عون الباري للقضاء على رجة السفاري.

[قرم]

السلام عليكم ورحمة الله وبركاته

هلابالشباب....موضوعنا هذه المره عن النفضه او الرجه اللتي تنتاب إطارات السافاري عند سرعات محدده..
واللتي لم يسلم منها أي سافاري بشتى انواعه , فأصبحت للأسف وصمه في جبين هذا الشرس وسمه ملازمه له
ارقت الكثير ومنهم انا ..., العجيب واللذي يبعث على الحيره إن هذا العيب لايزال يمارس من قبل الشركه المصنعه وبأصرار!!! فهذا العيب ملازم للسفاري منذ القدم !!! جل الشركات تخفق في بعض السيارات
وينتج عن ذلك مايسمى بالعييب التصنيعي ,لكنهم عاده يتلافونه في الموديلات المستقبليه ..إلا في حالة السافاري.
فلازالوا الجماعه مصرين على ذلك بقصد اوغير قصد !!..غصت في بحر الأنترنت بحثاً عن حلول ,فوجدت الكثير ..هذا يصف ميزان بيده حل سحري لهالمشكله ,والأخر ينصح بتبديل الكفرات,, هنالك اخر ينصح بتغيير
جلد نضام التعليق كله ,,واخر يجعل المساعد الأصفر ( الإسترالي) سيد الحلول ,,وهذا الأخير أي الأسترالي
ركبته ب340 ريال ارتاحت له نفسي لأن سيارتي جديده جداً ولايمكن يسري عليها خراب جلد او إحتياجها للوزن,, وكفرات وخلافه....ركبنا هالأصفر وياخسارة القريشات..أمنت بالأمر الواقع, وقلت سيأتي الحل بأذن ربي قريباً ..سمعتهم يتكلمون عن إضافة مساعد رديف للأصلى ..مجرد إشارات فقيره من اصحاب مواضيع
بدون صور ,ولا توثيق ..هنالك صور لكن لاتروي تفاصيلها..هالحل إرتحت له كثيراً ..وقلت سأتبناه ..
تمردغت تحت الجيب اقلب ناضري بهالحديد ,,حددت اين يجب ان يكون ,,ماهي الإحتياجات,, توكلت على الله
عندي مساعد خلفي للباثفندر ,,اشتريت مسامير تليق بثقوب المساعد,,وإلى عالم الورش المقرف والخالي من القيم ..بحث طويل هداني الباري لورشه سمكره متواضعه في إمكانياتها , وصفت للأخ الباكستاني العمل ونزلت معه للحفره ,,,,,ولا موكذا
جبه منا ,,فكه يابن الحلال.. ابيه كذا ..هاه معلوم....خلاص مالووم..بسم الله ..ركبناه ,,,, جربنا لفينا لأقصى اليسار ,,أقصى اليمين,,,يالله لك الحمد والمنه ...إلى الأن تمام ,,لكن المحك الرئيس هو الخط ...ياسلام ..وصلت السرعه 80 بدأ العرق يتصبب الأن يجب ان ترج السياره ...مومعقول ... تجاوزنا ال80 ..سأتخطى حاجز ال80 ...100....ثم 130 ...زال الخطر لله الحمد والمنه ..المهم مالكم بالطويله قلت ينبغي تعميم هالخبر
للشباب وبشده لوقف هدر اموالهم والكد على هالورش من اموالنا... إخوتي اقولها لكم بكل ثقه لا توزن
لاتغير كفراتك ,ولاتغير جلد ,او تفك الرمانات لتسحب خرابيط مدري وشي ..لن يجدي نفعاً ...ماعليك سوى
إيجاد ورشه جيده لهم خبره والحصول على مساعد يكون بطول الأصلي ولا يمنع بأن يكون اطول قليلاً
لا ان يكون اقصر من الأصلي انتبه.. ولووجدت ورشه سبق وأن رهموه يكون افضل لك ..كلام كثير هالمره
ارجوا المعذره المزاج رايق ......إيه قبل ما انسى ..كلفني 100 ريال والمسامير ب4ريال والمساعد قديم
من عندي ..جبت كم صوره للتوثيق ولنستمتع قليلاً .


هذه قاعده في الشاص يسار السائق



http://www.mekshat.com/pix/upload02/images68/mk8645_msaad1.jpg

قاعده في الذراع

http://www.mekshat.com/pix/upload02/images68/mk8645_msaad2.jpg

لاننسى رفع ليات تبريد زيت القير وحزمها للأعلى لصحاب التبترونك

http://www.mekshat.com/pix/upload02/images68/mk8645_msaad3.jpg

هذا مساعد الباث
http://www.mekshat.com/pix/upload02/images68/mk8645_msaad4.jpg

تم التركيب
http://www.mekshat.com/pix/upload02/images68/mk8645_msaad5.jpg

وضعه والمقود منعطف لأقصى اليسار للسائق
http://www.mekshat.com/pix/upload02/images68/mk8645_msaad6.jpg

كذلك وضعه منعطف لأقصى يمين السائق

http://www.mekshat.com/pix/upload02/images68/mk8645_msaad7.jpg

مقارنه لمساعد الباث الخلفى مع مساعد الدركسون للسفاري الأصلي
http://www.mekshat.com/pix/upload02/images68/mk8645_msaad8.jpg


هنالك صور سأنزلها روابط قريباً ان شاء الله

تحياتي لكم جميعاً تحايا عطره لاتبقي منكم احداً إلا وقبلته........اخيكم ...قرم

[الديزلي]

شئ جميل وبركت أخي الكريم

[Magellan]

قصة مشوقة من حلقة واحدة
أشكرك على إستفاضتك في شرح معاناتك لإخوانك المساكين الذين يكدون من جيوبهم على الورش

[turkiq]

افهم من كلامك انهم صاروا مساعدين للدركسون بدل واحد؟؟

طيب جربت تغير القديم يمكن يكون انتهى عمره الافتراضي

[العيد]

الله يجزاك خير
قصدك الرجة اللي بالدركسون او نفضة بكل السيارة على سرعات متدنية !!

[باترول للأبد]

وعليكم السلام ورحمة الله وبركاته

الله يعطيك العافيه اخوي قرم وتسلم بيض الله وجهك

وصراحه أنك أفدتنا كثير كثير وأنا عندي مشكلة الرجه وأن شاء الله الحين برتبها

[z a n h o r]

انا اشهد انك ما تخلي الموتر بحاله

لازم تحورف فيه

صادق من سماك قرم

بس يالغالي ان ماكنت واهم اخونا (راعي الهدد )

اخبر سوا حول الشغله ذي

[راعي البرهـ]

الله يحييك اخي القرم
رحت لميزان العضيب ووزنو الكفرات ورصصوها وكبسو الذراع وشدو الرماناتوغيرو الجلد حقت الذراع وغيرت مساعدالدكسون وحطيت جبريال وخذو مني 600 ريال والوضع كما هو
اخوي القرم الله يحفضك ماذكرت ىلنا اسم الورشه الله يجزاك خير
والله اتعبتنا الرجه

[بدوي جنوبي]

بارك الله فيك
جهد تشكر عليه
http://www.mekshat.com/vb/images/rating/rating_5.gif

يضاف الي ๑×۩۞۩المواضيع المميزة في الخيمة๑ ๑×۩۞۩๑ (http://www.mekshat.com/vb/showthread.php?t=10218)

بالتوفيق

[VTC]

السلام عليكم ورحمة الله
كان هنالك موضوع بالصور مطروح من الاخ راعي الهدد سابقا ولاكني ماوجدته ياليت من مشرفنا الغالي لو يرفق الرابط للايضاح

واتوقع حسب خبرتي المكانيكية البسيطة ان المساعد العادي مايصلح للدركسون لأن المساعد حق السيارة يكون هناك دفع بحيث لو تخليه يفتح اخر شي اما مساعد الدركسون فمافيه دفع انما يكون شد الطاره حسب الوضع فقط غير ان مسامير المساعد العادي تكون ثابته غير مرنه ويمكن تكسر القواعد او تثقل اللفات
اما مساعد الدركسون فمساميره متحركه في جميع الجهات
وشكرا على الموضوع



**ملاحظة/ماصحة مقولة ان تدبيل مساعد الدركسون يلعب في الدودة مع الوقت.

[أبوناصر]

هلا والله بقرم والله من زمان عنك



ما ودك بباث عشان تواصل ابداعاتك السابقه

[محسن اليامي]

وعليكم السلام ورحمة الله وبركاته

الله يعطيك العافية يالقرم وعزالله انك قرم

وموتري أحس فيه رجه خفيييييفه من 80 إلى 100

وراح أبدل المساعد بمساعد إسترالي يمكن على الله تروح الرجه من غير ترهيم

وإذا ماراحت راح أسوي طريقتك المباركه

لأني من النوع اللي مايجلد السيارة

مشكور وتقبل مروري

[NSS]

يعطيك العافية قرم وجزاك الله خير,,
بس ودي اسرد لكم قصتي يمكن يستفيد منها الاخوان
طول الله عمرك عندي سفاري 2003 نفس المشكلة من يوم طلعتة من الوكالة الرجة مابين 80 و120
عجزت وانا اودي واجيب للوكالة وماكو فايدة((الكفرات كانت بريدجستون))
بدلت الكفرات وحطيت دانلوب هم مافي اي فايدة,,
بالاخير ركبت ميشلان ورصصت الكفرات وشلت عمدان التوجيه للمخرطة عشان يخرطونهم لان كان فيهم فضاوة والحمدلله انتهت المشكلة تمااماااااا,,,,

بس على فكرة الكفرات لازم ترجع ترصصها بعد فترة (تقريبا قول 30000 كم)) لان قشرة كبيرة من الاطار تاكلت وانمسحت فيحتاج ترصيص.
ويعطيييك العافية وان شاء الله الجميع يستفيد

[شروكي ربع]

موضوع مميز وطرح مشوق .

الله يعطيك العافية يالغالي ..

والله يعطيك العافية على الصور والشرح المفصل ..


لا تحرمنا من جديدك دوما .

[shababi]

يعطيك العافية على الصور والشرح

وطريقة تدبيل المساعد الظاهر انها الحل النهائي لمشكلة الرجة

والغالي NissaN 1990 عمل نفس طريقتك




أخوي شبابي هذي الصور للتوضيح وهي لك وللي ما يعرف طريقة إضافة مساعد الدركسون أتمنا أنها تكون واضحه وأعذرونا على ردائتها وعلى التأخير ،،،




الصوره الأولى :
تثبيت المساعد الجديد بجوار القديم



http://www.mekshat.com/pix/upload02/images67/mk61773_14051984.jpg



الصوره الثانيه :
نفس الصوره الأولى ولكن للتوضيح أزود


http://www.mekshat.com/pix/upload02/images67/mk61773_514256.jpg


الصوره الثالثه :
الكفر مثل ما قلتلكم أنه منتهي ( متمسح )


http://www.mekshat.com/pix/upload02/images67/mk61773_5214452.jpg


الصوره الرابعه :
وهذي صوره للكفر الثاني للتوضيح بعد ،،،


http://www.mekshat.com/pix/upload02/images67/mk61773_5521252.jpg


الصوره الخامسه :
توضح كيفية تثبيت المساعد الجديد بالذراع ،،،


http://www.mekshat.com/pix/upload02/images67/mk61773_5541222.jpg



الصوره السادسه :
المساعد الجديد وهو مثبت بالذراع وبالشاص ،،


http://www.mekshat.com/pix/upload02/images67/mk61773_8854749.jpg


الصوره السابعه :
لو تلاحظون المساعد الأساسي حق الوكاله كيف متكسر منتهي ما غيرته ولا كان يبي يضبط زياده بعد ،،،


http://www.mekshat.com/pix/upload02/images67/mk61773_22514552.jpg


الصوره الثامنه :
وهذي الصوره توضح المساعد الجديد و القديم ولو تلاحظون كيف المساعد القديم منتهي ،،،،


http://www.mekshat.com/pix/upload02/images67/mk61773_55215425.jpg




http://www.mekshat.com/vb/showthread.php?t=133487&page=3

[قرم]

http://www.×××××××××.com/vb/uploaded/128_11209556023.jpg http://www.mekshat.com/pix/upload02/images68/mk8645_jhhhjh.jpg (http://www.mekshat.com/pix/upload02/images68/mk8645_jhhhjh.jpg)


السلام عليكم
VTC حياك الله ..المساعد الأسترالي الموضح فوق لما لا يخضع لخاصية المسامير المتحركه؟؟؟ خاصه وهو من شركه عريقه ومخصص للدركسون وللسفاري ايضاً.
مساعد الباث جداً مناسب فهو ليس قوياً ولا ضعيفاً فهومعتدل .فلن يؤثر على الدوده ابداً والدوده انا راحمها وإلا كان ركبت الأصلى والأسترالي معاً,لكن ألإثنين جبارين على الدوده. موضوع راعي الهدد والله ماشفته لكن حبذا رابط له ليكون داعم لهالموضوع..تحيه طيبه يابعدي.


محسن اليامي..هلابك..الأسترالي لن ينفعك لوحده.عن تجربه..مرحبابك.


turkiq ..نعم اخي الكريم تم إضافة اخر ..والسياره يابعدي 2007 مالها 7شهور .



العيد..هالرجه معهوده لملاك السفاري تبدأ من 80 الى110 وهي نفضه بالدركسون.


راعي البرهـ..يالله حيه ..يعظم اجرك ربي ,,أخي الكريم انا في ينبع الصناعيه حيث اعمل.. والورشه في ينبع البحر, لكن الدعوى بسيطه, اي ورشه اطرح الفكره عليهم ستجد من يتحمس لها ,حبذا ورشه تكون لها معرفه وسبق لهم وسووه.


الديزلي..أشكر لك مرورك يامكثور الخير ,,تسلم


Magellan ..حياك الكريم الشكر لله وحده


باترول للأبد..مرحبابك ,الله يوفقك إذا انت من اهل القصيم ستجد ورش كثير عارفين لهالمسأله.


z a n h o r ..مشكور اطرائك بارك الله فيك


بدوي جنوبي..جزيت خيراً



NSS ..ياهلا والله خسروك كثير..بس اخي الكريم كيف فيه فضاوه العامود ويخرطونه اعرف الخرط يأخذ من الحديد ولا يعطي ..بمعني عامود فيه فضاوه ينبغي ان يحشى لا ان يخرط!!والله مجرد تساؤل لا اقصد فيه شيء
شكرأ على طرحك.حفظك الكريم.


أبوناصر.. يالله حيه. وشلونك ابوناصر, وش امورك,والله يسعدني مرورك دائماً, الله يوفقنا وياك, الباث والله موجود ماراح بعيد ..أخذه والله اللي قلبه كله رحمه عليه 24 ساعه تمسيح وتدليع, تحياتي لك.

[ABO AL-HESH]

اخوي قرم ما ثقلت الطاره بعد التدبيل (لان المعروف بالسفاري خفت طارته وخاصه في 2005 وفوق)

[قرم]

شروكي ربع..الله يعافيك ويسلمك من السوء..شكراً




shababi ..شكراً على نقل الصور ذات الصله ,,حبذا جمع المواضيع ذات نفس الطرح مع بعض ..يعطيك العافيه.


ABO AL-HESH ..الثقل لايكاد يذكر ابداً ,تحيه طيبه لك

[سيد الجو]

والله هافكره من زمان وهي في بالي

ورحت لورشة النويصر وقالو مانرهم مساعد دركسون باترول وايضا رحت لابن مرضاح ونفس الفكره


مع ان الورشتين اللي ذهب لها من افضل واشهر الورش في ترهيم المساعدات بس ماعندك احد

[الفتكي]

السلام عليكم
اخوي قرم انا نفس الحكاية عانيت من الرجه وقلت ما أبي ارهم ركبت مساعد اصفر استرالي لكن ما زالت الرجه عندي ذهبت لورشة عندنا ورشة الهبيش في خضيراء (في بريده )وضبط لي الموتر من احسن مايكون وتراها تجي من ارتخاء رمانات العكوس تحصل دائما تنحل في الباترول وكذلك وزن الدوده .

[turkiq]

انا في ينبع الصناعية الله يجزاك خير تعلمني عنوان الورشة بالضبط

اخوك تركي

[.أبوعبدالرحمن]

بيض الله وجهك


وفعلا حل في الصميم للباتروول

[أسد تميم]

شكر الله سعيك وحرمك على النار ومن يقرا هالموضوع, ولكن هناك استفسار فيه من نصحنا بتغيير العمود الي يمسك مساعد الدركسون ويظبط موتره فسئلت عنه فلقيته غالي فرحت لفلبيني وقال بسيطه ففكه وفكفكه وطق اطرافه بشاكوش ثم ركبه وظبط شهرين ثم عادت حليمه لعادتها القديمه ما تتوقعه من نفس العمود لاني اكره الترهيم والحام في الموتر

[لكزس شاص]

السلام عليكم أيها الإخوة

الطريقة التي ذكرها كاتب الموضوع ضبطت معه هو فقط، ولا هو شرط تضبط مع أي أحد ثاني. لأن ما يرتكز شغله على مقاييس محددة ورسومات هندسية تحدد المواصفات وطريقة التركيب بدقة.

الحل النهائي في نظري غير موجود،

والسبب: هو أن قوة ضغط المساعد العرضي للدركسون في الباترول لا تتناسب مع وزن قوة التوجيه، وقوة الصدمات الجانبيه. بمعنى أن هناك خلل في تصميم مساعد الدركسون.وهو القطعة الوحيدة التي فيها خلل في النظام كله.

هذه المعلومات توصلت إليها بعد أبحاث مطولة مع الوكالة في هذه المشكلة، وتجارب مستفيضة.

الحل المؤقت: أمرين 1- ترصيص الكفرات وتدويرها كل 10 آلاف كيلو
2- التعايش مع هذا الواقع والإطمئنان إلى أنه مجرد خلل مصنعي وليس مشكلة طارئة في السيارة.

آمل أني قد أفدت الجميع.

[الحرالاشقر]

معلومه طيبه
وجزاك الله خير

[قرم]

لكزس شاص..هلابك..



الطريقة التي ذكرها كاتب الموضوع ضبطت معه هو فقط، ولا هو شرط تضبط مع أي أحد ثاني. لأن ما يرتكز شغله على مقاييس محددة ورسومات هندسية تحدد المواصفات وطريقة التركيب بدقة.


بل ضبطت مع غيري...إليك الروابط

http://www.mekshat.com/vb/showthread.php?t=76221

http://www.mekshat.com/vb/showthread.php?t=133487&page=3 الرد رقم 25



والسبب: هو أن قوة ضغط المساعد العرضي للدركسون في الباترول لا تتناسب مع وزن قوة التوجيه، وقوة الصدمات الجانبيه. بمعنى أن هناك خلل في تصميم مساعد الدركسون.وهو القطعة الوحيدة التي فيها خلل في النظام كله







فهمت منك إن المساعد الأصلى ضعيف ....طيب حلتناه,,وركبنا بداله إسترالي ,,ولم يفد!! حتى الأسترالي فيه خلل في التصميم؟؟



الحل المؤقت: أمرين 1- ترصيص الكفرات وتدويرها كل 10 آلاف كيلو
2- التعايش مع هذا الواقع والإطمئنان إلى أنه مجرد خلل مصنعي وليس مشكلة طارئة في السيارة.




الترصيص لم يفد....اما التعايش ..فعلاً تعايشنا حتى اتى الحل فأخذنا بالحل وتركنا التعايش..
بارك الله فيك ولك شاكر مرورك واثرائك للموضوع,تحيه طيبه.

[قرم]

سيد الجو..إبحث وستجد,, المساله لا تحتاج ورشه متخصصه. إشرح مسالتك لاصحاب الورش وستجد من عنده استعداد....لكن الأفضل للورشه اللتي وسبق لهم ان ركبوه.

الفتكي...يعني مانفعك الأصفر؟؟؟ مثلى تماماً ,جزاك الله خير

ابوعبدالرحمن الصفيّان... وبيض وجهك ,,شكراً


أسد تميم..هلابك..أخي لاتخسر نفسك..يعني تغير عامود بأخر من نفس الشركه وبنفس معايير ومقاسات القديم
وتبيه يضبط؟؟ إستحاله.. لكن اعتقد بعد الطرق بالمطرقه والفكفكه من قبل الفلبيني سيحتاج للتغيير.

الحرالاشقر...ويجزاك خير على إطرائك.


turkiq ..حياك الله ..إعطني فرصه لأجد لك إسم الورشه وأضعه بين يديك كذلك مكانها , تحيه لكم جميعاً

[سيل عرمرم]

الحمد لله على السلامة .. للتو فقط انتبهت لرجوعك للمنتدى ..

آخر عهدي بك يالغالي بعد دفتر أبو أربعين (:

ما شاء الله .. مواضيعم دائماً في الصميم ولك اسلوب مميز في الكتابة

حفظك الله ورعاك .. وأخشى أن تتركنا إذا حصلت على دفتر جديد (:

أخوك ومحبك سيل عرمرم

[قرم]

السلام عليكم

عدنا ..وينك ياطارق :director: كما وعدتك الورشه هي ورشة السيد /3910952 تجدها في الصناعيه بجانب معرض للسيارات إسمه سلامه العلوني.. الباكستاني إسمه رؤوف. وفقنا الله وإياك.

سيل عرمرم..سلمك الجبار من النار .. إطرائك احرجني الله يحفظك..ماعليك زود ابد.. لكن بالله عليك إنعش ذاكرتي وش سالفة الدفتر ابو40

تحياتي وأشواقي للجميع
من راى ان في ردي عليه بعض القسوه فليتقبل عذري

[سيل عرمرم]

سيل عرمرم..سلمك الجبار من النار .. إطرائك احرجني الله يحفظك..ماعليك زود ابد.. لكن بالله عليك إنعش ذاكرتي وش سالفة الدفتر ابو40
هلا بالغالي قرم
المرة الماضية غبت عنا وكان السبب قدوم مولود جديد
ودفتر أبو أربعين هو رمز لأيام الحرمان والمعاناة (:

أخوك ومحبك سيل عرمرم

[قرم]

إيييييييييييييه توي فهمت :d دفتر ابو40 ماااااااااااش ماطلعت قرم في هاذي..اضحك الله سنك العقبى لك وتكثر دفاترك ان شاء الله.

[مكثور الخير]

الله يجزاك خير

[الجندي2005]

اخي باترول للأبد هل انت اهات خالد بمنتدى نيسان ارابيا

[السلطان11]

مشكور أخوي القرم على هذا الأيضاح
عندي سفاري 99 ولا زلت أعاني من الرجة تجي على سرعة (80) أحياناً وتنفض السيارة بقوة إلى درجة أني أجبر على تخفيف السرعة ...

أود منك أن تخبرني عن ورشة جيده لتركيب المساعد الاضافي وماهو نوع المساعد الجيد .
ولكل مني الدعاء والشكر ،،،،،

[بيبسي]

الله يجزاك خير اخوي قرم .... بصراحه تفاجأت بأن الرجه المعروفه لازالت موجوده الى الان بصراحه انا عانيت منها في موديلات 99 و2000 وكانت سبب بيعي للسيارتين ... ماخليت شي ماسويته مع انه جديده .. ماقصرت وبيض الله وجهك

[speed 557]

الله يعطيك العافيه

[هـدد]

وش خليت لليابان
مادري انت ميكانيكي ولا مصور ولامدخل بيانات
عشت الله لايضرك ومشكوووووووووور فكرة على تدبيلة المساعد

[ابو خطاب]

عز الله انك قرم على اسمك .. وما يصح الا الصحيح. بيض الله وجهك ورفع الله قدرك .. كم من واحد عانى الامرين من هل رجه ووجد الدواء عندك ودعالك في ظهر الغيب .

مع اني لا املك باترول .. لكن الكثير يعاني من مشاكل ميكانيكية قد لا يجد لها حل حتى عند وكالات الغفلة .. وبعض المستخدمين عنده قناعة غير قابلة للتغيير ان الوكالة ابخص وصعب يخش راسه كلمة (خطأ مصنعي) تقل الوكالات والمصانع منزهة عن الخطأ .. ولو المصنع وضع في السيارة اقضل تقنية توصل لها العلم واجود مواد وحذف فكرة (قطع استهلاكية لارباح اضافية) .. كان موترك مايطلع من وكالته الا بدبل قيمته.

عندي استفسار بسيط : هل جربتوا مساعد دركسون خاص للاستخدام الشاق مثل ( رنشو او مونرو) مثل المساعدات المذكورة في مواقع تجهيزات الاداء العالي .لانها تجي بعدة مقاسات لجميع سيارات الدفع الرباعي؟؟

تحياتي وتقديري يا اقرم واحد بالمنتدى

[المميـز]

يا اخوان عجزت أفهم وش الرررررررررررجه اللي تعانون منها !!!

هل هي بالطاره ؟؟؟؟؟؟

او ررررررررررررررررررجـــه تنفض السياره كلها ؟؟؟؟

انا عانيت ولازلت أعاني من رررررررجه تنفض الموتر كله على سرعة 90


وجربت مره فكيت عمود الدوران الطويل ومشيت على الدبل الصغير

وماصار في رجه بالموتر ابد ابد ابد وبعد فترة بسيطه يعني اسبوعين
رجعة الررررررررجه مره ثانيه !!!

من تجربتي لفك العمود عرفت ان الررررررررجه منه وسألت عنه بالوكاله
وسعره 2000 ريال بعد الخصم وخليت الموتر على ماهو عليه

أرجوا منكم توضيح الرجه اللي تعانون منها

هل هي بالطاره ؟؟

أو

تنفض الموتر كله بشكل مزززعج ؟؟




,

[ابو نواف المطرفي]

اخوي قرم .. هل الترهيم هذا ينفع لموديل 95 ...ز وهل القواعد موجوده والا لا

[بن حويرب]

معلومه طيبه
وجزاك الله خير

[ابو سوبر]

السلام عليكم
مشكور على الطرح الحلو
مره وبعد اذنكم ادلي بدلوي
انا( واعوذ بالله من قولت انا)
من عام 1978 وانا شيل وحط بالباترول
ومن خلال خبرتي المتواضعه
ما لقيت احسن من هالطريقه
الي تفضل بها اخوي قرم

[ابو سوبر]

للاحاطه :
قبل فتره ليست بالقريبه
تعاونت انا وخوي راعي
الهدد على الموضوع
واي استفسار (بعد اذن اخوي قرم )
انا مستعد والف الف الف شكر اخوي العزيز

***(قرم)***

[طخيمان]

طيب يا اخوان اللي موجودين في الرياض ما لقيتوا ورشة تسوي هالشغلة وتريحنا ؟؟

[ابو نواف المطرفي]

طيب يا اخوان اللي موجودين في الرياض ما لقيتوا ورشة تسوي هالشغلة وتريحنا ؟؟




هذا رابط موضوع لااخونا NissaN 1990 (http://mekshat.com/vb/member.php?u=61773) اتمنى انه يفيدك
http://mekshat.com/vb/showthread.php?t=214834

[اورنس الشمري]

والله ما ارتحت إلا يوم جلبته ..

كان معي 98 ربع , لكن ذبحن بالرجه وجلبته شر جلبه ..

النية على تويوتا بحول الله وقوته رغم يقيني بان الباترول اقوى من التويوتا

لكن مالي خلق اضيع دراهمي عند الورش

[؟؟؟ياعيني؟؟؟]

السلام عليكم...............
الله يعطيك العافية على هذا الموضوع اللي كنت ابحث عنه من زمان مشكور اخوي.......




تقبل مروري

[نشمي الحوطة]

أنا ما اعاني من رجة بالدركســون ...

أنا اعاني من رجة خفيييفة بالبدي بعد سرعة 120 ..

تبدا المراية اللي فوق تهز ويطلع صوت [ ررررررررررررررررررر ] مزعج شوي


وتبتل معي الى سرعة 200

مدري وش الحل ..؟

جاني واحد قال من عمود الكردان ..

وقال واحد ترصيص ارضي

رصصت ارضي ولا نفع ..

وش رايكم ؟

[أبو طلال 777]

يا اخوان ابي اذكر لكم قصتي مع هالرجه اللي لعوزتني مره وخاصة اذا كنت على سرعه 100 او جاء مطب ينتفض الموتر كله وبعد عناء وروحه وجيه والوكاله وجميع انواع الورش ما خليت احد ما سالته وبالنهاية دلني صديق لي على صاحب ورشة بالقصيم وتحديداً ببريده ذهبت اليه وكاني اعرف بان مشكلتي لان تحل لاني عاصرت هذه المشكلة لوقت طويل مما وصلت الى اني ابيع سيارتي vtc 2005 بعد معاناتي بالبحث عنها واصطيادها المهم مالكم بالطويلة ذهبت الى الرجال وجدته سعودي ماهو بنقالي ولا هندي يبي يمشني والسلام علشان يضمن فلوسه الهم قال لي وش عندك قلت الموتر فيه رجه قال خلاص خله عندي وبعد ثلاث ساعات تعال استلمه المهم رحت اتمشي وبعد ثلاث ساعات رجعت لقيت موتري جاهز جيت الرجال قلت له كم تبي قال ما ابي شي تعال بعد اسبوع عطني حقي لمن تضمن سيارتك وانا واياه ويالله وبالله ياخذ الفلوس لاني ماني من اهل بريده المهم قالي كلمة للحين ما نسيتها قال رح وخلي موترك يمشي 600 الف كيلو واذا رجعت الرجه تعال خذ فلوسك وتدرون بكم 250 ريال كل شغله وللمعلومية عرف اني موديه الوكاله مدري كيف ...

صاحب الورشة اسمه ابو سليمان الهبيش ياجماعة انسان تعجز اليدين عن شكره لحل هذه المشكلة والتي كادت ان تتسبب ببيع سيارتي والتي حلنت فيها تحياتي للجميع ولعلي افدت من لديه مثل مشكلتي

[shaheenshah]

السلام عليكم أيها الإخوة

الحل النهائي في نظري غير موجود،

والسبب: هو أن قوة ضغط المساعد العرضي للدركسون في الباترول لا تتناسب مع وزن قوة التوجيه، وقوة الصدمات الجانبيه. بمعنى أن هناك خلل في تصميم مساعد الدركسون.وهو القطعة الوحيدة التي فيها خلل في النظام كله.

هذه المعلومات توصلت إليها بعد أبحاث مطولة مع الوكالة في هذه المشكلة، وتجارب مستفيضة.

الحل المؤقت: أمرين 1- ترصيص الكفرات وتدويرها كل 10 آلاف كيلو
2- التعايش مع هذا الواقع والإطمئنان إلى أنه مجرد خلل مصنعي وليس مشكلة طارئة في السيارة.

آمل أني قد أفدت الجميع.
اتوقع ان الخلل ليس في قوة ضغط مساعد الدركسون وانما في وضعيته يعني لو تلاحظ كل اللي يرهمون المساعد الثاني يكون مايل

[ABSS]

هذا موضوع اخونا العزيز

راعي الهـــدد


http://www.mekshat.com/vb/showthread.php?t=76221

[saeed s]

يا اخوان التثبيت تقصدون من الشاص للذراع مباشرة ؟

وهل المساعد عادي يعني امامي او خلفي مو حق دركسون ؟ وش المساعد الرخيص اللي رح يضبط انشاء الله


جزاكم الله خير

[راع الحيزى]

الله يجزاك خير
موضوع مفيد جداً

[الشهري 666]

عندي باترول 99 فيه رجه بالدركسون بين سرعة 80 الى 100 وبعدها تختفي الرجة ومع المطبات تزيد ما ادري وش المشكلة وديتها محلات ميزان كل واحد يعطيني شي من عنده على الرغم اني قبل شهر مغير مساعد الدركسون جديد اصلي وكالة ما ادري وش الحل جزاكم الله خير .