المساعد الشخصي الرقمي

مشاهدة النسخة كاملة : ليلة شهد اهل الوحوش للجير الزير ( مقناص الارنب 2008) 2


قنيص غبر
07/05/2008, 10:06 AM
السلام عليكم ...

اتجدد معاكم في هذا الوقت والجميع في شوق لسماع قصص المقانيص وصور القنص .. وهذا بديهي عند كل صقار في وقت المقيض يتم يراجع الصور والافلام وسماع قصايد القنص و وصف الطير ....

انا اليوم جايبلكم سالفه مع صور وارجو انكم تستمتعون طبعا عن الجير وما ادراك مالجير يا هل الوحوش ....

كما شاهدت في موضوعي السابق .. طيري الزير استفصل الحمدالله وبدا يبدع فالصيد ...

في احد الايام ونحنا سارحين كان فيه طير حر وحش لابن عمي . فكان يقوولي ويسفزني . انا رصيدي فالقنص اكثر عنك بثنتين . المهم .. ونحن في وقت الضحا هبت علينا ريح قويه .. وكان يصعب انك اتشوف الاثر او تتبعه .. فبينما نحن نطالع ونبحث عل انا نشوفها شوف العين اللا واخوينا يقوول ابشروبها ! هنا تبسم ابن عمي .. وقال يو بومحمد انا بتنازل عن هذي وبخليك اتهد .. لاني انا سابقك فالصيد .. قلتله انت كريم وازير يستاهل

http://www.mekshat.com/pix/upload02/images69/mk78179_dsc_1080.jpg


.. ومجر فرعت عن طير ماهي اللا ثواني اللا وطار ماشالله عليه وضربها ضربه خلاها ميته .. يعني ماخلانا نطمش او ناخذله صوره للذكرى ;)

حولنا وكرمنا الطير فقالي ابن عمي راعي الوحش .. ماشالله عليه هذا الطير اشهد بانه من خيرة الطيور وشله علا كفه .. وانا سرت اغسل عن الدم . ماشفت اللا والجماعه يزاعقوون . قلت عسا ماشر !!!!

قال ابن عمي السموحه خفق الطير وانا مش منتبه !! ذاك الوقت انا شلت عنه الريشه وكان وقت هوا شديد .. وتوه متعشي .. قلت الله يستر !

قلت الطير وينه واشار للطير !!!

في ثواني ركبنا السياره ولحقناه ..
الغريب الطير ماكان يطير طير شارد او انه يحوم .. كان حاط فناديه فالتراب ويلوي جناحه كان به بلا !! وكنا في مكان سوى علا مد البصر اتشوف اللي قدامك .. ونحنا نلحق الطير فجاه صرخ اللي يسوق السياره ويقوول ماشالله ماشالله !!!

قلت علا شوو ماشالله ! قال انا اشوف ارنب تنسل من بعيد والطير مطلب فيها !!!!
لاحظوا اني وايد احط علامات استفهام :rolleyes: هههههه

الطير طلع يوم كان ابن عمي شايله على ايده وشاف الارنب من بعيد منسله وتحاول تشرد عنه من بعيد .. فطلبها ماشالله عليه وكان توه متعشي ...

المهم كنا نسوق بسرعه عاليه والطير جنب السياره
http://www.mekshat.com/pix/upload02/images69/mk78179_dsc_0987.jpg


وقلت في خاطري الله يستر من هالطيار . ومن عادة هذا الطير من هو فرخ يعطيك كل ماعنده بسرعه وكان يجهد عمره بزياده ..

المهم صار الموقف اللي جدامنا وانا حاولت التقط له هذي الصور ولو ان السالفه صارت بسرعه والكاميرا ماكانت علا استعداد ومجهزه وماكان فيه وقت ناخذ صور كفايه. فتركم مع الصور

هذا الصوره كان جاي الف وشالها من علا الارض من سرعته ماقدر يضربها

http://www.mekshat.com/pix/upload02/images69/mk78179_gg.jpg



وهنا بعد ما اجهز عليها

http://www.mekshat.com/pix/upload02/images69/mk78179_dsc_1002.jpg






وهنا !! ماشي هنا خلاص في صوايده وصايد من العوايد

http://www.mekshat.com/pix/upload02/images69/mk78179_dsc_1003 (2).jpg


الحمدلله في هذا الوقت اتساوينا في الصيد مع ابن عمي في وقت قياسي . جاني بن عمي وقال خلاص يا راعي الزير . انا احقلك <--- كلمه اماراتيه تنقال اذا الواحد يشهدلك اذا كنتم في تحدي ..

وصرنا حبايب من هذاك الوقت ماحد يتحدا على الثاني .. لكن هناك في السياره الثانيه كانت معركه شديدة الوطيس وكان يتراسها العضو المزروعي وكان في تحدي كبير ما بينا . كان يجينا يوم نغلبهم . واليوم الثاني هم يغلبونا .. طبعا هذا التحدي تكون له نكهه خاصه بعد مانجلس حول النار وتبدا السوالف والعلوم وهذا سوا وهذا قال
http://www.mekshat.com/pix/upload02/images69/mk78179_dsc_0174.jpg



ارجوا انكم استمتعتم وانشالله انتظرو المزيد
وَسَام!
07/05/2008, 10:10 AM
سوالفك كلها طيبه وان شاءالله نتواجه في الرمله ونوريك الاصايل وش تسوي . وينك يالمزروعي ترانا جودنا الرجال راعي الجيره لاتفكه وهو مستانس
المزروعي
07/05/2008, 10:13 AM
ما شاء الله !!!! أنا كنت أقول ليش قنيص غبر ما حط الصور لين اللحين !!!!!
كنت متوقع أنك تحط هذي الصور الجميله للزير . لكن أنا بحط صور الوحش أخر شي !!!!!!!
لكن الحقيقه تنقال الزير فعله فعل وحش !! الله يبارك لك فيه .
المزروعي
07/05/2008, 10:15 AM
وسام11 . الوعد معاك و مع قنيص غبر و أبورداد في مقناص الرمله في أول الوقت . و إن شاء الله يرجعون للوحش بعد المقناص !!!
وقاااااد
07/05/2008, 10:33 AM
ماشاءالله على الزير عزالله انه كفو وماقصر
بيض الله وجهك على الصور والسوالف الممتعه
تقبل مروري
وقاااااد
قنيص غبر
07/05/2008, 10:40 AM
وشهد شاهد من اهله ههههه المزروعي .. وسام11 والنعم فيك .. والوحوش انا ابصم عليهن بالعشره بس كل مقام مقال .. اذا حضر الماء بطل التيمم .. احس بروح فيها على هذي الكلمه خخخخ .. تسلم على المرور ..

وقاد مرورك يشرفنا
بعيد الشوح
07/05/2008, 10:42 AM
بسم الله الرحمن الرحيم
السلام عليكم ورحمة الله وبركاته
اخوي / قنيص غبر
انا ملومك في حب الجيرات لانها شجاعه بافراط
لا كن اهل الحرار مايحبونه لن فيها وليس كلها عيوب
1/ الصيحه وعاده غيير مرغوبه في جير واللى وحش
2/ الكوشه والحقلان على العلف
3/ ارفل تلقي اكثر الجيرات يعلق صيته ويحولبها في القاع ويقوم ينتف ويعلف
من دون ان يحللها
4 / تلاقي بعظ الجيرات التفريخ مايعرف الارتفاع
مميزات الجير
1 / الحوق الفارط
2 / الشجاعه الفارطه
3 / اللوان المرغوبه
4/الصمله القويه
مميزات الوحوش
1 /طير لياقته "فل اذا كان وحش"
2 /طير اصيل
3/ طير ذكي
4/ طيور تعرف التحليل
5/ طيور شجاعه
6/ طيور ترتفع
طيور تسدك اذا نقلتها في مجلس الرياجيل قالو فلان معه حر ماقالو جير
قنيص غبر
07/05/2008, 10:57 AM
اخوي بعيد الشوح .. اشكر مرورك .. وكلامك مردود عليه ..

اول شي العذاريب اللي قلتهن فالجير فيهن من الصحه . لكن حتا تكون منصف قولي .. هل كل الوحوش طايره ومحلله وترتفع وكل الكلام الزين .. اذا انته تعرف انه ظاهره منتشره في السنوات الماضيه انه في جماعه يصيدون الفروخ من العش ! يعني يجيبلك وحش وحر وشكل لكن ماقد طار ولا حلل ولا من هالقبيل .. يعني هو والدجاجه واحد لكن بصوايد .. وانا اعرف ناس كثار صار فيهم هالموقف لان معضم الناس ماصر عندها ذمه يجيبلك فرخ على اساس انه مطروح . وهو مربوط في عشه ماتحرك من مكانه لين ماكتمل ريشه وشاله ..
في هذي الحاله مالفرق بين هذا الطير وبين الجير !!!

لكن يا اخي العزيز ويا راعي الوحش .. اذا جالك طير وبالاخص من مزرعة Dk وما ادراك ماهي هذي المزرعه ,, وجاك مسويله "هاك" يعني فك لمدة ثلاث اسابيع وهي كفايه .. ومن سلاله معروفه .. فبيكون من الماسف انك اتقارن بين الجير والوحش لانه بيكون طاير ومرتفع . وبيكون محلل . وبيكون ذكي .. وزياده عليه بيكون ابوه الجير الخالص .. يعني قل على الصيد السلام .. يجيك سرعه جنونيه لا يمكن تقارن فيها الوحش ابدا . ويجيك اشكل واحلا من الوحش .. وزيدك من الشعر بيت . ان الجير كل ما جرنس معاك زادة قوته وسرعته ..

خلاص الموضوع اتمنا ان ماتكون في موقف بان هناك حباري طايره من بعد كيلو ومعزمه السما ومعاك واحد عنده جير متمرس وقانص ..

ونحنا يشرفنا مداخلاتك
نبع الدموع
07/05/2008, 11:15 AM
ما شاء الله تبارك الله عليك اخوي قنيص غبر تستاهل الناموس وانا اخوك
يعني تنصحني ما افرط في الجير؟؟ تراك رفعت من روحي المعنوية حيل
الله يرفع من قدرك و الاخوان. توني ماخذلي جير شاهين و هذا اول تجربة لي
في الجيرة و ليت علمة على قد وزنه ههههههه

لا هنت اخوي على الاسلوب في السرد و التصوير.

لا خلا ولا عدم
طيرحوران
07/05/2008, 11:38 AM
قنيص غير
السلام عليكم ورحمة الله وبركاته
مشكور على هذا التقرير
ومبروك التعادل
وبالنسبه للهدد بعد العشاء أغلب الطيورالتي ضرت على الصيد سواء وحوش او جيره تهد وهي عالفة وخاصة بعد العلف مباشره
ولكن يبدو لي من اسلوبك انك متحمس جدا للجير
ولا يروح تفكيرك بعيد فأنا طيوري مابين احرار وجيره
ولكن لو خيروك جير سبوق فارط وصايد
ولا وحش سبوق مثل الجير وفارط وصايد
وش تختار
الجير انا ارغبة لحاجتين السبق والشجاعة
واكره لحاجتين بطء بالتعلوم وكثرة امراضه
وطيرك الزير بسم الله ماشاءالله مادام هذه علومه
ممكن تعطينه علوم هدده على الحمام ان امكن وخاصه حمام الطوي كما تسمونه عندكم او حمام الزاجل
والله يبارك لك فيه
وتسلم
قنيص غبر
07/05/2008, 12:19 PM
نبع الدمووع .. افا عليك لاتفرط فالجير ان كانه سبوق وبيدسم شواربك انشالله ..

طير حوران .. اشكر مرورك ياخوي .. وانا ما اعيب في الوحش وانا اخوك او اقلل من مقامه . لكن في نفس الوقت لا اقلل من قيمة الجير وهو مشهود له في اماكن كثيره .. سؤالك جيد من حيث الاختيار .. انا اعتقد فالسبق ان الجير دائم التفوق كسرعه وليس كتقنية وفن ..واذا تمرس فصيد فعتقد الجير اسبق ..

عن الحمام . صايد حمام الزاجل ثلاث مرات كامل الريش . ولكن حمام الطوي لم تسنح له الفرصه اقصد لي ..
بـــن خــتروش
07/05/2008, 01:37 PM
الله يبارك لك فيه طير طيب ولايرظى بالهزيمه وتسلم على هذه القصه والصور الجميله
محمد الفهيد
07/05/2008, 02:53 PM
الله يعطيك العافيه وصراحه شي طيب

وانا اشهد لك يا ( سفير الجير )وهذا دليل قوي وايبين نجاح الجير

وقدااااااااااااااااااااااااااااااااااااااااااااااا ااااااام والقلب داعيلك
رامى السيد
07/05/2008, 04:01 PM
ماشاء الله بارك الله فيك
أبو رداد
07/05/2008, 09:56 PM
ماشاء الله تبارك الله
انا اشهد ان الجير مايحتاج ريشه ههههههه


وسام11 . الوعد معاك و مع قنيص غبر و أبورداد في مقناص الرمله في أول الوقت . و إن شاء الله يرجعون للوحش بعد المقناص !!!
هلايبو محمد
ياخوي الوعد (ماوراء الخليج العربي) على الربد المخاريش
هههههههه الارنب كلن يصيده
وانا اريد اطمشك على التلقيف وذل الشارده
المزروعي
07/05/2008, 10:00 PM
أبورداد . الصراحه أنا رجعت في كلامي !!! يا أخي أنت تهدد و تتوعد بتلقف علي ! أنا مش وجه بهدله ياخوي !!!! أروح أقنص لحالي أستر
وَسَام!
07/05/2008, 10:02 PM
لاوصلت للمشرفين انا مالي دخل شوفوا المزروعي انا اول ماادري ان المشرف دخل المنتدى على طول ترجع ذاكرتي للخلف واذكر المدرس في الابتدائي اذا دخل الفصل:j
العمراني
07/05/2008, 10:04 PM
مشكوووووووورررر
حطاب 123
07/05/2008, 11:05 PM
:) :good: :good: :good: السلام عليكم ورحمة الله وبركاته
مشكور على هذا التقرير
والله يبارك لك فيه
وتسلم
بروفسر
08/05/2008, 12:15 AM
يعطيك العافيه على هالموضوع
قلب شاهين
08/05/2008, 01:28 AM
ماشاء الله تبارك الله ،،

صور رائعه جدا جدا جدا وطير صمله ماعليه كلام ومشهود له الله يباركلك فيه ،،

وودي اني اقولك كلام وتقتنع فيه :

شوف كل صقار وله طيره المفضل ، يعني انت مثلا شفت الجير وشفت فيها فعل مايفعله الوحوش واعجبت فيه ، يعني راعي الوحش شاف الوحوش يسوون الهوايل بس كل طير ومميزاته ،،

يعني انت ذكرت مزرعه عن الجيره وقلت الي ياخذ منها طيره مايفشل في صيدته طيب راعي الوحش بيقولك أقن لك طير حر سنجاري اصيل وش وش يسوي !! حرام انه يسوي فعايل ماتصدقها العين !! وكذلك الفارسي والباكستاني وبعض الوحوش ،،

يعني كل صقار ورغبته بالطير المفضل لديه ،،

والحقيقة طييرك تووووب ،،

لاهنت على الصور والله يرزقنا وياكم ،،

تحياتي / قلب شاهين ،،
نايف الخالدي
08/05/2008, 02:32 AM
مشكووووووووووور ياقنيص غير على هالصور وطيرك ماشاء الله لون وعون
بس ابورداد قال كلمتين وصدق فيها
1الجير مايحتاج ريشه.. لانه مايقدر يضيع
2 الارنب كلن يصيدها ...احنا نبي نشوف اشياء فوق والوحوش مشهود لها نبي نشوف الجيرات وش تسوي مع الربد
والمزروعي حنا وكلناك المحامي ولازم تجيب رد للدفاع مدعوم بالصور
ومشكووووووووووووووور ياقنيص غير على الموضوع المتكامل
عاشق البحر5
08/05/2008, 03:30 AM
ماشاء الله تبارك الله
قنيص غبر
08/05/2008, 07:01 AM
تسلموووون عالمروور ..

ابو رداد انت بس اللي في صفي .. وعلا ماقلت المقناص هو اللي ما وراء الخليج العربي .. يوم اطير الحباري من بعد ثلاث كيلو عالاقل . يبالك طير ابوه بيور ملعون صير . اذا طار من ايدك اتقول رامي اب ار بي جاي .. مايبالك طير يتسحب ..

ويا نايف الخالدي .. رساله موجه لك يا عزيزي ...
بالاخص هذا الطير .. عنده عقده وجنون في شي اسمه هدد في السما .. وانا السنه اتصلي ابن عم لي وهو مرتبش .. قالي وين طيرك قلتله في البيت .. كنت ذاك اليوم مع الوالد . سكر في وجهي وبعد ساعه وصلتني رساله وفيها صورة الطير صايد حبارى .ز قالي ان محصل حبارى في مكان مايقدر يهد اي طير لخطورة المكان وضيقه . يعني اذا طارت عنك من محيط ثنين كيلو سلم على الطير ..

وهذي صوره لك يوم هو فرخ تلقيف في السما على خرب

http://www.mekshat.com/pix/upload02/images69/mk78179_hadad11.jpg



http://www.mekshat.com/pix/upload02/images69/mk78179_hadaad1.jpg


وهنا عزف السلام الوطني :D

http://www.mekshat.com/pix/upload02/images69/mk78179_hadad2.jpg






تقبلوا تحياتي يا هل الوحووووووووووووووووووووووووووووووووش
نايف الخالدي
08/05/2008, 08:49 AM
مشكووووووووووووووووور على الصور
وياقنيص غير انا مانزل من مستوى الجيرات بس الاغلبيه من الجيرات فاشله وعذاريبها كثير
بس الطيب منها وهم اقليه مسكت وماعليه كلام لاكن وين الطيب
والوحوش تاريخه مو من كم سنه تاريخه من سنين طويله والاصل دايم غير ويكفيك انه اصلي والي غير تقليد
وهاذي وجه نظر وماكنت بطرحها لولا ككلامكم عن الوحوش وانا مارضى عليهم
ومشكوووووووووووووور على التصوير الراقي والجوده العاليه
قنيص غبر
08/05/2008, 09:14 AM
نايف الخالدي افا عليك يا خوي .. انا ماعذرب في الوحش ابدا .. لولا الحمد ماتكمل الصلاه .. والوحش مالنا غنى عنه . وابشرك انا كل سنه اخذ وحش فرخ . بس انا اعيد وكرر الوحش له مزته والجير له نكهته الخاصه .
والله يجمعنا انشالله على خير وسلامه
وَسَام!
08/05/2008, 10:26 AM
قنيص غبر صورة هدد الحبارى كان يبيلها موضوع لحاله ! الحقيقه من الصعب انتحداك ! الله يوفقك ويبارك لك في حلالك.
طلق الصيد
08/05/2008, 10:37 AM
بيض الله وجهك على ذا الصور والسالفه الحلوه ماقصرت ونستنا والجيره ماعليها كلام
قنيص غبر
08/05/2008, 10:38 AM
وسام11 مافي الجعبه اكثر وانا اخوك ..
شواااش
08/05/2008, 04:41 PM
السلام عليكم جميع يالربع .. اشكرك اخوي قنيص غبر على هالموضوع الطيب والصور الزينه والطير المبروك عساك تهد فيه مستانس انشالله انت والجميع
بس عندي استفسار وياليت تفيدني فيه ولا اي احد عنده معلومات مايقصر .. هل طيرك تهده بوزن معين او ان ماعنده خلاف لو على كبده علف او انها تختلف التهجين من خلطه الى خلطه
وسلااااااااااااامتك
falkon
10/05/2008, 05:38 PM
الله يعطيك العافية على المشاركة الرايعة والردود الاروع
قنيص غبر
10/05/2008, 06:37 PM
تسلموون على الردود وكلن له طيره المفضل .. وانا احترم رايكم في الجيره . وانا ماقلل في قيمة الوحوش ... وترا لو اتشوفوني اسولف بس عن الجيره .. انا كل سنه لازم انقل الوحش .. بس يا جماعه طربة الجير غييييييييييييييييييييييييييييييير اذا فعل عندك ..
الشواش .. عزيزي اشكر علا صبرك وانتظارك . كنت ساير منطقة واليوم جاي .. على سالفة الوزن .. انا طيري له وزنين .. ان كنت في لبلاد اخليه علا وزن 1300 الى 1270 .. اما اذا في مقناص اقنصه علا وزن 1230 وكرمه في صيده .. لو يكون عديد في مقناص من صيده احسن واحسن بيعرف وقتها ان كل ماقنص بيحصل كرامته ..

اشكر البقيه علا المرور والردود ..

انتظروووو جديد الزير
المان العرب
10/05/2008, 07:34 PM
ماشاء الله على الزير
عز الله ان الجيره طيور
شواااش
10/05/2008, 08:44 PM
الغايب عذره معه ومرحبابك انورت المنتدى بعد ذالغيبه ..
الله لا يهينك عالمعلومه .. استفسار ثاني صغير اذا تسمح :)
وش افضل انواع ذالخلطات...؟
وكم اسعارها ...؟
ذراع الذيب
10/05/2008, 11:44 PM
ماشالله عليه صايد وفايد الله يطرح فيه البركه......
قنيص غبر
11/05/2008, 06:41 AM
شواش .. كل ماقربت من نسبة الجير عطاك شكل وطباع الجير وسبقه . وقرب خلطه هي 8/7 اما كل ماقربت من نسبة الحر كانت مواصفات الحر وجلده للجو الحار وسهولة تربيته .. واقرب شي وهي انا اللي انصحك فيها 50.50 ..

اما اسعارها فخوي حسب المزرعه فيه طير يبدا من 7000 لين ال 70000
501
11/05/2008, 07:39 AM
ماشاء تبارك الله وتستاهل الصيد يا قنيص غبر
و
ماشاء الله على الطير

501
شواااش
11/05/2008, 08:09 PM
اشكرك اخوي قنيص على معلوماتك وكلها طيبه وماقصرت طال عمرك ... وشكرا
قنيص غبر
13/05/2008, 06:49 AM
تسلمووون لكل من اعطا نفسه وقت حتا يشهد هذا اليوم المحسوب للجيره . تسلمون على الردود
صارووم
13/05/2008, 08:29 AM
ماشاء الله .. تبارك الله
الزير طيب .. وراعيه أطيب
الله يطعمك من صيده
ولايحرمك
شوفته
بو هاشم
13/05/2008, 08:33 AM
مشاء الله تبارك الرحمن الله لايضره