اسئلوا أهل العلم ان كنتم لا تعلمون

[أبو ممدوح]

السلام عليكم ورحمة الله وبركاته
كيف حال الأعضاء انشاء الله طيبين
اليوم الصباح روحت أزور أحد الشباب ولقيته مكتئب وزعلان سئلته عن سبب زعله وتكدر خاطره قال لي تعال ودخلني المقيظ حقه الخاص فيه ووراني شيهانه جبليه وياليته ما وراني هي قال وش العلاج حاولت معها أعطيتها سكر نبات ما فاد اعطيتها عسل ما فاد اعطيتها حبوب الديدان ما فاد أعطيتها حبوب الكنقر لمرض التجبن الي يجي في حلق الطير ما فاد وحبيت أعرض عليكم الحاله لعل وعسى نلقى العلاج عندكم الحالة كالأتي
الشيهانه مقفله عيونها على طول
عظمة الصدر بارزة بالحيل
اذا اسقيتها الماء قام تعطس بشدة لمدة 10 ثواني تقريبا
العلف ما تعلف الا شيء بسيط جدا لا يذكر ((تذكي الحمامة وتقوم بنتفها وأكل أعلى الصدر يعني أطراف فقط وترجع على وكرها وتبدأ تلق العينين ))
وش اسم هذي الحاله واش علاجها
وشكرا

[جارح العين]

والله اعلم ان معها مرض التهاب بالصدر او قلاع الان اعراضها نفس الشي تقريبا
واذا قلاع تلقا بقع سوداء على السان
والله اعلم انه وصلت مرحله صعبه وعلاجها صعب
لاكن ودها عند مستشفى او على الاقل بيطري وهو ابخص بهالشغله
والله شفيها انشاء الله...

[راكان 11]

هاالحين معاد ينفع السؤال

خل الرجال يلحق عليها ويوديها للمستشفى لأن وضعها خطير

وبالنسبه لنوع المرض / لآ يمكن معرفته الا عند رؤيتها وفحصها بالكامل

الله يشفيها ان شاء الله

[خشف.]

ان شاء الله اعضاء الخيمه يفيدونك اكثر

[ذراع الذيب]

الله يشفيها ...

[شبراق]

الله يشفيه انشاءالله
حاول توديه للمستشفى

[الجير الصافي]

كل هذا وليلحين ما وداها المستشفى !!
خل يروح يوديها المستشفى احسن من الاكتئاب

[راعي البرقا]

ياخوي معليش تحملني شوي لوالإكتئاب يشفي المريض كان الناس كلهم مكتئبين .وأنا أخوك أفعلوا السبب والإكتئاب مهوب سبب يعني لازم يودي الطير المستشفى ولا ياخوي يطيرها ولها رب بيعافيها ويرزقها والشفاء من عند الله وأسئل الله أن يشفيها . وتقبل مروري وفالك التوفيق

[معشي الطير]

صبحكم الله بالخير جميعا
اخوي اذا الشيهانه تتجنب اكل العظام ومروشها خظر وريحه فمها كريهه فهي مصابه بمرض القلاع وعلاجه (سبار تريكس) حبه لمده اسبوع وانشاء الله راح تشوف الفرق لان القلاع قد يكون داخل المعلف وماتشوفه بالعين.ولايحاول يعطيها سكر لانه السكر يحل الطيروالطيره ضعيفه والسكر راح يتعبها اكثر ..واذا امتنعت عن العلف خله يقطع قطع صغيره على قد حبه الزيتون ويسقطها بحلقها بشرط ان يكون العلف بسيط (يعني لاتكثر لها).والاحسن من هالشغله كلها ودها للمستشفى لان حالتها متدهوره .والله يشفيها انشاء الله .

[أبو ممدوح]

مشكورين على تعاونكم وردودكم
والله يعوض راعيها بأحسن منها لأنها ماتت اليوم
وعلى طاري المستشفى ما عندنا الا صيدليات بيطريه والمستشفيات الي في جدة بصراحة ما هي مستشفيات هي أماكن يتعلمون فيها البياطره على حيوانات الناس وانا واحد من الي تعلمو في طيره وذبحوه لي بالإبر والطير حر جرودي 17 * 17 ونزلت عليهم واخذت حق العلاج كامل ولا اعطيتهم الا حق الكشفيه تتوقعون العلاج كم كلفني والله كلفني 1200 ريال والكشفيه 50 ريال واخذت حق العلاج ودقوا عليه أكثر من مره ولا رديت عليهم لأنهم يبغون حقهم لكن عندنا كلا طبيب طيره والله يعين الجميع