المعاميل تطلق على ايش00000نقاش حاد

[بواسامه]

السلام عليكم ورحمة الله وبركاته
حيا الاخوان جميعا
المعاميل تطلق على ايش بالظبط
الحقيقه وانا في الاستراحة ان ومجموعه من الاصدقاء
صار بيننا نقاش وتعالت الاصوات
بخصوص
المعاميل تطلق على ايش بالظبط:good:
اللي000 يقول انه كل عفش الشاهي
واللي0000 يقول القهوه والشاهي فقط
واللي0 000يقول انه للبيالات والفناجيل
واللي0000 يقول انه للعزبه بدون الاباريق
واللي00000 يقول للاباريق بدون ملحقاته


بس نعرف راي الجميع وياحبذا يقول منطقته وش يسمونه
نبي نوصل لراي معين
ولكني اظنه تختلف باختلاف المنطقه والله اعلم
شاكر لكم تفاعلكم فادلي بدلوك وشاركنا

[راعي البرقا]

وعليكم السلام ورحمة الله وبركاته
الله يحييك ويبقيك
يشرفني أخوي إني أكون أول من يرد على الموضوع اللي طرحته بالنسبه للمعاميل فهي عندي وانا من سدير هي ألأدوات اللي يصلح بها الشاهي والقهوه مثل الدله والملقمه والمبرد والنجر لراعي الكيف....... إلخ و بريق الشاهي وهذا عندي والله أعلم وارجوا أني قد أفدتك وفالك التوفيق

[بن نويشر]

المعاميل هي كل ما تتعامل معه بإستمرار ، ولذلك يطلق عليها معاميل .

وتقبل تحياتي يا الغالي ،،،

[info]

المعاميل هي للقهوة والشاي وعدتها وعلى فكرة هذة الكلمة يقولها الجميع لكن هي لقبيلة واحدة فقط ؟حتى 30 او 40 سنة مضت لميكن يقولها الا قبيلة شمر والان اصبحت لفظ متداول
شكراً لك

[سرهيد]

السلام عليكم

الغالب انها تطلق على ما يخص القهوة والشاي

ولكنها اطلقت ايضا على معاميل الغداء فيقول واحد انا بجيب معاميل الشاي وثاني يقول انا بجيب معاميل الغداء

ولكن والله اعلم ان اصلها اطلق على معاميل القهوة

مجرد رأي قد يكون خاطيء

تقبل احترامي

[بن دوخي]

اخوي الكريم ..

واعضاء مكشات الأكارم ..

أضن ان الكثير يجمع على ان "المعاميل" تطلق على كل أدوات القهوة والشاهي و "العزبة" تطلق على أدوات الطبخ وأسمع أحياناً كثير من الناس يطلقون على "المعاميل" لكل عدة البر من القهوة والشاهي والطبخ .. والله اعلم ..

أخوكم .. بن دوخي

[Ry905]

يبدو لي أنها تطلق على الأدوات التي تستخدم لصنع القهوة فقط ( الدلال ، المحاميس ، المبردة ، النجر ... الخ ) ولا تطلق على أدوات الطبخ الأخرى ..

[طيب القلب]

شكراً على طرح الموضوع ...

في الشمال ، وبحسب جلستي مع الشيبان ، أن المقصود بالمعاميل هي أدوات القهوه والشاهي:

دلة المطباخه (القمقم) لطبخ القهوة وتفويرتها ، وهي الأكبر حجماً بالعاده.
دلة المبهاره ، لتفوير الهيل ، وهي تلي المطباخه بالحجم.
الدله الأصغر حجماً (وهي التي تزل بها القهوة مفصولةً من الهيل ).. نسيت اسمها الدارج..
المحماسه (لتحميص القهوه).
المبراده (لتبريد القهوة).
النجر.
أما الملحقات والتوابع فهن:

الفناجيل
الكاسات(بيالات).
البيز
ليفة الدله.

[جهام القصيم]

اخوكم من القصيم اقول والله اعلم ان المعاميل تطلق على جميع اغراض الطبخ من قهوة وشاهي والطبخ بجميع انواعة0
وفق الله الجميع

[اول 111]

عزبه الشاي والقهوه هذي هي المعاميل

[الموشم]

المعاميل كل ماتحتاجه لتجهيز القهوة والشاي ..والعزبة هي أدوات وأغراض الطبخ .. وتقبلوا تحياتي ,,الموقع الفويلق (القصيم)

[المجمعه]

المعاميل


كلمه قــــــــــــــــــديمه ...على وقت البقشه.. وين طلعتها منه


المعاميل ادوات عمل القهوه والشاهى
والمواعين ادوات الطبخ

[سندهم]

المعاميل تطلق على القهوة والشاهي

واذكر البيت واللي يقول فيها


عاش من جاب الفناجيل والدلة ***و الابريق مخدر فيه نعناعي .

وشكراًلك

[عاشق السيل]

وعليكم السلام ورحمة الله وبركاته ،،

أنا أشوف إن أكثر الشباب أجمعوا على إن المعاميل هي الأواني اللي تخص الشاهي والقهوة ،، وبصراحة هذي معلومة جديدة علي وبحسب ثقتي بأساتذة مكشات تأكدت إنه المعنى الصحيح !!

وبالنسبة لي ( طبعا قبل أقرأ الموضوع ) المعاميل هي المواعين أو الأواني بشكل عام يعني أي شي يستخدم للأكل أو الشرب أعتبره معاميل !!!!

بيض الله وجه راعي الموضوع لطرح مايفيد القارئ والله يجعله في ميزان حسناته ،،

تقبلوا مروري يالغالين ....

[بواردي الدلم]

تطلق على ادوات القهوه فقط

اما الشاهي داخل في نطاق العزبه

ولو ان بعض العالم نقلوه لنطاق المعاميل

واللع اعلم

[ابوفهيدان]

المعاميل حسب معرفتي
هي الحافظات التي تحفظ بها القهوة والهيل والسكر والشاهي وبالسابق كانت صراير وليست علب

[كويس]

حتى عند الشعار القدماء يقصد بها القهوه والشاي(أهل الشعر) اذا صح التعبير

[بواسامه]

المعاميل حسب معرفتي
هي الحافظات التي تحفظ بها القهوة والهيل والسكر والشاهي وبالسابق كانت صراير وليست علب

الحقيقه انا اوافقك الراي يابوفهيدان
وهذا اللي اعرفه

شاكر للجميع على المشاركه القيمه المثرية للموضوع
واللي يظهر لي انها تختلف باختلاف العرف بيننا ونحن في نجد فكل ديره لها عرفها :good:
فكيف بغير اهل هذه المنطقه
لاشك ان الاختلاف بيكون اوسع

[الخادم]

المعاميل كل مايخص القهوة و الشاهي من :
دلال
ملقمة القهوه
ابريق التفويح
اباريق التخدير
الفنجيل
البيالات

اما العزبة فهي :
القدور
الصحون
كل مايخص الطبخ

[فاقد تبوك]

في الشمال ، وبحسب جلستي مع الشيبان ، أن المقصود بالمعاميل هي أدوات القهوه والشاهي:

دلة المطباخه (القمقم) لطبخ القهوة وتفويرتها ، وهي الأكبر حجماً بالعاده.
دلة المبهاره ، لتفوير الهيل ، وهي تلي المطباخه بالحجم.
الدله الأصغر حجماً (وهي التي تزل بها القهوة مفصولةً من الهيل ).. نسيت اسمها الدارج..
المحماسه (لتحميص القهوه).
المبراده (لتبريد القهوة).
النجر.أما الملحقات والتوابع فهن:

الفناجيل
الكاسات(بيالات).
البيز
ليفة الدله.

نفس الفكرة:good:

شكراً على طرح الموضوع ...

[بواسامه]

نفس الفكرة:good:

شكراً على طرح الموضوع ...

الشكر موصول لك وللجميع
بمروركم الموقر

[شاهين الباز]

من العرض احييكم واقول ان المعاميل تطلق على كل اواني الطبخ حتى ولو كانت المعاميل اللي بمطبخ البيت




تقبل مروري

[العاذر]

المعاميل حسب معرفتي
هي الحافظات التي تحفظ بها القهوة والهيل والسكر والشاهي
وبالسابق كانت صراير وليست علب
:good::good:

[فهدالغيهب]

الحقيقه انا اوافقك الراي يابوفهيدان
وهذا اللي اعرفه

شاكر للجميع على المشاركه القيمه المثرية للموضوع
واللي يظهر لي انها تختلف باختلاف العرف بيننا ونحن في نجد فكل ديره لها عرفها :good:
فكيف بغير اهل هذه المنطقه
لاشك ان الاختلاف بيكون اوسع


هذا الكلام اللي يجمد على الشارب أصبت كبد الحقيقة ومخها .

فعلاً العرف يحكم كل بلد

فاللفظ الواحد تجد له أكثر من معنى حسب عرف كل بلد ، بل تجد ذلك حتى في العربية الفصيحة فانظر لاختلاف المفسرين -رحمهم الله -لمعنى القرء في قول الله تعالى : ( والمطلقات يتربصن بأنفسهن ثلاثة قروء ) على ماذا يطلق .

واختلافهم كله مبني على العرف اللغوي وهذا أمر سائغ لاغبار عليه.

[الضاحي]

المعاميل



كلمه قــــــــــــــــــديمه ...على وقت البقشه.. وين طلعتها منه


المعاميل ادوات عمل القهوه والشاهى


والمواعين ادوات الطبخ




هذا الكلام المعروف عند الكثير من الشيبان

[ALBDRANE]

المعاميل دلة القهوة وملحقاتها فقط وأما بريق الشاهي وأدواته ما كانت موجودة في السابق
من ما قيل في المعاميل وهي على شكل لغز لمن يحبون الألغاز
أنشدك عن رجل شرى له معاميل ......... وأخذت ثمان سنين مادق فيها
إما يسويها سواة الرجاجـــــــــل ......... وإلا يخليها لـــمــن يقتنيهـــــــا
ماتصلح الدله وبيض الفناجـــيـــــــــل ......... إلا لمنهو يحرق البــــن فيهـــــــــــا

[الحيا]

المعاميل هي للقهوة والشاي وعدتها وعلى فكرة هذة الكلمة يقولها الجميع لكن هي لقبيلة واحدة فقط ؟حتى 30 او 40 سنة مضت لميكن يقولها الا قبيلة شمر والان اصبحت لفظ متداول
شكراً لك


حلو كلامك, لاكن هل بالفعل أنه لقبيلة شمر؟, وما أصل الكلمة أو وش معناها الأصلي الي جعلها تطلق على أغراض القهوة و الشاي؟

شكرا ً لك,



شكراً على طرح الموضوع ...


في الشمال ، وبحسب جلستي مع الشيبان ، أن المقصود بالمعاميل هي أدوات القهوه والشاهي:

دلة المطباخه (القمقم) لطبخ القهوة وتفويرتها ، وهي الأكبر حجماً بالعاده.
دلة المبهاره ، لتفوير الهيل ، وهي تلي المطباخه بالحجم.
الدله الأصغر حجماً (وهي التي تزل بها القهوة مفصولةً من الهيل ).. نسيت اسمها الدارج..
المحماسه (لتحميص القهوه).
المبراده (لتبريد القهوة).
النجر.
أما الملحقات والتوابع فهن:

الفناجيل
الكاسات(بيالات).
البيز
ليفة الدله.




والله أعلم أن هذا العلم الأكيد,

[يا سلام سلم]

صباح / مساء ،، الخير ::

يقول ابو دباس :

راعي معاميل لها العبد جلاس ### للبن يشري بالسنين العسيرة .

اولا : اشكر راعي الموضوع على طرحه مثل هذه الافكار اللي تساعد على معرفة بعض العادات والالفاظ المستخدمة في المناطق المحيطة بالشخص ،،،،

ثانيا : كلمة (( معاميل )) هي كلمة قديمة وتدل بالاجماع ومما لا شك فيه على ان المقصود فيها هو ( اغراض القهوة ) لعدم معرفة الناس بالشاهي والموجود سابقا هي القهوة ولكن مع بداية معرفة الشاهي في الجزيرة العربية وبداية اقترانه بالقهوة وهذا كان في وقت ليس بالقريب فقد اشتمل مصطلح معاميل كل من القهوة والشاهي حتى اصبح الجميع لا يكادون يفصلون القهوة عن الشاهي واصبح الشاهي مكمل للقهوة والعكس .

ثالثا : لا استغرب استنكار بعض الشباب لهذا المصطلح اللذي لم يصل الكثير لكنه موجود عندنا يا اهل الشمال ،، ومنتشر بكثره ،،

رابعاً : ايام ما كنا صغار ونحتاج التوجيه من الوالد ( شفاه الله ) كان يوصينا او يلزمنا بالاصح ويقول :

انت يا فلان اللي تصب القهوة والشاهي ، وانت تستقبل الرجال ، وانت ( يا سلام سلم ) على (((المعاميل))) لو تقوم عنها كسرت رجليك :mad:،، وهكذا

هذا العلم الوكاد والله اعلم واحكم ،،،

تقبلوا المرور ،،

[طحنون]

ماجبنا شي جديد المعاميل هي
عده القهوه والشاي
النك نيم التابع لي من سنه 2000((( راعي المعاميل))) تم سرقته من بعض الاعضاء في المنتديات الاخرى ابي اشتكي عليههم ههههه

[الصقر المهاجر]

حياالله الجميع ايضا المعاميل تطلق على اشياء اخرى غير الاواني وخلافه ومنها هذه القصة التي حصلت قديما فكان المقصود بالمعاميل شي آخر وعليكم التفسير وسلامتكم .




تزوج رجل من امرأة فأصيب في رجولته فصبرت معه ثمان سنين لم يمسها ولما فني صبرها قالت له:




أنشدك عن رجل شرا له مـعامــيل ......... وأخذت ثمان سنين ما دق فيها



إما يســـــويها ســــواة الـرجاجيل ......... و إلا يخلـــيها لمــن يقــتنيـــها

ما تصــلح الدلـة وبيض الفنــاجيل .......... إلا لمن هو يحــــرق البن فيها



فـطلقها بعد ذلك لما فهم المغزى

[العاذر]

المعاميل قديما : تطلق على ادوات القهوة والشاهي وملحقاتها من قهوة وهيل ومسمار و محماس ونجر والمبرد والملقاط ...

لاكن في الاونه الاخيره دخلت ضمن كلمة(( العزبة ))

فيطلق مسمى العزبه على شنطة البر اللتي تحتوي على جميع مستلزمات الطبخ والقهوة والشاهي



وتنتشر مفردة المعاميل بشكل كبير عند الشعراء قديما وهذا لايخفى

[رعب الصحراء]

السلام عليكم
بالنسبة لي فهي على حسب ما يأتي بعدها من مرتبط به معاميل القهوة أو معاميل الطبخ و هكذا

[مطنوخ قطر]

شكراً على طرح الموضوع ...


في الشمال ، وبحسب جلستي مع الشيبان ، أن المقصود بالمعاميل هي أدوات القهوه والشاهي:

دلة المطباخه (القمقم) لطبخ القهوة وتفويرتها ، وهي الأكبر حجماً بالعاده.
دلة المبهاره ، لتفوير الهيل ، وهي تلي المطباخه بالحجم.
الدله الأصغر حجماً (وهي التي تزل بها القهوة مفصولةً من الهيل ).. نسيت اسمها الدارج..
المحماسه (لتحميص القهوه).
المبراده (لتبريد القهوة).
النجر.
أما الملحقات والتوابع فهن:

الفناجيل
الكاسات(بيالات).
البيز
ليفة الدله.

احسسسسسسسسسسنت هذي هي من غير زود ونقصان,,,مع احترامي للجميع..

[نسناس غربي]

المعاميل هي للقهوة والشاي وعدتها وعلى فكرة هذة الكلمة يقولها الجميع لكن هي لقبيلة واحدة فقط ؟حتى 30 او 40 سنة مضت لميكن يقولها الا قبيلة شمر والان اصبحت لفظ متداول
شكراً لك

مالك لوا ياخوي

من عرفت العلم واهلنا واللي قبلهم واللي قبل قبل قبل قبلهم يطلقون اسم المعاميل على اللي انت تقوله
وهي.... "قبل مايعرفون الشاهي"
1-الدله
2-المصفاه"وهي دله كبيره تطبخ فيها القهوه وتصب في الدله للي تقدم"
3-المحماس
4-المبراد او المبرده " وهي انيه خشبيه تستخدم لتبريد البن بعد حمسه.
5-النجر
6-الفناجين
7-صحن القدوع " وهو صحن نحاسي مزخرف من اطرافه" والقدوع اكيد موجود فيه:D
8-الخصمه او الخصم وعددها 3 وهو كيس يصنع من جلد الارنب يوضع به البن والهيل والعويدي كل واحد في خصمه لحاله.
وكلها كانت توضع في صندوق" اللي هو صندوق المعاميل" جنب مشب النار طرف بيت الشعر في شق الضيوف..

وبعد ماعرفوا الشاهي" وهالكلام طبعاً من سنين طويله
صار مستلزمات الشاهي من العده وهي:
1- البراد
2- المفواح" واضح من اسمه هو البراد الكبير اللي يتفوح فيه الماء
3-فناجين الشاهي او البيالات
4-مونةالشاهي من شاهي وسكر..

حبيت اوضح ان الاسم ليس مقتصر كما تقول اخي على قبيلة شمر او منظقة الشمال بشكل عام.
ومسمى المعاميل لاواني الشاهي والقهوه معروف عند اغلب القبايل من زمن الغابرين...


اما اواني الطبخ فليس لها علاقه بالمعاميل
ولكن فالوقت الحالي المعاميل واواني الطبخ دخلت ضمن مسمى واحد وهي:"" العزبه""

اسف على اطالة الكلام وشكرا

[الوالي 999]

المعاميل هي للقهوة والشاي وعدتها وعلى فكرة هذة الكلمة يقولها الجميع لكن هي لقبيلة واحدة فقط ؟حتى 30 او 40 سنة مضت لميكن يقولها الا قبيلة شمر والان اصبحت لفظ متداول
شكراً لك
وش دليلك مع فائق الاحترام لشمر

[داعي خير]

السلام عليكم
المعاميل معاميل القهوة من دون الفناجيل والقدوع والنجر
وهذا المعروف في قصايد الشيبان الاولين عندنا في بيشة من مئات السنين وهذا الاسم ليس حكرا على قبيلة او منطقة

[ابن الفيحاء]

المعاميل أو المواعين هي الأواني وهي جميع مايستخدم في الطبخ من( شاهي اوقهوة اوطبخ الاكل )000

[Al3rands]

كل اغراض الكشته معاميل بس هي في الاصل تطلق على ادوات القهوه والشاهي(راي خبير)