نبي نحكمكم يا أعضاء مكشات

[الفوار2008]

السلام عليكم ورحمة الله وبركاته
اخوكم ابوالعبدي جلس في مجلس وفيه ناس منهم صقاقير وناس شرواكم
المهم
واحد من الشباب طرا سالفه صارت مع ولد عمه وسألني انا والشباب اللي بالمجلس عن راينا
السالفه الله يطول بعماركم هي كالتالي

ولد عم الرجال راعي طير مبطي وترك نقلة الطير بسبب ظروفه الماليه المترديه وعجزو الشباب عنه حاولوا معه يهدون له الطير مايبغاه حلف مايقني الا من حر ماله او من طرحه يده هو
المهم
مره من المرات اتصل على ولد عمه وقاله انه جاي ومعه طير طارحه
الطير ذا حر احمر وراسه كاشف ومواري الطير طيب المهم
الطير ذا عليه سبق وحجل وفيه رقم راعيه
الرجال شاور ولدعمه وش يسوي هو يبي الطير وكاسر ظهره ان الطير عليه دلاله لراعيه الأول
المهم ولد عمه شار عليه يتصل على الرقم الموجود بالحجل وفعلا تصل وكان الجوال مغلق وجلس يتصل لمدة ثلاث ايام
يوم وحنا جالسين بالمجلس وهو كان عندنا والرجال خلاص رافض يطلق الطير او انه يبيعه او انه يبحث اكثر عن راعيه
دق جواله وكان المتصل واحد من طرف صاحب الطير وقاله انت متصل على الرقم كذا وكذا قال الرجال ايه نعم قاله سم امر وش بغيت قاله طير وحصلته وعليه هالرقم ودقيت ابشر راعيه قال الرجال الطير لك وتستاهله قال خوينا انت صاحب الطير قال لا قال طيب انت بأي حق تعطيني اياه قال صاحب هالطير بمستشفى جايه سكته دماغيه ولاهو يمك انت والطير قاله طيب خذ الطير وبعه وعط الرجال الفلوس قاله الرجال انت سو بالطير اللي تبي وقفل الخط وخوينا الحين محتار يملك الطير والا وش يسوي علما بأن الرجال الى الأن مقفل الجوال وعجزنا عن الحصول عن معلومات عنه او الطريق اللي يوصلنا له

وش الحل ياجماعة الخير

[al7ur al29eel]

والله انا اقول خله عندك و اسال الرجال الي اتصل عليك متى يطلع من المستشفى صاحب الطير و رجعة له
و بارك الله فيك

[طيرحوران]

عن نفسي
خل الطير عندك الين يقرنس
وداوم على الأتصال براعي الطير وتأكد من علومه
فإذا كان صحيح بأنه مريض فسأحاول ارجاعه الى اخوانه وإذا لم يكن صحيح
فأنت بالخيار اما تاخذ الطير وإلا تثمنه وتتصدق بثمنه بنية الأجر لراعي الطير
والله اعلم

[صقر الرحيبة]

اول شي نقول الله يشفي راعي الطيرويقوم بالسلامة انشالله

وثاني شي الرجال اللي يقلط عليك الطير مايحقله

وثالثا الطير عندك وانته الحين عاجز عن الوصول لراعي الطير الاصلي

فانا اقول وماهي بفتوى لكنها شور:

على هذا الاساس تحتفظ بالطير وتحافظ عليه

ودير بالك عليه بالمقيظ كانه طيرك

وان الله كتبلنا عمر وصار وقت القنص

ادعي الطير وليقه واقنص به لين ما يجيك راعي الطير

ولا ترى هو من صوبك حلال زلال ان ما جاك لانك انت ماقصرت

وسويت اللي عليك

وشكرا

[ثلج]

جزاه الله خير على حرصه ويداوم على الاتصال حتى يجد رد.... طير حوران عاجبني توقيعك ممكن اعرف مصدر الصوره؟!!

[جارح العين]

انا اقول الي له حق بالطير بعد راعيه اهل الرجال
ولاسمح الله صارله شي اهله الي يارثونه
يدق عالجوال الي دق عليه يحاول معه لين يعطيه رقم جوال ابو الرجال
او انك تروح للاتصالات تشوف يمكن الرقب باسم وتشوف الاسم
وتدبر رقم الوالد
الان ملك حق بالطير الا اذا اهداك اياه من اهله
والله يعينك انشاء الله

[وَسَام!]

الافضل انك تسأل اهل الفتوى ويعطونك العلم اللي بعده ان شاءالله مايلحقك شي .

[alajmi110]

الافضل انك تسأل اهل الفتوى ويعطونك العلم اللي بعده ان شاءالله مايلحقك شي .
بيض الله وجهك يا وساام11 هذا الكلام الصحيح لان الامور هذي يدخل فيها مجال الشرع:good:

[أبو رداد]

الافضل انك تسأل اهل الفتوى ويعطونك العلم اللي بعده ان شاءالله مايلحقك شي .
الهديه جائزه لكن الوضع هنا فيه جانب شرعي لان الرجل راقد في المستشفى والي اعطاه الطير ماهو راعيه
ولايعرف درجة قرابة من راعيه ويمكن اعطاه بحالة حزن او مجبر او اي شي ثاني
وراي مع اخي وسام فيما قال اهل الفتوى هم اهل الاختصاص بهذه المسئله

[عزام الاشقر]

انا صراحه اتفق مع كلام أخوي طير حوران ولا ازيد عليه ولا انقص كلام سليم ميه في الميه

[ابو الوسمي]

انا اقول الي له حق بالطير بعد راعيه اهل الرجال
ولاسمح الله صارله شي اهله الي يارثونه
يدق عالجوال الي دق عليه يحاول معه لين يعطيه رقم جوال ابو الرجال
او انك تروح للاتصالات تشوف يمكن الرقب باسم وتشوف الاسم
وتدبر رقم الوالد
الان ملك حق بالطير الا اذا اهداك اياه من اهله
والله يعينك انشاء الله

وهذ الطير اعتبره زى الامانه والله يعينك عليها وكل بئجره..

[بن طلق]

شور وسام سديد
وكلام جارح العين سديد
الطير ذا أمانه عندك
دام له راعي

دمت بود

[ابوفارس 5350]

الافضل انك تسأل اهل الفتوى ويعطونك العلم اللي بعده ان شاءالله مايلحقك شي........ وياليت تفيدنا عن الاسم الموجود على الحجل ممكن نقدر نفيدك اذ موجود اسم على الحجل او ممكن نكون نعرفه ولله يكثر من امثالكم . وتقبل مروري/ابوفارس

[سمير]

ســـلام عليكم

يالربع حنا مسلمين وش دعوى وين الشرع؟؟؟

((فاسألوا أهل الذكر إن كنتم لا تعلمون))

لا بد من سؤال أهل العلم عاجل غير آجل

والله يكتب الي فيه الخير للجميع

[a.الخثلان]

مو مشكلة

حاول تتعرف على صاحب الجوال واتصل على أهله

[طارق الحربي]

اللي اشوفه مجرد رأي انك تدق على الرجال وتساله بالله عن قرابته للرجال اذا كان ممن يرثونه فانك تبقي الطير معك وان شاء الله يطلع الرجال بالسلامه وترجع له الطير

لا تبيعه فقد يكون غالي عند راعي جدا

[قنيص غبر]

كل الامور اللي ذكروها الاخوان ادل على انك تتحفظ على الطير وانك اداري عليه لين ماتحصل فرصه وتقدر اتكلم احد من اهله يقدر يفيدك .. والاخوان ماقصروا ...

[نبع الدموع]

الافضل انك تسأل اهل الفتوى ويعطونك العلم اللي بعده ان شاءالله مايلحقك شي .
الله يقوم الرجال بالسلامة و الي رد ما اعتقد له حق بالتصرف هذا و انا مع اخوي وسام11.

[قلب شاهين]

كلام أخوي وسام عين الصواب ،،

تحياتي / قلب شاهين ،،

[بو هاشم]

انا رايي من راي اخوي صقر الرحيبه

[راحة باال]

الرأي وأنا أخوك إنك تحافظ على الطير وتراعيه وتنتبه له ثم لا جاء وقت القنص لا تقنص به وأنا أخوك إلين يعطيك راعيه الإذن أو حرية التملك والتصرف ومثل ما شاروا عليك الأخوان رح يم الإتصالات وجب اسم الرجال وحاول تاصل ولو لذريته هذي أمانه ... من ترك لله شيئاً عوضه الله خيراً منه. تحياتي ،،

[نواف السبيعي]

الافضل انك تسأل اهل الفتوى ويعطونك العلم اللي بعده ان شاءالله مايلحقك شي .
هذا الكلام عين العقل.
ولا ازيد عنه بشئ لان اذا عطيناك الحل
ممكن ان تحصل فتوى لاسمح الله
اسئل اهل الفتوى بعطونك الحل انشاالله.