ابيات شعرية لبدر الحويفي ابي شرحها تكفوووووون

[منقذ]

اخواني الله يحيي كلن باسمه لوتكرمتوا من يشرح لي هلابيات
للشاعر الكبير بدر الحويفي


الخرب ياغنـام ماهـو كـروان = تبرك عليه ولا يهمـك صفيـره
الخرب عابي لك قنابل بخـزان =يبي على خشمك يفك الذخيـره
غرّك فعولك يوم نقنص (لفيحان)=أثرك جيد لا قبضـت الكسيـره


وهذي ايضا


اليا قطعـت (البتر)وعروق(لـزّام) =ضاعت همومٍ بالضميـر مخنوقـه



في ديرةٍ مابـه مـزارع ومرسـام =بين (الخرم)و(الهوج)و(اشعاف لوقه)



مع ربعةٍ نقـوة شغاميـم وحشـام =وخويهم يحشـم ويعطـى حقـوق
وجزاكم حير وهناك بعض الابيات بس ماودي اثقل عليكم

[أبو فهد العيد]

السلام عليكم ورحمة الله وبركاته,,
مساكم الله بالخير,,
هالموضوع شدني لان فيه اسم الشاعر الكبير

( بدر الحويفي)
,وقصايد ابوسلمان تتمتع بالجزاله , وعمق المعنى.
وانا منيب اهل لاني اشرح ابياته لكن من باب المشاركه,
ابد مستعينا بالله.
البيت اللي يقول :




الخرب ياغنـام ماهـو كـروان = تبرك عليه ولا يهمـك صفيـره
الخرب عابي لك قنابل بخـزان = يبي على خشمك يفك الذخيـره
هالبيت هذا له سالفه ,, وهو ان ابوسلمان شرى طير ,,,وهده على خرب,,(حبارى),, ويوم لحق الطير الحبارى,مرشت عليه (ذرقت),, ومعروف ان مرش الحبارى يعمي الطير ويضره,اذا جا على وجهه,
والطير الغشيم هو اللي يخلي الحبارى فوقه,,لانها ممكن تمرش عليه,
وطير ابو سلمان تساهل بصيدة الخرب ,,يحسب صيده مثل الكروان,
وقال هالابيات بعد مامرشت الحبارى على الطير ,

...
البيت الثاني:



اليا قطعـت (البتر)وعروق(لـزّام) = ضاعت همومٍ بالضميـر مخنوقـه

في ديرةٍ مابـه مـزارع ومرسـام = بين (الخرم)و(الهوج)و(اشعاف لوقه)





ايييييييييه.. ذكرتني بذيك الديار الله يجيب الخير..
(البتر) (وعروق لزام),,هذي مناطق يدوجونها القنوص وموقعها في الشمال,,
(في ديرة مابه مزارع ومرسام) كنايه عن البر ,, انه مافيه مزارع ولا عقوم وبيوت,,,يعني خلا,
(بين الخرم والهوج وشعاف لوقه)هذي مناطق لاهل الطيور يدوجونها ويقنصون فيها,,, وموقعها بين عرعر ورفحا,,تقريبا,

البيت اللي يقول:



مع ربعةٍ نقـوة شغاميـم وحشـام = وخويهم يحشـم ويعطـى حقـوق


يقصد ربعه واخوياه اللي معه ومخاوينه في المقناص,,يمدحهم بكرمهم وشجاعتهم وقدرهم عنده,, وانه ماينظلم احد بينهم ولايهان قدره,, محشوم عن فعل الردى..

(اتمنى اني وفقت)
واتمنى من شعراء المنتدى التعقيب لانه يهمني رايهم,,
مثل الشاعر (ابوعبد الله الخليفه),,, والشاعر والمشرف (جرير), والشاعر (خالد الوقيت ,,(والشيخ مسكين),وغيرهم كثييييييييييييير,,ولا يهونون باقي الاعضاء ,, وكل(ن) فيه الخير والبركه,,

[منقذ]

شكرا يبوفهد على هالشرح عز الله إنك كفيت ووفيت
وونتظر باقي فحول الخيمة ليشاركونا
واستلم يبوفهد ايضا هلابيات لبدر

لا شطب الصيحان روس الزبيـدي =والعشب جاله بالمثاني,, عنـا قيـد
ولابدو مايبـدي لهـم,, بالشديـدي=تسعيـن ليلـة ماحكـوا بالمواريـد
ماهي الصيحان وماهي التسعين ليلة
وهالالابيات ايضا
وفيّض على فيحان ريف المعيـدي=بي لنـا بشعـاف لوقـه مطاريـد
على أوسـوق مقربـات البعيـدي=من فوقهن يازيـن مزح الاواليد

لا فرّع النـادر وطلعـه وكيـدي=حوّل على جوال الحباري تقل حيد
ابي شارح موجزللأبيات الثلاثة وتراي ماعرف الا لوقه هي ديرة بالشمال
واخيرا هذا البيت

وشفق على شوف الفضا والبراري=لا صار معه مشبـبٍ مسنـد لـه

تحباتي الحارة

[أبو فهد العيد]

حياك الله بأي وقت’’


بالنسبه للصيحان: هي جمع صحن, والمقصود فيها الارض اللي تجيك خضرا ولا فيها نبت,, وتسمى عند بعض الناس ,قاع,
وفي وقت الربيع تصبح هالقيعان او الصيحان خضرا وتميزها بعدم وجود نبت فيها,,( اقصد النبت الكبير ),,
واذا قربت منها تلقى الزبيدي اللي هو (الفقع)
مشطب الارض واحيانا تلقاه مصلع ’’فوق الارض,



اما التسعين ليله,
فحسب علمي ان المقصود فيها ,,ليالي الوسم وعددها اربعين ليله,,
والمربعانيه وعددها خمسين ليله,
هذا حسب علمي,
ولعل اهل الخبره يفيدونا.



واما الثلاث ابيات اللي تقول


وفيّض على فيحان ريف المعيـدي=بي لنـا بشعـاف لوقـه مطاريـد
على أوسـوق مقربـات البعيـدي=من فوقهن يازيـن مزح الاواليد


لا فرّع النـادر وطلعـه وكيـدي=حوّل على جوال الحباري تقل حيد


يقصد السيل والمطر ’’ يفيض في هالاماكن


فيحان,واشعاف لوقه,
والمطاريد:, كنايه عن الصيد وهد الطير,لان الطير يطرد ورا صيدته ,, وانت تطرد ورا الطير.
على اوسوق مقربات البعيدي’’ يقصد السيارات
من فوقهن يازين مزح الاواليد,, جمع وليده , والمقصود الرجال الدبره اللي مايعجزه شي.
لافرع النادر وطلعه وكيدي,, :يعني الطير اذا شيل برقعه وطلع للصيد ,, يعني شاف صيدته ,, شوفه مؤكد..
حول على جول الحباري تقل حيد, يعني مثل الحجر الكبير اللي طايح من جبل,





وشفق على شوف الفضا والبراري=لا صار معه مشبـبٍ مسنـد لـه
مشتاق لشوفة البر,, خاصة اذا صار معه رفيق قرم ومهوب عجاز و يسانده في كل شي.


هذا والله اعلم,, ولعل الاخوان يصححون ان كان عندي اخطاء.

[جرير]

تجمل ابو فهد وافاد بالشرح الوافي
عساه علي القوه والشكر لكم افد تونا جزاكم الله خير

[يوسف الخليفة1]

ما شاء الله عليك يا أبا فهد تجملت بالنشمي فبارك الله بمنقذ الذي كشف لنا هذه القدرات التي لا نشك

فيها مسبقا فلك تحيتي وتقديري والشكر الجزيل لك أخي وزادك الله علما واتقانا وحياك ربي

[عبدالرحمن الخالدي]

أبوفهد كفيت ووفيت ولاهنت على هذا الشرح المفصل , والشكر أيضاً موصول للأخ / منقذ
بارك الله فيك وفي الجميع وتقبلوا تحياتي وتقديري .

[صقار 2008]

كفيت ووفي يا ابو فهد

[أبو فهد العيد]

المشرف الغالي (جرير)
وشاعر مكشات العزيز على قلبي (ابوعبدالله)
والصديق والقريب الاخ(مذكور)
والاخ (صقار 2008 )
الله لايهينكم على هالردود الطيبه,, اللي تبهج الخاطر..
ومانستغني عن الفوائد اللي استفدناها منكم..
بيض الله وجيهكم..
ويابوعبد الله ترى العزيمه بمناسبة تغيير الاسم متى ما بغيت,ارسلي رقمك وابشر بها,
نبي نشوفك ونتشرف فيك

[يوسف الخليفة1]

المشرف الغالي (جرير)




وشاعر مكشات العزيز على قلبي (ابوعبدالله)
والصديق والقريب الاخ(مذكور)
والاخ (صقار 2008 )
الله لايهينكم على هالردود الطيبه,, اللي تبهج الخاطر..
ومانستغني عن الفوائد اللي استفدناها منكم..
بيض الله وجيهكم..
ويابوعبد الله ترى العزيمه بمناسبة تغيير الاسم متى ما بغيت,ارسلي رقمك وابشر بها,


نبي نشوفك ونتشرف فيك



أغناك الله من فضله ووفقك أخي أبو فهد وإن أردت رقمي فلا مانع لكن الوليمة عدها واصلة وهي مجرد مداعبة


سلمك الله ووفقك لكل خير وأخشى أن أقول من فود طيرك فتمسكها علي وتستحق من يزورك أخي أبو فهد لكن


لعل الأيام تجمع من يكون حيا وزادك الله من فضله وحياك ربي

[سوبر152]

ما شاء الله عليك يا أبا فهد تجملت بالنشمي فبارك الله بمنقذ الذي كشف لنا هذه القدرات التي لا نشك

فيها مسبقا فلك تحياتي وتقديري والشكر الجزيل لك أخي وزادك الله علما واتقانا وحياك ربي