الخــــــــيــــــــــام

[MOR300]

السلام عليكم ورحمة الله وبركاته

اخواني انا ناوي اشتري خيمة اليومين هذي وجالس ادور وش احسن انواع الخيام الموجوده
وانا ماكتبت الموضوع هذا الا بعد ماقريت كل المواضيع الي في المنتدى عن الخيام

عموما انا محتار بين الخيام التقليديه العادية وخيام التفصيل

الخيام العادية ميزتها قوية ومضمونه وعارفين طرق تركيبها زين
وعيوبها ثقيلة وصعبة الحمل ومرهقة بالتركيب خاصة اذا طلع الرواق معكوس (( هذي نبي لها حل ياشباب كيف اخلى الرواق يركب صح ؟؟))

اسعارها
4*4 مقاس 26 باكستاني ب 750 ريال حديد و650 ريال خشب (( على فكره وش احسن الخشب ولا الحديد ))
5*5 مقاس 26 باكستاني 1400 ريال


خيام التفصيل ميزتها سهلة الحمل سريعة التركيب وتفصلها على مزاجك
عيوبها غالية الثمن جدا توصل لدبل السعر ضعيفه مع العج حسب ماسمعت




سوالي الحين ياشباب ابيكم تشورون على وش اشتري وابي مع السعر بعد لانه هذا موسم الخيام


وجزا الله خير من افاد واستفاد


تحياتي

[الطيب]

وعليكم السلام ورحمة الله وبركاته

اخوي الفرق بين التفصيل (سريعة التركيب و بدون أطناب و رواق) أو باكستانية(اطناب و رواق) يبدوا انه واضح لك و هذا يعتمد على الميزانية و كثرة الكشتات و السيارة ..

لكن اسمح بس اقترح عليك تشري أو تفصل عند الغرابي لأنه يعتبر اقل الاسعار في المملكة و بدون مبالغة ...

ارجوا ان اكون افدتك ..

:)

[مرافق الطيبين]

التفصيل ما مثله ابد

وبالنسبه للغلى فهو غالي اذا اخترت قماش غالي

لكن تقدر توفر الى نص الثمن اذا اخترت شراع باكستاني مثلا بدال التنزاني

[شايب الصمان]

السلام عليكم ورحمة الله وبركاته

افضل انواع الخيام وتجد طلبك عندهم مصنع القاضي للخيام(حيث انهم متخصصون بالخيام-الدمام)ولديهم فروع في المملكه واذا حبيت الفزعه حاضر ومستعد ويمكنك مراسلتي على (kass_110@yahoo.com)

والله الموفق

[MOR300]

الطيب
هذي الاسعار الي حاطها اسعار الغرابي قبل امس

وفعلا ارخص من برا كثييير

لكن وش رايك الرواق حديد ولا ذرا احسن

اشكر لك حظورك

============================
مرافق الطيبين
اخوي وش الفايده اوفر واذا جا المطر قامت تخر واذا عجت تشققت واذا جا البرد تصير ابرد من الجو برا

اشكرك على مرورك

===================

شايب الصمان
ماقصرت والله بس لو رقمهم بالرياض واذا يمديك على الاسعار بعد اكون ممنون



تحياتي للجميع

[ابو ســــاره]

انا من رائيي وانا اخوك احسن شي الخيام الجحشه طقتها سهله وفيه انواع منها كبيرة مدري هي تباع في السوق ولا لا الي معى مقاسها تقريباً خمسة في عشره بس انها من خيام الحرس شريتها من حراج بن قاسم قبل سنتين ولا فيه اروع منها اطقها انا الحالي بربع ساعة ورواقاتها منها وفيها يعنى حط العمدان وشد الزوايا بس
وسلامتكم ،،،،

[desprado]

في خيمة من تفصيل القاضي تباع عند الرماية في الرياض ممتازة وسعرها معقول وخفيفة وسهلة النصب وارضيتها منها وفيها ولا فيها عمدان في الاروقة تنصب مثل الشمسية مجربه وممتازة بس اذا عزمت اطلب طبقتين

[الطيب]

وعليكم السلام ورحمة الله وبركاته

اخوي مور

انا شاري خيمة رواق خشب 3 غاط قماش 26 من الفوزان في الغرابي 7x4 بالف ريال فقط لا غير و هذا في تاريخ 26 رمضان ؟؟؟

بالنسبة للرواق ... مرة اخرى هذا يعتمد عليك !!!

الخشب مميزاته انه خفيف ... لكن يتكسر مع الشيل و الحط و كثر المزح :D

الحديد قوي و يتحمل لكنه ثقيل ؟؟؟

واذا تبي خيمة جوالة (Mobile) فخذ الخشب و حتى اذا تكسر غيرة مهنا شي يسوى ..

و اذا تبي خيمة ثابتة (حشى صارت تلفونات) خذ الحديد ... يعني مثلا تبيها في مزرعه ولا شي ..

ارجوا اني اكون افدتك و ما طولت عليك ..

:)

[MOR300]

ابو ســــاره
مشالله حجمها كبيير مره بس عاد خيام الحرس ثقيله خلقه عاد كيف اذا كانت بالحجم هذا عموما لو اضمن اني القاها بالحراج كان رحت
بس انا ماافضل نوع الجحش جربتها قبل ومافادت
==========================
desprado
محلات الرمايه غاليه خلقة عاد كيف اذا كان الي عندهم مميز

==============================
الطيب
مشالله سعرها حلو بس اكيد عامودين


عموما انا نازل بكره لسوق الخيام وابي انقل لكم كل الي موجود هناك انشالله


تحياتي

[* رمش العين *]

اخوي mor300 السلام عليكم
خذ هالراي من اخوك المجرب خيمه من الخيام الحديثه وهي تجمع بين الجحش والعادي القديم يعني انها قطعه وحده رواقها منها وفيها وارتفاع الرواق زين وسعرها معقول ولايطيرها الهوى وبالنسبه للسعر يجي منها مقاس 3 في 5 وهاذا ب900 ريال ويجي 3 في 3 والحقيقه اني ناسي السعر
وعلشان مانسوي دعايه للمحل راسلني افيدك
وياحبنالنا

[العاذر]

باختصار ،،
شـــــــــــــــــــــــــــــــــــــــــــــــــ ــراء الخيمـــــــــــــــــــــــــــــــــــــــــــــ ـة يعتمد عــــــــــــــلى :
نوعية الكشتات والرحلات التي تقوم بها ..
(((( 1 )))) إذا كـــــــــــانت يوم أو يومين أو تتنقل من مكان إلى مكان بكثرة: خذ لك الخيام

سريعة التركيب
خفيفة ،،
وقيمتها 1300
4 في 5
رواقها منها بارتفاع متر ونصف مما يجعلك تاخذ حريتك في المشي وارتفاع الخيمة مترين
بدون طنابات ولا عمدان داخليه
روووووووووعة للكشتات الخفيفة


(((((((( 2 ))))) إذا كانت أكثر من ثلاث أيام فعليك بالخيام السنعة اللي برواق وطنابات وحبال المعروفة

وأفضل شئ صراحة رأيته ( مصنع بيت الفال ) أشهد بالله أن خيامه ما عليها كلام
قوية والرواق ما ينعكس له أبعاد متناسقة يستحيل اختلافها وهي بصراحة منظرها راائع ( سكبه )
تجده على طريق اللي يوديك لمقبرة النسيم على اليمين ومنصوبة أمامك وتخير والسلالالالام

[MOR300]

أشكر إخواني على ردودهم

رمش العين

مساحتها حلوه
بس الكلام على كم طبقة ؟؟؟
ولا حصلت قريب من السعر هذا بس تجي غاطين وتخر وبرد

العاذر

مريت بيت الفال بس اسعارهم اغلا من الغرابي

[* رمش العين *]

اخوي MOR300 شكراً على مرورك وبالنسبه لتجربتي للخيمه لابرد ولامطرن يخر
وياحبنالنا

[الوانيت1]

للرفع.................////.