عذروبي اللي اعترف به هوى البيد--هذا الذي لاطراف جاشي ينوشـي

[قلب ذيب]

انا اليا من شفت طـرادة الصيـد--على الجيوب محمّليـن العفوشـي
أجرّ مـن بيـن الحنايـا تناهيـد--وأحسّ راسي بالهواجس يدوشـي
ودي بخوتهم ولو راحـوا ابعيـد--انا غرامي في مخاوى الطروشـي
لو لامني بعض الرجال المقاريـد--أهل النميـم مثلّميـن العروشـي
ناسٍ تبدّي في قفا الناس ... وتعيد--تدور من كثـر الهذاريـم بوشـي
وانا احمـد الله ماعليّـه مناقيـد--الجيب جيبي والدراهـم قروشـي
ولا عِلْتْ بالدنيا على زيد وعبيـد--مغنيني الله عن خطـاة الدفوشـي
عذروبي اللي اعترف به هوى البيد--هذا الذي لاطراف جاشي ينوشـي
لا هام غيـري بالبنـي المناهيـد--هيف الخصاير ضافيات الرموشـي
فانا هيامي وسط هـاك الجراهيـد--من حرة عويرض الى ام الحنوشي
مداهلٍ لو هـي وعـور وتناكيـد--ناطى بها سود الحصا والفروشـي
إلاّ انْ حبّه داخـل القلـب ويزيـد--حيثه مساريح الظبا والوحوشـي
اسلى بها لاجيتهـا بـاوّل العيـد--مع رفقةٍ للصيد مثلـي اعطوشـي
اهل المودّه ... صادقين المواعيـد--ما فيهم اللي لاختلفنـا يهوشـي
لو جيت أحسّبها سنيـنٍ سراميـد--وانا عليها آسوق غرّ الجيوشـي
ناخذ عليهـا بالخرامـس تراديـد--ونرمي بها فوق القفوش القفوشي
آثارنـا فـي خدّهـا والمطاريـد--مثل الوشوم الثابته ... والنقوشي
واختامهـا ياجِعْلهـا للرواعـيـد--وعسى عليها ما تكف الرشوشـي
---------- الشاعر خالد الوقيت .

[المزروعي]

بيض الله وجهك يا بو ماجد على هذه القصيده الرائعه .

طالبينك يا بورداد أنك ما تنقلها !! قول تم يابورداد !!!!!!!!!!!

[قلب ذيب]

الله يحييك يابومحمد .
فعلا قصيده لخالد الوقييت معبره . تخليك تروح تشوف الطيور , وهي جزله ومعانيها صادقه
خاصه في قوله
عذروبي اللي اعترف به هوى البيد--هذا الذي لاطراف جاشي ينوشـي
شي عجيب اما قوله
وانا احمـد الله ماعليّـه مناقيـد--الجيب جيبي والدراهـم قروشـي
ولا عِلْتْ بالدنيا على زيد وعبيـد--مغنيني الله عن خطـاة الدفوشـي
فهو قمت التعبير والتصوير عن عدم الحاجه الى الغير !!
كثير من الصقاقير يتبعون الومرا والشيوخ ويعدون انفسهم قوانيص , والادهى بعض سماسرة الطيور , يعدون انفسهم قوانيص !! وساحة المقناص عجايبها كثيره .

[وَسَام!]

كل علومك طيبه يابو ماجد لاخلا ولاعدم!!!!!!!

والبيتين هذي اسمح لي اضيفها لتوقيعي
وانا احمـد الله ماعليّـه مناقيـد--الجيب جيبي والدراهـم قروشـي
ولا عِلْتْ بالدنيا على زيد وعبيـد--مغنيني الله عن خطـاة الدفوشـي


اما ابو رداد ماقالوا النشاما قال تم!

[أبو فهد العيد]

بيض الله وجهك . .وماأظن ابو رداد يرد الطلب.

[جارح العين]

صح لسانك
وبيض الله وجهك

[ابوالجازي]

من روائع الشعر النبطي
تسلم ولا هنت يا قلب ذيب
وصح لسان الشاعر خالد الوقيت انا اشهد انه ابدع

[أبو رداد]

صح لسان الشاعر وسلمت ايدك يابو ماجد
واسمحلي بتغير العنوان فقط ..

[عبدالرحمن الخالدي]

صح لسان الشاعر، وتسلم يمينك ياقلب الذيب .

[أبوإبراهيم1]

صح لسانك ولسان الشاعر

[نبع الدموع]

بيض الله وجهك و صح لسانك و لسان الشاعر

اقرى و اتخيل و اتذكر لين تقلبت علينا المواجع

لا خلا ولا عدم

[قلب ذيب]

تسلمون يا النشاما
وبيض الله وجه ابورداد على الاستجابه لطلب الجماهير !!

[راس الرعيلة]

بارك الله فيك يابو ماجد

القصيده جميله جدا

وأبو صالح شاعر معروف وهو أيضا من الشعراء الذين أثروا خيمة الموروث الشعبي في هذا المنتدى بجزل القصيد...

مرة أخرى أكرر شكري لك يبو ماجد, الأبيات أجبرتنا على الرد وحنا والله من زمان مبطين عن المنتدى وعلومه ...

[دغيم1]

السلام عليكم ورحمة الله وبركاته
يعطيك العافية أخوي
قلب ذيب
وصح لسان أخوي الشاعر
خالد الوقيت
شاعر مكشات

اهل المودّه ... صادقين المواعيـد--ما فيهم اللي لاختلفنـا يهوشـي
قصيدة رائعة وجميلة
والله يلوم اللي يلوم راعي البر والصيد
سلمت يمينك
تقبل تحياتي

[السنع كله]

كل يبكي على ليلاه احد هواه هوى البيد واحد هواه هوى الغيد ولكل من الهوايتين اوقاتهما على نحو مما يذكرعن بركات وابنه :لاصرت بالصمان والقيض حاديك اي حسين الدل واي المطية0ربك كريم ماومر بالتهاليك ولا ومر بافراق صفي الثنية0وان صرت بايام الرخا عند اهليك حبة حسين الدل تسوى المطية000ثمة من اتخذ البران غاية صيفا وشتاء ومع الصيد كل العام وقد قال ابن عباس رضي الله عنهما من اتبع الصيد غفل00وكم وجدنا من انفسنا وزملائنا من غفل عن امره الضرورية بله امورمن يعنونه جدا وعموما لكل مقام مقال وكفى المرء اثما ان يضيع من بعول0وكل شيء زاد عن حده الطبيعي انقلب الى ضده بصرنا الله بعيوبنا ورزقنا العدل في الامر كله

[بـــن خــتروش]

بيض الله وجهك يابوماجد الشاهد الله اني رحت ويا القصيد وعشت اجواء المقناص ابدعت في القصيده وصف لولع القناص ورحلة الصيد مع حكمة الرجل الفاهم والقنوع ولاهي غريبه منك

[راعي بيشة]

عذروبي اللي اعترف به هوى البيد--هذا الذي لاطراف جاشي ينوشـي

صح لسانك يا بن الاجواد

[محمد الفهيد]

بيض الله وجهك على القصيده الطيبه ويسلم راعيها.

[قلب ذيب]

ارحبو بدون عدد
والساعه الطيبه اللي شرفنا الاخ / دغيم 1 - مشرف خيمة الرحلات السياحيه .
ومن الان ابشروا بقصيد المقناص
والاتدرون خلووووووها عند نقلة الطير .

[قلب شاهين]

وانا احمـد الله ماعليّـه مناقيـد--الجيب جيبي والدراهـم قروشـي

صح لسانك ولسان من قالها ،،

أنا أشهد أنها معبره جدا جدا ،،

بيض الله وجهك يابوماجد قصيده ماعليها كلام ،،

بارك الله فيك ،،

تحياتي / قلب شاهين ،،

[المان العرب]

صح السان الشاعر وتسلم يمناك ياقلب ذيب عزالله ماقصرت ماجيب الا طيب

[الفيتو]

بسم الله الرحمن الرحيم
السلام عليكم ورحمة الله وبركاته
صباح الخير ياخوي / قلب ذيب
صح السانك يالشاعر .. وسلم الناقل .. وعذروبه يازينه
من عذروب
مشكور
*
والسلام
الفيتو
الحجاز
20/5/1429هـ

[طيرحوران]

(كثير من الصقاقير يتبعون الأمرا والشيوخ ويعدون انفسهم قوانيص , والادهى بعض سماسرة الطيور , يعدون انفسهم قوانيص !! وساحة المقناص عجايبها كثيره) ,
تسلم يابو ماجد على النقل
وصح لسان الشاعر
وعز الله انها قصيده مافيها كلام وفيها ابيات تردع من يتكلم بأهل الطيور ومقانيصهم .
وانت قلت كلام جزل مثل القصيده وهو الذي بين قوسين
وهذا كلام رجل مايعرف المجاملات والف والدوران بمعنى الكلمه صريح
حيث تجدهم بالمجالس يتكلم ويقول القصص عن مقانيصهم وانت طايره بوهتك من كلامه وبعد ماتسأل عنه قالو هذا خوي مع الأمير الفلاني وقنص معه في تلك البلاد والخ من العلوم الطيبه اما العلوم الشينه مايجيب لها طاري
وحقيقة واحد من الربع صارحني قال اشين مقناص إذا رحت مع شيوخ على حسب كلامه
اما مقانيصنا اللي على نفقتنا فالحمد لله راضين بها كل الرضا
على قولة الشاعر
وانا احمـد الله ماعليّـه مناقيـد--الجيب جيبي والدراهـم قروشـي
ولا عِلْتْ بالدنيا على زيد وعبيـد--مغنيني الله عن خطـاةالدفوشـي

[بو هاشم]

بيض الله وجهك
وصح لسانه

[نبع الدموع]

(كثير من الصقاقير يتبعون الأمرا والشيوخ ويعدون انفسهم قوانيص , والادهى بعض سماسرة الطيور , يعدون انفسهم قوانيص !! وساحة المقناص عجايبها كثيره) ,



اما مقانيصنا اللي على نفقتنا فالحمد لله راضين بها كل الرضا
على قولة الشاعر
وانا احمـد الله ماعليّـه مناقيـد--الجيب جيبي والدراهـم قروشـي

ولا عِلْتْ بالدنيا على زيد وعبيـد--مغنيني الله عن خطـاةالدفوشـي

طير حوران رحم الله والدينك خليتني اضحك و انا متضايق
عز الله ان ذي خلاصة الموضوع ههههههههههههههههه