سؤال لصقاقير مكشات ؟

[قرناس حائل]

بسم الله الرحمن الرحيم

مساكم الله بالخير يالأخوان

صراحة واحد من الزملاء عنده مشكلة في طير له حيث تناقشنا في المشكلة ولم نخرج بحل مرضي

صراحة الطير سبوق حيل حيل لكن

المشكلة في الطير انك ياخذيت برقعه ياخذ شوي يناظر للصيدة حتى تروح وبعدين يطلبها ؟ ولا يتركها تروح

ما شاء الله عليه حتى أن مرة ظلمنا الطير صارت لنا قصة في هدد حبارى اول الموسم لقينا حبارى والهدد لخوينا هذا

-تخبرون الحبارى ربشة- والطير توه شاريه جهل فك عن برقعه ولا طلبها قلنا برقع على طول وهدينا عليها

وصدناها وخلصناها حيه على طول ودرجناها للطير نفسه لتعليمه خذي شوي وهد هدة ما تقول الا ان الطير

معاودي حباري وفعلا بعد ما تقصينا عن الطير طلع الطير مخرج من أحد الأمراء وصايد الحباري كثر

ريشه .
هد بعده بايام على حبارى وصادها تعليق ما شاء الله لكن سوى نفس الحركة ما طلبها الا عقب ماراحت شوي

حتى على الحمام والكراوين يعمل نفس الشي

آمل الافادة

وتقبلوا تحياتي

[سلطان 1]

قرناس حايل ارحب تراحيب المطر 0 يا خوى ما يبا لها شى 0طيركم ساسه قرناس خلوى 0 وهذا طبع الخلوى كله 0 تقبل مرورى 0

[ذراع الذيب]

صراحه فعله عجبني
انا سمعت عن قصه نفس هالقصه
وقالو عنه رياجيل لهم خبره طويله في الطيور انه سبوق والطير واثق من الصيده..........

[قرناس حائل]

قرناس حايل ارحب تراحيب المطر 0 يا خوى ما يبا لها شى 0طيركم ساسه قرناس خلوى 0 وهذا طبع الخلوى كله 0 تقبل مرورى 0
حياك الله اخوي فاروق

يمكن الطير خلوي لكن اللي انا اعرف عن الخلوي انه تلاب ( يعني يخلي اذا هد يهد ببرودة حتى يبعد عن راعيه وعقبن يلحقها) لكن اذا قسم الله وهد الطير هذا ما تمغط الحبارى ولا الكروان ظهره ولا حتى الحمام القوي )

غريب الطبع هذا

تقبل تحياتي

[المان العرب]

كلام راعي فاروق صحيح طير قرناس خلوي

[قرناس حائل]

صراحه فعله عجبني
انا سمعت عن قصه نفس هالقصه
وقالو عنه رياجيل لهم خبره طويله في الطيور انه سبوق والطير واثق من الصيده..........
حياك الله اخوي ذراع الذيب

صراحة الطير ما شاء الله ســــــــــبــــــــــوق بالحيل ( اذا هد )

لكن حاول الرجال بكل الطرق انه يعالج هالوضع ما قدر اللي عنده حل لا يبخل علينا

تقبلوا تحياتي

[alajmi110]

يا مرحبا بك يا قرناس حايل
انا اتوقع ان الطير هذا فيه رهاوة جناح اي .......
ان الطير فيه لياقه كافيه لو راحت صيدته بعيد يلحقها واقفه
اما مسألة ان الطير يبطي ما يهد .... ( قد يكون طبع فا الطير وقد لا يكون )

[جارح العين]

مثل مقالو هذا طبع بالقرناس

[أخو وضحة]

هلا بك يا قرناس حايل
والله ما ظنتي لها علاج لأنه طبع تطبعه الطير
وهذا الطير مثل طيرة أخونا العضو الوهـــــــ قحطان ــــــاج
شيهانه جبليه قرناسه خلويه من سرعتها سماها لحظه لكن نفس المشكله تخلي طريدتها تبعد ثم هدت مثل البرق وأكثر ما تبي طرايدها معليات فوق
لكن انا اقول خله يصن ويقعد يتلفت على الدس لين يعدي اليوم كله ولا واعطيه فنجال اقهوه وشاهي وندقها سوالف دام انه جايبها جايبها وشهو له ادور علاج هذا ما يبيله علاج هذا يبيله انك تكرمه ليل ونهار حافظ على الطير ولا تعطي أحد مجال يلعب لك في الطير خله مثل ماهو صدقني ما راح تلقى مثله وهذي مجرد نصيحه
والله يوفقك ويرزقك

[فداع]

هلا بك يا قرناس حايل



والله ما ظنتي لها علاج لأنه طبع تطبعه الطير
وهذا الطير مثل طيرة أخونا العضو الوهـــــــ قحطان ــــــاج
شيهانه جبليه قرناسه خلويه من سرعتها سماها لحظه لكن نفس المشكله تخلي طريدتها تبعد ثم هدت مثل البرق وأكثر ما تبي طرايدها معليات فوق
لكن انا اقول خله يصن ويقعد يتلفت على الدس لين يعدي اليوم كله ولا واعطيه فنجال اقهوه وشاهي وندقها سوالف دام انه جايبها جايبها وشهو له ادور علاج هذا ما يبيله علاج هذا يبيله انك تكرمه ليل ونهار حافظ على الطير ولا تعطي أحد مجال يلعب لك في الطير خله مثل ماهو صدقني ما راح تلقى مثله وهذي مجرد نصيحه
والله يوفقك ويرزقك
صح لسانك يخووضحه لالالالالالالاتخلي احديلعب بطير

[نبع الدموع]

اخوي قرناس حائل ما شاء الله تبارك الله على طيركم و الله يباركلكم فية

علاجة و انا اخوك فكلة طرايد قريبة و ان تاخر في طلبها برقعة و صومة
و من تالي سوي نفس الحركة فكلة شئ قريب و ان هد زين و ان ما هد رد
برقعة و صومة لين يطيع و يهد على القريب و خلك على ذا الحال و ان صار
يهد زين وقتها غيرله في المسافة حتى ان كان الطير طلع ما يخرب طبعة

و بهالطريقة تعلمة ان ما هد سواء قريب او بعيد ماله علف

[طارق الحربي]

اشوف انها من طيب الطير ماشالله عليه

الطير عارفن نفسه انه يبي يلحقها فيخليها وهذا طبع اتوقع ماتقدر تغيره

[أخو وضحة]

اخوي نبع الدموع انا احترم رايك وعلى عيني وراسي
لكن التجويع ليس علاج وبالعكس يخرب طبع الطير ما عاد يطلب البعيد
وبكذا اذا ابعدت عليه الطريده تركها وحول ينتظر الي عودته عليه وهو القرب وعلى كذا خرب الطير وراح تبيعه بتراب الفلوس
وهذي الطريقه سويناها مع قرناس خلوي حمر يحبه قلبك وبعناه في الرياض بـ 4800 ريال والله قهر بعد ما كان يطلب ويلحق خليناه يطلب ولا عاد يلحق
وفي نهايت كلامي
أقول يا قرناس حايل طالبك لا تلعب في الطير وأكرمه وصدقني راح تلقى نتيجه اذا حس الطير منك الأمان والله يوفقك

[راعي عساف]

السلام عليكم ورحمة الله وبركاته
انا ماشوف الشي هذا عذروب او عيب في الطير اهم شي انه يلحق ويصيد
ورايي من راي الاخوان ان الطير ساسه قرناس هوى ,لكن اذا خذيت برقعه يقلب في السما ,يمكن يكون
هاد عليه عقاب ,وهذا الطبع كان في طير واحد من الربع مايهد الا اذا تاكد ان الجو خالي من العقبان
لانه قد ناشه عقاب والله سلمه.....

[قرناس حائل]

حياكم الله جميعا
اعتقد انه جابه راعي عساف لانني سألت راعي الطير اليوم بعد ما قريت رد راعي عساف يقول الطير اول مافك برقعه يناظر فوق بعدين يهد

فعلا الطير طيب ولا ودك تخرب طبعه

والاخوان ما قصروا كلهم واللي عنده شي لا يبخل علينا

تقبلوا تحياتي

[راعي دهام]

.



مساك الله بالخير يا قرناس حايل ..

كل طير له طبع سبحان الله .. في بعض الطيور اذا هديته ياخذ له روجه
عقبن يلحق وطير من تهده يلحق على طول وطير يبطي على اليد

فـ هذا طبع طيرك واعتقد ما فيه اي مشكله دامه بيبرد قلبي ويلحق الصيده ويصيدها ..

هل جربت وحذفت الطير على الحبارى ؟

عموماً الله يبارك لك فيه ويجعله يونسك زود ..



تحيتي وتقديري ..




.

[قرناس حائل]

حياك الله ياراعي دهام

والله ما عندي منها خبر ما سأ لت راعيه

لكن عموما حذفة الطير على طول خطيرة لأن الطير اذا ماملى عبنه من الصيدة ما راح يصمل عليها

لأن كم من طير صايد وحذفه على حبارى ما يطرد

الله واعلم ان مثل ما قالوا الأخوان الطير ما يهد الا اذا تأكد من الحوم لأنني سألت راعيه يقول اذا فكيت برقعه

على اي صيده اول شي يسويه يناظر فوق

هذا وتقبل تحياتي

[نبع الدموع]

اخوي نبع الدموع انا احترم رايك وعلى عيني وراسي

لكن التجويع ليس علاج وبالعكس يخرب طبع الطير ما عاد يطلب البعيد
وبكذا اذا ابعدت عليه الطريده تركها وحول ينتظر الي عودته عليه وهو القرب وعلى كذا خرب الطير وراح تبيعه بتراب الفلوس
وهذي الطريقه سويناها مع قرناس خلوي حمر يحبه قلبك وبعناه في الرياض بـ 4800 ريال والله قهر بعد ما كان يطلب ويلحق خليناه يطلب ولا عاد يلحق
وفي نهايت كلامي

أقول يا قرناس حايل طالبك لا تلعب في الطير وأكرمه وصدقني راح تلقى نتيجه اذا حس الطير منك الأمان والله يوفقك

يعطيك الف عافية اخوي على اهتمامك لاكن انا كنت واضح و قلت انة بعد ما يجوع الطير و يقبل الطير
الهدد على الصيد القريب يرجع يغيرة المسافات عشان ما يخترب طلع الطير و طبعة