سلة للتحميل خلف السياره [الأرشيف]

مشاهدة النسخة كاملة : سلة للتحميل خلف السياره

الـ ع ـارض

25/12/2003, 10:17 AM

السلام عليكم ورحمة الله وبركاته

الكثير من اصحاب الجيوب وخاصة اصحاب الجيوب الاربع ابواب لين نوى يطلع البر يشيل همل اغراضه وين بحطها وخاصة اذا اهله وعياله معه ما يقدر يستغني عن المرتبه الثالثه ويصفطها او انه يشيلها ويخلي عياله ينحشرون بالسياره وهذي مشكله اواجها منذو مبطي .... طيب والحل ؟؟؟؟؟؟
الحل كان انك تشتري قلص وامرك لله بس مشكلة القلص انه يقيد حركة السياره بالبر وخاصة اذا دخلت النفود غير ان القلص من ناحية الامان لك عليه الا بعض الانواع الجديده بس مشكلتها غاليه بالحيل واحيانا اغراضك مهيب كثيرة وما تحتاج قلص .... وش السوات ؟؟؟؟

الحل هو السلة
ولكن مو اي سلة .... لقيت اشكال وانواع شغل وطني بس بصراحه من شكلها تحس انها اي كلااااااااااااااام
وجلست احوس الى ما لقيت اللي انا ادوره اخذتها ودخلت عليها بعض التعديلات من اجل الحماية والامان.

واهم شي قبل لا تركب السله في شي مهم جدا جدا جدااااااااااااااااااااااا

وهو الهوك اللي بتركب عليه السله وش نوعه ووين مركب ؟؟؟
في انواع يكون الحديد خفيف وهذا ما ينفع لانه يا سرع ما ينكسر وخاصة بعد الاستخدام الكثير
والاهم من نوع الهوك هو انه وين مركب ؟
الياباني (الباترول والاندكروزر ) لين رحت تركب الهوك يربطونه على قاعدة الصدام الخلفي وهنا يكون الخطأ الخطر لا القاعدة مجهزه لوزن الصدام فقط وما تتحمل وزن زيادة (وزن السلة مع الاغراض اللي فيها)
وتنكسر القاعده مع الصدام مع السلة (وبتسبوني وتدعون علي الى السنة الجايه)
القاعدة مفروض انها تتركب على الشاص حتى تتحمل الوزن ويفضل انها تتلحم مع الشاص بالاظافه للمسامير اللي جايه معها .
القاعدة هذي لقيت نوع جيد ويركب على الشاص عند السليماني اللي بطريق الملك عبدالعزيز ولكنها غاليه مقارنه بالانواع الثانيه وتوصل قيمتها مع التركيب الى 950 ريال اما الانواع الثانيه اسعارها مابين 400-500 ريال وهذي صورة الهوك وهو مركب على السيارة
http://www.arab3.com/gold/images/Dec03/al3ard_Image-025875.jpg

وهنا انتهينا من الهوك

نروح الان للسله
السلة تبيها عرضها مناسب وارتفاعه جيد ليحمي اغراضك من الطيحه وخاصة اذا اكلت لك كم مطب وانت مسرع شوي وايضاشكلها حلو وما تأثر على توازن السياره .

هذا شكل السله وهي راكبه على السياره
http://www.arab3.com/gold/images/Dec03/al3ard_Image-03565.jpg

(((لاحظ الخطوط العاكسه ومثلث التحذير عشان اللي ماشي وراك ينتبه للسله )))

السله على مستوى ارتفاع الصدام وعرضعها اقل من عرض السيارة حتى لايشكل البروز الجانبي مشكلة توازن السيارة .

ارضية السله
كل انواع السلال اللي شفتها تكون الارضيه شبك وملحم على لحام بسيط بقواعد السله وهذي مشكله لوكانت اغراضك ثقيله ومع المطاب يا يفك لحاك الشبك او ينكسر من النص انا سوية شي وهو اني لحمت اطراف الشبك كامله مع القاعده واظفت مساطر حديد ملحمه على القاعده فوق الشبك لحماية وسط الشبك من الانكسار .
ورفعت الحواجز الجانبيه وسويت لها دور ثانيه لحمايه اكبر للاغراض (لاحظ الخطوط الجانبيه عددها 3 هي في الاساس 2 ورفعتها الى 3 )
http://www.arab3.com/gold/images/Dec03/al3ard_Image-05485475.jpg
((( لاحظ الخطوط العاكسه من اجل السلامه وتنبيه الاخرين )))

وبكذا اعتقد انك بطلع للبر انت وعيالك مرتاحين بالسيارة واغراضك كامله ومرتاح .

اتمنى ان اكون وفقت وكان شرحي واضح ومفيد للجميع ....

تحياتي وشكري لاعضاء المنتدى جميعا

(((السله موجوده بالرياض بحمل بالغرابي ووصف المحل هو :لين دخلت الغرابي من جهة البريد المركزي وجتك اشارة الدوريات طبعا تبي تلف يسار ابتل الى ما يجيك على اليمين محل ادوات زينه سيارت (هذا المحل بس ما اعرف اسمه ) وبعده محل كفرات كبير قبل محل العليان وموجود عنده نوعين بس هذا اللي شفتخ بالصور افضل وسعرها 250 ريال طبعا بدون التعديل .

والتعديل اللي سويته على السله (رفع الحواجز الجانبيه وتدعيم الارضيه ) سويته عند حداد بالصناعيه بـ 150ريال مع اعادة صبغ السله كامله .)))

العناء

25/12/2003, 01:57 PM

مشكوووووووور اخوي العارض على هذا الوصف الوافي ماقصرت

يعطيك العافيه :good:

العنــــــــــــــــــاء

أيمن

25/12/2003, 03:56 PM

يا جعلك تسلم يالعارض على هالدرر ..
ومشاركات متوالية وإبداع متواصل يثلج صدورنا وصدور المشاركين بكل المقاييس ..
فسر - بارك الله فيك - على هذا النحو وهذا الإبداع ..
وفقت لخيري الدنيا والآخرة ..

تحيتي

الـ ع ـارض

25/12/2003, 04:42 PM

العناء
مشكووووور يا عنوني والله يعافيك

الـ ع ـارض

25/12/2003, 04:51 PM

ايمن مشرفنا العزيز
الله يجزاك خير على الدعوة الحلوه
وبعيدن يا عزيزي انا ما سويت شي انا ارد جميل ودين للمنتدى ومشرفيه واعضائه لاني استفدت من الشيئ الكثير واحاول اني ارد شي من جميلهم .

والله يوفقك الجميع الى مافيه كل خير انشاء الله

الطيب

25/12/2003, 11:12 PM

Originally posted by أيمن
يا جعلك تسلم يالعارض على هالدرر ..
ومشاركات متوالية وإبداع متواصل يثلج صدورنا وصدور المشاركين بكل المقاييس ..
فسر - بارك الله فيك - على هذا النحو وهذا الإبداع ..
وفقت لخيري الدنيا والآخرة ..

تحيتي

بس ما تتوقع ممكن تسبب مشكلة مع المرور بسبب عدم ظهور اللوحة ؟

:)

الخضاري

26/12/2003, 03:57 AM

السلام عليكم ورحمة الله وبركاته

تسلم يالعارض كفيت و وفيت بصراحه أنا عندي سله بسوي التعديلات الى ذكرتها عليها ولك الشكر الجزيل

أخوك الخضاري.....

المترو

26/12/2003, 11:42 AM

هلا وغلا العارض بالخير وفعلا عمل جميل وممتاز بس عندي سؤال
ماهو موقف الاسبير الخلفي من السله اذا هو تعليق بما انك فكرت لليوكون فكر لنا بالجيب وش لون تحط السله وسبيرك خلف السياره
انا فعلا ابي ادرس الموضوع لانه جدير بالاهتمام ومفيد لنا جدا جدا

والله يحفظك ويسلمك يا العرض

وسلامتكم الرحال2003

فـ(الجـوف)ـتى

26/12/2003, 12:46 PM

مشكووووووووووووووووووور

ماقصرت الله يعطيك العافيه 0

الـ ع ـارض

26/12/2003, 01:58 PM

الطيب الخضاري فـ(الجـوف)ـتى

العفو يا اخوان والشكر لكم لتشريفكم الموضوع بالرد عليه :D

الـ ع ـارض

26/12/2003, 02:04 PM

الرحال2003

هلابك يا الغالي ومشكور على ردك اما بالنسبه للجيوب اللي فيها الاستبنه معلقه على باب الشنطه يتخلف مقاس عامود القاعدة الموجود تحت الصدام وبيكون اطول بحوالي 5 سم وايضا العامود الموجود بالسله اللي يدخل يقاعدة الهوك يكون فيه اكثر من فتحه لمسمار التأمين لا ختلاف مقاس السيارات .

عموما ترا الموضوع له اكثر من حل ومهوب صعب انت اشتري السله وحدد نوع سياراتك وموديلاها وانشاء الله حلها موجود عندي .

ويا هلابك

الـ ع ـارض

26/12/2003, 02:17 PM

ابوقاسم

26/12/2003, 10:22 PM

الف شكر للاخوان وخاصة الاخ العــارض على طرح المواضيع المفيدة واللي ما احد منا يستغني عنها .

الـ ع ـارض

27/12/2003, 08:31 AM

شكرا لك يا الغضى على تشريفك الموضوع

عاشق الخزامى

27/12/2003, 10:43 PM

مشكوور اخوي العارض على الموضوع الجميل والفكره الجميله

ولكن انا عندي فكره وهي معروفه للجميع حيث اني عانية كثير اذا جيت اروح للبر ونت عارف حوسة البر

وكثرتها ,,,, رحت يا طويل العمر للغرابي وفصلت على السلة اللي فووق شراع تنزاني من النوع القوي

سيارتي بثفاندر يعني حجم المساحه اللي فووق مو كبيره .ففصلت بطوول 135م وعرض 110م

وسيارتي مافيه ماسك من الامام ولا حتى الخلف فقط من الجوانب فسويت حزام 4 يمين و4 يسار
بالاضافة الى زوايد 3 ربطات من الجهتين للامان اكثر . كذلك ارتفااع 63 متر والميزه الجميله

ان الشراع يسكر بسحاب ,,, فكره طبعا مو جديده لكن لتعم الفايده للجميع وضعتها واري انها

كذللك سعرها جيد 150 ريال
صدقني اخوي العارض راح اقولك اني شايل اغرض عليها مو بسيطه مثل عدد 2 رواق خيمه وعزبه

من النووووع الكبير و5 حزم حطب وفرشتين ومنقد كبير لشوي و2 مراكي عادي واغراض اخري

ومع ذلك المكان اللي رحتلها مو قريب وكله نفوود ومع ذللك لله الحمد ماسكه ولاا كأن معاك حموله

كذلك حتى لسفر ارى انها جدا عمليه مهما بلغ العفش بشترط ان لاتكون بلاستيكيه ونت عارف حرارة

الشمس لما تكون عليها ,,, سووري للاطاله ولكن اردت المشاركة في الموضوع
واللي عانية من عدم الاستفاده من المرتبه الخلفيه ونحلت والله الحمد المشكله

الطيب

27/12/2003, 10:58 PM

وعليكم السلام ورحمة الله

:row: :confused: سفهته ؟

راعي عنيزة

28/12/2003, 05:52 AM

رائع يالعارض وفكره ذكيه مشالله عليك

ولكن وش وضع اغراضك اذا اسرعت في مسحيه او صبخه مغبره !
ما تتوقع بحكم ان السله مكشوفه وخلف السياره انها بتندفن هي والاغراض الي فيها من الغبار ؟

الـ ع ـارض

28/12/2003, 06:28 PM

الطيب
اســــــــــــــــــــــــــــــــــــــــــــــــ ـــــــــــــــف
ما انتبهت لردك يا غالي

وبالنسبه للمرور وسع صدرك :D

الـ ع ـارض

28/12/2003, 06:33 PM

راعي عنيزة

ملاحظه ذكيه ومهيب غريبه على اهل عنيزه;)

ان كنت ناوي تدخل ريغه من الاساس افرش طربال داخل السله وحط عفشك همن صك عليها الطربال واربطوه بحبل وانتهينا

وياهلابك

بــرق الشمال

29/12/2003, 03:26 PM

اخوي العارض يعطيك الف عافيه على هذه الصور
وهذه الطريقه المجديه....:good:

الـ ع ـارض

30/12/2003, 09:26 AM

برق الشمال

الله يعافيك ومشكور على ردك

القناص

22/02/2004, 07:26 PM

اسعد الله اوقاتكم بكل خير

فكرة رائعه يالعارض

مداخلة بسيطه

لمن لا يوجد لديهم هوك مربع لتحميل السلة وفي حالة رغبتهم تركيب هوك مربع يجب الحذر من تلحيم الهوك في الشاص.
لكي لاينعوج الشاص عند الحمول الثقيلة او المطبات القاسية.
هذي النصيحة سمعتها من مدير قسم السمكرة"استرالي" في ورشة وكالة دووج "المتحدة" حيث يرد اليهم من يركبون السلات الخلفية لتركيب العفش او الدبابت او حتى الطائرات الشراعية.
حيث يوصي بتركيبها باستخدام 6 مسامير ربط على الاقل وبدون تلحيم الهوك في الشاص.
ودمتم

http://www.jcwhitney.com/wcsstore/jcwhitney/images/imagecache/I19417.gif;pv3b16214fd01874de

http://www.jcwhitney.com/wcsstore/jcwhitney/images/imagecache/I11649.gif;pv8f1c04ec99967656

.

الـ ع ـارض

23/02/2004, 10:23 AM

كلامك في محله اخوي القناص ولكن ما يضر الشاص اذا ركبت المسامير ولحمت القاعده بالشاص زيادة امان

التلحيم بعد تركيب المسامير وليس العكس

على العموم هي وجهة نظر ومشكور اخوي على ردك وحرصك

ويا هلابك

قناص الحبارى

28/02/2004, 09:41 PM

بسم الله الرحمن الرحيم

السلام عليكم ورحمة الله وبركاته

عندي مداخله بسيطه لو سمحوا لي الأخوان...

نفس السله الموجوده بالصوره تقريبا شفتها على سياره وصورتها ورحت للحداد

وصممت زيها بالضبط وكلفتني الشغل مع الصبع 200 ريال فقط لا غير!!

ولها عندي 4 سنوات مثل الحلاوه بس كل سنه أصبغها عن الصدا 20 ريال مع التنظيف

لأن سيارتي وانيت شفر غماره ونص,,,,

أشكركم للأنصات والمتابعه

قناص الحبارى

عبدالعزيز الدباسي

02/03/2004, 03:11 PM

ما يصير اخوي قناص الحباري تدخل وتعطينا هالمعلومات السريعة ،، وانت ماشي:p

حنا يالغالي نبي زود اعلوم ، ولازم تعلمنا وش السالفة وكيف سويتها ، وعطنا صورة لها

راشد ابراهيم

02/03/2004, 03:38 PM

الاخ العارض
السلام عليكم ورحمة الله وبركاته
بارك الله في جهدكم ،ومتأكد انكم بذلتم جهد كبير لاخراجها بهذة الصورة،والله لايضيع عملك واجرك على الله
اخي الكريم
لودعمت السله من الطرفين بسلسلتين تمتد من التنده تتصل بالسله المثبته فيها ،ارى انها ستكون اكثر امن ،مرائيتكم وفقك الله

محب الشمال

08/03/2005, 09:15 AM

اخوي ابي عنوان الورشة في الصناعيه
او على الاقل اي صناعية تتكلم عنها في اي حي بالظبط
وشكراً لك والله يحفظك ويعافيك

المطلق

08/03/2005, 03:10 PM

أخوي العارض

اللع يعطيك العافية على الشرح المصور

وما قصرت

mo76m

12/03/2005, 08:17 PM

السلام عليكم
اخوي العــارض وين الحداد اللي بالصناعيه

:)

ابوسحاب

15/03/2005, 12:08 PM

اخوي العارض
شكرا على هذا الطرح الجميل والمفيد ،ولكن مارأيك في وزن هذه السلة ،اضن وزنها تقيل ،ما رأيك بتبديل الجوانب بالواح المنيوم بدل الحديد وقد يكون هذا اخف على السيارة وعلى اللي يبي يركبها وينزلها

فوفو والهلي

15/03/2005, 11:20 PM

مشكور على الوصف المفهم الي يخش اللراس

الـ ع ـارض

16/03/2005, 09:11 AM

الاخ راشد ابراهيم
مشكور اخوي على ردك ... وبالنسبة للسلسلة ما اعتقد انك تحتاجها اذا ما حملت السلة فوق طاقتها ولو فرضنا انك ركبت سلسلة مثل ما ذكرت وحملت السلة بوزن زيادة ما اعتقدد ان ارضيتها بتتحمل ... السلسلة بتخفف من ضغط الوزن على العامود اللي شايل السله وليس على كامل السله ... والله اعلم

الاخ الميناء
سؤالك موجه لي او للاخ قناص الحباري ؟

الاخ الرياعي
الله يعافيك ومشكور على ردك

الاخ mo76m
اخوي السلة انا شاريها جاهزه اما التعديل فأي ورشة حدادة ممكن تسويها ...

الاخ ابو سحاب
الله يسلمك بس مافيها اي الواح حديد بالجانب ... مجرد عواميد وترا وزنها خفيف وتقدر تشيلها وتحطها بكل سهوله .... ويا هلابك

الاخ فوفو والهلي
العفو اخوي ويا هلابك

منــاكد

17/03/2005, 12:16 AM

الأخ العارض ولايهونون الشباب...

جزاك الله خير على هالموضوع المتكامل...

وانا لي موضوع عن الهوك الذي يحمل السله...وإمكانية تركيب هوكين لزيادة التحميل على السله...

وهو على هالرابط لمن اراد الإستفاده:

http://www.mekshat.com/vb/showthread.php?t=29579

.

ابوسحاب

19/03/2005, 12:23 PM

الاخ العارض
ارجو ان توسع صدرك علي وتتحملني، انا ما صبرت رحت وشفت السلة وكانت فعلا على ما وصفت خفيفة وممتازة وتعديلاتك ضرورية .ولكني وجدتها تتكون من جزئين اي سلتين يربطن في بعض بمسامير عادية مع الهوك ،وهذه قد تكون مشكلة مع المطاب والحمل الزايد لو مال على احد الجهتين فقد تنكسر السلة او الهوك او القاعدة ، فما رائيك لو وضع لها هوكين او قاعدتين مع اطراف الشاصي وتم تلحيم السلتين مع بعض اليس في ذلك حماية اكبر . . ارجو الرد.

الـ ع ـارض

19/03/2005, 05:28 PM

يا هلابك اخوي ابو سحاب

وان ما شالتك الارض نشيلك فوق روسنا .....

كلامك صحيح ولكن المسامير ليست على العامود الذي في الاسفل فقط ولكن هناك مسامير ايضا في المنتصف على جدار السلة من الامام والخلف وايضا لما ترفع الدور الثاني من حاجز السله يجب ان تظيف مسامير لزيادة الامان فيكون عندك عشرة مساامير تمسك السلة من اولها الى اخرها ....

وان بغيت تلحمها من المنتصف وتستغني عن المسامير فيمكن ذلك ولكن تفقد ميزة فك السلة عند عدم الحاجه لها وتصفير حجمها في حالة التخزين في المستودع مثلا ولا تشغل مساحه كبيرة ....

هذا والله اعلم

صاروخ

31/01/2006, 11:41 AM

انت مبدع يالعارض .
لانك تتعب على الشغل السنع .

خالد2000

25/03/2006, 01:46 PM

السلام عليكم
اخوي العارض
انا استعمل السلة من سنة تقريبا اشتريتها من السنيدي ببريدة
المشكلة انها بعد كم مشوار يطلع الهوك من الصدام
صلحته اكثر من مرة ودبلت الحديد ومع ذلك يطلع بشكل مائل للاسفل
السلة هذي مسطحة بدون جوانب كنت ناوي اعدل عليها لكن قلت انتظر هي بتضبط ولا لا
ارجو من عنده طريقة لتثبيتها بشكل دائم وبشكل مستقيم يدلني على الحل
سيارتي لاند كروزر

شاكرا لكم تعاونكم ...

ابودلـــــــه

28/03/2006, 02:58 PM

<TABLE class=tborder id=post96696 cellSpacing=1 cellPadding=6 width="100%" align=center border=0><TBODY><TR><TD class=alt2 style="PADDING-RIGHT: 0px; PADDING-LEFT: 0px; PADDING-BOTTOM: 0px; PADDING-TOP: 0px"><TABLE cellSpacing=6 cellPadding=0 width="100%" border=0><TBODY><TR><TD noWrap>الـ ع ـارض (http://www.mekshat.com/vb/member.php?u=350) http://www.mekshat.com/vb/images/statusicon/user_offline.gif<SCRIPT type=text/javascript> vbmenu_register("postmenu_96696", true); </SCRIPT>
</TD><TD width="100%"></TD><TD vAlign=top noWrap>

</TD></TR></TBODY></TABLE></TD></TR><TR><TD class=alt1><HR style="COLOR: #cccc99" SIZE=1>السلام عليكم ورحمة الله وبركاته

</TD></TR></TBODY></TABLE>

ياليت عندك صور ياليت ياليت .......... مع الشكر الكثير

}{التميمي}{

19/07/2006, 02:36 PM

مشكووووووووووووووووووور

ماقصرت الله يعطيك العافيه

ذيـب الاشجعي

22/07/2006, 08:56 AM

مشكووووووووووووووووووور

ماقصرت الله يعطيك العافيه

صيهد

05/12/2006, 07:09 PM

جزاك الله خير