي اتلاف الزرع ، فقد نهى الاسلام عن إتلاف الزرع والحرث بقطعه او حرقه لغير منفعة ، فقال تعالى (وإذا تولى سعى في الأرض ليفسد فيها ويهلك الحرث والنسل والله لا يحب الفساد) ـ البقرة 205

ويذكر المفسرون أن الآية نزلت في الأخنس بن شريق، حيث قدم على رسول الله صلى الله عليه وسلم، فزعم أنه يريد الإسلام ثم خرج من عند النبي ـ صلى الله عليه وسلم، فمر بزرع لقوم من المسلمين وحمر، فأحرق الزرع وعقر الحمر·
--------------
مرة أخرى اشكرك اخي الكريم على هذه الدرر الماسية التي تتحفنا بها باسلوبك الفذ ، ولي رجعة ان شاء الله على الموضوع بشكل مفصل .

[مراكي الذيب]

الله يحفظك ياخوي حفرلوجيا.


اولا مبروك على الوسام

ثانيا المفروض يعطونك كل الأوسمه مع الأبتسامات

ثالثا خويك هذا الله يهدينا وياه العقوبه الأخيره ماتكفي ودك تدفها شوي الين الزناد يكون عند الهاة وبعدين تضحكه تخلي الهاه هي اللي تثور رقم سته تخليه يموت وهو يضحك.

رابعا ياشين خليتنا مانقرا للأعضاء الثانين اقرا موضوعك وانسا الباقي.


الف شكر.

[شقران]

من كل شر....مبارك عليك وسام التميز فانت لها ومن حذا حذوك في كتاباته المفيده.

اخي الغالي ذكرت قاعدة ونسيت اخرى من وجهة نظري.الا وهي التربيه السليمه للفطر العقيمه.

فلو ان اخيكم هذا زرع في فطرته المحافظه على البيئة وحبها لما رأيتم منه كل هذه الافعال.

العلم في الصغر كالنقش في الحجر فلنعلم ابنائنا حب الطبيعه والمحافظه عليها بالاضافة الى التوعية الدائمه لانفسنا واخوننا خصوصاً من (فاتهم قطار التعليم...في حب الطبيعه والحفاظ عليها).

كالعاده مواضيعك جميله وتلامس الجرح وتزين المنتدى حفظك الله ورعاك.

دمت نصيرا لبلادنا وطبيعتها.
تحياتي القلبيه

[عاشق الصفاري]

الرسالة الأصلية كتبت بواسطة شقران
من كل شر....مبارك عليك وسام التميز فانت لها ومن حذا حذوك في كتاباته المفيده.

اخي الغالي ذكرت قاعدة ونسيت اخرى من وجهة نظري.الا وهي التربيه السليمه للفطر العقيمه.

فلو ان اخيكم هذا زرع في فطرته المحافظه على البيئة وحبها لما رأيتم منه كل هذه الافعال.

العلم في الصغر كالنقش في الحجر فلنعلم ابنائنا حب الطبيعه والمحافظه عليها بالاضافة الى التوعية الدائمه لانفسنا واخوننا خصوصاً من (فاتهم قطار التعليم...في حب الطبيعه والحفاظ عليها).

كالعاده مواضيعك جميله وتلامس الجرح وتزين المنتدى حفظك الله ورعاك.

دمت نصيرا لبلادنا وطبيعتها.
تحياتي القلبيه

سر على هذا المنهاج بارك الله فيك:good: :good:

[الرّماي]

ياسلام عليك اخوي حفروليجيا ونستنا وافدتنا ونصحتنا اللة يجزاك خير ولكن العبرة
لمن اعتبر والمشكلة للي مايفهم وسلم علي البولندي المفسد في الارض

[حفرلوجيا]

أخوي المسفهل :
شكرا .. والله كلامك خلاني منتشي .. و ( مختف ) وأيقنت انك انسان (محرض ) وتحب تجامل..
تصدق لي يومين افتح على المنتدى .. متغبي ورا الشاشة وكل شوي ( اويق ) سرقة .. مادام ( صيد ثمين ) ذولا المكشاتيين لاجاء طاري الصيد .. مايعرفون غير الزناد .. يثورون بي وأروح من صيد أمس :)
أخوي القماري :
شكرا .. هذا اللي عطانا الله .. ربعي السكران والبولندي .. والقماري بمكشات ..
ياحلو عيونك اللي تغمض به وتفتح .. حلوة وتخرع الصغار .. خله مسلهمة أحسن.
أخوي desprado :
شكرا .. خوفتي انك هولندي تبي تحل لنا مشكلة بولندي .. مادام ذا علمك وتوقيعك.. عساك على القوة .. وعليك بالتسعة ملي تراه أوفق :good:
أخوي صقر :
أنا والله اللي اشكرك .. وطلباتك أوامر .. عسى الأمور بس تقود الوجه .. وهالحرة اللي بصدرك من العابثين بالبيئة أحس بها .. ليتها توزع على ( البولنديين ) حتى يعقلون:(
أخوي القناص :
شكرا ..الله يسلم قلب قلبك .. ويوفقك ياحبيب .. وأحلامك بتزيين البيئة يبي لها وقت وحنا اللحين.... يالله السلامة مانبي غيرها.
أخوي الحر :
شكرا .. سم طال عمرك .. انت تأمر .
أخوي شقردي :
شكرا .. وأنت سالم ياريس .. آآآآه .. وياليت الجميع يعي حقيقة الذي نبهتنا إليه ..
الإستخلاف بالأرض ..
وتذكرت الأن مقولة رددها أحد الإعلاميين .. وهي ( الوعي ممارسة وسلوك ) .. مما يعني ان نعتقد ونفهم ونطبق ..
------------ مرة أخرى نشكرك على تنبيهك .. ولعل رجعتك للموضوع ماتطول .. خصوصا انك تقول بشكل مفصل .. وأنت إذا فصلت ( توسع ) الموضوع:good:
أخوي مراكي الذيب :
شكرا .. الله يسلمك على هالعبارات الرقيقة ..
بس والله العظيم ضحكت حول مايغشى علي .. على العقوبة اللي أقترحتها .. أثريك روعة .. خاصة ختمتك ( يموت وهو يضحك ) ..بعد ماتثور اللهاة الفشقة :D
أخوي شقران :
شكرا .. وانت سالم ياريس ..
وكلامك صحيح .. بس أشك إن هالنوعيات يهمهم أمر المحافظة على البيئة ..
وصحيح .. علينا مسؤلية تربية ابنائنا ومن هم في نطاق مسؤليتنا على حب الطبيعه والمحافظه عليها والتوعية حول ذلك ...
وعلى هالأفكار انت اللي أجمل .
أخوي عاشق الصفاري :
شكرا .. سم طال عمرك .. والله يخلي لك الصفاري.
أخوي الرّماي :
شكرا .. وعساك دوم متونس .. وأسلم لك على البولندي وأحاول أفهمه وأوعيه ولعله يعتبر لأن اللي أمثاله كما تفضلت .... مايعتبرون.

[ذيب البر]

حسبي الله عليك ياالبولندي الله لا يكثر من امثالك


لكن برضه اقول زي ما قلت قبل حسبي الله على اجهزة القارمن الي وصلت البولندي


واشكاله لمثل هذه الاماكن مع استفادتنا الكاملة منها وانا اول واحد

لكن قبل نعرفها وحنا بخير من البولندي وربعه قبل تطب الصمان والدهنا

ما تشوف الا مثلكم وشرواكم بس الشكوى لله وانا اعتبرها افادت كثير ودلت ناس

ما يستاهلون البر كثير

تحيااااااااااااااااااااااااااتي

[حفرلوجيا]

أخوي ذيب البر :
شكرا .. معك ان أجهزة تحديد المواقع ساهمت في وصول الردي وغيره لكثير من الأماكن والمواقع .. لكن ..
تعليق الأخطاء على ذلك .. هو هروب من حقيقة المشكلة وهي ان شرائح متعددة من ( البرنجيين ) لم تنضج أفكارهم وسلوكياتهم تجاه الوعي بأهمية البيئة الصحراوية والمحافظة عليها.. ومصداق لذلك شف أطراف كل ديرة ومكشات أهلها القريب بالعيد وبعده .. يارجل مناطق الكشتات المحيطة بمطار الملك خالد تعد بالديرة وأكثر من يجيها اللي مايعرفون هالأجهزه .. إذا شفت الوضع المزري لها بعد كشتات أهل العاصمة ( اللي يفترض انهم أكثر وعي من غيرهم ) .. تعرف ان أجهزه تحديد المواقع ( مالها ذنب ).. وإن كانت ساهمت في وصول الكثيرين لمواقع بعيدة ومجهولة لهم من قبل .

[المربد]

أشهد انك تستحق الوسام وعسى الجماعة ارسلوا لك الهدية معه..؟

عندي من ربعي من اشباه البولندي ولكنهم بدأوا يعقلون حتى واحد منهم باع الشوزن
واشترى كامرة ديجتال الله يفتح على بصائر الباقين.

[راكد الشمال]

عز الله مادمرنا إلا البولندي واشكاله. من كثرت هالسيارات وهالاجهزة وبرنا رايحن وطي.
قله الوعي هي اساس البلى. اول ما تشوف إلا جره المواتر والغنم من كثر الرمث وهالحين الله المستعان
:(

[حفرلوجيا]

أخوي المربد :
شكرا .. حلوكلا مك ( ولا هو قصور من غيرك ) .. أحلى هدية .. بس تعال استبشرنا بك من فترة وغطست وتوك تظهر .. لاتكثر الغطس;) وخلك حولنا ..
ونسأل الله اللي فتح على قلوب ربعك يفتح على قلب كل ( بولندي ).. ويصير بعدها نصير للبيئة .