انتداب مع ( علك ماطي ) يبي الطريق على كيفه

[حفرلوجيا]

سلام يالربع
قبل يومين تخاويت ( بالغصب ) أنا وزميل عمل ( منتدبين ) .. طريقنا كان بر .. بغيت سفرتنا تكون ( كشتة ) ونوسع صدور بعض .. لكن هو صار لي بسوالفه وعلومه مثل علك جادعة وغد نعمة وصاير مثل علك ريفالينو ( للي مايعرف ريفالينوهذا لاعب محترف كرة سلة بنادي الإتحاد قبل خمس سنين مشهور بشدوقة إذا لعب وارمات من العلوك ).. وضاربة(ن) الشمس هالعلك المحلوت بطريقك وجيت وطيته بالزبيرية الخشنة .. وغدا لك مثل الباتكس تحاول تخلص منه ماتقدر .. وياسلام لو كنت عجل .. الأمام يقيم الصلاة وأنت ودك تلحق ( خذ بهالحالة أنواع الدعاء والسب ) .. هذا اللي صارلي مع الزميل
جهزت السيارة مبسوط .. وزهبت معاميلي ولحيمة الحاشي والقدر الكاتم ( مادريت ان الكاتم رفيقي ) ..
صلينا الظهر وتسهلنا برجاء الرحمن .. جاء مسيان قلت لـ( خوي الغبرا) نبي نوقف نضبط فطورنا بعد هالصيام .. قال ( بكل أدب ) : مانبي مطرسك .. وإلحق الديرة الجاية ( باقي 50 كم ) وتلقى مطاعم :mad:
علمته ان المطاعم هناك ماهي زينة ( مع ان الزين بالمطاعم مروح ) .. وإزهل كل شي كان تخشى يلحقك تقطيع بصل أو غيره .
وأصر بـ( أدبه الجم ) ألا أعطله وأمشي أحسن لي .. عاد خوي ولا ودي أزعله ( وأنا اللي أمني نفسي حول أكالرمث نشب الضوية و(نعلل ) بعض (هو اللي علني بس ) .:mad:
وصلنا الديرة .. والمشكلة المطاعم اللي خبركم ماندري عن نظافة ( المواد الخام اللي يطبخون منه) .. والمطاعم السريعة ( زبالة وزيوت ) .. اكتفيت بالتمر والماء.. والخوي ( بلع ) بالمطعم .. وواصلنا المسير .. قلت : ياخوي مالك عذر لبيت طلبك وأنا اللحين ودي نوقف ونسوي قهوة وعشاء على السريع ... وبكل بجاحة يقول : خلاص تعشينا ( شوفوا الهيس جطلني ) ويبين لي ( النزيه ) حرصه على وقت الدولة و(خويه بالارض ).. :mad:
لكن خل أجيه من جهة ثانية .. أتودد له .. قلت : يافلان ماسبق وجلست مع رفيق تعزه ويعزك ( يخسا ) .. وأردفت : وعلى قرقعة المعاميل وتشتشة القدر الكاتم ( الله يكتم نفسه ) تنسى همومك وغثا عيالك .. قال : أسرع خل نخلص انتدابنا ونرجع لعيالنا !!!!
بقى عندي رجاء .. طيب ياغالي ( صار غزل .. ياحول ياأنا ) .. اللحيمات واللي انت خابر وش نسوي بها ( استجديه ) .. قال عطها عمال المحطة الجاية شف بنزينك يبي يخلص ..( أي والله خلص البنزين ).:mad:
خلص انتدابنا وبطريق العودة احترزت على شان أضمن ماأضطر لأكل المطاعم جهزت لي سندوتشات ( تقل خواجة ) .
قرب وقت الفطور وأكد لي قبل أسأله إنه يبي مطعم .. نزلنا وحطيت سندوتشاتي .. وبدأ مع بلعه السندوتش يتشره ويوصفني بالأناني بزعمه جبت أكل وناسيه :mad: .. مابغيت أرد عليه الرد المناسب وأزعله لكني قلت : أمس كنت أبدهرلك برغبتي وأبجيب أقصاي رفضت واللحين جايز(ن) لك هالسندوتشات اللي ماهي قدرك ( إلا متعدية قدره ).. تحنفش... لكنه انثبر ولا.. تكلم .
وصلنا ديرتنا ونزلته ورجعت لبيتي .. وفي اليوم التالي قبل الإقامة لصلاة العصر بشوي يتصل الخوي ( قايللكم علك ماطي ) :p ;) ويقول : ترى نسيت كيس ملابس معك ويبيني أوصلها لبيته لأنه معزوم ؟؟!! .. الهيس عنده سواق ويقدر يمر ياخذهن .. لكن هالخوي غريب يبي يعامل زملاه ( على كيفه ) ويبيهم يعاملونه ( على كيفه ) .:looney:
ولو تدرون قبل أتورط ونسافر سوا كانت أم العيال تقول هذا ماهو من شلتك لاتتفشل معه خل نجهز لك الفطور .. وانا اللي معيي أقول خل أونسه .. لكن مادريت انه يبي يمشيني ( على كيفه )
عاد من التجربة مع هـ( العفن ) قررت حتى لو يرافقني أحد العمال لازم أدور اللي يبسطه و( يوزن كيفه ) .. لأن هذا اللي أبيه من رفيقي .:good:
وسلامتكم

[صقر]

حفرلوجيا دائما تبدعنا بالقصص التي مرت على تسع وتسعين بالمية منا

ويا كثرهم والمشكلة لو غصبته على ( الصح ) كان حرج عليك بين العالم.

بورك قلمك وبوركت افكارك النيّرة. فإلى الامام ايها المبدع.

وبارك الله فيـــك.

[الاجودي]

بعد حيي والله

يشهد ربي اني اغليك ودي بجلسة معك بس بدون المصري

غدي الانتداب الجاي اخاويك

والله يكفيك شر هالغثيثين والله يافيه مثل يركب على هالاشكال

لكن والله اني مستحي اقوله ان كان في احد من حايل فهو يبي يعرفه

لك تحياتي يا الذيب

[خشم الحصان]

الاخ الحبيب
حفرلوجيا
السلام عليكم
اخي الحبيب يعلم الله اني ارتاح لكتيباتك ولكن ياخي انت لاتعلم مما اعانيه من مر في اركبي من الضحك
بسب اسلوبك الجميل الذي اعجز عن الوصفه الله لايظرك.
اخوي حفر لوجيا منول يقولون ملا يودك نور عينك فراقه وانت عرفت الحين ان الاخ الي معك نوعيته
علك ابو طمغه يعني ماكو امل في اقناعه المره الاخراء اذا بغيت تروح معه دورلك ارض قشراء
واذا مشي الموتر 30كم افتح الباب ودزه علشان يعرف ان شغلك ماهوب مطاريس الا بنشدك عن
لحمات الحاشي عسي ماذبيتها او عطيتها راعي المحطه ان كانه ايه يافسابها عليه .
اخوي وادي اهديك بيت شعر.
يقول الشاعر
ترك صبيآ مايفيدك في المواجب
خله مع الخفرات يقظي دلها
وسلامتك
اخوك
خشم الحصان
ملاحضه
انا خابر ان رفالينو يلعب في نادي الهلال او نسيت هدف( المدرعات)
علك ابو طمغه قديم مره اذا نشب في الشعر مامن حل الاقصه وسمي ابو طمغه لئن فيه صوره تلعطها
بلسانك ثم تطبعها علي ذرعانك :o :D :D :
وفي الختام الله يرضي علي ولديك اخوي حفرلوجيا انت:good:

[الوراد]

العزيز الغالي
حفرولوجيا

بصراحه اتحفتنا بسوالفك الزينه
واسلوبك اللي مهنا زينه

الف الف شكر
والله لايحط بدربك احد من هالنوعيه مرة(ن)ثانيه
ولا تارط بكشتة(ن) طويله مع احد من نوعية ابوعلك صاكته شمس القوايل

مثل محاتسيك :(

[الجوني]

إبداااااع وطرح أجمل واصل اخينا حفرولوجيا في مثل هذه المواضيع

[المربد]

الله يعظم اجرك
الله يعظم اجرك
الله يعظم اجرك واصبر واحتسب،
هذا يـبـيـلنا نظيف مواصفاته على قائمة (العلة منكد البر على الشلة).
تعيش وتاكل غيرها.

[فرد حمزة]

ابو سليمان

تدري قرصن قلبي من يوم قريت أسم الموضوع وحاصت عويناتي :(

قلت بس .. حفرولوجيا جاب العيد وهو توه ما بعد جاء !

آخر علمي بك يوم أرد على رسالتك اللي أرسلته لي ... عاد أنا ما رديت عليه إلا متأخر بالحيل :(

قلت هذا ابو سليمان أستقعد لي بالمنتدى ويبي ينشر غسيلي بالرساله اللي زعجته له
وهي ما تخلى من ذكر أنتداب للعمل به ( وهذا مربط الجحشه )

لكن أشوى ما هو أنا المقصود ... ( وجه واحد ممطق وجه ويصب عرق وقاعد يمسحه )

[عبدالعزيز الدباسي]

والله انك صادز يا ابو سليمان ، فيه اخويا ما يهمهم اللي معهم ، ولا يداري خواطرهم ، واهم شىء عندهم يونسون انفسهم وينبسطون واللي معهم ( بحريقة )

والمشكلة انت بين امرين ، اذا سمعت كلامهم وتحملت خواطرهم ، قالو عنك ما لك راي وضعيف شخصية

واذا تممت رايك ( او اقنعتهم غصب ) قالو متسلط ويتمم رايه وما عنده ديموقراطية ، اي والله النشبه اذا صارت لنا يبون ديموقراطية ، واذا صارت لهم تميلحوا بانواع البيوقراطية .

وبعدين يا ابو سليمان فيه ناس ما تقدر ( توزن كيفهم ) لان ( المنشاف ) منعفط ويحذف يمين ولا ينفع معه الترهيم .
---------------

خالي خشم الحصان الظاهر انك شيبت ( قوه ) انت نسيت ان ريفو بعد ما حلف انه ما يحلق لحيته الا اذا جاب هدف على ( مبروك ) الله يرحمه ، وبعد هدف المدرعات ، انهالت عليه العروض من كل الاندية العريقة ( الاتحاد ، الاهلي ، الرائد ، التعاون ، الجبلين ) بس المسكين ما سلم من عيون اهل الشماسية وانكسرت رجله على شان كذا قرر انه يتحول لا عب سله لان ايده مثل رجله قويه بالحيل ، وبعد كذا تحول الى نادي الاتحاد لاعب كرة سله وكرة يد اذا احتاجو يكملهم .

[عاشق الصفاري]

الله يقطع سولفك يابو سليمان..
مشكور وما قصرت وكثر من المواضيع الزينة ..
وبارك الله فيك.,.

[مراكي الذيب]

كلك درر يابوسليمان الله يحفظك .

خويك هذا يوم انه دبل تسبدك كان طلعت وجهه باول لوحه ارشاديه وانت تمشي ميتين , ياخوي هذا عله الظاهر انه صايم حتى عن الوقفه.

[ابو سلطان العتيبي]

اخي ابو سليمان

مساك الله بالخير

والله يخوي يعجز اللسان ان يوفيك حقك ايها المبدع.

اما من ناحية الرفيق اللي مثل خويك يعتبر بلشه، يا اما انك

تطيعه ويصير مثل ماشفت او انه يطيعك ومن غير نفس (مغصوب)

وفي كلا الحالتين دبلة تسبد (كبد).

لكن انا افضل ان أطيعه مثل ماسويت انت ولا يقعد لي فيها (منة)

وتسلم يالغالي

تحيات اخوك/ عقاب

[مريقب العيفار]

ما شاء الله عليك يا ابو سليمان

ابداع وتميز

تعجبني طريقة الكتاب الكبار باستفتاح

مقالاتهم بقصة تسهل الدخول الى صلب الموضوع

عيني عليك باردة على هالطرح وجمال الافكار وحلاوة الاسلوب

الى الامام ابا سليمان والله يحفظك

[حفرلوجيا]

أخوي صقر :
شكرا .. وفيك يتبارك مكشات .. وصدقت عواقب انك تحده على الصح .. شينة.
أخوي الأجودي :
شكرا .. ماتغلي الا اللي يغليك ... ولك تحياتي ياأذيب ( بدون صعيدي ) :p
أخوي خشم الحصان :
شكرا .. وعليك بالتمر مع الحلتيتة وشوي رشاد وعسل .. وتشوي ركبك .. ترى ذي علاج تعتبر توظيب للركب ( وكلش )..;)
والبيت بمحله .. أما عن خبرك بريفالينوا .. جاوبك الريس شقردي .
أخوي الوراد :
شكرا .. وحاشاك يالغالي تكون مثله .. انت نسيت انك مكشاتي يالسنافي . . وأنت اللي أزين .
أخوي الجوني :
شكرا .. وتسلم على وصفك الحلو .. بس مكتوب بشكل دحديرة فوق مايحصل يركد ونتمقل به :D
أخوي المربد :
شكرا .. ويعظم أجرك .. وصدقت نظيفها ..
بس هذا جمع اللي ينكد الشلة وعطا نياها ( مركزة ) .. صدقت الله لايبلانا بمثله.
أخوي فرد حمزه :
شكرا .. انت عز الله اللي جبت العيد بعودتك .. بس من رجعت وأنا أدور هالموضوع اللي أنت وعدت المكشاتيين به .. ( أروج وازعجه بهه يابعد حي ) .. وحاشاك تكون مثل ذا ..
أخوي شقردي :
شكرا .. وصدقت بعض المرات تأخذنا العزة ( ونحنفش ) حتى لايقال ضعيف شخصية .. بس رفقة الطريق والبر ودك تحسب وتقيم زين .. ولا تكررها مع هالأشكال خاصة اللي مثل ماتفضلت صعب ( وزن كيفهم ) .. وحلوة ردك لشايب الرحمن ( خشم الحصان ) .. لسؤاله عن ريفو :D
أخوي عاشق الصفارى :
شكرا .. وابشر بتقطيع ابليس الله يخسه ويدحره .. انت تامر .
أخوي مراكي الذيب :
شكرا .. انت اللي درة مع ذيبك اللي كل يوم أقول طلع من شاشة الكمبيوتر .. أذا ملزوم به خله مقفي على شان يطيح ورى الطاولة .. وعلى قولتك هذا صايم الا عن.. الانانية .
أخوي oqab :
شكرا .. وفيت وماقصرت .. وصح لاياخذها انك تمنن .. وانت تتوب عنه بعدين .
أخوي مريقب العيفار :
شكرا .. ماخبر نفسي حياوي إلا إذا قريت ردودك ياغالي وردود بعض أخوان بهالمنتدى .. تخلون الواحد يتدوده .. الله يسلمك ويسلمهم ..

[راعي مرات]

الغالي000 أبو سليمان


تسلم أخي000

اصلاً أنا زعل عليك وما ودي أرد عليك ( عقب توصيفك لي أنا وأبو عايد)

لكن سلم لي على ها الخوي اللي عارفك000 ودك تعلم فيه الطبخ000

أسلوبك رائع وسردك جميل000

لاهنت ولا شنت 00

تمتعنا بتواجدك في أي مكان000

لك تحياتنا0000

[عبدالعزيز الدباسي]

الا على فكرة يا ابو سليمان وعلى طاري ( وزن الكيف ) ما قد طلعت مع احد ( راعي كيف ) تكفى يالغالي اذا كان حاصل اسدحها هنيا

[حفرلوجيا]

أخوي راعي مرات : إلا الزعل .. ولو أدري ان تعذيبي مع هذا ( الماطي ) يرضيك كان أكشت معه كل خميس حتى تقول رضيت .. ياريس .. وهالأيام قاعد أسوي لك موضوع لخيمة القصص والأشعار لكنه يتطلب مشاركة أطراف أخرى ساكنين دولة الكويت .. قاعد أأيملهم ولا يردون .. ومنا لحد مايتجاوبون أجهز فيه لعله يكون عربون رضاء علينا ولا تزعل (ايا كان المكان ) ..;)
أخوي شقردي : أفااا .. بس ماشي .. نحاول نتحسس معاناة من كشت مع هالنوعية .. امهلني وقت وطلبك أمر .. لكن إذا بديت بالموضوع لازم استشير خبراء .. تحراني استشيرك..يا... الخبير;) :p

[مفتش الريضان]

الكاتب المبدع حفرولوجيا.................... اسمحلي ان اطلق عليك لقب شكسبير مكشات ... وإذا ما تعرف شكسبير تراه واحد يلعب عندنا بالحارة يقول ان امه بريطانيه وابوه راعي غنم عند بلير..... هذه المعلومة على غرار معلومتك عن ريفو والا ريفالينو .......... اخوي استمر في إبداعك بارك الله فيك.