ضعنا بالطوشة بين المقاس و الوزن

[نبع الدموع]

السلام عليكم و رحمة الله وبركاتة

اخواني القنوص و الغير قنوص مساكم / صبحكم الله بالخير
بغيت اسال عن طريقة تعرف فيها مقاس الجير بالطول و العرض
المعروفة عند القنوص

الحين من تسال عن مقاس الجير جاء الي قالك g750 او g1300
و من هالحسابات وشلون نعرف هالقياسات بالقياسات الي عندنا
و وش دخل هالقياسات في افعال الطير الي اشوف في بعض المواضيع
لا ينقص وزنة عن كذا ولا يزيد عن كذا

سؤال اخر للرجال الي يعرفون كيف تعرف تحول الوزن لقياسات بالانش؟
و متى يكون الوزن المذكور وزن ذكر و ان زاد عن كم نقدر نقول انة
تام (وافي) ؟؟

بالمناسبة سؤالي عن الهجينة منها مع الحرار او مع الشياهين

و سؤال اخر عن طريقة طلب الطيور من المزارع الي اعرفة من اتصالاتي
ببعض المزارع انك تدفع اولا و تجيك الطيور و هالشئ صار معي
شفت طيور في كذا موقع و طلبت طيرين و للاسف لقيت انة مافي
اي ضمان لك على الطير او على قروشك لو جاك الطير فية الف علة
مالك مرجع ترجعلة و تطلب حقك و خفت من هالشئ و لهالسبب
مع وعود اني باشتري منهم اكثر و انا غير صادق لاكن لخوفي
من النصب و اني ارغبهم في الاستمرار بالتعامل معي و اني ابي اشري
اكثر من طير في المستقبل و ان هالطلب الي طلبتة قفط لاطمئن
على جودة انتاجهم, ولا جبرني على هالشئ غير اني ابي احفظ حقوقي

ارجوا افادتي عن افضل طريقة بيع و شراء طيور من المزارع

لا خلا و لا عدم
ابو بدر

[الكتبي2008]

السلام عليك ورحمة الله وبركاته
انا اقول ياطويل العمر مالك الا معرض الصيد ألي يقام في ابوظبي كل سنه بتلقى
اصحاب اغلبية المزارع موجودين مع طيورهم واختار من بيض وشقر وحمر وسود والحجم
ألي يعجبك والعياده في المعرض تفحص الطير قبل مشتراه.

[همس الرعد]

يا اخوي متى يقام المعرض اللي بابو ظبي

[الفيتو]

بسم الله الرحمن الرحيم
السلام عليكم ورحمة الله وبركاته
مساء الخير ياخوي / نبع الدموع
بالنسبه لمقاسات الطيور ما تجهلها لكن بقولها الشياهين الجبليه
من1205الى 14 والوكارى من 13الى15
والشياهين البحريه من14 الى16
والحرارمن 16 الى 18
والجيرات والسيبيريا ت يقولون تاصل 21
الوزن مهوب شرط يكون سوا حر طوله 16ووزنه800وحرطوله16وزنه1100
بالنسبه للميزان من الصعب توصيل الفكره بالكتابه ومن الصعب وتوصيل المعلومه عبر التلقي
لأن كل طير له معامله تختلف ولو تشابهت الطيور لكن الاختلاف اكثر . واول الموسم له
وزن واخر الموسم له وزن وفالجو البارد له وزن وفالجوالحارله ,,,,,,,,
شف وشلون بديت ما تستوعب وانا بدييت الخبط لالالالا واللحوق له وزن .. ...
وتكرار الهدد للطير اللي ماإنجرد له وزن
يارجال
ما اقدرابسط وأوصل المعلومه اللي في راسي .. كل هذي تجي بالممارسه
واحيان ينتهي الموسم فيه طير ما وصلت معه لنتيجه
بالنسبه للمشترى اخونا الكتبي قال وووفى
*
والسلام
الفيتو
الحجاز
16/4/1429هـ

[قرناس ارامكو]

السلام عليك ورحمة الله وبركاته

انا اقول ليش تشتري التفريخ أسعارها غالية والفعل 1% ألي يفعل ألا أذا أتدورالزين صحيح . أنا ماشفت الي فعل لا معي ولا مع اخوياي الصقاقير ، نسمع ولا شفنا شي !!!!!!! أما المشابط خذ ولد أذا شاف طير في السماء كنة مبشر ؟؟؟؟؟؟
وأذا لقيت ألي يصيد وصاد الحبارا اليوم تورية الثانية كأنة ماعمرة شفها .:hot:
أنا أقول أشتر الوحش (حر أو شاهينة بحرية ) لو كان غالي الي قطعتة زينة وتعب علية وانشاء اللة ماتندم هذا رأيي وأنت على كيفك يالغالي:good2:

[صقر الرحيبة]

السلام عليكم

بقول والله اعلم:

مقاس العرض يعتمد اكثر من مقاس الطول

فلو كان الطول 17 والعرض 17,5 نحسب الطير قياسه 17,5

بالنسبة لقياس الحر الكامل من 17 وما فوق

الشاهين البحري من 14,5 وما فوق

الجير لاتنشدني عنه احجام الوان متفاوتة وتداخلة ببعضها
قمت تشوف الطيرما تعرفله ايش خلطته

[نبع الدموع]

يعطيكم الف عافية جميع على الردود و يمكن ما عرفت اوصل السؤال صح

سوالي مثلا قالي راعي الطير وزنة 1300g كم يطلع بالانش؟
مثلا قالي راعي الطير وزنة 1080g كم يطلع بالانش؟
او مثلا قالي راعي الطير وزنة 980g كم يطلع بالانش؟
او مثلا قالي راعي الطير وزنة 750g كم يطلع المقاس بالانش؟

و سؤالي الثاني شلون الي يشتري من المزارع عن طريق الانترنت و الصور
يحفظ حقوقة اذا دفع مثلا و جحدوه في الطير او وصلة الطير معيوب الخ؟

[المزروعي]

هذي الطريقه التي ذكرتها لمعرفت الطير بالانش مقارنه بوزنه مش صحيحه لسبب واحد !

في طير ممكن تحصل قياسه بالانش 17.5 لكن وزنه وزن طير 16.5 وذلك بسبب كثرة الريش و قلت اللحم و العضل . و أنت أكيد عارف بهذا الشي . يعني تقول الطير ما فيه روز او مش جبر . لكل طير مقاسه ووزنه الخاص و ليست هناك ارقام و قياسات محدده . هذي الامور بتعرفها لما تصقر الطير بنفسك و بتعرف نفسيته .

أخوك المزروعي

[نبع الدموع]

يعطيك الف عافية اخوي المزروعي يعني لازم نجلس نقيس ؟؟

و سؤال ثاني قد احد طلب طيور مزارع من خارج المملكة
المعروف ان الطيور مسموحة اذا كان معها جوازها و الشهادة الصحية
وش افضل منفذ لدخول الطيور و كم كمية الطيور المسموحة و وش الاجرائات
الي لازم تتخذ لادخالها السعودية
ولا بس ادفع و اشحن؟؟

[أبو رداد]

الله يحيك يبو بدر
موضوع (القياس والوزن)
كلتاهما جديده على عالم الصقاره !!!
وماهي الا طرق يتمكن الصقار من خلالها على الوقوف بدقه على طيره
وزيادة الوزن من الصفات الجيده لاي فصيله
وتراه قديم ماهو جديد
(الصقاقير القدامى قبل لايشتري الطير ينقله بيده يشوف روزه)
ولو شافه ثقيل عرف ان الطير فيه صفه طيبه
,,,
وللاستزاده في موضوع التفاريخ والمهجنات
اطلع على هذا الموضوع
الجير المهجن من الالف الى الياء (http://www.mekshat.com/vb/showthread.php?t=57533&page=1&pp=15)
واي استفسار انا حاضر
,,,
وموضوع الشراء من المزارع مباشره مانصحك عليه
الا اذا وصلتهم وتشتري (شوف عينك)
في دبي يوجد سوق اسمه (مركز الصقور والرياضات التراثيه)
وفي ابو ظبي والشارقه توجد محلات مخصصه لبيع الطيور
ما اندلها بالضبط لكن ان شاء ينفعوك الاخوان
المحلات الي في الامارات جميعها تكون طريقة البيع فيها
بعد ان تشوف الطير وتقيسه وتقتنع فيه
تكاسره على قيمة الطير هههههههه
وقبل لاتعطي الدراهم
تقله(على شرط الفحص والهك)
يقلك نعم ولك ثلاث ايام . تقله اعطيني فاتوره
تورق الدراهم وتروح تفحص الطير في اي مستشفى
اذا كان فيه عله عطوك في المستشفى تقرير ورجعت لك فلوس
وغير ذلك لاتشتري منه لان طيور تعتبر مغشوشه
واسعارها انسب من اسعار الطيور في معرض الصيد والفروسيه
والسلام

[نبع الدموع]

يعطيك الف عافية ابو رداد على هالرابط الي اعترف انة مرجع للي يبي يعرف
الجير ما شاء الله تبارك الله عليك ما خليت شئ ما ذكرتة و فعلا هالشئ غريب
من واحد ما قنص الوكري هههههههههه رجعنا لياطيري يالي

لا خلا ولا عدم اخوي ابورداد