وين تنصحونا قبل نهاية الاسبوع

[اهم 1]

ماودكم يا شباب تحطون لنا مجموعة اماكن تكون اماكن جميله ومتنوعه مثلا المكان الفلاني فيه مويه والمكان الفلاني فيه اشجار ويصلح لطلعه عقب الظهر والمكان الفلاني يصلح للتخييم فيه بس عيبه كثرة العالم فيه

المقصود يا جماعة الخير نفيد ونستفيد بالاماكن العامه سواء القريبه لنا او القريبه لغيرنا

[فـ(الجـوف)ـتى]

اخوى العرزيز اهم 1 السلام عليكم ورحمة الله وبركاته



مشكورعلى موضوعك وفعلاً نتمنى ان نتعرف عن الاماكن القريبه او البعيده حيث من يريد منا


ان يذهب اليها حيث الربيع القادم بأذن الله تعالى وودنا ان نعرف هذه الاماكن سوى قريبه او بعيده


ونتمن من اخواننا الجميع ان يخبرنا عن تلك الاماكن وعن الربيع 0


واخواننا لن يقصروا بأذن الله تعالى وكلهم الخير والبركه 0



مشكور اخوى على هذا الموضوع الرائع 0

[كشات]

بسم الله الرحمن الرحيم
السلام عليكم ورحمة الله وبركاته

اشكرك اخي (اهم 1)
موضوع جيد

بالنسبه لي
وصلني خبر من شخص مشى من الخبر لين وصل الخفجي

يقول احسن الاماكن واللي باذرها بادي بدري وربيعها وخضار ارضها حلو هي المنطقه اللي بعد راس مشعاب الي الخفجي

بس مشكلتها مافيها مشاجير (رمث,وعرفج)لشبة الضو
وكثرة الاحواش (المنطقه ماهيب كبيره) وفيها صبخ مناقع ماء مالح وخاصه عقب الامطار

ادري هالرد مايستفيد منه الا القليل
حيث ان راعين البر بالشرقيه قله بالنسبه للي بالرياض ونجد عموما

اللي اتمناه ان الجميع يستفيد

[ابو شكاع]

انت وين محلك ؟؟

يعني الروحة على حسب موقعك


بس اشوف الشمال عموما ومن خلال الصور اللي هنا في المنتدى ممتاز

عندك الشوكي والتنهات والصمان وهلم جرا

سلام

[اهم 1]

اخوي كشات

يكفينا بس مشاركتك معنا وطلتك علينا واخبارك هذي صدقني بيستفيد منها ناس كثير من حول هالمناطق وكثر الله خيرك على هالمعلومات

اما بالنسبه للاخ ابو شكاع فانا وانا اخوك من اهل الرياض واطرق للبر من كل محل يذكر لي انه زين بالنسبه للمسافات ماتهمني لاصار المكان يذكر به ويمدحونه

وبالنسبه للموضوع هذا انا يوم اكتبه ماقصدت اني استفيد منه انا بالحالي لا انا قصدي نستفيد كلنا ممكن انت وانا وغيرنا نكون مرينا على اماكن وشفناها زينه نذكرها غيرنا مايدري عنها او يخاف يعني لها ولا يلاقي اللي هو يبي
ونفس الشي لنا نستفيد من اماكن مانعرفها من قبل

ومشكورين وماقصرتوا كلكم على تواصلكم

[المواكب]

السلام عليكم ورحمة الله وبركاته.. و.... اخوي اهم 1 بالنسبة لطلعة نهاية الاسبوع انا انصحك بالطلعة الى قبة ومن ثم البعيثة ومن ثم الزبيرة ومن ثم شعيب الحسكي بس المسافة طويلة على الى مهب راعي بر المسافة من قبة الى البعيثة حوالى 38 كم ومن ثم الزبيرة حوالى 70كم ومن الزبيرة للموقع الممتاز جداً ولايفوتك اخوي اهم 1 18 كم . طبعاً مايبي له يوم وترجع يبي يوم الاربعاء الى الجمعة بس لايفوتك شرط تدعيلي والمسلمين . وفيه جبل قطن بالقصيم لايفوتك فيه سد ماء مليان والمناظر الطبيعية . واجد الاماكن الحلوة بس يبي الجزمة . فية اعريق الدسم ورى اظليع رشيد ورى الرس قدام قرية اصعينين واحد كيلو مشجار غضاء مثل الغابة . الحداثيات موجودة قلي ونا حاضر للجميع ولاكم مني الدعاء لكم بالتوفيق في رحلتكم والله يردكم سالمين غانمين اخوكم المخلص ان شاء الله المواكب

[نقا هشال]

اخوي

كل البران اللي بالقرب مركز تمير

ممتازه

منها الشوكي

و روضة نورة

وروضة الحقاقة

وشعيب الارطاوي

والدهناء

والصورة اللي في توقيع في الشوكي الخميس اللي فات

تحيتي لك...

[هملان]

السلام عليكم ورحمة الله وبركاته
شكراً لك اخي الكريم اهم 1 على هذا الموضوع
ولمن يهوى الجبال والاشجار والاثار فهناك مناظرجميله واوديه بين الجبال واشجار كثيفه
والحقيقه انها تستحق من يذهب اليها وربما كثير من الناس لايعرفها
انها جبال ماسل وتقع جنوب الدوادمي وشمال القويعيه وهي سايله في الايام الماضيه
وبودي ان لدي صور لاعرضها لكم تحياتي