اللبيب بالأشارة يفهم

[الفوار2008]

بسم الله الرحمن الرحيم
السلام عليكم ورحمة الله وبركاته

اخوكم ابوعبدالله

قبل مايقارب السنه كان اول ظهور له في هالمنتدى الغالي وحب هواية الصيد بالسلق المهم بدى بأقتناء السلق وتربيتها والمفروض انه هالسنه يبدى يطلعها ويهدها ويوريكم شغل يده

ولكن !!!!!!

للأسف من بديت ونا منحوس اخذت لي جرو من خويي ابوالعز وبعد شهرين تبين انه لوقي

وضاق صدري وشلت الفكره من راسي

ولكن !!!!

الله جاب عطي الله
ابوعايش
( سلطان العوني)
وعطاني جرو ياجماعه يشهد الله ما راح يحصل لي اقني مثله ولو بعد مية سنه وربيته لين صار عمره 7شهور
وجاه مرض يسمونه الدود يضعف مره تقول له شهر ماأكل المهم قام خوين لي طيب يقاله ابوعزوز وتفنن بالجرو وعطاه ابرة دود وبعد الأبره بربع ساعات الذيخ مات
وضاق صدري ثانيه
وكان العوض عندي قبل لا يمرض الذيخ عطاني ابوعايش جروه اطيب من الذيخ قبل لا يموت تقريبا بثلاث اشهر
وقلت العوض بك ياهالجروه
وبعده بشهرين جيتها ولاها مستميته فاتحه فمها وتخثي دم قمت و طلعتها برا مكانها وصبيت عليها ماء ومامداني احط فرشه بسيارتي عشان اوديها البيطري الا وهي ميته

قلت ياولد بس هاذي مايبيلها فهم السلق خلها لأهلها المهم انتم وش رايكم !!!!

[ابو تمام]

بصراحه يابوالعبدي ضيقت صدري بس ترى فيه ناس تخطئ بالنسبة للجرا اول مايصير عمره شهر لازم تعطيه إبرة اسمها ( الجرعه الخماسية ) وهذي تحميه بإذن الله من الامراض وتخلي صحته زينه

قلت ياولد بس هاذي مايبيلها فهم السلق خلها لأهلها المهم انتم وش رايكم !!!!


بالنسبة لكلامك هذا انت تنقصك الخبرة فقط

تقبل مروري

[واكس]

ياخوي ضيقت صدري هههههههههههه وانا اضحك
والله الحظ االاقشر يالله دخيلك
نصيحتي لك خل السلق عنك وحول للطيور والا دورلك سلقه ام سنه والا اكثر

واكس

[صدر الشمالي]

وعليكم السلام ورحمة الله وبركاته

معاناهـ بصراحه لكن يالغالي الموت عند الله والرجال لانوا شي لزم يجيبه ولا يحصله لاتخلي هالازمتين تكون عثره في طريقك او تمنعك من اكمال الي براسك اقتن السلق ونا اخوك والي يموت محله جرو ثاني والله وثم والله لو عندي شي اني لا اقولك وين محلك واجيبه بنفسي لك لكن العذر والسموحه وحبيت اقولك لاتخلي شي يمنعك عن تربية السلق وقتنائها مافيه يجي يبدا سهل وينتهي سهل لابد من بعض الامور والعوني رجال ماقصر ونعم اتمنى ان الي حصل يكون دافع اكبر لك واعتقد لو تربي من سن 6 شهور وفوق افضل من الجرا الصغيره حيل

اتمنى ما اكون طولت عليك لان موضوع بصراحه اثر فيني

تقبل مروري

[راعي سبحة]

أنا مع أخوي صدر الشمالي هاذا مثل الإختبار وعاد القرار يرجع لك

[خشف.]

الله يرزقك باللي اطيب منهم ان شاء الله

[جن جون]

الفوار الله يكون في عونك وانت حاول انك تتعلم شوي شوي لحد مايصير عندك خبره

[القحطاني505]

اخوي الفوار معوض بخير ان شاء الله ..

وصدقني الامراض الشائعه اللي صابت الجرا كلها امراض لو اعطية جرراوتك الابره السداسيه كان كلهم معك لحد اللحين والابره السداسيه تقوي المناعه وتحميها من الامراض والله يعوض عليك بخير واذا انت هاوي سلق تلقف مع الاولي والتالي وخذ من هذا وهذا معلومه وصدقني راح تغطي عليهم ولكن اذا كان اهتمامك مو ذاك الزود فاتركها للناس هاوينها والله يرزقك باطيب السلقان ان شاء الله...

[عبدالله هدد]

السلام عليكم
اخوي والله يعليك حض الله يعينك
وعلى فكره انا مثلك مالي الا سنه ونص على هوايت السلق
ولا اعرف شي بس اسئل وانت تعرف
وبعدين محد طلع من بطن امه متعلم
يعني يبيلك عشر جرا بعد ويموتن عندك وامورك تظبط تصير تعرف

امزح معك

يعني الشغله يبيله ممارسه
واستمر والله يوفقك

[ابوحمد 2009]

والله مافهمت