بلاي ستيشن .. للشيبان والكشاته اللي مايطولون البر!!!

[حفرلوجيا]

معلومة خله براسك حتى تكمل الموضوع : ( البلاي ستيشن ) لعبة صارت اشهر من علم على رأسه نار .. ويتم اللعب بها بواسطة أزارير عليها علامات مرسومة هي : ( مثلث , اكس , مربع , حرف او ) ..

----------------------------------------------------------------------------------

سلام يالربع
(( أنا مايقهرني إلا إذا اجتمعوا شلتنا بالاستراحة وتركوا جذعانهم يلعبون ( بلاي ستيشن ) بطرف المجلس .. وتفرغوا للجدل والقرقة والسوالف اللي ماتنفع عيالهم ))
قال لي هالكلام ( أبوفواز ) عند ماأخذني بحديث جانبي لأننا من وقت مااجتمعنا ..
صدقت يابو فواز وعداك العيب :good:.. نعم .. لازم نستغل مجالس الكبار لتربية الأولاد بدلا من استغراقهم بـ( البلاي ستيشن ) ..
لكن أبو فواز قال : ماهو ذا اللي أقصده .. انا شاغلني هالأيام مشروع حول ( البلاي ستيشن ) ودي أنفذه ..( أخبر ابو فواز راعي فزعات وهالنوع ماينجح بالتجارة .. وكلها قرشين شرا بها جيب جديد للكشتات وقاعد على الحديدة ) :confused:
سألته وش هالمشروع ماشاء الله ؟
قال لي ( بحزن ) : ليش بس العيال يلعبون بلاي ستيشن ؟.. وبعض الشيبان مالهم رب ؟!:looney:
أفا .. بلاي ستيشن للشيبان ؟!
نعم .. هذا مشروعي .. لكن البرنامج ( أوالقيم أو اللعبة ) ماهي أي كلام .. القيم بهالكور .. ويشر على راسه ( أخبر ابو فواز مستقيم ولا يتعاطى شي .. الله يستر لايصير به نفس ) :rolleyes:
قلطنا على العشاء .. وماصبرت جلست جنبه ( ودي اتطمن عليه ) .. وبادرته وهو مشغول بالعشاء .. ماشاء الله ياأبو فواز صاير ( كمبيوترايز ) وتبي ( تبرمج ) بعد ألعاب ؟!
اللي أقلقني انه بتل ينهش بالمفطح ولا هو حولي .. وسرحت انا .. معقولة بلاي ستيشن للشيبان ؟! يمكن يقصد الزقرتيه منهم ؟ أو اللي متكين بالبيوت ومشغولين عنهم عيالهم ؟ وإلا .... أي شيبان ذولا ؟!
ماصبرت .. ياأبو فواز فهمني عن أي شيبان تتكلم ؟!
قال : الشيبان اللي يحبون الكشتات والمراح بالخلاء .. لكن ظروفهم الصحية أو الاجتماعيه ماتساعدهم .. أو ان عيالهم ( مهملينهم ) .. أو اللي مثلك وده يكشت وظروف العمل ماتسمح .. كل ذولا عندي لهم كشته على كيف كيفك !!:looney:
كشتة .. .. بلاي ستيشن ؟؟!! .. وش السالفة ؟ .. نرجع لأبو فواز بعد العشاء ..
------------------ يتبع

[شبوب]

ننتظر ( الظرس ):D الين يهظم 0؟

اذا الشيبان يسمون ( النار ) فاكهة الشتاء00 تراك انت فاكهة ( مكشات )


تحياتي ،،

[حفرلوجيا]

أخوي شبوب : شكرا على هالمجاملة ( الحريقة )
-----------------------------------
على أنغام رشفات الشاهي .. عطانا أبو فواز علمه..
يقول : الشايب أو اللي وده بالكشته ولا يقدر .. ابنفذ له قيم ( لعبة ) تفاصيله كالتالي :
إذا ودك تتسلى تحط ( سي دي كشتة شيبان ) بمكانه بـ( جهاز البلاي ستيشن ) يطلع لك على الشاشة الخيارات الأساسية وأنت حر وهي :
نوع الكشته :
1- تمشيه وفرجه وأنت بالزفلت ... 2- كشته ورجعه آخر النهار .. . 3- كشته ومراح ( على ماتشتهي ).
خيارات الطقس
1- صحو .... 2- مطر ....... 3- سيول وشعبان.
خيارات المكان
1- النفود ........ 2- الصمان ............. 3- مكان آخر .
وللتوضيح أكثر : الشايب اللي مطنشينه عياله ..أو راعي الكشتات بالرياض عند ماحدد بالخيارات ( كشتة ومراح – جو ممطر – للصمان ) يبدأ من يتعدى الرياض يطلع له على الشاشة ( نقاط تفتيش حقن وعلل ) بمجرد مايضغط زر ( مثلث ) يلغي كل نقاط التفتيش بالطريق . وعند وقفته يفلل بنزين من المحطة اللي قبل دوار التنهاة يضغط ( اكس ) همن تكبر المحطة وتخف الزحمة ( وتزين النفس الخايسة ) للي يبيع بالبقالة :good:
وبعد ماتفرق يمين من دوار التنهاة وتشغل ( اللاسلكي على القناةالعامة ) ويطلعون لك نوعيات بذيئة وكلامهم فيه قلة حياء .. تضغط .. بس بحرفنه ( مثلث وإكس ) تقلب على طول علومهم ( علوم ناس محترمين ) . . وتستمر باللعبة ( ولك الخيار ان بغيت تلغي الشخاميط اللي مالها داعي على لوحات الهجر والقرى ) .. وبعدين أول ماتفرق ( شمال ) تبي الصمان تقدر ( تعلق وتوقف ) كل الجيوب والدداسن اللي تتعداك مسرعة تقول مطرودين ( ويطشرون الحصى على قزاز سيارتك ) .. وإذا وصلت أول الفياض والخباري ( ام قرين واللي حولهن ) تسوي ( مسح ) لكل اكالدشير اللي يتمرمرون رافعين صوت المسجلات على الأغاني ويفحطون وتخليهم بزاوية الشاشة حتى تقرر انك تعداهم .. وإذا تعمقت بالأجواء اللي بوسط الصمان يطلع لك على الشاشة اشارة تحذير( اسيام ربطات التبن وأكياس الشعير المبعثرة اللي حالتينهن أهل الحلال ) بهالحالة اضغط ( أكس مع مربع ) تحصلهن على طول تلولسن على رجلين اللي حلتهن ولا ينفكن الا إذا نوى يتخلص منهن بطريقة صحيحة ..:D
وإذا توسطت بالصمان ولقيت اكالروضة الصادة اللي العشب والزهر والورد فيها ألوان بس مكدرك الزبايل ( اللي تاركينها كشاتة الأسبوع الماضي ) :mad: بهالحالة خلك مرن اضغط ( اكس ومثلث مع أوه ) تحصل الزبايل طارن يتكومن بسيارة اللي جادعهن .. وإذا انت حبيب لاتضغط ( اوه ) على شان تجتمع الزبايل بالحزم وتولع بهن ..
وإذا نزلت مع خوياك تقدر ترجع للوحة الخيارات وتحذف ( الخوي الأربد اللي يبي يعلكم وتستبدله بالمواصفات اللي تبي ) ..:good: .. وإذا رجعتوا ووقفتوا عند المحطة اللي عند دوار التنهاة تعبي بنزين تقدر تضغط ( اكس مرتين ) تلقى اللي يبيع بالبقالة انقلع لديرته اللي جاء منه لأنه على طول نفسه شينه :mad: .. أما اللي مقابلينك بالليل وانت راجع للرياض كلهم نور سياراتهم واطي مايرفعونه اذا استمريت تضغط على ( مثلث ) ... :D
-------- توقف ابو فواز عن شرح مشروعه .. وقلت تكفى واصل ... قال ودي اضبط لي دله قهوة لأني ناوي اسري لم أم العيال ..
طلبت من هـ( الفلته ) يزودني بـ( سي دي ) لبقية السالفه قال مااعرف ..
ليش ماتعرف ؟!
قال تخبرني انا والكمبيوتر ماحنا ولايف وما عندي بالعرف به ماعند جدتي !!! :looney:
خوش مبرمج .. ياأبو فواز !!!
وسلامتكم

[الطبيب]

تصدق ياحفرلوجيا اني خفت يوم شفت اسمك جنب اسم البلاي ستيشن

وقلت الظاهر انك مصخن

لكن بعد ما قريت الموضوع وتمقلت فيه


وجدته كالعاده



يعجزني عن التعليق عليه من روعته


حافظ على هذا التالق

والسلام ختام

[صقر]

أخي حفرلوجيا

والله اني عشت مع السالفة (وطبعا دمعت عيوني من الضحك) الين وصلت لكلام ابو فواز


قال تخبرني انا والكمبيوتر ماحنا ولايف وما عندي بالعرف به ماعند جدتي !!!

واثاري الرجال صدز مصخن ..

لكن دعني اهمس في أذنك ان شيئا من أفكار ابو فواز مطبق هنا في (مكشات)

حيث اننا نتمشى الآن في فياض الصمان والشمال والـ(التيسية) عن طريق هذا المنتدى.. ولله الحمد..

مرة أخرى اشكرك على هذه البراعة في السرد وخفة الدم... وإيصال المعلومة بطريقتك التي لا يجاريك بها أحد.

وبارك الله فيك..

[((( الحر)))]

ابو سليمان تحيه عطره...!!!

تصدق ان السالفه كلها ممتازه لاكن سالفة راعي المحطة الي قبل دوار التنهات الي نفسه خايسه اعتبرها قمة الله يقطع بليسك يبو سليمان كل شي تمر عليه ولا يعجبك تقرر تغيره ولو بنفسك ثم تترجمه على الكيبورد......الف شكر يبو سليمان وبارك الله فيك...!!!

[مراكي الذيب]

الله يعطيك العافيه يابوسليمان


ماشاء الله عليك الظاهر لوتكتب اسمك فقط طلعنا بفايده :D


ودي اضغط على الازار كلها على شان مانفقد هالافكار النيره وهذا التواجد المتواصل .

[الماجدي]

الموضوع روعة والله يعطيك العافية000


اخوك الماجدي000

[رعد الجنوب]

ابو سليمان
دائما رائع ونفتقدك ( نحس بخرمه) اذا مالقينا موضوع جديد لك

فكره رائعة ومشروع مضمون النجاح وانا اول مشتري للبرنامج...
ولاتنسى تقوم بحفظ حقوق الفكره..
ابوسليمان فعلا مافاتت عليك الي يبيع في بقالة محطة دوار التنهاة فعلا جلد مروح ونفس:mad:
لكن اتمنا ان تضيف للبرنامج تضغط ( اكس ثلاث مرات ) وتشيل الشبوك الي الى بغيت تكشت
يبيلك تقطع اكثر من مئة كيلو علشان تدخل للبر..

تحياتي

[هواوي]

كالعاده رائع وكل موضوع احسن من الثاني

على فكره احلى ما في الفلم هو انه يشيل نقاط التفتيش

[راعي الطويلة]

الأخ

حفرلوجيا

تسلم والله على الفكرة الثاقبة وترا التدريب على أخوك ولا يهمك لخلي هالشيبان يبدعون ويدخلون تحدي بعد ...

بس ينقصنا احد الأخوة يرفع كم أحداثية لا يروحون شيباننا فيها وتلقاهم بدل ما يردون على الثمامة يواصلون على طول ....

أخوك

راعي الطويلة

[المربد]

والله اني عشت مع الخيال السارح الى صمان نظيف هادئ،

فكرة حلوة من قلم مبدع


تراك ابطيت علينا هالمرة، رجاء لا عاد تتاخر...!

[نفل]

السلام عليكم ورحمة الله وبركاته

اخوي حفرلوجيا

موضوع رائع ونقد بطريقة البلاي ستيشن والله يعطيك العافية بس فية معلومة ناقصة ما قلت لنا الشريط حق البلاي ستيشن 1 ولا 2 :D :D وتصدق ان الفكرة هذه لو وصلت للصينين كان نفذوها طلبية خاصة وبيني وبينك ابشتري منها كمية واوقف عن دوار حفر العتش الصمان والى شكله من اهل الثمامة اعطيه نسخة واقوله ديور الله لايهنك :D :D :D

اخوك نفل

[القماري]

أبشرك ياحفرلوجيا
السي دي وشريناه وصار لي يومين ضغط على الزراير وأكتشفت حركة حلوه بها اللعبة:
أضغط مثلث مرتين ومربع +L1 +L1 وأدعس دائرة ومربع مرة وحدة (الطريقة ذي تخليك تجتاز كل العقبات وترجعك البيت سالم ) :D
سلمت يابو سليمان على الفكر بس حلاته بالفراش وأنت نايم (صح النوم) سبقوك اليابانين وسبقوا أبو فواز.... مبدع .... بلا ستيشن

[حفرلوجيا]

أخوي الطبيب : شكرا .. ناوي تجيب ( اقصاي ) بكثر ماتجامل ياغالي.. طلباتك أوامر.
أخوي صقر : شكرا .. والبركة بتواجد أمثالك اللي مخليننا نتجول بالمناطق ونكشت بكبسة رز .. أقصد بكبسة زر الماوس وحنا ( بمكشات ).
اخوي الحر : شكرا .. ياقمة .. أشوى ان غيري ملاحظ هالعامل ( الخايس ) .
أخوي مراكي الذيب : شكرا .. شوي شوي ياحبيب لاتوهقني وأسويها .. لكن وين ذيبك ..رجعه بس خله مقفي:p
أخوي الماجدي : شكرا .. الروعة ذوقك ولطفك ياغالي .
أخوي رعد الجنوب: قعدنا به .. إلا الخرمة .. لكن عليك بالعسل حق الجنوب .. و( اكس ثلث مرات ) اللي تقترحه مافاتت بس قلتها انت ماهو أنا:p
أخوي هواوي : شكرا .. نقاط التفتيش العلل بس.. أما غيرهم يؤدون واجبهم.
أخوي راعي الطويلة : شكرا .. ونحولك على ابو فواز مادامك متبرع بالتدريب بس لاتكون مثله بـ( عرف الكمبيوتر ).:D
أخوي المربد : شكرا .. ياليت يكون كل مكان نقصده نظيف وهادي ... وتراك ( خجلتنننن..).
أخوي نفل : شكرا .. لا تكفى لاتنشغل .. لاتوزع شي .. خلك مشغول بالكاميرا وبس:good:
أخوي القماري : شكرا.. حلوه حركة ( اجتياز العقبات ) .. ;)أقرأ فيها معاني كثيرة يا... حكيم .