الحر فالصفري كم سعره

[خشف.]

السلام عليكم ورحمة الله وبركاته
الحر البيتي صايد الحبارى والكروان وطلع سالم من الامراض اخضر عرضه 16 ونص وسبقه وسط لا هو السبوق اللي ماتروح احباراه ولا اللي يفرط ثلاث ويصيده وحده
كم سعره فالصفري
اخوكم
خشف.

[مغــادر]

السلام عليكم ورحمة الله وبركاته
طال عمرك على حسب الطير وفعله ان كن الطير على الصيد والطلع سبوق بيشقح 15 الف,,,
وانشاءالله الشباب بيفيدونك ,,,

[قرناس ارامكو]

وعليكم السلام ورحمة الله وبركاته
أخوي \ خشف
محد يقدر يعطيك السعر بالضبط لأن لكل صقار نضرة ، يمكن يكون زين في عيني لكن شين في عينك أنت .
لكن حسب كلامك يسوى مابين 5000-8000 حسب السوق .
وأنا سارلي موقف العام الماضي
مدح لي طير مقاسة نفس مقاس طيرك ونفس اللون تقريبا وأنا ماشفتة، ( طلع ولحوق مفرط وهو فرخ صاد 4حباري لحوق 12كروان) وشريتة ب20000 ألف ريال ولما جاني الطير وحطيتة على يدي ضاق صدري ماتتصور شلون ضاق صدري ، لأني من الناس ألي مايشتري طير ألا لين أشوفة ويجوزلي . المهم كل من شافة من أخوياي مستحيل يلحق ولا يسوى 5000 ريال وأن طعت الشور بعهههههههههه .
قلت خلني أجربة على الحمام وشوف بعدين ، وفعلن وجربتة على السوادي منتوف ثنتين + ثنتين وراح معها نقطة في السما وعلقها ، بعده كبر في عيني وعين أخوياي ، وهديتة على خرب عاصي في سوريا وقعد أكثر من خمس دقايق وهو يرددة في السحاب وياخذ منة ريش فوقنا وحنا ندربل لين علقة ، وسيم مني هاليام 30000 ألف ولا بعت وضاهر أني أبي أضيفة في بطاقة العائلة .
وهاذي صورتة http://www.w0ow.net/uploads/w0ow-32972b1de8.jpg (http://www.w0ow.net/)
http://www.w0ow.net/uploads/w0ow-0995a67585.jpg (http://www.w0ow.net/)
واللة يستر علية ، ويرزقك بالطير الي أطيب منة .
وتقبل مروري

[بعيد الشوح]

والله الطيور تختلف فيه طيور تطب السوق مجهوله تاصل 5000 وفيه طيور تطب السوق ويشرط راعيه طلع وذبح ولحوق ويكتب عليه ورقه انه اذا ماذبح يرجع ولا طلع يرجع ولا لحق يرجع ويقولون 8000 وانت وحظك في السوق

[الطبشي]

السلام عليكم 00 زي ماقال اخوي قرناس ارامكو في ها الحدود

[قلب ذيب]

هلا
مافيه صقار يقدر يحكم على طير بدون مايشوفه , ويتأكد بانه خالي من الامراض وخالي من العذاريب
ويقلب الطير , ويعرف شرط بيعه ! هذا المفروض ,اما القرانيس في الصفري فهي من 5000 الاف الى 100000الف .

[طيرالحمــــاد]

والله الطيور تختلف فيه طيور تطب السوق مجهوله تاصل 5000 وفيه طيور تطب السوق ويشرط راعيه طلع وذبح ولحوق ويكتب عليه ورقه انه اذا ماذبح يرجع ولا طلع يرجع ولا لحق يرجع ويقولون 8000 وانت وحظك في السوق

كلام صحيح وانا معك بالراي

[النـادر]

على حسب الكلام اللي قريته منك يارجال
.......مقاسه زين والوسره ماهوبالزايد الناهي
وطلعه ثبت لامن روحت مع فية المدهال
.......وتل السبق من جنبك ولا قلك تراها هي
جناحه مايعذربه البخيص ولا عليه جدال
.......وصقاره بنفسه يدري انه ماهو/ الراهي
ولونه مثل لون الحد لامنّه لحقه ظلال
.......على ماقالوا العقيل صدّ وكنك./الساهي
ترى من فوقها العشره ولاتدفع يكون ريال
.......الى السبعه نزول وضبط البراد ابو شاهي

[خط المقناص]

مساكم الله بالخير
هلا بك اخوي خشف

الطير اللي هذي علومه وشخوصه ان كانه شبب فهو يسوى الثمانيه وان زدت الفين ما هيب خساره ان كان طلعه زين
اما ان كانه عود من ثامن وطالع فهو يسوى الخمسة وحولها ،،،

والطيور الحين غالية فر المرابط وتفرج ،، اللي كنت تاخذه بعشرة الحين ما تنقله بأدون من ال 15

[وقاااااد]

عطاك العلم نادر الجبيل
صح لسانك على هالأبيات

[بو هاشم]

الموصفات الي انت ذكرته لا تقل عن 10 ألاف
اتمنالك التوفيق

[سنافي نجد]

..




الشباب ما قصروا .. الله يعطيهم العافيه




..

[خشف.]

سنافي نجد
بو هاشم
وقاااااد
خط المقناص
نادر الجبيل
طيرالحمــــاد
قلب ذيب
الطبشي
مغادر
يعطيكم العافيه على الردود وما قصرتو
قرناس ارامكو
ما شاء الله على طيرك ويعطيك العافيه على المرور

[جارح العين]

ماقصرو الاعضاء

[خشف.]

على حسب الكلام اللي قريته منك يارجال
.......مقاسه زين والوسره ماهوبالزايد الناهي
وطلعه ثبت لامن روحت مع فية المدهال
.......وتل السبق من جنبك ولا قلك تراها هي
جناحه مايعذربه البخيص ولا عليه جدال
.......وصقاره بنفسه يدري انه ماهو/ الراهي
ولونه مثل لون الحد لامنّه لحقه ظلال
.......على ماقالوا العقيل صدّ وكنك./الساهي
ترى من فوقها العشره ولاتدفع يكون ريال
.......الى السبعه نزول وضبط البراد ابو شاهي
صح لسانك
ويعطيك العافيه على المرور

[بوخالد الكعبي]

على حسب فعله وصيده وشرووط عليه بالصيد والطلع

عندنا في قطر الله يهديهم من 10000 الى 40000الف واكثر

[شنوان]

الطير وشهو الي يرفع سعره يافعله ياريشته احد يرفع سعره لانه يدور الفعل مايهمه الريشه واحد العكس يدور الريشه لومايلحق بس يصيد وانا اقول الطير على حسب الي بيشتري

[أبو فيصل]

الشريطيه من سنتين صايرين مثل مضاربين الأسهم السعوديه يرفعون الطير نسب فوق لصار المكسب لهم و يحدرون به في القاع لصار عندك

يس المشكله ما تقدر فيهم يعني ما فيه مؤشرات مثل اللي أنتم عارفين في السوق ... يعني صارو هوامير الله يرزقهم ما دام أنهم على حق ولا يزيدون في طيورهم أو ينقصون في غيرها

أذكر سنه من السنين مليت من طير شاريه على أنه صايد وطلع يهد عليها و يصفح ليـــــش لأنه ما يعرفها و يبي له علمه الكلام هذا عام 92 و أخوكم ماهو فاضي

تدرون مريت به على شريطي و صقار و أول حياته شباك و من عرض كلامه يقول ترا طيرك... طوير!!! <<< ما أنسى كلمته الله يغفر للجميع و الطير هاذيك السنه بكر أحمر يرد للشقار وافي ومزيون والطول بس يشطف الــــ 18 من الروسيات الأوله

لذلك لا تهتم في أسعار هالأيام ... لا زل من شهر عشره أسبوعين عينتها عند أهلها و جاهزه بأسعار معقوله و مفتك من المقيض و الشنذره و الدعو و هاذي بحد ذاتها لها فرق في السعر مع أن المعروض بيكون أكثر من المطلوب لكن أنحش من اللي يخلونه في الأسواق ذاك الوقت!!!

و بعدين البيتيات فيها نسبه كبيره تفريخ و كبيرة سن و كلها قرناس خامس الله وكيلك ما يتعداه وعلومها طيبه

وفق الله الجميع

[خشف.]

بو خالد الكعبي
شنوان
ابو فيصل
يعطيك العافيه على المرور

[سنجااار]

الطير الطيب مايتغير سعره لا صارت علومه معروفه سعره ثابت
والله يرزقك الطير الطيب