لاهل صيد الضبان

[مكشات عنيزه]

السلام عليكم ورحمة الله وبركاته


يالله حي الشباب كلهم


تعرفون الآن وقت صيد الضبان وله عشاقه وهم كثر


وافتخر ان اكون من عشاق هذا الزاحف من صيده واكله


وبنظري ان افضل انواع البنادق لصيد الضب هي الخرازه


وتكثر انواع الرصاص للخرازه


وبنظري ان افضل انواع الرصاص هو الستنقر لقوته


لكن هل هو موجود الان واذا كان موجود ؟
هل يستطيع احد يدلني على مكانه بالقصيم؟


الصراحه تعبت وانا اكتب باللغه العربيه خل نقلبه عاميه


الصراحه انا منول كنت ما استعمل الا ستنقر ولي 3 سنين ما حصلته
وياليت احد يدلن على واحد يبيعه بالقصيم ويراسلن بالخاص


ثاني شي ياشباب الاسبوع الي راح كنت طالع لمكان ماشاء الله كله ضبان
(واحتفظ بخصوصية اسم هذا المكان)
للحفاظ على بيئة الضب وتكاثره في هذه المنطقه ووعد من بعد 3 سنين
اذا كنا من الحيين ان شاءالله اقولكم اسم هذا المكان اذا ذكرتون


زبدة الموضوع اشتريت نوعين من الرصاص واحد متفجر والثاني عادي


ومن تجربتي للاثنين المتفجر اقل مرتبة من الستنقر لكن ليس بالبعيد
وماشاء الله قوي وارتحت معه راحه كامله
لكن ما استغني عن الاستنقر لقوته بالمسافات البعيده جدا


وراح انزل صور له ان شاء الله


ولكن بهذي الطلعه الصراحه اخر الوقت وقفت الصيد واكتفيت
بالملاحق للضبان واصيده حيه
لان الصراحه ما ودي استاثم تقولون وشلون انا اقولكم وشلون
الرصاص العادي اذا ما جبته بالراس فعرف ان الضب راح يموت بجحره وهذا حرام


لان الضب البعيد مره ما فيه احد يجزم انه راح يجيبه بالراس
لكن المتفجر حتى لو جت بالصدر او البطن راح يموت الضب لتفجر الرصاص
لكن الرصاص العادي يشق بطنه ويدخل الضب بجحره ويموت داخل جحره
وهذا والله حراااااااااااام


فنصيحتي لكل صياد انه ما يستخدم الرصاص العادي مهما كان الامر


هذا الي عندي ودي افيدكم من تجربتي وتفيدوني

[الحمض]

الضبان في كل محل يا اخي ما يحتاج تعلمنا مكانها وشكرا لك

[ابو سفيان]

ايييييييييييه ما بتعلمنا على المحل واحنا ما بنعلمك على مكان الرصاص الاستنقرههههههههههههههههه امزح
في رصاص نزل والله ممتاز جدا لضب وتفجيرة قوي ويبعد مسفه بعيده جدا بعد الاستنقر في الافضليه
اتحفض بالاجابه لحفض النوع من الانقطاع واوعدك ان بعد مقناص الضبان اقلك وشهو النوع
الله يصلحك يخوي خلاص عندك ضبان مابتعلم احد لاتقل اناعندي ضبان ومناي بمعلمكم اصلا لا تجيب طاري الضبان في الموضوع بعض العلوم تق لراعيها اتركني

[EFI.4500]

هلا براعي الحمراء العنزاوي
انا اخبر محل عنده ستنقر ورخيص المحل وقنوع
لاكن احتفظ به علشان مايقضن الفشق عن هههههههههههههههههههههههه
شف ان علمت كل الناس مكان هالضبان
انا اجيبلك الفشق الى عند بابكم وهديه بعد
وتراي جاااااااااااااد
طبعا بعد الفحص على هالمضبه
وكلام ابوسفيان عين العقل

[مكشات عنيزه]

السلام عليكم

ياشباب بعد ردودكم الاسنتقر خلاص ما ابيه دامه بمنه

والي يقول لازم تخبرنا المكان ونخبرك مكان الاستنقر
تراي كل ثلاث اسابيع اطلع لهذا المكان
وما اصيد الا من 8 الى 10 ضبان بس حاجتي
وارجع وبطريق الرجوع القى اكثر من الي قبل واخليه لاني اكتفيت

وكل مقصدي من الصيد هو عشان اذا رجعت تعشيت انا والشباب
والوعد بعد 3 اسابيع

فلو قلت هذا المكان والكل بدا يروحله هل تتوقعون اني ما اقدر كل 3 اسابيع
اصيد عشر ضبان
بالعكس لو ابدا اروح كل اسبوع اقدر اجيب 10 ضبان

لكن انا مقصدي اني ما ابي ان الضب ينقرض
وبعد 5 سنين نقول كان فيه ضب

وانا اخطيت يوم قلت ان فيه مكان مليان
لكن ودي افرحكم معي لاني لي 3 سنين ماعمري
شفت ارض به ضبان بعدد كبير

اخوي الحمض
ودي والله اني اشوف الضب بكل مكان
لكن هذا زمان

ابوسفيان
لو انا شايف سياره وحده بهذا المكان
او اني اصيد بإسراف
كان حطيت اعلان بالمنتدى عن هذا المكان
لان اذا ماخلص الضب بالارض هذي السنه راح يخلص السنه الجايه
فأستفيد وافيد ربعي الثانين اعضاء مكشات
لكن قصدي بالتحفظ كتبته بالاعلى

اخوي Efi.4500

لو مافيه بديل قريب من الاستنقر اقول معك حقا
ومثل ما قلتلك انا ارتحت مع نوع راحه كامله
لكن تعودت على الاستنقر
ولا فيه مانع اتعود على نوع ثاني
ولو المضبات حال الفشق كل سنه تطلع مضبه كان خبرت عن المكان
لان السنه الجايه تطلع مظبه جديده
لكن شف الوضع الان اغلب الاماكن الموجود فيها الضب
انقرض والضبان الي تشوفه تعد باصابع يد وحده
والناس ماتصدق خبر الا وتروح تقضي على المكان كله
لو الناس تصيد على قده واذا حس نفسه ما يحتاج ما راح
كان كل المضبات مليانه ضبان ولا راح تخلص
لكن المشكله انا اعرف ناس يروحون يصودونه وباسراف
وبالنهايه يعطي الصيد واحد ثاني يقول اني ما اكله
طيب ليه تصيده او ليه تصيد باسراف
وفيه اكثر من مكان لا انا ولا انت يعرفه لكن غيرنا يعرفه ويحتفظ بالمكان
لان إن نشر اسمه السنه الجايه ما يروح لمه لانه خلصن


ما ابي اطول بالكلام لان الصراحه انجرحت يوم قريت الردود
لكن ودي اخبركم كل مقصدي عشان
ما تفهمونن اني ودي استولي على هذي المنطقه وحدي
ولو كنت من المسرفين طلعت 3 طلعات ومليت الفريزر وبعده خبرتكم

[أبوشروق]

أبد لا تعلم احد وماعليك من اللي يرد..... للمحافظــــــــــــــة على الضبـــــــــــــــان ,,,,,

[مكشات عنيزه]

تسلم والله ابوشروق على هذا الرد الرائع
وهذا يدل على اهتمامك بالبيئة
اكثر من تلبية هواياتك

وياليت الي مثلك كثر
كان استمرينا بالصيد من غير انقطاع وانقراض

والى الامااااام ابوشروق على هذا المبدأ

[ابو سفيان]

اول شي احيك على اخلاقك العاليه ثانيا يخوي انا ماكل الضب على شان ترتاح وثالثا ماحد تمنن عليك انت جبت المن على نفسك ومن ناحية الضبان والله الذي لا إلاه إلا هو اعرف محلات ضبان ورحتها العام وبرحلها ان شاء الله قريب يشيب شعر راسك من كثرتها لكن في مقطعه يعني لازم معك بنزين احتياطي في جوالين لانه مشواااااااااااااااااااااااااااااااار لكن ما اكل الضب معنا ناس اكيله درجه اولا لكن الله يوفقك

[نادر العش]

السلام عليكم ورحمه الله وبركاته

اول شي يا مكشات عنيزه الاستنقر متوفر بكثره عندنا بالطايف

وثاني شي لا تقول (واحتفظ بخصوصية اسم هذا المكان)

لاننا كلنا نعرف محلات الضبان واله لو تجيني لاوديك مكان ماعمرك رحت له

وانا من الناس اللي ما احب لحم الضب بس اروح مع الشباب يعني مضيعه وقت

[مكشات عنيزه]

السلام عليكم

انا اقول لا نطول الموضوع ونعطيه اكثر من حقه
مع ان الموضوع الاصلي غض الطرف عنه

انا فاهم شي وانتم فاهمين شي ثاني
انتم لكم وجهة نظر وانا لي وجهة نظر
ومن واجبي احترم وجهات نظركم

على العموم قد اكون على صواب او على خطأ

والكل ينظر لها بوجهت نظره وقناعته

البعض ايدن والبعض الاخر عارضن

وهذا لايهم بقدر اهتمامي هل انا نبذت من بعض الاشخاص او لا؟

ان كنت مخطي على احد فارجوا انه يسامحني
وهذا هو المطلوب الان

اشكر كل من ساهم بالرد

والسلام عليكم ورحمة الله وبركاته

[أبوقزاز]

كفوووووووووو

والله ان منتديات مكشات تفخر بعضو زيك والله والنعم فيك

وانا قريت ردودكم جميع عشان كذاا اعحبتني ولاانا ماعرف عن هالرصاص شي

والله يجازيك بالخير

وابد ماعليك لاتعلم احد واكثر اهل القنص والصيد هم الي يكتشفون الاماكن ومايعلمون احد بهااا

مثلان فيه واحد يعرف مكااااان بالبر يتجمع فيه عدد كثير من القطااا يروح ويعلم اخوياه
من بكره مهب لاقي ولاقطات بالمكاااااان عشان كذااا احتفض بالمكان لنفسك

واحييك على حرصك للمحافضه على الضب

[أقلط]

الله ييسر امرك

[العـربي]

اجل فيه احد يرمي الضب في غير راسه

[سفير الصمان]

شكرا على هذا

[مكشات عنيزه]

كفوووووووووو

والله ان منتديات مكشات تفخر بعضو زيك والله والنعم فيك

وانا قريت ردودكم جميع عشان كذاا اعحبتني ولاانا ماعرف عن هالرصاص شي

والله يجازيك بالخير

وابد ماعليك لاتعلم احد واكثر اهل القنص والصيد هم الي يكتشفون الاماكن ومايعلمون احد بهااا

مثلان فيه واحد يعرف مكااااان بالبر يتجمع فيه عدد كثير من القطااا يروح ويعلم اخوياه
من بكره مهب لاقي ولاقطات بالمكاااااان عشان كذااا احتفض بالمكان لنفسك

واحييك على حرصك للمحافضه على الضب

الله يخليك وحنى كذلك نفتخر فيك
وكل الي قلته صحيح ولا غبار عليه
اشكرك من كل اعماق قلبي على هذا الرد الرائع الذي يدل على شخصك الكريم

[مكشات عنيزه]

الله ييسر امرك

جزاك الله خير

[مكشات عنيزه]

اجل فيه احد يرمي الضب في غير راسه

يا خي ياليت تعيد قراية الموضوع بتمعن
كلنا ندري ان الضب ما يرما الا بالراس
انا كلامي اذا كان الضب بعيد مره يعني توقعاتي ولست جازما 250 متر وفوق
يعني لو يتحرك البندق ملي طلع الراس من تقاطع الصليب
بهذي الحاله لا تجازف وترمي برصاص عادي غير متفجر

[مكشات عنيزه]

شكرا على هذا

ما سوينا الا الواجب