للصقار فقط:بهذا الموقف وش ردة فعلك

[لعّاب المنايا]

السلام عليكم ورحمة الله وبركاته


مسيكم الله بالخير اخواني الصقاقير :)


من موسمين تقريبا طرح فرخ حر في أحد دول الخليج العربي واتصل واحد من الربع هناك وبشرني قال طرح طير طيب عندهم وشرايك فيه يابوراشد ترى الطير يناسبك توكلت على الله وكنت في إجازه ورحت عند خوينا بمنطقتهم وطلعت انا وإياه لسوق الطيور للمزايده على الطير عندهم ووفقني الله بالطير وصار من نصيبي ,,
وحنا بالسوق تقريبا كان الوقت صباح بعد مانتهينا إجراءات الطير ودفع فلوسه إستأذنت من الرجال وقلتله إني أبمشي لديرتي قال أصبر غداك اليوم مستوي وأبروح انا وإياك اليوم العصر للمدعى العام عندنا بالمنطقه عندي طير قرناس رابع والطير وهو من عمره بكر وثنو وهو ما شاء الله صايد من الحباري كثير واموره زينه
بس من طلع ثالث قلب راسه الطير ووفقنا الله بحبارتين لكن الطير ما بغاهم الثنتين يلحق ولا وصل عندها حل عنها وطرّح على طول دخل الطير الربطه وطلع الحين رابع وانا خايف إنه يصير مثل ما صار العام يحل عن حباريه واكون ادخله السوق أفضل لي,, بس إني فكرت الموسم هذا أشتري له حبارى من السوق وأفكها له وأشوف وش بيسوي معها ,,:rolleyes:
قلت له يابو ناصر شورك وهداية الله صار الرجال مجهز له حبارى كرتون وطلعت انا وإياهـ للمدعى عندهم عشان ندرّج الحبارى للطير ونشوف وش بيسوي معها الحاصل يا أخوان وصلنا المدعى قال يالله يابو راشد
جهّز نفسك ودرّج الحبارى للطير وبنشوف نزلت من الموتر واطالع وإلا مواتر الصقاقير من كل جهه وكان فيه زحمه شوي من الصقاره بس إنهم كلن بموترهـ يعني مانزل احد أو يدعي طيره او فاك لطيره حمامه او أي شي ,, أنا من بعيد اللي اشوفه إنهم كلن حاط طيره على كفه وكنه ينتظر هجوم مباغت وبغدرهـ بعد انا قلت لا إن شاء الله ما يسوونها والرجال ما جاء هنا بالمنطقه هذي إلا إنه خابر ربع مطنقته ,, درّجنا الحبارى للطير وفك الرجال طيرهـ ما أمداهـ يلحقها شوي إلا جانا مع كل جهه طير فروخ قرانيس أشكال والوان اللي تشابطت واللي تلّب على الحبارى :confused: المهم خوينا ما تحمل شاف طيرهـ حل عن الحبارى ما قدر يصبر طلع ام خمس وإلا هو يسدد الاولى الثانيه إلا والحبارى نازله شلو وقال والله مايفرحون بها هاللي ما يستحون,,:mad:
نتلفت يمين يسار نبي نرجع للطير إلا هو قريب ما أبعد لقيناه على الريشه مسافه قريبه تقريبا 500 متر ,,
ورجعنا محلنا اللي فكينا فيه الحبارى ما حصلنا ولا واحد منهم كل واحد أخذ طيرهـ وزبن يوم شاف الرمي الظاهر ,,:j


انا والله بصراحه أنبهرت :eek: من شدة الموقف يعني إلى هالدرجه نوعيه من الأوادم رايحه فيها ماتقدر الموقف الرجال مامداهـ يفك طير إلا والله هجوم ولاعلى عدو طير مع كل جهه :mad: ,,


ما أدري بهذا الموقف وش ردة فعلك اخوي الصقار !!!!

[نبع الدموع]

و عليكم السلام و رحمة الله و بركاتة

انا لو اني مكانك مع الرجال ما اقولة غير تسلم
يمينك يالذيب هالرخوم ما يبيلهم غير كذا.

لا هنت

[نايف الخالدي]

انا ماقول الى بيض الله وجهه خويك
هالاشكال ماينفع وياها الى الي سواه
هو سوى المطلوب

[قاصدجداكم]

مساك الله بنور لعاب المنيا

انا قريت الموظوع ويعطيك العافيه

الغلط راكب الجماعه الي هدو طيورهم عليكم وماسوا الا العدل خويك يوم ظربها لا تلومهم الحين الوقت هذا الكل يشل طير الي له الطير ولي مالهم خص

وهذيلا الي هم من الاول وهم صغار ماودهم اهلهم مجالس الرجال ولاتلومهم وايذ مشاكلهم

[أبوإبراهيم1]

كن حذر
وهذا درس لاينسى
ولاكن في إعتقادي ان مثل هده النمونة من الصقاقير قليلة والحمد لله والخبر ينتشر بين الصقاقير ولا يقنص مع مثل هذه الأشكال ، والشيء المعروف عند الناس ان الصقاقير أناس يمتهنون مهنة شريفة توارثوها من من قبلهم لها قواعد وظوابط . وهي كما قيل (هواية الملوك) فإن أخل قلة منهم ، ستجد الكثير من من يسرك
-
-
الحمد لله انها صفة على هذا الشيء وما كبرة

[طارق الحربي]

لو اني بمكانه

ما ارمي الحبارى

ارمي طيورهم واحد واحد :)

وابن امه واحد منهم يتكلم

[بعيد الشوح]

بيض الله وجه خويك حتى الحبارى من كرتون يعني اني شاريها بيهدون عليها الله يلعن ابو هيك عينه وتقبل مروري

[أبوتركي]

شر البلية مايضحك ،،، بس يوم قلت الشوزل ،،، توقعت الرجال رمى طيره ,,

وبعدين إذا كنت هذي مهاد الجماعه بعذر طيره لو ترك الذبح بعد ماكان يذبح،،، معذووور أكيد من كثر المشابط ..

[ابو الوسمي]

بيض الله وجهك ووجه خويك احسن ماسواي ههههههههههه يستهلون وبوهم الرخوم...

[قلب ذيب]

قصه تحدث دائما !!؟
من المفروض ان يذهب خويك الى مكان بعيد خالي من تلك الاشكال , ويكون تدريج الحبارى عند سلوم الشمس وقت عشى الطير , وقت يكون الكثير من( جداد الصقاره ) قد عشوا طيورهم , اما يأتي في مدعى عام يلوفه 100 شخص فهذا خطأ ,الامر الاخر اذا كان مافيه غير ذا المكان وجب عليه تنبيههم واحد واحد وتحذيرهم في حالة هددهم عليه !
طيره طبعا ماشنذره هذا سبب عدم ذهابه للحبارى ! وبعدين الطير خاف من السيارات والطيور وهذا سبب ثاني
تعليم الطير وتجريته على الصيده له اسس ونظم وقواعد لابد للصقار ان يحتاط لها -------- شكرا لك .

[خيال الصبحا]

وعليكم السلام ورحمة الله وبركاته
الأخ لعاب المنايا
ترددت بالمشاركة لإنك كاتب
للصقار فقط ، وانا الى الان لا احمل
اسم صقار ، على كل حال ، الله لا يجعلنا
من هالنوعية ، فعلهم غلط 100% وعيب ولكن
فيه ناس ماتعرف العيب(بكل شيء بالصقارة وبغيرها)
الله لا يجعلني اصير صقار ان كان بيوم ابسوي الي سووه
وبيض الله وجه خويك على الي سواه بالحبارى ،وودك انهم طايحين
بانسان (طالب حرش) ويرمي له طيرين والا 3 على شان يتأدبون
ولكن بعد ماتسوى عليكم تذابحون معهم على شان هالشيء، وشكرًا

[خيال الصبحا]

تعليم الطير وتجريته على الصيده له اسس ونظم وقواعد لابد للصقار ان يحتاط لها
السلام عليكم
الأخ ابو ماجد
لو ارشدتنا مشكورًا
الى هذه الاسس(لإن اخوك
من المبتدأين بالصقارة)أكون لك
من الشاكرين ، وشكرًا

[ااابوخلف]

لو اني بمكانه

ما ارمي الحبارى

ارمي طيورهم واحد واحد :)

وابن امه واحد منهم يتكلم



كلامك صحيح اخوي طارق ,,,
اعشي طيري من ثنادي طيورهم ...:mad:

[المزروعي]

الله لا يحطني في هذا الموقف . إن شاء الله أني بقنص دار قفرا رمال وسيوح ما يوصلونها هذي النوعيه من الناس و لو عندهم ألف ما جلان !!

[مغــادر]

السلام عليكم ورحمة الله وبركاته

[مغــادر]

السلام عليكم ورحمة الله وبركاته
وبالنسبه لسالفه الي صارت معك انت وخويك لازم اتصير لأنكم غلطتوا في مكان هددكم والا مافيه حد بسوي طريقتكم بجي عند ناس ما يعرفون من الصقاره الا اسمها ومايدرون ان الصقاره الها ادابها واحترامها ,وبيض الله وجه خويكم في الي هو سوا وودك انه قضى على اطيورهم بعد عشان يعافون الطيور والصقاره بكملها,,,

[ابو الأيهم]

ما كل من نقل طير صقآآآآآآآآآآآآر

[العمراني]

مدري وش اقول لاكن الي زي هاذا وش تسوي في هيك شكله
الكبير كبير
تقبل مرووري

[لعّاب المنايا]

نبع الدموع/ لاهنت وقتها الرجال انا حبيت خشمه من اللي سواهـ,,
نايف الخالدي/ وجهك أبيض وفعلا الرجال سوى المطلوب,,
قاصد جداكم/ فعلا كلامك بمحله ولاهنت,,
أبوإبراهيم1/ إن شاء الله إنها نمونه صغيره والحمدلله إنها صفة على هالشي وماكبرت,,
طارق الحربي/ الحمدلله انها عدت على كذا والرجال خذها من قاصرها ورمى الحبارى,,
بعيد الشوح/وجهك أبيض وندعي لهم بالهدايه,,
أبوتركي/ هم موب من جماعته مدعى عام كل المنطقه تدعي فيها ولاهنت ,,,,
ابوالوسمي/وجهك ابيض وفعلا يستاهلون,,
قلب ذيب/ والله وأنا اخوك الديره موب ديرتي والرجال هو أبخص بربعه وعيال ديرته وأنا والله ماقدر أسوي شي ولا أعرف في ديرتهم شي وبغيت أقول شي للرجال وقتها يوم اني شفت طيورهم على كفوفهم بس قلت الرجال هو أبخص بربعه وكل يوم يجي للمدعى ,,وبالنسبه للطير مشنذر وقتها بس سبحان الله شي غريب اللي صار معه ,,
خيال الصبحا/ انت صقار على الفطره يا خيال الصبحا ومثل وشرواك كفو للصقارهـ ووجهك أبيض ,,
ااابوخلف/لاهنت اخوي
المزروعي/ الشكوى لله يابومحمد بس الدعوه كانت علومه وبمدعى عام وهذا اللي حصل والله لايحطنا بذا الموقف ولاكنا متوقعين ذا الشي إنه يحصل ولاصفر بالميه ,,
مغادر/ انا عني والله الديره جديده علي ياليتها الديره الدوله كلها اول مره أجي مدعاهم ولا بيدي حيله ,,
خصيم الرخايم/ فعلا ماكل من نقل طير صقاااار ,, بيض الله وجهك ,,

[alajmi110]

والله يا ابو راشد انها مشكله وتصير كثير
ولكن الله لا يحطنا في ها الموقف:d
ولكن في هذي الاحوال يجب استخدام العقل اذا انهم خلو للواحد عقل
اما رفيق جعل يمناها تسلم:d
ودك والله بأنه سدح كم طير مع الحبارى عشان يعرفون يتعدون على حاجه ماهي من حقهم

[وَسَام!]

من الاساس مفروض لاجيت تعلم طيرك تجي في خلا مافيه احد!!!!!!!!!
ومادام انها على ماقال نشبت رجيل حجيل !! ماله الا اللي سواه!!!!!!!!!

[ابرق العزاف]

المفترض مادام فيه خلق بهذه الصفات يذهب لمنطقه غير
ولوانه حط الرشاش بطيوره كان احسن على الاقل يذعرها لهم حتى يعرفون
اللقافات0000 شكرا

[قنيص غبر]

مثل ماتكرم بعض الاخوان .. لو انا اريد اعلم على حبارى رحت منطقه مافيها احد !!
واسمحلي ياخوي في نقطه مهمه .. لو انا ساير المدعى العام على قولتك . وهديت طيري على حمام مثلن وانت من بعيد هاد على حبارى وشافها طيري وصادها شو بيكون موقفك !! هذا مكان المفروض مكان دعو وفيه ناس وصقاقير .. يعني لازم الواحد يعمل احسابه .. وثالثا المفروض تسير حق الجماعه واتقولهم انك بتهد على حبارى يعني يلزمون طيورهم ..

لكن قدر وماشاء .. وسالفة الشوزن انا عندي تحفظ لنه يمكن في هذي اللحظه تصيب شخص وتصير سالفه لك انت في غنى عنها . او انك تعور طير واحد من الربع وتخسر صداقته ... واعتقد في ذبحها اب هالطريقه مساله شرعيه !!!!!!!!!

خلاصة الكلام سير بعيد ورجع سالم .. وعلى قولة اخوي قلب الذيب احسن وقت لتعليم الطير على الحبارى هو وقت معشاه قبل المغرب .. وهو وقت معضم الصقاقير خلصت دعو ...

والسموحه

[عبدالرحمن ‍]

موقف عجيب.. بس لو انا في نفس الموقف بسوي اللي سويته .. بحب خشم رفيقي :)

وهالنوعيه من الناس انتشروا ذي الايام .. ويلوموني اذا قنصت في مكان مافيه الا ثري وثر اخوياي

تقبل مروري

[الزعـبي]

هذولا مافيهم رجال ... وخويك غلطان مفروض يوديك لمكان بعيد عن العالم علشان تاخذون راحتكم...

[سنجااار]

اول شي يالعاب المنايا انتم غلطانين رايحيين بتعلمون على حبارى وبالمدعى العام كان دورتو ارض صاده عن هالناس الي ماتستحي تعلمون على كيفكم وانتم مرتاحين
وهذولا دواهم والله من يثور في طيورهم

[شبراق]

الله يكفينى شر الحسد هذا اعوذ بالله مايوفر ولا تعلوم

[عا سبيل بر]

لا حول ولا قوة إلا بالله

والله جانا جيل لا يعرف لا أحترام ولا أخلاق
وناس ذبحتها المرجله الزايفة

حتى وأنتم في مدعى عام <<<<< تبقى الأخلاف أخلاق

تخللللللللللللللللللللللللللللللللللللللللللللللف

[افزعواله]

جعلني ما افقدك ولاخويك ........وقله يمينن سالمه

[الطبشي]

الله يكون في عون الجميع .....ويهديهم انشاء الله

[((السنياري))]

اول شي هذي اسالفه كني اعرف وين صح

الثانيه الغلط مو غلطهم غلطك انت انت الي جايب خويك لساحة دعو

المفروض توديه للخلا ماحولك احد

وهل عالم الي متجمعه انتم الي جيتوهم1
ولا جايبين حباره هذي المونيه2
احمد ربك مامعهم طير اكله

طيركم هذا مريض شوفو عنه

فيه شباب يقول ارمي طيور العالم (وين قاعد) كني اشوف جيبك مخرق

تقبل مروري
وسمحلي على صراحتي

[طلق الصيد]

لو اني بمكانه

ما ارمي الحبارى

ارمي طيورهم واحد واحد :)

وابن امه واحد منهم يتكلم
لو اني مكانه مثل ماقال اخوي طارق والله ان اتعلم النصع في طيورهم وشرط ماواحد منهم يتكلم لانهم ماهم برجال لكن ماقصر,,,, الانسان لازم يكون حليم في ذا المواقف عز الله ان خوييك حليم

[محمد الفهيد]

والله موقف شين ويتعب

والله يعينكم ، ومثل ماقالوا الربع ابعد عنهم بعيد وعلم طيرك على راحتك

انا ولله الحمد ما احب ادعي في مكان فيه زحمه الا الربع الي اعرفهم ويقدرون الرجال

تحياتي لك

[أبو أمين]

حلاه يا بو عطفه لأرمي طيورهم واسوي منها ملاويح هههههههه
بيض الله وجهك ووجه خويك

[سيف الظفير]

خويك يا ابو راشد ذيب


وذكي وعرف يتصرف بالوقت المناسب والفعل المناسب


مع اشباه الصقاقيــــــــــــر


وعلمهم علوم الصقــــــارة



بطلقة شوزن

[أبو فهد العيد]

لو كل رجل(ن) ينقل الطير صقار,,, كان الصقاره ماتغير سنعها
مير الصقاره تختلف فيها الافكار,,,وهذا سبب عيب الطيور ووجعها
الطير له عند الصقاقير مقدار ,,, عند الرجال اللي حقيقه ولعها
والا الغشيم يخلي الطير بوار ,,, يشري من العالم ويدمر سلعها
ولا تامنه لايشوي الصقر بالنار ,,, كلمة مثل كل(ن) بسمعه سمعها


...بدر الحويفي...



عز الله ان رفيقك ماقصر باللي سواه, وليته بعد ملحق طيورهمـ,بالرمي

[عبدالله هدد]

اسمحلي اخوي
الخطاء من خويك,اللي يهد حبارى وسط مدعى الطيور,
وانا لو منك,كان شرت عليه يبعد ويهد حباراه بالخلا.
وخله يحمد ربه انه كسب درس ومرت سلامات.
تقبل مروري

[سيف الظفير]

يا اخوان وجهه نظري


حتى لو كان المكان للمدعي المفترض ترك الصقار يدرب طيرة وياخذ راحته لأنها ماهيب نهااابة




الحبارى تخصة ويبي يهد طيره عليها .

[لعّاب المنايا]

بيض الله وجيهكم ولاهنتوا ,,:)

ومثل ماقلتلكم بالموضوع انا ضيف عند الرجال بدولته ولاعرف وش طريقة مهدهـ وتعليمه على الحبارى بيروح خلا وإلا بمزرعه وصلنا المدعى العام عندهم وحصل اللي حصل ,,
واللي كانوا موجودين بالمدعى قلت الرجال ماجاء هنا إلا إنه مايحتاج خابر اهل ديرته ,,
وانا مابيدي حيله وعلى ماقال ياغريب كن أديب ,, وإلا لو إني بديرتي
كان لكل حادث حديث ,,

[القطاوي 2008]

الله لا يحطنا فالموقف