ممكن طرق جديدة لصيد الثعابين

[كوبرا القصيم]

السلام عليكم

كيف حالكم أخواني وأخواتي أعضاء منتدى مكشات

انا هاوي صيد وتربية الثعابين والعقارب ولكن للأسف ماحصلت خلال طلعاتي الشبه يومية خلال العام الماضي والسنة هاذي إلا وحده وهي أفعى السجاد الشرقي وكانت تحت حصاة وأغلب اللي عندي من اخوياي يحصلونهن ويصيدونهن لي (جزاهم الله خير)

واللي عنده أي طريقة يعتقد أنها تنفع لصيد الثعابين يقولها حتى لو كانت مكلفة وله جزيل الشكر

وللمعلومية الثعابين مو كلها سامة فيها السام ونصف سام وعديم السمية أما العقارب فكلها سامة وللاسف كثير من الناس اذا حصل اي ثعبان ينهي حياته بدون سبب وبدون مايعرف هل هو سام او لا لأنه ثعبان ولازم يموت

بانتظار أفكاركم وطرقكم

[ابوسليم]

ماشاء الله عليك وعلى عدم خوفك من هذه المخلوقات . انا كنت اتوقع ان غالبية الأماكن البريه يوجد فيها
العديد من هذه المخلوقات . وانت تقول انك طلعة اكثر من يوم ولم تجد شي :confused: .

ارجو لك التوفيق وان الله يحفظنا واياكم من كل شر ........
*************

[اخو سعود]

احسن طريقه لصيده بالشوزل
ولا توطه بالكفره
اقول الله يهديك وانا اخوك وشذا الهوايه الله يستر بس ويخليك لهلك
وعلى فكره تراها ما تسوا عليك لو حصل خلل فني وانت تصيد
انا اتمنا انك تترك عنك القوارش واذا انت معزم مره لازم تاخذ معك ناس محترفييييييييين ومعهم جميييع الادوات الازمه
تحياتي للجمييييييييييييييع واتمنا ما تزعل من كلامي

[ابو صقر992]

اخوي كوبرا القصيم الله يكفينا شرها اجل وش تبينا نسوي نتركها لازم تذبح هي سامه ولا لا ابقعد اشوف هي سامه على كذا تبا تقرص اي واحد هه 0

[كوبرا القصيم]

أخوي أبو سليم : اللي تبيه ما تلقاه واللي ماتبيه تلقاه دابل كبدك

شاكر لك مرورك وتعليقك الحلو

أخوي اخو سعود : آمين الله يهدي الجميع والحمد لله عندي خبرة فيها ومعي أدوات الصيد وحقيبة اسعافات أولية وكل الإحتياطات اللازمة
واللي يزعل من كلامك يطق براسه الجدار ههههههه

أخوي أبو صقر 992 : أقصد بعض الناس اللي يمشي بسيارته واذا حصل شي بالطريق قام ذبحه وهو مو جالس بنفس المنطقه أما اذا حصلها بمنطقة المخيم له الحق بذبحها

[عاشق تمير]

الله يكفينا شرها وجميع اخواني المسلمين ياخوي نخاف منها اذا شفنى صورتها كيف تبينى نعلمك احسن طريقه لصيدها بس فيه طريقه وهي رميها بالخرازه ولا توطها بالكفر سواءً سامه او غير سامه اقض عليها وتقبل مروري

[كوبرا القصيم]

عاشق تمير جزاك الله خير

[مسامرالليل]

ياخوي
اسمحلى حول تعليقى على موضوعك
حيث ان هوايتك هذه غريبه , وان كانت منتشره حسب اطلاعى وليست جديده بالنسبه لى , ولكن ماهى الفائده المرجوه من خلال هذه الهوايه العجيبه هذا مجرد استفسار من اخوك وامل ان يكون صدرك رحب حول تعليقى , وهل من الممكن ان تعرض لنا صور للثعابين العديمة السميه وكذلك النصف سامه والسامه كليا
لنكون على بينه من الامر .
تقبل مروري

[ابوغريب2006]

السلام عليكم

المطلوب
1 درام صيغ او بلستيك يكيقك
2 يوجد جهاز عند محلاتالادواة الكهربائيه الي هو لمبه طواري طويله
3 استبدال اللمبه بلمبه لون ازرق مثل حقة صيادت الذبان
4 تضع البرميل بمستوى الارض وتضع اللمبه فوقه بمتر
5 صيد وفير

[ابوعاشق فهد]

السلام عليكم ورحمة الله وبركاته
اسمع يا اخي خذ هالطريقة ذكرها لي واحد مجربها خويا له بشرط اذا ضبطت الطريقة ابغا هدية كوبرا او ام جنيب(الجنيبية)

الطريقة مخصصة لثلاث اشياء ( الثعابين - العقارب - الحصني ) انت وحظك

الطريقة:
1- سطل (دلو - او درام ) بلاستيكي
2- علبة تونة من اللي لها ريحة تهبل وزيت وحركات
3-تحدد مكان يغلب على ظنك انه تتواجد به هذه الكائنات المرغوب صيدها
4- تحفر و تدفن الدلو كله بس تخلي فتحته مواسيه للارض وتمهد الارض اللي حوله
5- تفتح علبة التونة وتضعها في قاع الدلو البلاستيكي
6- تروح وتسوي علية دورية كل يوم . تمر عليه لين تشوف وش جمعلك:eek:

والبعض الاخر جرب طريقة اللمبة الغاز القوية زي الزنن بس تجيبلك كل شي يدبي على الارض (دمغ دماغ):j

[كوبرا القصيم]

أخويmsamer : اللي بيزعل منك يطق براسه الجدار لين يرضى
وبالنسبة للفائدة من الثعابين أنا استفدت منها كثير وعرفت أنواعها ومدى خطورة أي ثعبان اصادفه والأهم من كذا الإسعافات الأولية ومسوي معرض صغير بالإستراحة أعرف اللي يجي من الشباب بالثعابين اللي عندي ومدى خطورة كل نوع والفائدة من معرفتهن اذا طلع شباب للبر ولدغ واحد منهم ثعبان غير سام وعافين نوعه فالوضع عادي وخاصة الملدوغ ما رايح يتأثر بس اذا كانوا مايعرفون هل هو سام أو لا بيصير فيه ربكة وخوف شديد للملدوغ ، وإلى غيرها ذلك من الفوائد
أما بالنسبة للصور إن شاء الله رايح أنزلها مع تعريف كامل لكل نوع

أخوي أبو غريب2006: طريقتك حلوه وختصره وشامله ليحوانات البر وشاكر لك تفاعلك وإن شاء الله رايح أجربها

أخوي ابو عاشق فهد : شاكر لك تفاعلك ولك اللي طلبت بس خلها تصيد لأني جربتها بسطل بويه وحطيته في وسط بيوت طين مهجورة بالمزرعة وأنا متأكد أن فيها ثعابين وكثير أشوف سلبهن(جلدهن القديم) وكل ما أجي ألاقي(الله يكرمكم) خنافس وجعول بالسطل ( يمكن عشان السطل قصير وتطلع منه )

[جمعان 22]

يا دافع البلا :)


طريقة السطل ولكن استبدل السطل بدرام اطول علشان اللي تصيده ما يطلع

والافضل من ذلك كله هو ان تضع كاميرا فيديو شغالة طول المدة على المصيدة وتستمتع بمشاهدة الفلم بعد ذلك :)

[كوبرا القصيم]

أخوي جمعان 22 : أكيد بستبدل السطل بدرام أطول وسالفة الكاميرا فكرت فيه قبل كذا بس خفت تسرق كامرتي

شاكر لك مرورك وتعليقك

[عا سبيل بر]

أخوي كوبرا القصيم

الله يوفقك ويسهل أمرك

والله الله بالأذكار والمحافظة على الصلاة

والأخوان المستغربين من هوايت أخونا كوبرا...... ترون المسأله هواية والألف ميل يبداء بخطوه

[كوبرا القصيم]

أخوي عا سبيل بر : الله يجزاك خير على النصيحة الرائعة وألف شكر للمرورك العطر ونصائحك الذهبية

[راعي حركة]

والله انك تع جبني ولا تنسا تعطينا من الي عندك

[حبنان]

يعطيك من خيرها ويكفيك شرها توقع من الهوام

[كوبرا القصيم]

أخوي راعي حركة : أبشر بطلبك بس خلنا نكون مجموعة تسوى

اخوي حبنان : الله يجزاك ألف خير على النصيحة الرائعة

دمتم بود

[ابوسعدبدر]

ما اقول الله يستر علينا وعليك والمسلمين اجمعين .

[كوبرا القصيم]

أخوي ابو سعدبدر: آمين والله يجزاك خير على الكلمة الطيبة

ومشكور لمرورك بالموضوع

دمت بود