اسـتفسار : بـشأن الـبهارات و مـكوناتـه

[سكّين]

السلام عليكم ورحمة الله وبركاته

وش افضل مكوناات البهارات [ كبسة ]

وشكرا مقدما

[عتيق]

وعليكم السلام ورحمة الله وبركاته
بالنسبة للبهارات كلن ورغبته

فيه ناس ما تحب تكثرها

وفيه ناس تحب تزود البهارات شوي

وفيه ناس يحبونها على شكلها بدون طحن

وفيه ناس تطحنها...............

اما الغالب في البهارات فهو الله يسلمك:

كمون
كسبره(ناشفه)
ليمون
ورق غار
كركم
هيل
دارسين
قرنفل
فلفل
طماطم ناشفه
بصل ناشف
واذا اردتها للحمه تضيف عليها بزار النفووووود شيء عجيب بصراحه


بالتوفيق

[سكّين]

مشكور اخوي عتيق

لكن عندي بعض الاسئلة لو تسمح لي



طماطم ناشفه
بصل ناشف


من وين احصل هاللي تقول واذا اسويه انا كيف أسويه




بزار النفووووود


وشو بزار النفود ، وش مكوناته

[يحيي بن حمد]

لايرخص عليك الليمون الاسود والدارسين

[عتيق]

البصل والطماطم بأمكانتك ان تنشفهم ( تجففهم )عندك في البيت سهله وعاديه

والا تلاقيهم عند العطارين..........

وكذلك بزار النفود ( بزار يجي على شكل ازهار بنفسجيه يعطي نكهه مميزه للحم )تلاقيه عند العطارين.........

[أبوعمار]

يا أخوي فيه اقتراح جيد هو انك تزين البهارات على ذوقك تروح لاحد العطارين تعرفه وسو الخلطه الي تعجبك وجربها وعلى فكره هاذي الحركه علمنيها شايب

[ابوعبدالهادي]

كمون - فلفل اسود- قرفة- ليمون ناشف-كزبرة - فلفل حار طازج

[الخادم]

اخوي
كل لة طبخة و احسن شئ عندي
بدون بهارات لانها تضيع طعمة

[الخبوبي]

فيه طريقه واحد علمنيها ,, بس مابعد جربتها

يقول خذلك ربع كيلو بهارات مشكله من أفضل أربع محلات عطاره

ثم أخلطهن مع بعض ,, يطلع عندك كيلو بهارات روعه

ممكن واحد من الشقرديه يجربها ويعطينا العلم


تحياتي للجميع

[جنون الليل]

السلام عليكم ورحمة الله وبركاته
أنا بهاراتي شكلين نوع يميل للون الأصفر ونوع يكون يميل للأسود

لكن هناك طبخات بهارتها معروفة مثل الفول والجريش لازم كمون

والشوي أحط فيه من كل شيء بس رشة خفيفة ما يغطي على نكهة اللحم الأصلية

وكشنة الجريش دايم أسويها يا بالليمون الأسود أو الصلصة الحمرااااااااااااااء وبس

طبعاً مع الزيت والسمن البري كل ٍ حسب مزاجه

وبكتب لكم كيف أخلطها وكيف أجهزها بالبيت
أذكروا الله مشاء الله تبارك الله

[جنون الليل]

اول شي حددالبهارات اللي تفضلها واللون اللي تفضل يكون عليه البهارات

فيه ناس تحب لونها يميل للسواد أكثر
وناس لللأصفر اكثر

على العموم أنا بقولكم الطريقة إذا ما تبي البهارات تميل للأسود000000000

وهي أنا أقيس بالطاحونة صراحة بس حط في بالك الأشياء اللي حجمها كبير مثل اللومي والدارسين ((القرفة)) والزنجبيل هذولي لازم يكونون مدقوقين دق ناعم قبل عملية الطحن عشان يضبظ القياس


بعدين اذا تبي اللون موزون لا أسود ولاأصفر حط من البهارات اللي لونها فاتح

ضعف كمية البهارات اللي لونها غامق

وأنا بهاراتي تحتوي على كل البهارات الموجودة في السوق

بس أنا اللي اسويها بنفسي ---------

يعني --------------كمون --كزبرة --زنجبيل --هيل--فلفل أسود --مسمار((قرنفل أو عويدي))

قرفة((دارسين))--ليمون أسود --

الغوامق أحط منهم على كاس والفواتح على كاسين هذا مثال
المهم إذا خلصت منقية البهارات وطاحنتها أنخلها بالمنخل الناعم عشان ما يصير فيها شيء خشن

وأضيف عليها أثاء النخل شوية كاري حسب رغبتك وشوية كركم وترى الكركم في نوع أصلي ونوع مو ذاك الزود
وحتى الكمون فيه نوع ممتاز ونوع موذاك الزود

المهم عاد إذا خلصت من الطحن ونخلتها

أحفظه في كيس وأحط الكيس داخل علبة الحليب مثلاً

وأحطه بالفريزر

بس نصيحة اللي يضيفون البهارات المطحونة للرز غلط هذا يغير لونه ما يخليه أبيض ناصع ولا أحمر ناقع إذا كان أحمر

لذلك حط البهارت صاحية حب مو مطحونة وشيلها وأنت تغرف الرز

وإذا بغيت الرز يطلع له ريحة تجنن من البهارات
إذا خلصت من الكشنة أفتح قدر الرز وحط الكشنة فوق الرز بعد ما ينشف في الوسط وغط القدر بقصدير
ولو ما تحب الكشنة أو ما عندك بصل هذاك اليوم رش بهارات فوق الرز بعد ما ينشف مرة وغطه بعد بقصدير وهو بيسحب الريحة من البهارات ويطلع جنان
والقصدير بعد يخلي الرز أحسن وحبته أطول

بس نصيحة ---------

لازم يكون عندك كل نوع لحاله في علبة بعد إحتياط خاصة

الكمون- والفلفل الأسود -والكزبرة ---والليمون الأسود ---والقرفة
أما الباقي الهيل والمسمار والزنجبيل هذولي دائماً موجودات في المطبخ مطحونات وجاهزات أكيد

[عبد المجيد]

أخوي قائد
أنا بالنسبة لي ما أفضل أحد أي نوع من البهارات المطحونه أبداً لسبب انها تغير نكة الرز وما تخليه صافي ونثري
أنا احط مع الكبسة :
ليمون أسود
فلفل أسود وفيه ناس تسميه عويدي
دارسين
حب هيل
ورشة ثوم مطحون
ورق غار
طبعا كلها تنحط عدله مو مطحونه
علشان يطلع الطعم مزبوط وما يروح الطعم كله توابل
وإذا كانوا الشباب يفظلون البهرات الكثيره فأحيانا أعطيهم وجه :) وأطلع اللحم وأحمسه لحاله على صاجه ولا أسحب عليهم