أبي رأيكم عاجلاً ... هل أنا مخطئ أم لا !!!!!

[القابوعة]

يا شباب والله اني متضايق من سالفه مدري اني أنا الغلطان أم لا !!
وهي انه إذا طلعنا مع شباب .. ربعي وعارفين بعض ودايم طلعات مع بعض بس فيه واحد دايم يجيب معه اخوياه ام ولد عمه ولا ولد خاله ولا ولد جيرانهم .. وبعد إذا جو ياخذووووون راحتهم بالمررررره رافعين الكلافه يعني يمسكون السالفه ويعلقون عليها ويحللون ورأيهم هو الصح وكأننا انا الضيوف عليه !!! وكلمنا خوينا قلناله إذا بتجيب احد لا تروح معنا ورح انت وياهم لحالكم وعلينا تكاليف طلعتكم بس الفكه !!
وش رايكم بالسالفه ووش رايكم باللي يجيبون معهم ناس أو أشخاص غرباء وهل انت إذا دعيت لرحله ما تعرف احد منهم توافق أم لا
ارجو التعليق والرأي
مشكورين يا حلوين

[صقر البحيرات]

والله شف يا خوي الناس ماهي واحد
احيانا يجي واحد ماتعرفه مع احد خوياك وتتفاجئ انه رجل بمعنى الكلمه
وبعضها يغش الكبد
وانت مثل ما تقول ياخي قل لخويك حنا ناس نبي ناخذ راحتنا ونسولف ونستر عيوبنا
وإذا جاء احد معك ترانا ماناخذ راحتنا
وانت رجال تدور راحتنا
ومن هالكلام
ــــــــــــــــــــــــــــــــــــــــــــــــــ ـــــــ
سالفتكم هذه تراها تفرق الخويا وتصير هنا حزازيات بينكم
الأفضل
انك تجتمع معهم وتكلم الشباب وانشاء الله تطلعون براي سديد
((((((((((((((((((((((((((((
المفروض ما تكلم خويك بهالطريقه على شان ما تجرحه او يتضايق منك
"""""""""""""""""""""""""""""""""""""
انا ما اييد اللي يجيبون ناس
الأفضل اكلم خوياي قبل ما اجيب احد على شان ما يصير شيء اتفشل منه
"""""""""""""""""
بالنسبه لو دعيت لطلعه
ما اطلع حتى اعرف منهم وشلون اخلاقهم
وإذا اصروا
لأفضل اقول مشغول
بارك الله فيك يا صاحب الموضوع

[ولد الدواسر]

راي انك على حق بس مو بالطريقة ذي يعني تكلمه بشكل غير مباشر !!

[خيال الغلبا]

طريقتك هي الصواب .......والمفترض انه يستأذنكم في كل غريب يريد احضاره

[alkongrs]

اذا كان سيتائذن مي خالف ولا ااااااااااكن اذا ما استائذن لااااااااا يجيبه

اذقلتوله فيه طلعه قله لااااااااااااا تجيب احد الى اذا قالكم ابي اجيب معي واحد وش رايكم ؟؟؟؟؟؟؟؟؟الجواب لكم

عساه وضحت:)

[يازين الجو]

الطلعه دايما فيه نوع من الخصوصيه خاصه انك بتطلع مع شباب اخوياك

وتبي تاخذ راحتك وتفضفض معهم يعني ماحد غريب

خويك غلطان المفروض قبل لايجيب احد معه يكلمكم ياخذ شوركم

والي سويته مافيه شي غلط

عموماً,دايم احاول ابين للشباب يوم ننوي نطلع المح لهم خلو الطلعه خاصه , مانبا غربا من ذا الكلام كذا ينتبهون لذا السالفه وسلامتكم

[سليمان 10]

انا من رايي انك تحط بيت خويك الي يجيب معه ربع تحطه مطب مطب مطب 0 حتى يحس 000

[عمر960]

فية حلين
الحل الاول
تكلم الرجال على حدة وتقنعه بأن الي يسويه شي غلط واننا ما ناخذ راحتنا

اذا مافاد الحل الاول
فيه الحل الثاني

الي هو اذا طلعتو لكم مرة انت سو مثلة يعني جب اعيال عمك وجب اخوياك بس مايعرفهم وخلهم يظحكون ويمزحون وينكتون علية اين يطفشونة من الطلعه
بعد كذا راح يحس بالي تحس فية

جرب ولن تندم



ودمتم بصحة وعافية

[أبـو فـايـز]

اخوي,, انا مثلك واغلب الناس ماتبي غريب علشان الكشتة ماتصير رسمية والواحد طالع للبر يروح عن نفسه ويبتعد عن جو الرسميات ويوسع صدره,,
بس احيانا تطلع لك فرصة انك تتعرف على واحد رجال كفو شرواك وشروا كل الرجاجيل هنا,,
هي تعتمد على الشخص,, يعني فيه من ربعك من تثق فيه وتخليه يجيب اي شخص لأنك تعرفه مايجيب ناس ثقال طينة,, وناس العكس :)

[ضرماوي مووت]

يالغالي انا مره جبت ولد عمي واخوياي قالو لاتجيبه غثيث ونشبه وبثر
وعادي مازعلت ولاشي لاني صراحه حتى انا تظايقت منه في الطلعه

[االديحاني]

وسع صدرك الوضع عايدي بالنسبه للي يجيك لازم تكرمه ولا يصلح تطرد الناس
اما بالنسبه للواحد بنفسه مايطلع مع اصدقاء قريبه الي مايعرفهم لانهم ماراح يأخذون راحتهم

[الكونترولCONTROL]

يا بن الحلال .. وس صدرك.. و المسألة تقدر تقسمها قسمين .. لا تنظر للدنيا من زاوية واحدة فتضيق بك !! :ــ
1- إذا كانوا ناس - شرواك و من يقرأ - يرفعون الراس ... فحتى لو مسكوا خط السواليف و رفعوا الكلافة و غير ذلك تتحملها و لك أجر .... و لا عليك ضرر من مثلهم
==============

2- لكن المصيبة .. اذا جاب معه هامة من الهوام - أجاركم الله لا أخلاق و لا ضمير حي !!!!

هنا المصيبة !!!!! و تأتي القاعدة الشرعية ( لا ضرر و لا ضرار ) و القاعدة الأخرى العظيمة ( دفع المفاسد مقدم على جلب المصالح ) و قواعد أخرى يسمح لك الشرع بموجبها باختيار طريق آخر غير طريق رفيقك !!!!! و ما عليك من اللي ما يحترمك !!! ما هوب رفيق !!!

[مداحش]

شوف يالغالي , اذا كان خويك هذا انسان يتقبل النصح بصدر واسع ( خويك وتعرفه زين ) فالافضل انك تصارحه بهالشي وتقوله بس بكلام لطيف واسلوب جميل أما اذا كان من الناس الحساسة وياخذ الامور بحساسية شوي ( يعني يزعل لو قلت له هالكلام ) فالافضل انك توضح له المشكلة بشكل غير مباشر , مثلا تسولف انت وربعك عن الطلعات والكشتات وتقول لهم ( ورفيقك هذا موجود ) الصراحة الكشتة اللي فيها ناس أغراب تكون رسمية بحتة وما ناخذ راحتنا فيها , لانه بيكون ضيف وتخرب الكشتة شوي ومن هالكلام بس لا يشك الرجال :no2: وتسبب مشكلة . وانتبه من بعض الاشخاص ترى يسوي نفسه ما يزعل وحبيب وصدره واسع لكن لو صارحته بكلامك اما يزعل ويعصب ولا تلقاه يكتمها في صدره - اتمنى اني أفدتك

[مطلع]

من ناحية المبدأ .... أنت على حق 100%

ماودها مجاملة ...

بس الطريقة ... الطريييييييييقه !!

تقول لأخوياك مثلا : ياشباب , ودنا نطلع انا وفلان وفلان .. ولا ودنا احد غيرنا ونبي نستانس .. مانبي زيادة العدد وتخرب الطلعه ... !!

كذا الكلام عام , واذا جاب احد فلان ولا علان ... احسم الموضوع وخلاص


مجاملة في كل مكان .. حتى في الطلعات .!!

[شهوان]

انا اشوف ان الخوي اللي مايفهم بالتلميح و لا يقراه العلم بالتفهيم ماهو حسافه اقول :
( الخوي اللي مايقراه العلم دواه تركـــــــــه ) .
شهوان

[خالد030]

والله إذا كان خويي اللي جايبهم يستاهل الحشيمة كل شي ولاياخذ خويي بخاطرة
مايخالف لجل عين تكرم مدينه يمكن هم يحرجونه
وبعدين والله من رجل ورجل مايحتاج لحية غانمة شرواكم عرفناهم بالهطريقة

[راعي المقانيص]

هي كلمة وحده وانا اخوك

( كلمه تستحي منها بدّها )

وخويكم لو زعل من انك بلغته بالي يضايقكم فهو ناقص عقل

ويمكن الي يحفزه انه يجيب ناس معه مجلسكم ونيس ماشاء الله وفيه من انواع المزوح والشي الي يرفه عن النفس ولهذا السبب اتوقع ان الرجال ماخذها من باب المفاخره بكم عند اقاربهم ان اخوياي مافيه مثلهم ابد

[جيب بيج]

السلام عليكم أخوي القابوعة بالنسبة لصاحبك أحياننا تكون طهارة قلب زايده وماجابلها خبر وهي دايم تحصل
أما أذاكان يتعمدها بين له أن غيرك مانبغاه

[محمد عسكر]

ياقابوعة ..باختصار قبل الطلعة اتفق انت واخوياك قل لااشوف ابن امة يوطط معنا
مفهووووووم يقووولوون مفهووم وانتهت الازمة وبكذا تستانس انت واخوياك جعل ايامك كلها ونااسة
تقبل مروري,,

[المليحي]

الي يجيب معه نا س ما يعرفونهم خوياه انه تصرف خاطئ لاشخاص الييجون معه مفروض انه يحترمون انفسهم يجلسون با احترام وتقدير وانه ما يطيحون الميانه بسرعه مع خوايا خويهموهذا سلوكزخاطئ

[عبدالله الدوسري]

في ظني أن إحضار واحد من المجموعة لأحد أقاربه أو أخوياه من خارج المجموعة اللي يبغون يطلعون معهم هو أمر سيء
على الأقل يتصل عليهم واحد واحد ويشاورهم في الرجال بيجي معي فلان وش رأيكم
إذا قالوا الله يحييه أهلا وسهلاً
ولا يعتذر منه
أو يروح معه لحاله

وأعتقد أن هذي هي طريقة العقلاء من الناس

[الحاتمي1]

يالغالي اذا اخوياه الي يجيبهم معه رجال ترا خوة الرجال تجاره

[الشيف محمد]

انا ارى ان الي يجي مع ناس مايعرفهم متطفل

والذي يجيبه بجيح

[الستانس]

أنا من رايي أقول الله يحييه وهذي الساعه المباركه
وأزين شي إذا ذب الميانه على طول تصير ما فيها رسميات يعني خذ الوظع عادي
وتراها أول ليله رسميه وثاني ليله صداقه يعني وش تستحي منه أنت بتسوي شي غلط!
ما اتوقع


ويمكن الي يحفزه انه يجيب ناس معه مجلسكم ونيس ماشاء الله وفيه من انواع المزوح والشي الي يرفه عن النفس ولهذا السبب اتوقع ان الرجال ماخذها من باب المفاخره بكم عند اقاربهم ان اخوياي مافيه مثلهم ابد
اتفق معك بنفس الراي

[غالي]

هههههههههههههههههههههههههههههه

انا من رايي رح بالسياره وسقطها ((غرز))
ثم ناده هو واخوياه يدفون هههههههههههههههههههههههههه

وكل مره كذا

لين يتمصعون ويحرمون يجون هههههههههههههههههههههههه

أمزح ترا :)
لكن وسع صدرك

[برادو97]

انا اشوف ان الخوي اللي مايفهم بالتلميح و لا يقراه العلم بالتفهيم ماهو حسافه اقول :
( الخوي اللي مايقراه العلم دواه تركـــــــــه ) .
شهوان

صح لسانك ،،،، هذا الكلام الصحيح

[نفس السحاب]

صبحك الله بالخير ..

والله معك حقك وانا اخوك .. اهم شئ سعة الصدر والاخويا النشامى .. اذا يسبب لكم مشكلة او احراجات ممكن تعتذر منه بأي طريقة مناسبة .. لأنه مايحس بالخطأ اللى سواه ..

حنا اذا جينا بنطلع وكان فيه احد زود وغريب لازم عندنا خبر قبل الطلعه ..
وبعض الرجال معرفتهم احسن من كل المكاشيت والبعض خايب من راسه الى كعبه ..

واختر رفيقك مضبوط ... لانه هو ربيع الكشته او قحطها

[القطاوي 2008]

من ناحية المبدأ .... أنت على حق 100%
بس لو انك مغير الطريقة اللي جيتة بها

[إبن الجبل]

بسم الله الرحمن الرحيم
الصراحة أهم شىء وعليك بالاتي:
التفاهم مع زملائك الآخرين عن الموضوع هل هم راضون أم لا إذا كـــانوا غير راضين بحضور أقــــــــارب زميلكم عليكم بإبلاغه ان يختار إما عدم إصطحاب أحد إلا بعد اخذ رأيكم او عدم اصطحابكم له في تلك النزهات او الرحـــــلات لما لتلك الرحلات من خصوصية للمجموعة واذا كان زملائك لامـــانع لهم من اصطــــحاب زميلكم لاقاربه فعليك الانسحاب من تلك الرحـــلات و النــزهات ما دام ذلك يقلقك الى ان يتغير الامر
واذا كان زمــلائك غير راضين بمــــا يقوم به زميلكم فعليكم بعدم ابلاغه عن مواعيد الخروج واهمـــــاله من هذه الناحية ليختارما يناسبه وأرجو ان ان اكون قد اصبت في رأيـــــــي لإيجاد الحل ومع تأكيدي على مصارحة بعضكم البعض.

والسلام عليكم ورحمة الله وبركاته

[بيبسي]

اولا .. الحق معك

ثانيا .. الاخوان ماقصروا كفوا و وفوا

[Al-natour]

يالغالي انا مره جبت ولد عمي واخوياي قالو لاتجيبه غثيث ونشبه وبثر
وعادي مازعلت ولاشي لاني صراحه حتى انا تظايقت منه في الطلعه



http://www.mekshat.com/vb/images/myicons/sign.gif



http://www.3rb100.net/2008/4/3rb100_cW16PPo2zR.jpg