فرحان فهيد الذرفي

[الديعجان]

قال الشاعر فرحان الفهيد الذرفي هذه القصيدة في الشاص ال 2007 واللتي ارجو ان تحوز على رضا القارئ الكريم :


http://www.mekshat.com/vb/images/frames/4_cur.gifhttp://www.mekshat.com/vb/images/frames/4_cul.gif






راكب اللي كن زوله يوم قفا=زول ذيبٍ جاد بالركض الرهاوي
اطلبوه أهل الغنم قبل يتخفا=عاثين بأطيب مراييع الشواوي
بالمواتر والبنادق جوه صفا=مع صحاصيح ٍ مثل بر الصداوي
انذعر يوم اوقدوا به واستخفا=للصياح وللفشق فوقه تعاوي
مايصيبون الهدف قوم ٍ مجفا=رميهم عن حروته ينهج سماوي
من ضحاهم يطردونه لين هفا=بالظلام وناحر الضلع النحاوي
ليا وصفت الجيب وصفي فيه وفا=احتسب له وآصفه وصف الهواوي
سبعةٍ توه من اليابان لفا=ورّده عبداللطيف وجاك ضاوي
كنه اللي في جناح العز رفا=ليا وقف زوله مثل زول النداوي
نادر ٍ ماناش بالمخلب تكفا=يذبح الحبرم والأرنب والكراوي
جاهز ٍ زرع التواير ما تحفا=كل طبلونه بالأصفار متساوي
يشتغل عندك تحسب إنه مطفا=ماطلع حسه مثل وارد عراوي
اقطم الكبوت والخشم المضفا=والركون عن الهوا فيها ملاوي
وليا اعترض كنه ولد شيخ ٍ معفا=كاشخ ٍ بالثوب والبشت الحساوي
وكن خطه دم مصطور ٍ توفا=ناشته شلفا شليويح العطاوي
في نهار الحرب والموت المصفا=يوم تنخاهم ضحى الهيجا مضاوي
وإن نطحته قمت بالوجه اتشفا=شفت به فرق ٍ عن السته قصاوي
الشنب صناعته حفوه حفا=مثل شنب هتلر بأيام البلاوي
والعيون اللي تزف النور زفا=عن ظلام الليل حطو له تقاوي
سابقه منصاك حايل لاتلفا=واصف ٍ لك وانت بالديرة قطاوي
نصّه اللي بالوفا والطيب كفا=مقصدي ممدوح يازبن الجلاوي
حي هاك الوجه يانعم الملفا=اشهد إن الطيب له عنده حراوي
ينطحك بالعود والبن المدفا=في دلال ٍ ضوهن دايم سناوي
يابعد عفن ٍ على الناس يتجفا=ياعزيز النفس يالشهم الحياوي
له سلامي عد مانو ٍ ترفا=هو ويا اخوانه بعيدين الهقاوي
ماسكين ٍ درب عودٍ ماتسفا=غازي المعروف بالطيب الصخاوي
جعل مسكانه مع الرسل الأعفا=ياعساه في جنة الفردوس ياوي






http://www.mekshat.com/vb/images/frames/4_cdr.gifhttp://www.mekshat.com/vb/images/frames/4_cdl.gifوالقصيده اطول ذلك ولكن اوردت منها وصف الجيب الذي يهتم به هذا المنتدى الشامخ

[مكـiiiـات]

الله يعطيك العافية على النقل
وصح لسان أبو فيهد على القصيدة الرائعة جدا
والله مبدع أبو فهيد .

[الديعجان]

مكشات اشكرك على المرور الكريم

[مدرب الطير]

الله يرزقني ويرزقك ويرزق جميع القلوب اللي تهوى الشاص

[الديعجان]

الله يرزقني ويرزقك ويرزق جميع القلوب اللي تهوى الشاص
آمين الله يسمع منك واشكر لك مرورك الكريم

[جبل حائل]

http://www.mekshat.com/pix/upload02/images72/mk6440_tslamm21.gif

[الديعجان]

جبل حايل اشكرك على المرور الطيب

[أبو فهد العيد]

تسلم يمينك وصح لسان الشاعر

[الديعجان]

ولد حنيظل اشكرك على المرور الطيب

[ابن بدران]

صح لسان الشاعر وسلم بنان الناقل
بيض الله وجهك على هالنقل الجزل
إن كان ماهنا عليك كلافة نبي القصيدة كاملة لاهنت

[الديعجان]

هلا ابن بدران ومرورك شرف لي واوردت من القصيده وصف الجيب الشاص 2007 وهو مايهتم به هذا المنتدى واكتب باقي القصيده بناء على طلبك وتقبل تحياتي

لابةٍ عند القبايل له ملفا=طيبهم ماهو غريب ولا دناوي
بالكرم يوم ان سرحان يتهفا=مشبعين الذيب يوم الذيب عاوي
قصة ٍ عند العرب ماتنتخفا=مثبت ٍ تاريخها مع كل راوي
ولو اعدد كان جف الحبر جفا=مااحصي افعال الرجال اهل العزاوي
انتهت لو ان لي بالمدح شفا=وختمها عنبر ومسك وعود جاوي

وتقبل تحيات اخوك الديعجان

[ابن بدران]

الله يزيدك شرف أخوي ويرفع قدرك

بيض الله وجهك
ونعم بالناقل والشاعر والممدوح

[الضاري]

صح لسان الشاعر
وبيض الله وجهك أخي الديعجان
تحياتي

[مكـiiiـات]

شكرا للجميع من قرأ ومن رد
للعلم هذه القصيدة الرائعة للشاعر الكبير أمير الذرفان من شمر قالها في مدح الشيخ الشاب ممدوح بن غازي المهوس رحم الله والده الذي اشتهر بالكرم الحقيقي ليس الكرم التمثيلي فعندما توفي رحمه الله بكته العديد من الأسر الفقيرة التي كان يعولها رحمه الله واسكنه فسيح جناته .
ولكن من عقّب ما مات .
وألف نعم بممدوح ويستاهل المدح .

[الديعجان]

اشكر الجميع على الرد والمرور الطيب واخي مكشات اشكرك على التوضيح والممدوح يرجع للعليان من الدغيرات من شمر

[شاص2006]

يعطيك العافيه اخوي الد يعجان وصح لسان الشاعر,,,,,,,,,,,,,,,,,,,,

[الخيال2006]

تسلم اخوي الديعجان على نقل هذه القصيدة الرائعه فعلا

وبارك الله فيك

وعطنا من جديدك يالغالي

[عبدالرحمن الخالدي]

صح لسانك ولسان القايل وبيض الله وجيهكم .

[الديعجان]

شكرا للجميع على المرور الطيب وبيض الله وجيهكم