اطعمت طيري سمان مبرد وهذي النتيجه

[سفاري]

السلام عليكم ورحمة الله وبركاته
الدنيا تجارب ودروس :p وهذي تجربتي مع طيري

طبعا اخوكم عليمي في الصقور قلت يا رجال خذ لك واحد رخيص تعلم عليه وكيف تربيه نقزت للسوق واخذت لي واحد وعلى طول اول شئ شريته له الاكل قلت ابي ادلعه واسمنه ووقفت عند اقرب محل لبيع الدواجن المبرده واخذت له سمان (فري) امتنقيهن نقوه وعلى طول جلست اهدي الطير واشيله على يدي وكل شئ ماشي تمام ثم اعطيته الوجبه الأولى (والاخيره) :d وانا اشوفه وهو ياكل استانست وفرحت ( كأني ام ترضع ولدها ) من بكرا جيت ابي الطير ياكل ماهوب راضي وفي المغرب تقريبا بدا جناحه يرجف ويهتز وفي الصباح الباكر لقيت ابو الشباب منسدح على خشته وما زال حي يرزق حاولت اسعفه او اسوي له تنفس صناعي لكن ماش ماعاد ينفع ابو الشباب كان في الرمق الاخير ثم اسلم الروح لباريها ....

وانا ما كنت اعرف سبب الوفاة لكن قال لي واحد ان الطير اذا اكل لحم مبرد يجيب العيد هل هذا صحيح ؟

وخاصة ان طيري جاب العيد فعلا فهو مات في عيد الكفار الله يعيده عليهم وهم في اذل حال ...

وسلامتكم وارجو افادتي عن السمان المبرد هل يفيد ام لابد كل يوم اشتغل له قصاب واذبح له كل يوم طير؟؟؟؟

[فـ(الجـوف)ـتى]

اخوى الغالي الدنيا تجارب ودروس وربما هذا يكون لك درس المهم

ان الطير لايأكل المبرد التى انت اكلتها له اما وربما انها اثرت عليه لكن الذى انا اعرفه

وانا لست خبير في الطيور انه لايأكل المبرد اما عن سبب وفاته ( الله اعلم ) 0

[سفاري]

نتمنى من اهل الخبره انهم يخبرونا ويشاركونا

[المري]

مرحبا اخوي سفاري

الطير اللي اعرفه ان اكثر الطيور اذا عطيته لحم بارد يقعد يلفظ فيه ويحذفه يمين

ويسار , اما انه سبب وفاته فأنه محتمل انه يكون اثر عليه البارد ... والله اعلم..


الزبدة : لاعاد تعطي طير عندك شي بارد ..


وفي انتظار اخوي ميراج.. waiting

اخوكم / المري

[سفاري]

انا اقصد بالمبرد انه مذبوح من كم يوم ومنظف مثل الي يباع في محلات الدواجن الطازجه.وانا سمعت ان الطير لازم ياكل الاكل وهو طازج بدمه

نروجو الافادة الله يجزاكم خير لاني ابي اشتري واحد ثاني اذا كان الطير ممكن انه ياكل مبرد اما اذا كان يبي كل يوم اذبح له سمان فأتتوقع اني ما نيب شاري والله يعين

[صقر]

اخوي سفاري

السمان ما فيه ضرر على الطير ابدا.... الا اذا كان (بارد وقت الاكل) يعني اكل السمان وهو بارد فهو مثل ما قال المري يقذفه على الفور.

قد يكون سبب موت الطير من شيء آخر ...

[عزالخوي]

الاخ العزيز/سفاري
الصقار الحريص وطيرة غالي عليه مايعشيه لحم بايت-ولااذكر اني عشيت طيري لحم ماهو حار يعني ذبح اليوم الا منحد وهذي من نصايح صقاقيرنا الشيبان -واحرص على الشيهانه تراها ماتحمل بعكس الحر.
تقبل تحياتي

[ميراج]

الاخ السفارى السلام عليكم ورحمة الله وبركاته

اللحم المبرد و اللحم المثلج يصلح للطير ولاكن مع مراعات بعض الامور

اولاً : إذاكان اللحم مثلج أو مبرد يخرج من الثلاجه ويوضع فى صحن حتى ترتفع درجة حرارته ويصبح

مثل الطازج اللى مذبوح من ساعه

ثانيا : المجمد افضل من المبرد لأن التجمد يقتل البكتيريا

ثالثا : ما أصاب طيرك والله أعلم بسبب البروده الزائده

ملاحضه مهمه :

إذا شريت طيرك الثانى وتعرض لأى مشكله ( تغير مرشه _ او كش لون ريشه _ او ذبول فى العينين _

أوعدم الرغبه فى الاكل ) أنصحك توديه على طول لمستشفى الأمير فهد بن سلطان إذا كنت فى الرياض

لأجراء الفحص وأعطائه العلاج الازم أوعيادة التميمى إذا كنت فى الدمام أو على الاقل عيادة بيطره

لأن طيرك والله اعلم تعرض للتهاب رئوى حاد مع صعوبه فى التنفس .

الله يعوض عليك طيرك

تقبل تحيات اخوك ابو طارق

[سفاري]

مااقول الا الله يجزاكم كل خير ويبارك فيكم وفي منتداكم

وان شاءالله تكون لي تجربه ثانيه مع الصقور واعمل بنصايحكم

[ضاري بن طوالة]

السلام عليكم ورحمة الله وبركاته

الله يعوَضك خير يالغالي , وهذي الدنيا مثل ما قلت تجارب ودروس .

وأنا اللي أعرفه إن الطير عادي مهوب لازم ياكل شيء مذبوح بيومه .. وعلى العموم الشباب ماقصرَوا معك .


ضاري بن طوالة .

[سفاري]

جزاك الله خير اخوي ضاري بن طواله

وانا الي فهمته من الاخوان ان الطير مايضره المبرد اذا سخنته او اذا اكله الطير وهو مهوب بارد

بارك الله في الجميع واتمنى ان الي عنده زياده يفيدنا

[ابو عايد]

الاخ السفارى السلام عليكم ورحمة الله وبركاته

اولاً : إذاكان اللحم مثلج أو مبرد يخرج من الثلاجه ويوضع فى صحن حتى ترتفع درجة حرارته ويصبح

مثل الطازج اللى مذبوح من ساعه :good:

ثانيا : المجمد افضل من المبرد لأن التجمد يقتل البكتيريا

ثالثا : ما أصاب طيرك والله أعلم بسبب البروده الزائده


:good: :good:

وتقبل تحياتي // العاشق الولهان