قصيده في لينه

[فهد الهلالي]

السلام عليكم يالربع00 هذه قصيده قلتها عام 1418 وقت الربيع في لينه
حيث كنا قادمين لها من جهه الغرب من اطراف عرق المظهوروعندما وصلنا لينه ولاالطريق المسفلت واصلها و زحمة السيارات عند محطه البنزين والسيارات اكثار منها الكبيره والصغيره ولفت انتباهي مرسدس يعطي الوان يتمشى بالربيع وقمت اتذكر وبن كانت لينه مايصلها الواحد الاوهومتكسر من الطريق وعندما وصلناها وبرفقتي خالي رحمه الله قال هذي لينه وشتقول فيها قلت ياخال ماش معاد مثل اول من يوم شفت السيارات بالكثره والعالم الصراحه ضاق صدري وين يوم كنا نجيها على الفورد مدري هو ستين او اثنين وستين فقلت هذه القصيده بالرغم اني لاتذكر ها كامله ولكن هذا الموجود وحبيت اشارك والعتب على الكبر




لينه بكيتك يوم جينا لاراضيك
................ومن يوم فضنا من ديار الرعوجي
اسوق رجلي وتخطاء مفاليك
................ واجول كما تجول خطات الخلوجي
شفتك وعين غمضت لاتراعيك000
...............اخشى عليك من الزعل يالغنوجي
جيتك على الستين نوره اتاريك000
.............. ومكينته تمشي على سلك بوجي
افرح اليا شفتك عقب التهاليك000
.............. وازيد في ممشاه عجلا نهوجي
وقام يتندح في دروب ومساليك0
.............0 اتقول حر فوق خرب يروجي
واليوم شفت البنز ياطاء مراعيك
00.......... مع البهم يرعى بلون ن يموجي
راحو ارجالا بالمجالس تحييك
..............بهندي ومصري في خببها تدوجي



مع تحياتي لكم000000000اخوكم الشيخ مسكين

[أبو فهد العيد]

صح لسانك..عز الله انك شيخ..البيت عن عشر ابيات..
والله انها ادمعت عيني ياشيخ مسكين..
هذاك عام 1418هــ
اجل الحين وش نقول:هالخطوط خطمت على مفالينا ..
بيض الله وجهك..

[فهد الهلالي]

صح بدنك اخوي ولد حنيضل قصيده منواضعه حبيت ان اشارك فيها لعلها تحوز على رضاكم 0000 والصحيح
مابقا منها الا الذكريات تحياتي لكم

[جرير]

صح لسانك تعبير صادق
ولحظة تامل في الماضي
لوحة شعرية رائعه وفقك الله

ياشيخ ماباقي من السالفه ذيك
غير التوجد والفكر والهروجي

[فهد الهلالي]

صح بدنك يامشرفنا العزيز جرير
وبارك الله فيك واشكرك على الرد الطيب
والطيب مايجيب الا طيب
تحياتي لك

[المزروعي]

صح لسانك وبيض الله وجهك أخر مرة زرت لينه كان ربيع 1990 أشهد أنها دار تشرح الصدر أذكر كان في السياره 12 كرتون فقع وحنا راجعين الإمارات . الله يعودها من أيام جميله علينا وعلى أهلها .

[جلمود الجبيرى]

ابومحمد الشكوى لله الخطوط خربت وانفعت شف الصمان وغيره من الاماكن اللى كانت محلا ت قنص حافته الخطوط مع كل مكان مشكور ودمت بود

[قلب ذيب]

هذا كلام الصدق .( عيون لينه ) !
نعم كانت لينه . تجاور النفود تلك البلده العتيقه ورغم صعوبة الوصول اليها الا انها بلده حيه تجد بها كل شي
كنا نمر بها في منتصف الثمانينات , ونتزود بالبترول وما نحتاجه من تموين , ونشتري الفروه منها , وكذلك الكثري , والدهن , وننحر الشمال متوجهين الى اللبه وسنار ! كنا نعشي في ( مريط ) زباير غضا في نهاية وادي فيحان !
نعم كانت لينه عروس النفود , ولم اتيها بعد ما وصل لها الاسفلت !

[وَسَام!]

صح لسانك وهذا جاري على اغلب الاراضي والمنابت اللي توسع الصدر!!
لاهنت!!!!!!!!!!

[فهد الهلالي]

تحياتي الى الاخوان جميعا 00 المزروعي صح بدنك يالغالي وانشاء الله ترجع السنه الجايه بستين صندوق زبيدي تحياتي
الاخ جلمود الجبيري انشاء الله تكون ايامك جميلات وتشوف الربيع والحباري من يمين وشمال ماتدري ويش تناظر يابو علي حياك الله وصح بدنك
الاخ قلب الذيب اشكرك على حضورك وماتفضلت به عن لينه وانشالله ترجع لها وهي متحليه بلباس الربيع بارك الله
لك اخوي وسام صح بدنك يالغالي وبارك الله لك ودامت لياليك سعاده تحياتي

[ابرق العزاف]

صح لسانك الف ولينه لها معزه عندي خااااااااااااصه
صح لسانك ملايين وتسلم يالشيخ

[سلطان ال حسيان]

صح لسانك اخي الحبيب شيخ مسكين على الابيات الرائعة
الله لايهينك عندي استفسار صغير قلت يااخي في الشطر:
ومن يوم فضنا من ديار الرعوجي
وش القصد من ديار الرعوجي واين تقع ومنهو الرعوجي المقصود؟

[الخيال2006]

واليوم شفت البنز ياطاء مفاليك
00.......... مع البهم يرعى بلون ن يموجي
راحو ارجالا بالمجالس تحييك 00
.................... بهندي ومصري في خببها تدوجي
صح لسانك الشيخ مسكين على القصيدة وبارك الله فيك

[فهد الهلالي]

تحياتي الى جميع الزملاء
ابراق العزاف
تولاين
الخيال2006
وصحه ابدانكم جميعا ومشكورين على تواجدكم
بارك الله لكم
0000اخوكم الشيخ مسكين