سؤال اختلفت فيه الأجوبة ؟ ؟ ؟ ؟ ؟

[أبوإبراهيم1]

السلام عليكم ورحمة الله وبركاته
أخي المكشاتي/
لدي سؤال إختلفت فيه الأجوبة عند الصقاقير .
فآمل الإجابة عن واقع تجربة !

هل يتغير أطيار الفرخ إذا صار سبوق (يلحق) بعد المقيض _بعد مايكون بكر وأكبر_ ؟
وجهة نظري أنه إذا كان يلحق الفرخ يستمر على أطياره.

[فداع]

السلام عليكم ورحمة الله مساالخير ابوابرهيم بكر يجي اسبق وذا قرنس ثنو يثبت طياره اذاكان يلحق يبقى يحلق على طول والله اعلم

[قلب شاهين]

وعليكم السلام ورحمة الله وبركاتة ،،

أخوي ابو ابراهيم مشكور على سؤالك الذي يفيد الصقارين ،،

وبالنسبه للوحوش اذا قرنس يتغير اطياره الى الأبطئ على حسب الطير طبعا !!

ولكن الجيرة عكس الوحوش كلما قرنس يكون أسبق وهذا الكلام سمعته من قانين الجيره ،،

ولكن الوحش كلما قرنس يزداد ولافته وركادته عند صقاره ،،

وهذا الزين فيه ،،

هذا ماعندي والله أعلم ،،

تحياتي / قلب شاهين ،،

[طير طاير]

أبو أبراهيم


الله يعطيك العافية على ها السؤال الجميل


وتقبل مروري،،،

[طرح السعودية]

بالنسبة للطير السبوق اذا قرنس وتغير طياره فهذا يعود لبرود همة الطير اما امكانيات السبق فهي باقية لديه

[وَسَام!]

بالنسبة للطير السبوق اذا قرنس وتغير طياره فهذا يعود لبرود همة الطير اما امكانيات السبق فهي باقية لديه
انا معك ياطرح السعوديه 100% السبق يبقى ولكن اللي يرده من السبق اذا تغيرت صملته والا الطير السبوق سبوق اذا لقاله صقار يخرشه بالدعو ولايخرب صملته واللي يخربها انه يهد على شي فوق طاقته.

[القرناس المهاجر]

اخي ابو ابراهيم

لست بأعلم من الموجودين بالخيمة لكني أقول:-

إن الفرخ .. سواءاً حــر أو شيهانة .. إذا قرنس يكون طيارة أسرع لماذا ؟؟ لأن ريش القرناس اقصر بقليل من ريش الفرخ وأرهف :rolleyes: يعني بيكون اسرع في الخفق والإنسياب في الجو أضف إلى ذلك ثقل وزن الطير .. وإذا كان هو سبوق من الأصل فلآبالله إلا ابشر بالسبق الراهي :D وهذا من تجربه

اخوك .. القرناس المهاجر .. المجيرمة

[لعّاب المنايا]

بالنسبه للوحوش أنا أشوف بعض الطيور تطلع بكر ومازلت سبوق مثل ما كان وهو فرخ وبعضها يتغير سبقه يكون اقل من هو فرخ ,,

والحين عندي فرخ يطلع بكر إن شاء الله سبوق هو وإن شاء الله يبين معي الموسم الجاي هل هو على ما كان أو يتغير ,,

وااحد من الربع أخذله فرخ وحش العام من سوق الطيور بالرياض وطلع معه بكر الموسم الماضي سبوق وهو فرخ وطلع بكر وهو سبوق ما تغير فيه شي وماشاء الله سيم خمسين الف,,

وواحد من الربع عكسه أخذله فرخ سبوق ما شاء الله ووقت ماطلع بكر صار سبقه عاادي جدا أقل من يومه فرخ ,,

سؤال ممتاز بيض الله وجهكـ:good:

[فارس 74]

انا اقول والله اعلم ان الوحش يكون اسبق من الطير البيتي والفرخ سوا حر ولا شيهان يقل طياره لا قرنس وفيه فروخ شياهين وفروخ حرار لاقرنست تمسك طيارها ولا يتغير طيارها وهذي من نوادر الطيور ولا حصلك طير منها لاعاد تفكه :)

[الطبشي]

بالنسبة للطير السبوق اذا قرنس وتغير طياره فهذا يعود لبرود همة الطير اما امكانيات السبق فهي باقية لديه


كلام اخوي طرح السعوديه هذا الي لاحضته فعلا كلام سليم

[المان العرب]

[quote=قلب شاهين;1666468]وعليكم السلام ورحمة الله وبركاتة ،،

أخوي ابو ابراهيم مشكور على سؤالك الذي يفيد الصقارين ،،

وبالنسبه للوحوش اذا قرنس يتغير اطياره الى الأبطئ على حسب الطير طبعا !!

ولكن الجيرة عكس الوحوش كلما قرنس يكون أسبق وهذا الكلام سمعته من قانين الجيره ،،

ولكن الوحش كلما قرنس يزداد ولافته وركادته عند صقاره ،،

وهذا الزين فيه ،،

هذا ماعندي والله أعلم ،،

تحياتي / قلب شاهين ،،[/
انا معك ياقلب شاهين :good: :good: :good: :good:

[عين الداب]

مشكوووووور على طرح السؤال طر السعوديه كلامك سليم واخوي وسام

[طيرالحمــــاد]

الفرخ السبوق يثبت أطياره اذا قرنس بنسبة 90%
الفرخ اللي اطياره عادي هناك احتمال انه يصير أطياره طيب بعد القرناس بنسبة40%


راي من واقع رايته بطيوري وطيور بعض الربع


وسبق وان فيه طير مع واحد من أخوينا فرخ وقرنس بكر وقرنس ثنو ويوم قرناس ثاني ماراح عليه حباري ابد


وقرنس عنده ثالث ولاراح عليه حباري


وللعلم صقاره واحد من يومه فرخ وصاد حباري فرخ وراح عليه حباري فرخ وبكر
بس بعد ماقرنس ثنو تغير الطير 180 درجه بالطيار فرق شاسع عن اطياره فرخ وبكر


وأصبح يضربه المثل بالسبق


تقبل تحياتي
طير الحماد

[سلطان 1]

مردودى حدا الامرين
1\ اما يبقى الفرخ على طياره زى ماهو ما يتغير 0 او
2\ يفرط فى الطيار ويجى اسبق منه يوم هو فرخ 0
وجهه نضر 0 تقبل مرورى يابو ابراهيم 0

[ماجد الهلالي]

السلام عليكم انا سبق واسالت نفس السوال تقريبا لشخص قديم بالصقاره وقال لي انا الفرخ ما يزين طياره الا من ثنو فوق حتى لو كان سبوق اذا وصل ثنو زان طياره اكثر وشاهدت بعيني هذا الشي ويمكن ايضا للفرخ انه يتردا بعد ما يقرنس اما القرناس الوحش ( الخلوي ) ما يتردا طياره ابد حتى لو دهل لان السبق مو بتدهيل الطير او جرده على الحمام او الملواح هذي صفه في الطير واسف على القصور

[قنيص غبر]

السلام عليكم ..
سؤال اختلفة فيه الاجوبه والاراء ..
ومن وجهة نظري فأن الطير الوحش الفرخ اسبق عن الجرناس لسبب .. انه اول شي شفقان على الصيد وفن المناوره غير مكتمله فتلاقيه ان طار من ايدك تلاقيه يطير صوب الطريده بكل مالديه من قوه وتلاقيه يطرد بسرعه وسبق .. اما اذا قنص وقرنس فتلاقيه اركد . يبرمج في راسه كيف يجيها ومن وين وكم السرعه اللي تحتاج يبذله الطير . فتلاقيه اعرف في مقدرته وما يعطي كل الجهد حتا يتعب بس اتلاقيه يجيلها من فوق وياخذلها ملو .. وفالنهايه يصيد .. بس بفن .. هذا والله اعلم ..

اما الجير :) فهذي لعبتي عاد ..
الجيره عاده يجي فيها سبق لكن قلة الخبره فالصيد والفن .. وعندما يجرنس والله هداه وعطاه زياده فالعقل . فان يجيبلك طيار كان مخبيه ماعرف من وين ويتفنن كل الفن في الصيد . لدرجه انه يصيد للهو مب للاكل .. وعندي طير يكون مغداي ونطلع على الصيد وتلاقيه يخفق يريد الهدد ..
ثاني شي الجير يرغب فالهدد اللي فالسما اكثر عن الارض .. يعني حباري كروان او بط او حمام ..

وانشالله قدرة اجاوب على السؤال

والسلام عليكم

[hawwamT]

الطير من راعيه
اذا الطير سبوق وهمله راعيه يصير slow
والسكين الجيدة تردى اذا ما سنيتها..
وتحياتي لك يبوابراهيم

[ابوالجازي]

الطير من راعيه
اذا الطير سبوق وهمله راعيه يصير slow
والسكين الجيدة تردى اذا ما سنيتها..
وتحياتي لك يبوابراهيم

100% كلام صحيح
واذا الطير بردت همته على كلام اخوي طرح السعوديه (وهوصقار ذوخبره ودرايه واعرفه زين)
دواه الشناذر
ومن ناحية الطير اذا كان سبوق وهو فرخ هل يبتل سبوق اذا قرنس او يتردى
فهذ نفس جواب اخوي hawwamT
والدليل عندي طير من يوم هو بكر والان عمره 19 سنه وكان يوم هو فرخ يلحق لحوق طيب مع فيصل العطيشان وانا الاحظ ان الطير كل ماتقدم بالسن يزين طياره اكثر طبعا مع الدعو والتطليق
لدرجة ان الطير يوم وصل عمره 14 سنه سيم عل هدد حمام ب 100000 مية الف ريال مع العلم ان الطير ارقط وفيه خرمه في خشمه لكن طياره فرض نفسه
اسف على الاطاله

[بو هاشم]

ان الفرخ لا قرنس وكبر عمره يكون اسبق
لان يكو اعضاءه الدخليه مثل القلب والرئه اكتمل نموها
والله اعلم

[الكتبي2008]

وعليكم السلام ورحمة الله وبركاتة ،،

أخوي ابو ابراهيم مشكور على سؤالك الذي يفيد الصقارين ،،

وبالنسبه للوحوش اذا قرنس يتغير اطياره الى الأبطئ على حسب الطير طبعا !!

ولكن الجيرة عكس الوحوش كلما قرنس يكون أسبق وهذا الكلام سمعته من قانين الجيره ،،

ولكن الوحش كلما قرنس يزداد ولافته وركادته عند صقاره ،،

وهذا الزين فيه ،،

هذا ماعندي والله أعلم ،،

تحياتي / قلب شاهين ،،
انا مع رأيي قلب شاهين ومن واقع تجربه في الجير

[قرناس ارامكو]

100% كلام صحيح
واذا الطير بردت همته على كلام اخوي طرح السعوديه (وهوصقار ذوخبره ودرايه واعرفه زين)
دواه الشناذر
ومن ناحية الطير اذا كان سبوق وهو فرخ هل يبتل سبوق اذا قرنس او يتردى
فهذ نفس جواب اخوي hawwamT
والدليل عندي طير من يوم هو بكر والان عمره 19 سنه وكان يوم هو فرخ يلحق لحوق طيب مع فيصل العطيشان وانا الاحظ ان الطير كل ماتقدم بالسن يزين طياره اكثر طبعا مع الدعو والتطليق
لدرجة ان الطير يوم وصل عمره 14 سنه سيم عل هدد حمام ب 100000 مية الف ريال مع العلم ان الطير ارقط وفيه خرمه في خشمه لكن طياره فرض نفسه

اسف على الاطاله


أخوي /ابوالجازي
أنا موأيد كلامك 100 % وأذا تردا الطير الطيب فهو من صقارة

[أبوإبراهيم1]

أشكر الجميع على التفاعل بـوجهة الأنظار والتجارب.
أسأل الله أن تعم الفائدة