ما اسباب غدو الطير [الأرشيف]

مشاهدة النسخة كاملة : ما اسباب غدو الطير

abo-m7mmad

21/03/2008, 02:30 PM

السلام عليكم تعالو نتناقش ايها الاخوة العزاء

ماسباب غدو الطير

لانا ما يجي يوم الا ونسمع طير فلان غدى

فلا نبخل ايها الخوة من مشرفين و اعضاء على انفسناء باي معلومه

ولكم جزيل الشكر اخوكم ابو محمد

أبو رداد

21/03/2008, 03:05 PM

وعليكم السلام ورحمة الله وبركاته
موضوع طيب من رجال اطيب
واتمنى من جميع الاخوه الي غدت لهم طيور اوسمعوا
ان يذكروا السالفه علشان يستفاد باقي الاخوه
,,,
وابدي انا
غدت لي طيور كثيره ههههههههه
السنه هذه غدا لي شاهين فرخ
والسبب حمامه (الله يغربل هالزاجل لو يقلع الطير لويسبقه لو يملعه هههههه)
وكان الهدد قريب الغروب
,,,
وقبل غدت لي طيور وابرز سبب كان
(هو لماالقى جول حباري خامر) هههههه افقد السيطره
اهد الطير الاول واتركه ورا حبارته واهد الطير الثاني وكذلك والطير الثالث وهكذا
وفي الاخير ارجع ادور عن الطيور
وكانت تحصل حالات ضياع ...

أبو ممدوح

21/03/2008, 03:21 PM

حياك الله وموضوع بصراحة في غاية الأهمية

في نظري وعلى ما أشوف ان ( نفس الطير من نفس راعيه )
يعني نفسية الطير تكون من نفسية راعيه الي يدهله ويعلفه وينقله ووقت الهدد ووقت الدعو
وكل هذا يعتمد على الصقار نفسه يعني بالعربي الطير الي غدى على راعيه ما غدى الا من غلطه غلطها الصقار سواء في التعامل أو مثل أخونا أبو رداد يوم يشوف الجول ينسى حتى نفسه ويفقد السيطرة ويهد طيوره كلها ... والحمام الي انت عارف انه مثل البرق لا تهد طيرك عليه الا في الصباح الباكر أو بداية العصريه حتى لا يسير مثل ما سار معى أبو رداد والله يعقل عليك طيورك كلها يا أبو رداد

العمراني

21/03/2008, 05:48 PM

موضوووع طيب اخووي انا مالي بطيور غير عشر سنين واقول انا جديد
انا قنصت مع صقارين وشبكت طيور طيبه شي واحد لاحضته بل الصقارين
يعاملون طيورهم بطريقه غريبه( الطير) مو يحس ولالا الطير مو خوي ولالا ترا الطير لاخويته خاواوالله مايبعد واذا راح ورا حمام ولا وش ما كان تلقاه ثاني يوم بنفس المحل ما ينسا راعيه
والدليل صقار كان يقنص وشاف وكريه على العمود وهو يناضر لها مد يده يبي يشبك حمام كان مفرع عن طيره جبليه لمن مد يده ظرب طيره وهو مو قاصد قام الطير يكافخ والله بس يشوف راعيه يقوم ويطب كره راعيه ما درا وش بلاه
اهداه لخويه وتدور الايام ويطلعون البر يبون قنص والطير مع خويه شاف راعيه الاول وهو يكفخ ويصعك عرفو الرجال الموضوع وقالو لراعيه وش العله فا انا اقول الطير خوووي موو وسيله وش تسموها اي اسم خوووي

مشكوور اخوووي على الموضوع

أبو ممدوح

21/03/2008, 06:35 PM

صادق يا العمراني
وبرضه فيه شيهانه كانت مع صقار ويحطها عند الغنم والي يرعى الغنم سوداني والي يعلفها هل السوداني ويوم سافر السوداني اهتم فيها الصقار وسار يعلفها بنفسه وجاء يوم من الأيام وهدوها على حمام هددهما كان شمال والطيره راحت غرب وابعدت وهم وراها يوم شافها وقعت عرف راعيها وش القصه تدرون وين وقعت ... وقعت عند راعي غنم سوداني جالس على قوز ( طعس ) واستظلت في ظل السوداني
وهذي من وفاء الطير وخوته للسوداني ... سبحان الله

العمراني

21/03/2008, 07:32 PM

مشكوور اخووي هاذا دليل خوووة الطير امنا الشباب يفهموون معنا الكلام مشكوور ابو ممدووح لايحرمنا ربي هل الطله

جارح العين

21/03/2008, 08:39 PM

موظوع رائع ومعلومات مفيده وماقصرو الشباب
واننا اقول اول سبب لظياع الطير هو الاهمال وقله التدهيل
الطير وفي جدا جدا لاكن الي ماينقل طيره ولا يدهله كثير الطير خلاص مايهتم له اهم شي يبي علفه وبس
لو يطلق طيره بالجو بدون حمام ولا ملواح كان مايشوف وجه طيره الطير يجي من الجوع لي
الحمام الي اطلقته او الملواح او اي صيده مو عشان سواد عيونك طبعن هذا الي يهمل طيره
اما الي مخاوي طيره ويعتني به زين مايبعد عنه نشبه خخخ
ونفس الشي اذا الطير يكوش او ينقل العلف
من قله التدهيل ويفظل تعلفه على يدك او بقربك عاد هذا مو موظوعنا - موضوع يجر موضوع خخخ
والله يعطيك العافيه عالموضوع
وانشاء الله انك استفدت

ابو عايد

21/03/2008, 09:00 PM

السلام عليكم ورحمة الله وبركاته

بعض الموقع صعبه تهد فيها وكثر ضياع الطيور ورجعة الكراوين والحبارى

لان الجو مغبر والقصص واجد

ذراع الذيب

22/03/2008, 02:03 AM

شبراق

22/03/2008, 11:30 AM

سبب ضياع الطير الغالب تكون الريشه رديئه او الحجر ضعيف
خاصه اذا هديت على حمام الطير يروح فوق والارض الي تهد فيها لها دور

حب الوطن

22/03/2008, 11:38 AM

السلام عليكم اخوي abo-m7mmad موضوع جميل وهناك اسباب كثيره لضياع الطير ...

هد الطير بجوار مناطق وعره لا يستطيع الموتر الوصول لها ( من المتضررين ) :D

ســـــــنافي

22/03/2008, 01:44 PM

يعطيك العافيه

بروفسر

22/03/2008, 01:51 PM

البروفسر مر من هنا
الاسباب واجده منها قلة التدهيل /وعورة الارض / طلق الطير من دون وضع ريشه

abo-m7mmad

23/03/2008, 02:45 PM

مشكورين على المعلومات التي تم تزويد الجميع بها

ودمتم بود

اخوكم ابومحمد

راعي البرقا

23/03/2008, 05:16 PM

أسباب الضياع كثيره وش تقول وش تخلي بس منها :
عدم تدهيل الطير وهده
هده وقت غروب الشمس على صيده أو حمام أقشر وعدم الإكتفاء بالملواح
أرض المطراد والصيد كثيرة جروف ولا فيه ريشه أو ريشه الطير حجارها ردي أو نفس الجهاز لك عليه
أخذ العلفه من الطيرأكثر من مره إذا صاد وهده في نفس اليوم
نفسيه الطيرتلفانه و كل واحد يعرف نفسية طيره من وجهه . وهذا اللي أعرفه أنا .وتقبلوا مروري

قلب ذيب

24/03/2008, 06:46 PM

مرحبا بالجميع
اسباب ضياع الطير كثيره , وقد كتبت موضوع خاص بضياع الطير في المقناص 0
ان شاء الله القاه واعيد طرحه .
وضاع الطير له عدة اسباب منها:
الهدد المخالف
الهدد على الحمام في الاراضي الوعره والمأهوله ,
حومة الطير .
الهدد في الهوا الصلف وما الى ذلك .
ويمكن ان يقطع الطير من الوكر ويضيع , ويمكن ان يفرط الطير , كذلك بعض الطيور تطير ببراقعها .
لكم تقديري

المزروعي

27/03/2008, 09:00 AM

1. أول سبب سوء تقدير الصقار لجاهزية طيره !! يعني أحد من العرب ما يعرف نفسية طيره أبد ولا يعرف متى يكون طيره في اللياقه المطلوبه لطرد الحباره أو الكروان أو حتى الحمامه و يعتقد أن طيره بيطرد كل يوم نفس المسافه !! إذا كنت أنت معشيه البارحه حمامه كامله أو كروان كيف تريده ثاني يوم يطرد مسافه طويله !!
2. في أخر الموسم تكون نفسية الصقر متقلبه بسبب بدأ موسم التزاوج !! ولا تكون عنده القابليه للصيد مثل أول الموسم وخاصه جرانيس الهوا !!

abo-m7mmad

29/03/2008, 04:48 PM

شكراً لكل من شارك في الموضوع
شكراً لمن ساهم في نشر الفائده
وشكراً لهذا المنتدى الجميل والاعضاء المميزين
اخوكم ابومحمد
دمتم بود

abo-m7mmad

29/03/2008, 04:49 PM

شكراً لكل من شارك في الموضوع

شكراً لمن ساهم في نشر الفائده

وشكراً لهذا المنتدى الجميل والاعضاء المميزين

اخوكم ابو محمد

ودمتم بود

خشف.

30/03/2008, 06:04 AM

ان شاء الله اعضاء الخيمه يفيدونك اكثر

أبو رداد

30/03/2008, 09:07 PM

شكراً لكل من شارك في الموضوع

شكراً لمن ساهم في نشر الفائده

وشكراً لهذا المنتدى الجميل والاعضاء المميزين

اخوكم ابو محمد

ودمتم بود

الشكر لك اخي الكريم

لانك اثرت هذا الموضوع والذي تقصد منه فائدة اخوانك
ان شاء الله نضع للموضوع رابط مع المواضيع المميزه
لانه متميز بفائدته ....
ويمكن ان يفيدنا بعض اخواننا الي كانوا غائبين
ويضيفون مشاركاتهم وتجاربهم
والسلام

abo-m7mmad

04/04/2008, 09:40 AM

شكرا لك اخي ابو رداد
على اهتمامك الواضح في الموضوع
شكرا لكل مشرف او عضو
ودمت بود
اخوك ابو محمد

عين النداوي

07/04/2008, 02:15 AM

السلام عليكم .. الله يعطيكم العافيه ياخواني .. انا بقول الي صار معي مايضيع طيري الى اذ1 كنت سهران ولا اذ1 هديت الطير ونطح الشمس العصير .. اخفيه من اشعه الشمس .. تحياتي