المساعد الشخصي الرقمي

مشاهدة النسخة كاملة : اقلط حياك الله


ذراع الذيب
14/05/2008, 02:04 AM
السلام عليكم ورحمته الله وبركاته..
كيف حالكم عساكم طيبين
صراحه انا متشوقلكم ومتشوق اخبار مقانيصكم
والهدد راح وقته والحين وقت هدد الافلام والقصص اللي تبقى في الذاكره
اللي نحكيها كل من له ولع في المقناص سوا القصه طريفه او كانت حزينه ودي كل من يدخل ويقرا
الموضوع يسرد لنا قصه وقعت له واخص الكلام للمشرفين والاعضا الميزين اللي لهم باع طويل في المقناص
وعلى قولهم زانت السواليف والله يحفظكم من كل مكروه...........
المان العرب
14/05/2008, 02:53 AM
وعليكم السلام
مشكور اخوي ذراع الذيب على موضوع الطيب
اما اسوالف واجد فيه سالفه طرت على بالي الحين
مره من مرات قانص الساحل الشرقي وانت خابر الساحل في كل جو فيه عشر سيارات ماتعرفهم المهم جيت قاع حروة حبارى وتحرى الجره وتقنص ويوم رفعت عيني الا معرضعه علي حبارى اطيار والتفت للطير واخذه وهده اثر هديت اطير برقعه والحبارى يوم شافت اطير وترتفع وخلي طير ولحق الحبارى لين جيت تحتها ومعي طير ثاني واخذ برقعه واهده ويلحقها واصيدها ورجع للطير الاول ياالله لقيته وهاذي من سوالف الطريفه واجد اسوليف لكن اتمنى تعجبكم

تقبلوووو تحياتي
نبع الدموع
15/05/2008, 09:40 AM
هذي سالفة قبل كم سنة و هاذي من السوالف الغريبة في شبك الطيور
و الي تدلك ان المكتوب بتاخذة مهما صار و الي ماهو مكتوب منت ماخذة
لو انة بيدك

كنت انا و وخويي على موترة في اخر الموسم و ذيك السنة ما طرحنا ولا طير
علما كانت ذيك السنة تكلفة مقناصنا غالية شوي و نبي نعوض و معظم الطواريح
في الساحل وضعهم اسواء من وضعنا المهم كان معي شيهانة جبلية ما تركد
ابد تكافخ من فجة النور لين المغرب و كان عليها برقع تشوف منة المهم كان
خويي السايق و الباب الي عندي ما يفتح غير اركب الموتر من بابة

جينا الصبح مع فجة النور و انا اقولة اقضب الساحل يمكن نطيح في شئ من
الشواهين المتاخرات و هوا يقولي لا نبي الضلع للحرار و كان وقت الحرار
راح من مبطي المهم قمنا نتجادل هوا يقول الضلع و انا اقول الساحل
في الاخير اتفقنا نقسم الشر نصفين و نروح لمزارع بين الضلع و الساحل

ما تعدينا كيلو او اثنين كيلو من الطريق الاسفلت ولا هذاك الطير الي منحرة
تقال مراية (شيهانة) تعدى من فوقنا و اخلي عيني معها و لا هي توقع
حول 300 متر عن الموتر
خوي من الربشة طفى الموتر معة و خفنى انة يشغل و يكفخ الطير على صوت
دقة السلف المهم قلنا مالنا الا هي و يشغل الموتر في وقت شبكت انا فية الزريق
(كانت النفسية مدمورة ولا شبكنا ولا جهزنا شئ)
المهم و انا اعطيها قمرية بثقالة و نشغل الموتر في نفس الوقت و نمشي ولا الطيرة
مالها نية هداد و ندور حولها و اعطيها سمانة بشبكة و نفس الشئ ماتطلب العلف
في دوارتنا حول الطير بنشر الكفرين الي ورى بسبب علامة مزرعة ما انتبهنالة

و بداء يطلع صوت البنشر و خايفين يجفل الطير
و الطراد الي معنا قروشها زود بالمكافخ حقة المهم الطراد شاف القمرية الاولى
الي حذفناها من البرقع و يهد علينا من القزاز الي ورى ولا لحق يهد عليها الا
و الشيهانة معة على القمرية و يتشابطون مع بعض وحنى نرايسهم بالموتر المبنشر

المهم لين تاكدنا ان الوحش علق و افتح الباب الي عندي و انزل جري و اخم
الطيور و امهد الوحش الي ما شاء الله تبارك الله رغم انة في اخر الموسم
لاكنة جاب قيمة زينة عوضت كل الخسائر الي خسرناها في المقناص

لاكن سؤال بعد ما توجهنا لاقرب محل و اخذنا برقع و سبوق للطير
هوا شلون فتح الباب الي عندي علما ان هالباب من اول الموسم ما يفتح؟؟
ههههههههههههههه
مغرم مقناص
16/05/2008, 03:42 AM
في احدى مقانيصي

كنت قانص مع شقة النور والموتر سلس وأمشي براحتي ولم تعترضني اي مشكله

وعندما وصل الوقت تقريبا الساعه 1 ظهرا وقع نظري على ثر خرب مع ذاك الوادي يحبري

يوم شفت ثره يحبري وتوه من ساعه عطيت الموتر اول وغرس وقعدت في مكاني تقريبا نص ساعه احفر عن ثر

الخرب

عموما بعد ماطلعنا تقهوينا ويوم برد الوقت قصيناه وهدينا عليه وطلع على بعد 200 متر من التغريسه

لكن الشي السيئ انه راح على الطير :(

وهذا احد المواقف ..
راعي ام عشر
16/05/2008, 05:19 AM
السلام عليكم00 في عطلة اسبوع ربع لنا هدوا على خمس صادوا ثنتين بس00 المهم دوامي قريب من محل مقناصهم00 السبت الفجر متوجه للموقع تقريبا00 وكنا في وقت أختبارات آخر الفصل00المهم وأنا بطريقي مريت على محطه بعبي بنزين 00 وكان المكان مقطعه00 وكان بعد هذي المحطه محطه ثانيه بمسافة 20 كيلو تقريبا وكنت أبقنص بعد هذي المحطه00المهم حصلت بالمحطه الأولى اثنين شباب متعطله سيارتهم ولازم ياصلون المحطه الثانيه بعد عشر دقايق لأنه تعطلت سيارتهم بالمحطه0 واحد منهم بس يبي يختبر بقريه قريبه من المحطه الثانيه00المهم زبطت له محل بالموتر وكان شاص00المهم حطيت جهاز الطير فوق التنده ونسيته 00وصلت المحطه الثانيه00 ولحظة مانزل طرى في بالي الجهاز 00وأنا أرجع بسرعه أدور عليه بالخط لايكون تاطاه تريله00المهم يوم وصلت المحطه الأولى ولا خوي رفيقنا يأشر لي والجهاز معه فاك المسامير ينادي علي ههههههه00 قررت أدخل من عند هالمحطه للوقت بس00 ولحظة مادخلت ثلاثه كيلو ولا جرة هاك (الخرب)اللي يوحش00 المهم قصيته 00طلع عليه الطير من بعيد وهو يطير 00ويلحقه بأرتفاع ويرده مرتين00 ويعلقه فوق بيت بدو ويحول فيه 00 ولله الحمد0000000 والمعذره على الاطاله00
أبو رداد
16/05/2008, 02:01 PM
سوالف طيبه
اشكر جميع الاخوان الي شاركوا
والشكر موصول لصاحب الموضوع
جارح العين
16/05/2008, 04:10 PM
الله يعطيكم العافيه وهذي العلوم الطيبه
ذراع الذيب
17/05/2008, 01:35 AM
المان العرب
مشكور صراحه متعتناالله يعطيك العافيه ويهنيك في كل مقناص
نبع الدموع
مشكور ماقصرت والله يرزقكم بفرخ الشياهين وشيخ الحرار
مغرم مقناص
الله يعوضك في طيرك ويرزقك اخير منه
راعي ام عشر
الله يعطيك العافيه على القصه امتعتنا الله يحييك...
ابو رداد
مشكور على مرورك والله يعطيك العافيه
جار العين
مشكور على مرورك الله يعطيك العافيه