للمتزوجين بس بعد الكشتة .. العزوبية بالملحق

[حفرلوجيا]

سلام يالربع
صاحب لي يوم الاربعاء الماضي طلب مني أوصله شلته مجتمعين يبون يكشتون للصمان .. سألني ليش ماتخاوينا ؟ اعتذرت وقلت مشغول .. والله ( يسمح ) دربك وأشوفك إن شاء الله يوم السبت .
مجرد مانطقت ( السبت ) تكهرب الرجال وقال : تراك ضغطت على الجرح اللي يكدرني وهو يوم السبت وقت الربيع والكشتات ! .. كيف ؟!
أقول لك .. تعرف أنا موظف مايحصل الكشتة إلا نهاية الاسبوع .. ويوم السبت اذا رجعت من البر تقلبه علي ( أم العيال ) مرات نكد وأحيانا سعد! .. مازلت لم أفهم ؟! .. قال خلني أبين لك موقفين بعد رحلتين مختلفتين تشوف التناقض على كيف كيفك !! .. سم .. أرسل ياصاحب .
قال : مرة رجعت يوم جمعة كاشت مع ربعي بالنفود ثلاث أيام .. وحصل تأخرنا في أحد الهجر وحنا بطريق العودة .. نصيت – الله يكرم من يقرأ – دورات مياة بإستراحة وأخذت دش وغيرت ملابسي ورجعت ( مهندم ) ماكأني كاشت بعد ماكنت اغبر .. يعني صرت ألق وراحت روايح الطبخ والنار اللي يتضايقون منها الربع بالديرة .. وصلت البيت متأخر وقابلتني ( المعزبة ) تسألني تبي شيء ؟! :love2:..قلت : لا .. مرهق وودي أنام !:(.. صحيت متأخر حول الظهر ماداومت .. سألت المعزبة وين القهوة والقدوع .. قالت بنفس شينة : اصبر خل أخلص من غسيل الملابس ! .. طيب يبطي الغداء ؟!.. قالت : ماطبخت قم هات غداء من المطعم ! :mad:إنا لله وإنا إليه راجعون شف وشلون رغم اني وصلت البيت مهندم و( هادي ) ..:cool:
عاد أنا قاطعته وقلت : بس عرفنا ليش النكد .. عطنا السبت الثاني اللي تقول متناقض .
قال : لا هذا غير .. كنت رايح للصمان خميس وجمعة وكانوا بعض عيالي مصاخين لكن الشلة ملزمين :confused: وحصل بكشتتنا كان مراحنا الليلة الأخيرة حول واحد زقرتي وعيار من المعارف ( راعي حلال ) وعنده نياق بالحاصبيات .. وصار يلزم علينا نشرب من حليبهن حتى ( تطقطق ضلوعنا ) .. كل وقت وكل ساعة جايب ( الطياس ) يقول ترى حليبها فياقرا ;).. ماأطول عليك رجعت ليلة السبت ونزلوني الشلة متأخر وكنت رغم اني ( مصيف ) لكن مستاسع صدري ومشتهي قهوة وقدوع ;).. طلبتها من ( أم العيال) بعد ماتطمنت ان العيال المصاخين متعافين وراقدين .. واسفهليت مع ام العيال وتطمنت على وضعهم وعطيتها علومي .. ونمت وصحيت بدري ومتعافي ( وعروق راسي تطقطق ) بعد مازهمتني أم العيال مجهزة مصابيب وحنيني :good: وتقول إذا أنت مصيف خذها معك تفطر بالعمل .. وهذا اللي صار .. ورجعت بعد الظهر واجتمعت مع العيال على الغداء اللي صاير أشكال وألوان و...
قاطعت صاحبي وقلت : ( سبتك ) الأول يختلف عن سبتك هذا .. هنا راعيت مشاعر أم العيال ولهفتها وصرت حنون بسؤالك عن عيالك وعطيتها علومك وطمنتها على وضعك .. يعني احترام مغلف بتقدير .. أما السبت الأول يا( مهندم ) ماشربت حليب نياق وعند وصولك طنشت ( السؤال ) عن أم العيال ولا طرى عليك إلا النوم وتركت الضعيفة ..
وتبي الحق إذا ودك ( سبوتك ) تصير سعد بعيدة عن النكد .. فـ ( لأهلك عليك حق ) .. قبل تكشت لازم تصير ظروف عيالك مواتية ومتطمن عليهم .. وإذا رجعت خلهم هم أول همك . ولا يغريك دايما فتنة الكشتة حتى لو ربعك حسافة ..
-------- وإذا حصل ( كرع ) بحليب النياق حتى تطقطق ضلوعك وعروق راسك !! .. لكن صاحبي ( المكشاتي ) قبل وصولنا شلته طرح علي اقتراح غريب يقول : ليت المكشاتيين يقتنعون نشوف ثلاث مواقع متفرقة نحط بها رعيان ( ونجمع قطة ) نشتري خلفات .. هالمواقع هي 1- بعد التنهاة وانت رايح للصمان .. 2- وراء أم رقيبة وأنت رايح للحفر .. 3- حول قرية العليا أو معرج السوبان من شرق .... يعني اللي يبي يكشت من ( مكشات ) للصمان ( بس ) يصير ( محاصر ) بحليب النياق بالداخل والطالع ..هاه ..:D
اقول انزل وصلنا ربعك .. مع السلامة .. ولاتنسى حليب النياق .. يا .. ( مهندم )
وسلامتكم

[القماري]

سلمت يامبدع مكشات (حفرلوجيا) بس وأنا خوك ساعات حتى لو تشرب طن من حليب لنياق مايفيدك بشي ، تعب المشوار والشيل والحط يكسر الظهر ، أمس وأول أمس كنت بالبر واليوم السبت (الله وكيلك) زين إلي قدرت أكتب هالحرفين بالكيبورد ( جسمي كله مكسر من المندي وبلاويه )
أعتقد التعطر والتهندم أحلى من فياجرتك :D

[السمح]

والله إنك تغيص على هالحكي اللي يدور من داخل السيارة إذا صاروا الربع راجعين لبيوتهم :D
معروفة يابوسليمان جاي من البر متعطر ومتزين :confused: الله يكفينا الشر ... البر ما فيه عطر وسباحة ... يجي الواحد من البر ( أشعث أغبر ) منين جاي ؟؟
على كل التمشي والتفرج على خباري الحصبيات وحسنا ورديفتها ودليل ومويضي .. وش هالأسامي ( زين اللي ما حولي أحد يشوف هالحكي .. كان علوم :D ) أقول إن الطلعة بحد ذاتها أخوي حفرلوجيا ترد الروح مثل حليب النياق ، أو أحسن ..
وعلشان اللي يتقطعون يبي يشوفون رياض وخباري الصمان ولا يقدرون يغادرون الرياض ;) أهديهم هذه الصورة يوم الخميس الماضي شرقي بربك أوحيمد :

http://www.mekshat.com/pix/upload/images3/100_0006_2.jpg

أحلى تحية

[نفل]

اخوي حفرلوجيا

من وين تجيب هالسوالف تشخيص وعطر وحليب خلفات :D

بالنسبة للهندام ما ودك الواحد اذا رجع من الكشته يكون متسبح ومهندم ومتعطر لانة بتجي على راسه
بتقول اكيد شايفلك شوفه والا معقولة واحد جاي من البر وهو على الحالة من النظافة ؟ :D

اما حليب الخلفات بصراحة اذا كانت الطلعة بعيدة ومدة الرحلة كم يوم ما والله ما ينفع حتى لو شربت سطل حليب خلفات خاصة اذا كان هو الدريول :D :D :D لانه بصراحة اخر رحلة لي للصمان وانا راجع انعس وانا اسوق وما ينبهن الا عيون القطاوة تقل صوت شروخة وعساك سالم

اخوي المشرف السمح الصورة جميلة جدا وزينة الروضة وهي توها معشبة ياله من فضلك تنتشي ريحتها قبل ما تاصلها ويازين الامراح حولها والروائح تفوح من تمسي الين تصبح


مع تحيات اخوكم نفل

[عروان]

ههههههههههه


يا زين سوالفك يا حفرلوجيا

صراحة حنا مقصرين بعض الشي في حق الاهل.

لان عطلة نهاية الاسبوع ينتظرونها بشفق. ولا جا يوم الاربعاء تلطمهم بقولت انا كاشت.

لاكن الجيد اللي يعدل المزاج أول ما ياصل لاهله. خصوصا اذا هو شارب حليب خلفات. :;

[تالي الاولين*]

.


ماقول الى الحمدلله اكشت على كيفي

ماوراي لا ولد ولاتلد :D :D



تحياتي اخي حفرلوجيا


.

[نقا هشال]

اخوي حفرلوجيا

يعطيك العافيه ونصايحك طيبه

بس الحليب وين نلقاه نادراً تلقى الراعي اللي يعطيك الحليب

وبعدين انا خابر الحليب يهررررررررررر البطن على كذا بتصير المصيبه مصيبتين كخخخخخخخخ!!!!!!!!

تراي امزح وحليب النياق ولا احلى منه واحسن من الفياقرا بعد......

[نقا هشال]

مشرفنا

السمح

وشذا الزين ماشاء الله تبارك الله

صوره من جد تفتح النفس وكشتتٍ في هاالمحل تبري العله....

[نجمة سهيل]

رائع ياحفرلوجيا :D

والله هذا الي يحصل مع اغلب الي اكون كاشت معهم:D الا القليل منهم:) ،

طيب الحين هذا بالنسبه لالي متزوجين ، طيب والي ماتزوجوا :rolleyes: ؟؟

عندك الله يسلمك الوالده تلقاها تشيل هم طلعتك للكشته والا للصيد ، وماترتاح وماتطمن الا لما تعرف وين ارض ولدها الله يجزى والدينا الجنه والناس اجمعين ،

لكن عندي الحل الي يخليهم مايتضايقون ولايزعلون اذا طريت لهم الروحه ،

يعني اذا كنت بتكشت بعد بكره ، اجلس معهم بكره وسولف لك شوي ، واذا جا عقب الاخير بساعه ،

اطلع بهم ومشهم شوي وتعش معهم ورجعهم:D واذا رجعتهم للبيت تلقاك اول ماتوقف ، يقولون الله يعافيك

ماقصرت وسعت صدورنا ـ عاد انت دخل موترك واجلس معهم وطر لهم قل والله يمكن اكشت بكره:D

وراح تلقى الجواب السنع :D ويقولك المثل اسأل مجرب ولاتسأل طبيب:D

[حفرلوجيا]

أخوي القماري ..شكرا.. يارجال ماحنا ( ناحتينك ) ضارب من ها( التيوس ) بالبر .. وتقول مابي حيل .. علينا ؟;) .. وأكيد ضارب قبلها من السمك بالديرة يالشرقاوي .. أقول ( عين خير ) .
أخوي السمح ..شكرا.. تدري ان اللي خلاني أعجل بهالرد وشو .. أبي أعلن انهزامي أمام هالصورة .. والله يهني اللي يلقطونهاهالأيام من موقعها.. حتى لو مالقو حليب نياق :p
أخوي نفل ..شكرا.. يعني ( نيدك ) خايف من ( الشك ).. يعني واثق انك ما( تعلث ) ياراعي ( الشروخ ):D
أخوي عروان .. شكرا .. أحلى يا( جيد ) ;) .. وصدقت كثير من المرات نكون مقصرين في حق العايلة.
أخوي تالي الأولين ..شكرا .. وش مدخلك .. ماقلنا لك خلك بالملحق .. وذاكر هالسنة على شان تجيب مجموع يدخلك الجامعة ( توك على هالعلوم )..:mad: الله يحفظ لك شيبانك.. ويخليك لعين ترجيك.
أخوي نقا هشال .. شكرا .. تقول حليب النياق ولا أحسن منه (شكلك مسنع أمورك ياهشال ):rolleyes:.. الله يعطيك العافية..
أخوي نجمة سهيل .. شكرا .. أفكارك تدل على انك ( حيال ) .. وعليه أظن ( جوابك) سنع بكل الأحوال :good: ( لاإله الا الله ) .

[صقر]

أخي حفرلوجيا (ابو سليمان)

رائع أنت بأفكارك وأطروحاتك ونصائحك الغير مباشرة....

وكلامك صحيح (إن لأهلك عليك حق) وأنا اعتقد ان الانسان باستطاعته التوفيق في امورة (على الاقل كلمة طيبة) فالكلمة الطيبة صدقة...

وجزاك الله خير واعتقد المقصود تم فهمه...

أخي ابو سليمان واصل مسلسل النصائح فنحن نشد من أزرك وندفعك بكل ما أوتينا من قوة ولعل هذه الكلمات تكون سببا في سعادة أسرة ... أو تغيير البعض منا لطريقته في التعامل مع أهله...

وشكرا لك وبارك الله فيك.....

[ابو شكاع]

تسسسسسسسسسسسسلم على هالسالفة

لكن وانا اخوك

ومع احترامي لخويك المبجل ...................

انا ضد اخراج المشاكل البيتية خارج اسوارة

مهما كانت االاسباب

واذا كان ولا بد

يكون لاقرب قريب ..............................

ويكون شخص واحد وبسسسسسسسسس

وتسلم ................... وهلابك ................. ولاهنت

[الطبيب]

ان دلعنا الحيم بلشنا

وان زلبناهن تورطنا

والمشكله مردنا لهن (خصوصا بعد حليب الخلفات المنعش)

بس تدري

عز الله انهن لهن الاجر والثواب انهن متحملات مراكظنا بها البران

خصوصا وقت المقانيص

مجهود تشكر عليه ابو سليمان

وفعلا والله ياما مشينا والواحد قلبه معلق بالبيت انكان واحد من الورعان مريض والا فيه شغل ما خلصته ولا ودك تطوف فرصة جمعة خوياك

والا اذا صرت مثلي معلق رجل دايم ( ما عندي موتر دفرنشين )

الله يجيب الخير بس.......

لله درك

قلبت المواجع

ايه على فكره.........

تروني ماني شايب يوم اقول ورعان

بس التفكير تفكير شايب

هذا والله اعلم

والسلام ختام