مدري من اصدق اهل العلم او اهل الخبرة

[تالي الاولين*]

مساكم الله بالخير يالربع
وبقول السالفة اللي صارتلي هاليومن .
كان عندي طير طرح المملكة
علمته والحمدالله هديته والامور زينه وراكد في الموتر وطير صااامل وطلب واحد من الربع شرواكم يشريه واعطيته هدو المهم ارسلي طير الله يجزاه خير والحقيقة ماجازلي وعلى طول اخوكم بالله بداء رحلت البحث عن طير علومه دسمة شوي والسوق مافيه امل اروحله ( لاتسألوني ليش) مريت واحد من الربع واسولف انا وياه وذكر لي طير يعرفه ويقنص مع راعيه من سنين على طول شديت الرحال لصاحبنا راعي الطير وشفت الطير وجازلي شكله وانا حرصي على علومه قبل شكله لكن زيادة الخير خيرين وتفاهمنا ورسينا على المبلغ(22000) واخذت الطير ورجعت لرياض عند صاحبي اللي دلني عليه وطلب منى طلب اني اقيظ الطير عنده
وهو الله يجزاه خير ثقه وصاحب خبره المهم بعد يومين دق علي قال تعال تعش عندي وجيت بعد العشا قال بصراحه انا ناقد علي الطير تنفسه موهب زين ابد غير فحت الحر وعلفه ردي وانتم كلكم ربعي وما احط شي في ذمتي قلت جزاك الله خير ورحت للمستشفى وفحصت الطير وروعوني قالوا فيه ورم في الاكياس الهوائيه,,,
قلت يعني رداد قالوا متأكدنا لكن فيه ورم هذا اللي في الاشعة قلت خير واخذت الطير وعلمت خوينا اللي دلني عليه قال كلم الرجال وقله اللي صار علما انه بيرد عليك رد يزعجك شوي لانه مايعترف في المستشفى وكلمته وفعلا انزعج وقال والله لو شاك فيه مابعته لكن امستشفى والله انهم كذابين قلت عين خير واذكرالله قال الطير طبيعي اعرفه من اربع سنين وهذه طبيعته وإذا بغيت ترده لايردك ألى لسانك قلت الله يجزاك خير وانا بكلمك عقب كم يوم وقال خير .

اسف للاطاله يالربع لكن استشرت ربع لي وابي استشيركم الله لا يهينكم

[العمراني]

شوووف هاذا الحركااة اسئلني فيهاااا خبره بس مو خاام مخمووم لا يرووح بالك بعيد الطير المستشفى ماا فتح للبواشق توكد من المستشفى شووف هرجهم وكااد ولالا موو تفحص وترووح شف الدكتوور خذ العلم منه لجل لو رجعة للرجال ترووح وانت واثق انه به بلا وانت شرية طيب وبعد الفحص طلع فيه الي فيه رده اذا به بلا وتوكدت منه مريض وخذ الدرااهم واشري وكريه وحش اطيب للي مفارق طير غالي وتحيااتي

[تالي الاولين*]

حياك الله اخوي العمراني
مايحتاج اخذت كل الاوراق حتى صورة الاشعة رغم ان الدكتور قالي ممنوع بس اخذتها
والمستشفى كان فاضي يعني ماعندهم شغله الا الطير الي معي
وشاكرلك

[الكونترولCONTROL]

و الله انك صادق ,,, أحيانا تحتار ... تقول (( المتعلم واجب اتباعه لكي لا ألوم نفسي ))
و أحيانا تقول (( راعي الخبرة و بس !! ))
==================
لكن المسلم دائما يأخذ بالوسط
و الحكمة ضالة المؤمن .. أنا وجدها أخذ بها
--------
و اعذرني لعدم المشاركة في أصل الموضوع لعدم
إلمامي بالصيد بالطيور مطلقاً
و ان شاء الله يطيب طيرك .. و ترى يمدحون الكي !!!

[المزروعي]

السلام عليك ورحمة الله وبركاته .....

شوف حتى لا تظلم الرجال تأكد مره ثانيه و أنا بقولك ليش !!!!
فحصنا طير حق واحد من الربع يريد يشتريه و قالوا له المستشفى أن الطير فيه رداد مع أن الطير فرخ و توه وحش ما نصقر ( الطير جير حر ) . المهم صاحبنا تعلق بالطير و قال خلني أروح أتأكد في مستشفى ثاني يمكن عندهم تشخيص ثاني . يوم راح المستشفى وفحصو الطير طلع فيه شحم زياه على الرئه و المستشفى الثاني كان يظن أنه رداد !!!!! و الطير أيضا كان تنفسه صعب و طبعا هذا بسبب الشحم الزائد !!

[بيضا القاع]

انت اول ما خذيته من الرجال ما كان فيه شي بس يمكن جاه المرض بعد ما شريته او يمكن كان موجود فيه اصلا تحقق من الدكتور وخذه لكم بيطري واذا طلع المرض من زمان رده وخذ معاك اوراق الفحص حتى يتاكد الرجال والله يبدلك بافضل منه

[أبوتركي]

أنا أشوف أخوي تالي الأولين ,,, أنه دام الرجال اللي باعك الطير ... طلع أجودي وقال لك مايخالف ترد الطير .... أنا أشور عليك أنك ترده .... حتى لو طلع كلام المستشفى مهوب صحيح .. ولاتدخل نفسك في متاهات بعدين خاصه ان القيمة ماهيب هوينه ,,, والمثل يقول باب يجيك منه ريح سده واستريح ,, ويعوضك ربي بأبرك منه .. ويعوض راعيه الأول بعد ...

[أبو فهد العيد]

السلام عليكم ورحمةالله وبركاته,,
الله يعينك ويفرج همك,,
وانا رايي من راي اخي ((ابو محمد المزروعي))يمكن تنفسه وعدم شهيته للعلف,, من زود السمنه والعده,,
وانت ادرى ورفيقك صاحب المربط اخبر,
لكن تاكد,,وان طلع صحيح مريض,رجعه لراعيه, والحق ماينزعل منه,
الله لايفجعنا وياك ويفرج همومنا وهموك,

[تالي الاولين*]

اخوي الكنترول : الله يعطيك العافيه وشاكرلك اهتمامك اخوي
اخوي المزروعي : عرضت الطير علي طبيب شعبي واستنكر ظعفه شوي وقالي الطير علفه ابد مهوب زين
ويوم خلص قلتله عن السالفه والمستشفى قال نفعل اسباب لكن لاصار الدعوى مشترى استخرربك
وشاكرلك نصيحتك واهتمامك
ذيب النقيان : يطولي عمرك من يوم اخذته ماكمل 48 ساعه وفحصته علما ان المستشفى قال مزمن
ابوتركي : حياك الله وجزاك الله الف خير على النصيحه
ابوفهد : الله يعطيك العافيه وشاكرلك

يااخوان اسف لتأخيري
واسأل الله انه يوفقني وياكم وكل مسلم وانا يااخوان ابستخير والله يعين
جعلكم ذخر يااهل مكشات

[راعي عساف]

قال الطير طبيعي اعرفه من اربع سنين وهذه طبيعته

السلام عليكم ورحمة الله وبركاته


اذا كان الرجال ثقه ومعروف توكل على الله واخذ الطير لانه قال ان هذي طبيعه في الطير من اربع سنين

وعشان ترتاح اكثر تواعد مع الرجال وخله يشوف الطير بنفسه عند راعي المربط واذا تطابقت حالته الحاليه مع كلامه اخذ الطير والله يبارك لك

[لعّاب المنايا]

أخوي مسيك بالخير المفروض شرطت انت على الرجال الفحص وسلامة الطير عشان تفك نفسك من ذا الأمور ,,
ومن رأيي إذا الطير والله معجبك ومالك غناة عنه وودك فيه رح لعيادة الدرع ولاتقولهم إنك وديت الطير للمستشفى قل إني بشتريه وابغى فحص شامل له ,,

لإنه وأنا أخوك واحد من الربع الموسم الماضي كان معه قرناس وحش طرح الحماد الزمان اللي راح اول الوقت وطير طيب بالحيل قنص فيه اول الوقت وانا كنت معه ودعيناه انا وياه بالمقناص وفكينا له حمامه الطير لحقها شوي وطرح عنها وجلبناه على الملواح بحمامه يوم جانا إلا الطير يفح وحالته صعبه امسى الليل ومن بكره الطير برضوا معجبه جاء واحد من الربعه الظاهر إنه مسوي طبيب وجاي من فالكون سنتر . وقاله الطير فيه رداد قال راعي الطير انا والله رحت به للمستشفى قبل وقالوا لي إن فيه التهاب بالتنفس ولا إقتنعت بكلامهم ورحت ووديته لدكتور شعبي قال طيرك مافيه إلا العافيه والحين كنه رجع له نفس المرض أقنعه هذاك خويه وقاله يارجال والله فيه رداد وفك بالهواء وأكسب أجره قلت لا يفكه بالهواء بعني إياه انا ابغى اتطبطب فيه والطير اللي فيه رداد انا أسومه 200 ريال لإن الطير موات قالي نصيبك أخذت منه الطير وجلس معي يومين بالمقناص ودخلت فيه الرياض ووديته للدرع ودخل عند الدرع بالعياده وترقد مدة شهر كامل وطلع مافيه إلا العافيه وبعدها أبشرك صاد الثلاث ويجي على الملواح 150 وبعته 28000 آخر الوقت ,,

وانا أخوك لاتستعجل تأكد قبل من اللي فيه ,,

والله يرزقك الطير الطيب إن شاء الله ,,:good:

[قرناس ارامكو]

أنا أشوف أخوي تالي الأولين ,,, أنه دام الرجال اللي باعك الطير ... طلع أجودي وقال لك مايخالف ترد الطير .... أنا أشور عليك أنك ترده .... حتى لو طلع كلام المستشفى مهوب صحيح .. ولاتدخل نفسك في متاهات بعدين خاصه ان القيمة ماهيب هوينه ,,, والمثل يقول باب يجيك منه ريح سده واستريح ,, ويعوضك ربي بأبرك منه .. ويعوض راعيه الأول بعد ...

أنا أشور عليك أنك ترده ,واللة يرزق راعي الطير بالبيعة الطيبة ، وانت بالطير الطيب .

[صقار البحرين]

عسى الله يعينك على مشكلتك لكن انا اقول خل الطير عندك وافحصه في عياده ثانيه .....

[سلطان 1]

أنا أشوف أخوي تالي الأولين ,,, أنه دام الرجال اللي باعك الطير ... طلع أجودي وقال لك مايخالف ترد الطير .... أنا أشور عليك أنك ترده .... حتى لو طلع كلام المستشفى مهوب صحيح .. ولاتدخل نفسك في متاهات بعدين خاصه ان القيمة ماهيب هوينه ,,, والمثل يقول باب يجيك منه ريح سده واستريح ,, ويعوضك ربي بأبرك منه .. ويعوض راعيه الأول بعد ...




شى فيه شكه ابعد عنه ابرك لك

[ذراع الذيب]

لا استطيع ان اقول غير الله يعين ويساعد..

[أبوإبراهيم1]

رد الطير لراعيه الاول لان الطير مصاب من غيرك وبيض الله وجهه لانه إنسان متفهم 0
والطيور واجد ويرزقك الله أخير منه
( هذي وجهة نظري )
ولك التحية

[ميراج]

السلام عليكم ورحمة الله وبركاته
تالى الأولين كيف حالك عساك طيب
تأكد من الطير فى المستشفى وهل علاجه بسيط ولا صعب مثل الرداد
إذا كان إلتهاب بسيط أنا خابر علاج مثل الماجى يعطى الطير مرتين ويشفى بأمر الله ولا ترجع الطير إذا كان معجبك وإذا كان رداد وقديم رجع الطير
تحياتى للجميع

[طويق2]

أخي إذا كان الورم مبين بواسطة أشعة أجراها المستشفى فأرى أن المسألة ما تحتاج تدور أحد يفتح عيونك عليها . وأخيراً بيض الله وجه راعي الطير اللي أبدى عدم ممانعته بإرجاع الطير .

[مغــادر]

السلام عليكم ورحمة الله وبركاته
انا اقول بيض الله وجه راعي الطير الي بيقبله والله بيرزقك اخير منه ,,,

[راعى زويان]

السلام عليكم دام الطير مريض
لا ولله رده وانا اخوك دام راعيه قبله
ولا تسوى شى للطير والطيور واجد
والله يعوض راعيه وتقبل المرور

[راعى زويان]

السلام عليكم اخى العزيز
رجع الطير لراعيه وجزاه الله خير
ولاتتدبر فالطير دامه قبل
والطيور واجد
وتقبل مرورى

[طيرحوران]

تالي الأولين
حياك الله والحمد لله على السلامه
أنا حصلت معي مثل هذه الحاله كان عندي طير شريته اول الوقت وسبحان الله اختلفت علومه وماخليت شيء ماسويته قلت خلني اوديه للمستشفى وديته وقالو عند تضخم في الأكياس الهوائية واشوفهن بالأشعه بس مادري هي اشعة للطيري ولا لثاني عموما استحيت اني اكلم اللي شريت منه الطير لأنه راح عليه تقريبا ثلاث شهور المهم بيعت الطير وجاء رجال وتبايعت انا واياه بطير ثاني وعلمته كل ما بالطير وقال موافق أخذ الطير وشبه يوميا يعطيني علوم الطير ونفس علومه يوم كان معي هدده على الحمام والملواح وغيرها المهم الرجال عرض الطير للبيع وجاه رجال معه طير وقال بادلني بالطير راس براس وكل واحد في الأصل مال من طيره المهم كل واحد اخذ الطير بعد المبايعه وطيري في الأصل اللي بعته على الرجال وبادل فيه رجال ثاني يقول راعي الطير أنه صاد معه حباري ثنتين وكلهن تعليق وبالخضيرا وجناحه ماهوب صاحي
وخوي اللي اخذ الطير من خوينا اللي شرا طيرنا بدعه طيره معه تبديع وجناح ماهوب صاحي
لكن الطيور وفقه وانا اخوك ويمكن الطير يوقف معك وياخذ غيرك وينطلق عوقه
هذا ماحصل معي
بالنسبه للطيرك عطه حبوب امبسلين حبتين يوميا لمدة خمسة ايام وشف إذا تغير محوط الطير وزانة نسمه الحمد لله مازان انت في الخيار ويحق لك ترجع الطير ومن رايي انك ترجعه ولا فيها اي شيء وإذا تشتري مره اثانيه اشرط فحص المستشفى
وشكرا

[نبع الدموع]

يعطيك العافية اخوي نصيحتي لك عجل و افحصة بمستشفى ثاني لجل تحفظ
ماء وجهك على ما يقولون مع الرجال دام انة ذيب ما قصر معكم ولا تبطي ابد
و ان اتفق كلامة مع الي قبل رجعة ولا تشاور ترى هالعذروب ماهو بسيط.

لا هنت

[تالي الاولين*]

الله لا يهينكم يالربع
على مشاركاتكم ووقفتكم معي بالهنصايح
فحصته ثالثة وثابتة وبعد ما استخرت الله
رجعت الطير لراعيه والصدق ينقال الرجال ماقصر معي
وتعشى عندي ويالله لك الحمد الامور زينه والنفوس طيبه بالحيل واخذ طيره
ونفس اليوم دقوا علي الربع شرواكم يبشروني بالعوض وهذي بحد ذاته تكفيني يالله لك الحمد
وجعلكم ذخر يالربع ,,,,

[محمد الفهيد]

عذرك معك لو رجعت الطير

وصاحب الطير الاصلي كفو لو انه قبله


انا في رأيي رجع الطير وريح راسك والله بيعوضك بخير منه

[سبع الصحراء]

اخوي تالي الاولين

الخيره فيما اختارها الله

ودامك رجعت الطير وراعي الطير تقبل الامر بصدر رحب
والامور زينه على قولتك
الحمد لله رب العالمين والخيره فيما اختارها الله
والله يعوضك بالطير اللي تتمناه ويتمناه كل صقار

تقبل تحياتي

[قنيص غبر]

من رايي انك ترد الطير دامك توك شاريه . يمكن يزيد المرض وتبتلش فالرجال .. والطيور كثيره ...

[الطبشي]

انت اول ما خذيته من الرجال ما كان فيه شي بس يمكن جاه المرض بعد ما شريته او يمكن كان موجود فيه اصلا تحقق من الدكتور وخذه لكم بيطري واذا طلع المرض من زمان رده وخذ معاك اوراق الفحص حتى يتاكد الرجال والله يبدلك بافضل منه



كلام سليم .....