هل ممكن تفصيل هذا النوع من الفرش محليا؟

[برنو]

السلام عليكم

شفت على الانترنت شكل فرش استرالية اعتقد انها زينة و مناسبة للشتاء و الصيف و لا تحتاج لخيمة
لان عليها طبقة خارجية طربال و الداخلية شيش و ممكن تقفل اي واحد منهم و تخلي الثاني
و داخليها مريح و واسع و لا يكتمك الطربال بثقله و فيه لها تصاميم كثيرة
اضافة انها تطوى بحجم صغير ما يضيق في النقل
و بصراحة اسعارها غالية شوي فهل ممكن انها تصنع هنا؟

http://www.mrswagman.com.au/images/swag23_large.jpg
http://www.mrswagman.com.au/images/swag22_large.jpg
http://www.rangercamping.com.au/Ranger_Swags/Down_Under_Swags/Brumby.jpg
http://www.rangercamping.com.au/Ranger_Swags/Down_Under_Swags/Brumby.jpg
http://shop.rangercamping.com.au/images/downunder/brumby.jpg
http://shop.rangercamping.com.au/images/downunder/dingo.jpg

[مفتش الريضان]

أخوي هذي خيمة والا فراش؟ بس صراحة فكرتها حلوة... ولكن هل تناسب الطبيعة والطقس لدينا .... وبعدين وحده من ها الأنواع كنها تابوت ناقصه كفرات حتى يصير سيارة.......... لكن فعلا أدوات طريفة ومتميزة شكرا لاختيارك.

[العاذر]

بصراحة روعة :light:

خاصة للكشتات اللي بدون خيمة !!

لكن تبي الحق تستطيع تصليحها محلياً ..

فهي فكرة رائعة ... وطريقتها سهلة بس تحتاج شوي مخمخة وتركيز في الصور ..

والباكستانية الخياطين في الغرابي ما يقصرون

[قناص القرائن]

رائع لاكن نحصله في المملكه

[ابوخالد]

والله فكره طيبة وين وين عنوانهم

[عاشق البابونج]

الفكرة رائعة جداً خاصة للناس اللي مثل حالاتي مايتحملون قفل سحّاب الفراش

وهل تسمح لي بأخذ الصورتين الأولى لعرضها على خياطين الشرع بالغرابي

[برنو]

الاخ مفتش الريضان
هذي زينتها فراش ما يحتاج خيمة وبعدين ما لقيت الا تابوت :(
و أكيد تنفع عندنا صيف و شتاء و ممكن ترفشها على الارض حتى في المطر

الاخ العاذر
تعتقد الصور تكفي؟ لان داخلها مو مبين

الاخ ابو خالد
موجودة في استراليا و اسعارها من الف ريال و طالع

الاخ momjam
ما عندنا الا حلالك و اذا ما عليك كلافه تعلمني اذا عرفوا يفصلونها

تحياتي

[العاذر]

أظن الفكرة كافيه حتى تفصل شبيهه لها على أقل الأحوال

وحتى داخلها ما فيه شئ معقد فيما يظهر :rolleyes:

وترى الباكستانيين ( عفاريت ) اشرح له الفكرة بحيث تفصل اطوالها وعرضها وارتفاعها وهكذا
وترى بالمناسبة هي لها عدد ( 2 ) غطاء واحد شراع والآخر قماش مفتح ( مثل الناموسية )

بحيث إذا كنت تريد هواء وتحمي نفسك من الناموس سكر سحاب الناموسية وإلا سكرها
بالشراع المغلق عن البرد والشمس والمطر

وترى فكرته مثل الكيس المستطيل أو مثل التابوت لكن لها حدايد ترفعه من عند الراس والقدمين
وله حبل يسحب الحدايد إلى الأرض يعني مثل رواق الخيمة لكن صغير

وأيضاً بالإمكان توسعتها أكثر من الموجود في الأصل أو في الصورة حتى يرتاح النائم أكثر

ولعلي أجد الوقت كي افصل شبيه لها وعند أمل قوي أنها ستنجح :good: لكن الله ييسر

[الشاقي]

أخوي كم اسعارها و وين نلقاها
وبالنسبة لصنعها كان انت من اهل الرياض تلقى من يزين مثلها بالغرابي بس انصحك تصلح المواسير قبل علشان المقاس
فيه مواسير بلاستيك قويات عند محلات البناء من نوع( حراري الماني) طول الماسورة 6 متر وقيمتها 30-35 ريال
قص 6 مواسير وارابع اكواع بلاستيك بحيث تكون الأكواع اكبر شوي من المواسير علشان تفكهن وقت ماتبي ولا يضايقن السيارة
قص ماسورتين كل وحدة بطول متر اللي يصيرن عرض الفراش وحدة عند الراس و وحدة عند الرجلين وثنتين 50 سم اللي يصيرن جهة الراس وثنتين 30 اللي جهة الرجلين
اشتر شبك قماش مترين ونص
رح للغرابي وقل لأبويمن فصل لي فراش تنزاني متر في مترين
حط مجرى للماسورتين المعترضات
حط فتحتين وحدة فوق للشبك نص متر في متروالثانية بالجنب جهة الراس 30 في 30 سم
4 حلق للزوايا علشان الحبل اللي يثبت بالأرض
حط غطا فوق سطح الفراش بعرض الفراش وخيطه من جهة الرجلين فقط بحيث يغطي الشبك وقت البرد
ونم وتقلب يمين ويسار وان حصل تخلي قاعدة الفراش بلاستيك مقوى ترى ماهيب شينة علشان المطر

[عبدالعزيز الدباسي]

الحقيقية فكرة رووووووووووعة ، واعتقد تصميمها مهوب صعب في الغرابي .

وكلام الشاقي في متمه ، واضيف ، انه يجب ان يكون السحاب على الجنب ، ولا يكون فوق مثل الصورة الاولى ، لان اكثر الماء اللي يدخل اذا امطرت يدخل مع السحاب ، لكن اذا حطيت السحاب على جنب ، اعتقد انك تبي تحل المشكلة .

[ابو مساعد]

السلام عليكم ورحمة الله وبركاته

في أعتقادي أنه مايصلح لا صار ما رجلك تلمس الارض ويلحقها بروده وتقلب على كيفك والبطانيه بين رجليك سمعت والا هذا كنك في تابوت .

تحياتي مجرد راى .