هل يحق له يا صقاره ؟؟؟

[عبدالرحمن]

السلام عليكم ورحمة الله وبركاتة
.
.
.

واحد من الشباب لقى طير و فيه علامات يمكن تدل على صاحبة و لكن رفض اني اضع صورته او اي معلومة عنه حتى يتأكد من انه بيحصل على مكافأة , قلت له ليتك على الاقل تركتة في ارض الله الواسعة يلقاة احد يرده لراعيه , رد علي وقال لو تركته على ربطته كان الحين جيفه لاني لقيته ناشب وارضه ما حولها احد و انت خابرني مالي ومال الصيد .مكان ما لقاه شمال الرياض وشافه صقار و علق ان له فتره هلكان ما اكل شي و قاطع مسافه .

حزت في خاطري ان الطير عنده وراعية اكيد يدور عليه ولا ادري وش اسوي عشان افكة منه .

[هويدي]

وعليكم السلام ورحمه الله وبركاته

اكيد ما يحقله يستولي عليه او يتملكه الا بعد ما يعرفبه سنه كامله

حاول توضحله فضل رد الامانه وانها من صفات المؤمن واخيرله من الدراهم اللي من زيف الدنيا الزائل

عموماً الله يهديه ويتراجع عما عزم عليه وجزاك الله خير على نصحه

[القرناس المهاجر]

ياأخ عبد الرحمن .. الرجال يقول لوتركته كان يمديه جيفه ؟ يعني بيموت لأنه مربوط .. في هذا الحال إذا تعرف صاحب الطير أوأحد سـألك وأعطاك مواصفات وتيقنت من الوصوف إللي شفتها إنها للسـائل

فاجمع بينهما ولراعيه الحق في أخذه شيمة والا قيمة مالم يبدل ريشة .. خصوصاً وصوف الطيور المعلن عنها بالخيمة

وعزالله إن الرجال إللي ينعقل طيره إنه من الفرحة بيكافي من عقله :D

أما ماتعرف الطير لمن هو ولم يسألك أحد .. فلآ تحرك ساكن :no2: ودعه وشـأنه .. فالذي دله على الطير هو الله ولابد أن له بذلك حكمة :good: والله اعلم

[abu hlal]

يا اخ عبد الرحمن جزاك الله خير

انصح خويك يعلن عن الطير.....والجماله احسن له من كوم ريش يمكن انه ما يسوى..
او ...حط رقم جواله في المنتدى واكتب...اللي مضيع يتصل على:xxxxxxxxx

متى الرجال ماسك الطير??

انا مضيع طير العام الماضي نفس تاريخ اليوم ....قاطع بجريره

[طلق الصيد]

السلام عليكم ورحمة الله وبركاته بيض الله وجهك ياعبدالرحمن على الملاحظه ولكن كل واحد مضيع طيرة اكيد شارط له مكافاة لذلك بلغ صاحبك انا مضيعين طيور ولكن اللي يحصلها له مكافأة تكفى ياولد الطير عزيز عند صاحبه حتى انه ماهوب صايد الحين اذا فيه امل في الطير عطيتك اوصافه واذا مافيه امل الله كريم ولكن بلغ صاحبك ان الصقار بيضيع له طير اكيد ولذلك اذا هو مش صقار اكيد عنده شي غالي عليه والله فوق يمكن ايضيع شي غالي عليه بعدين بيتمنى ان اللي يحصله يعقله اما بدوي مضيع جمل اماعز او شي ثمين مهما يكون والله يمهل ولايهمل:no2: وجزاك الله خير ياعبدالرحمن

[وحيشان]

لاحول ولاقوة الا بالله الله يمهل ولا يهمل وخل خويك يحط نفسه محل راعي الطير اقل شي .

[العمراني]

بصراحه ماله حق ترا اذا هو طمعان يبي فلوس شكله ولا لو من الناس الي تنحط على يمناك اول ما يسوي يبشر راعيه وليش محتفض فيه اذا مو صقار اكيد سامع إنه صقر وكل صقر غالي والله اعلم بل النيه والله يعقل على راعيه

[راعي البرقا]

والله ياخوي ماأدري وش أقول .أنت جزاك الله خير ماقصرت وحاول فيه وإنصحه وأنت بيض الله وجهك

[الرّمااااي]

انا اقول خله عنده يعلفه ويرعاه واذا مهو صقار بيمل منه بفتره اسبوع وبعدها يبي الفكه منه عطه 500 ريال وخذه وشوف راعيه هنيه تكسب الاجر والجماله وراعي الطير اكيد بيردلك ال500

[بعيد الشوح]

الطير حمر مجهم صافي فيه خرمه في احد مناخره

[كبسولة2]

الي له طير ضايع وعزيز عليه يحط مكأفاة للرجال

1000 الفين ريال الي يجي منه ويذكر مواصفات طيره

والرجل ماهو مقصر أما أنه يعلن عنه فهذي كثر منها

يجي واحد مايحلل ولا يحرم ويقول طيري ويحلف عليه بعد

هذا أفضل حل

فإذا كان طيره ونفسه فيه وعقله الله اله فالفلوس الي دفعها ماهي خسارة

وإذا كان مهوب طيره ويبي يأخذه بالكذب لازم يدفع

[abu hlal]

الي له طير ضايع وعزيز عليه يحط مكأفاة للرجال

1000 الفين ريال الي يجي منه ويذكر مواصفات طيره

والرجل ماهو مقصر أما أنه يعلن عنه فهذي كثر منها

يجي واحد مايحلل ولا يحرم ويقول طيري ويحلف عليه بعد

هذا أفضل حل

فإذا كان طيره ونفسه فيه وعقله الله اله فالفلوس الي دفعها ماهي خسارة

وإذا كان مهوب طيره ويبي يأخذه بالكذب لازم يدفع

ان كان الرجال ناوي العقلان......يحط رقم جواله مثل ما الناس يسوون ولا حد ماخذ شي ماهو له!!!
وان كان الرجال قصده يبتز راعي الطير........فما اظن احد بيدفع له ...والسلامه غنومه

[ابوفارس 5350]

الله يهديه وجزاك الله خير على نصحه- المفروض يجب عليك أن تنوّه على الطير وليس هناك مدّه محدده للصمت.
- يحرم عليك فلوسه أو صيده أوّل سنه.
- يحل لك صيده بعد سنه ويمكن تبيعه اذا مالك رغبه في بقائه وتشهّد على بيعته ولكــــــــــــــــــن ...
- الطير لصاحبه متى ما وجده لو بعــــــــــــــد سنيــــــــــــــــن ويحق لمن أشتراه في تلك الفتره أو أطعمه أن يسأل صاحبه بسداد التكلفه وأن حصل أختلاف الشرع والقضاه العارفين بالطيور والحلال لابد ما يكون موجود في البلد

وهذا النص ممكن يطبع و يعرض على شيوخ كثير و يمكن تلاقي أختلاف بسيط و الله أعلى و أعلم

[fhd97]

السلام عليكم
جزاك الله خير يا عبد الرحمن هذا اولا
وانا عندي اقتراح ارجو انه يساهم في الحل
والاقتراح اني مستعد لدفع المكافأه ونحددها بالف ريال
بشرط ان الطير ينتقل لاحد المشرفين في المنتدى وهو يتولى عمليه الاعلان عن الطير
او انه اذا كان فيه حجل يتصل على راعيه وان ما عطاه الطراحه انا اتكفل بها وطبعا يكون تحت اشراف احد المشرفين او يتولى احد المشرفين العمليه يعني هو ضمن المكافأه الف ريال اذا ما كانت اكثر من راعي الطير
والهدف من هالشي هو ان الكل يعرف معاناة صاحب الطير اللي مضيعه والامر لله سبحانه وتعالى
وقدام الرجال اعهد بهالكلام
ان وافقت او وافق الراي ارسل رساله خاصه لي وبعطيك رقم تلفوني
وبعد اذن المشرفين المحترمين

[الاشعل 316]

كفوا والله يا فهد97 اشهد انك رجال نشمي

انت قدها وقدود

اخوكم ابو سطام

[سنجااار]

من المتعارف عليه عند الصقاقير ان الطير الي يلقونه مايذكرون عنه اي وصف لان فيه ناس ماتخاف الله تاخذ اوصاف الطير من ذكر العالم ويجي يقولك هذا وصف الطير وهو ماهوب مالك الطير وانت تعطيهياه ورفيقك معه حق وبيض الله وجه بس يشيد عليه والي له الطير كان عليه حجل اتصل وماقصرت على هذا الفكره

[طلق الصيد]

السلام عليكم ورحمة الله وبركاته بيض الله وجه من تكلم بالخير ولكن اذا الطير طيري انا شارط عليه ((5000)) ريال وعلى فكره طيري فيه رقم وشكرا.

[حجاج]

الله يعين على مثل هالشاكله

[عبدالرحمن]

اعذروني على التأخير في الرد و السبب اني ما قابلت الرجال الا امس وعرفت منه السالفه .

قابلته و قلت له الصقاره يشرهون عليك يقولون لك انه موهب هذا طبع ولا اخلاق الصقارين قالي من اول ما لقيته الى اليوم جاني سبع اشخاص واحد منهم بس الي قال الطير موهب لي و تشكر و مشى و الباقين كل واحد يقول انه له و يجيب اوصاف تمشي على كل الطيور و اذا ذكرت له علامه مهيب موجوده في الطير عشان اشوف هو صدق له والا لا على طول يقولي ابد ابد هذا هو طيري الي ضيعته , وواحد منهم قال لا ما فيه العلامة هذي وقلت هذا صادق و لازم يشوفه يمكن انه طيره ولما شافه قاله هذا هو طيري و جا بياخذه و قلت له اصبر وش العلامه الي كانت فيه ؟؟ سكت الرجال شوي وقاله هذي الف ريال وعطني الطير و قاله خوينا يعني الطير موهب لك قال الا لي هذي الف وعطنياه !! يقول خوينا اقوله وش العلامة وهو يقول هذي الدراهم .

اعذروني استعجلت في الحكم على الرجال و ظلمتة و صار مشاور ابوه وش يسوي فيه قبل, و ابوه الي شار عليه بالطريقه هذي , و ايضا اعذروني اذا قلت اني اقتعنت بكلامه وقصته بعد ما شفت الردود , و الرجال الي عنده الطير اخر كلامة قالي اعرف حقين الطيور اذا قلت له تعطيني طيرك قالك خذ ولدي فلان دليل على غلا طيره عنده و الطير ما يرجع الا لصاحبة , و حط صورته في النت و لاتحط رقم ولا غيره و راعيه بيعرفه على طول ان شافه .

http://www.mekshat.com/pix/upload02/images65/mk10802_dfgbh678%20copy.jpg

[عبدالرحمن]

fhd97 : كفو والله عداك العيب و جزاك الله خير , و الرجال يقول يهمني الطير يرجع لاهله قبل كل شي .

[ابوفارس 5350]

يا اخ عبد الرحمن جزاك الله خيروكثر الله من امثا لكم وخويك ونعم فيه اعلومه طيبه والله في عون العبد ماكن العبد في عون اخيه وما قصرتوجميع الله يعطيكم العافيه

[حطاب 123]

يا اخ عبد الرحمن جزاك الله خيروكثر الله من امثا لكم وخويك ونعم فيه اعلومه طيبه