الصقاقير اهل الخبره

[ابوميلاف]

اخواني السلام عليكم ورحمة الله وبركاته
انا عندي شيهانه وحش ويطلع من فمها ريحه كريهه
مع العلم اني فتشتها عن القلاع مالقيت له اثر واضح
والطيره ماعمرها ردة علفها وصحتها زينه ولا عليها
مواري مرض فقط هي الرائحه التي تصدر من فمها
ارجوا من الاخوه من له خبره في ذلك اني يفيدني و
اذا فيه علاج لذلك يخبرني عنه وعن طريقة استخدامه

وتقبلوا فائق تحياتي

[ناصر الحمد]

حياك الله أخوي والله مالي علم ولاكن يفيدونك الربع مايقصرون

[جارح العين]

تاكد من علفها لاتكون توكلها شي وسخ او مصران او الحوصله الان هي تجيب الريحه الكريها وانتم كرامه خل اكلها نظيف

[صقار البحرين]

ابوميلاف الله يمسيك بالخير .....
يمكن يكون فيها قلاع في المفرس مايبين عير بالمنضار او انك تدخل اصبعك في مفرسها واحيان يكون الطير تصريفه ما زين يفرز رحيه ماهي زينه ...

وان شاء الله يفيدونك الاخوان وتقبل مروري لاهنت

[شنوان]

مرحبا بالجميع
ممكن يابوميلاف تخزن روباج
اسقيها برواز ماء وسكر وكثر السكر
اذا في بطنها شي بيطلع
وعطها حبوب قلاع لمدة ثلاث ايام اول يومين
حبتين حبتين وبعدها حبه ولو زاد يوم او يومين
مافيه مشكله وبعدها شوف النتيجه

[همام5]

ياطويل العمر انشاء الله مافيها شي
1 اذا كان تصرف عشاها بسرعه فهي مافيها شي
2اذاكان عدتها مظبوطه فهي سليمه انشاء الله
3 اذا عن الريح فهو امر طبيعي بعضه يجي من نوع من العلف وهو الفري

ورايي عليك 1 عطها ماء لمدة ليلتان وهو نقع الما عندها بالمعنا الاصح وخضر الفريس وقت ماتعطيها
2وثالث ليل نبتها بالسكره حبتان اوثلاث طباعآ السكره معروفه
وهذا وتمنى اني افدتك

[نبع الدموع]

الله يعافيلك طيرتك و يبعد عنها السوء
اخوي جرب تاخذ حول خمس - عشر حبات شعير و تغسلهم زين
و تدسها مع العلف و تاكد ان الطير علفها مع سكر النبات الي ذكروه
الرجال قبل لا تعطيها حبوب القلاع اذا ان الريحة طبيعية بتروح مع
الشعير و السكر او لا قدر الله تشوف حبوب القلاع
الحبوب مثل الشعير و الدخن و الحب تطير الريحة من فم الطير اذا
ما كان فيها قلاع اسال مجرب :good:

[مغــادر]

ماقصروا لخوان,,,

[ابوميلاف]

الاخوان/الهدد الذهبي/جارح العين/صقار البحرين/شنوان/همام5/
نبع الدموع/مغادر
الله يجمل حالكم وشاكر ومقدر لكم سرعة تجاوبكم مع موضوعي
وانشاء الله آخذ بنصايحكم وآرائكم الغاليه

تقبلوا تحياتي

[نايف الخالدي]

ماقصروا الاخوان
ويعطيكم العافيه ابو ميلاف عطنا علومك وش صارر معك

[راعي بارود]

مثل ما قال اخوي همام5 عليك بسكر النبات
عطها حبة وانتظر وخل الماء جنب الطير
واذا ماراحت الريحة اليوم الثاني جرب طريقة الاخوان تبتدي بالسهل
واذا مرة مرة افحصها عند الدكتور
واتمنى اني افدتك ويمكن الطيرة مافيها شي وان طابت فك عمرك من الكورسات
ولا يهونون الصقاقير جميع

[بوخالد الكعبي]

ابوميلاف انصحك نصيحه عليك بالسكر النبات حطه للطير في الماء يشرب منه على الاقل وينظن بطنه منهااا

[زناد1]

ابوميلاف الله يمسيك بالخير .....
يمكن يكون فيها قلاع في المفرس مايبين عير بالمنضار او انك تدخل اصبعك في مفرسها واحيان يكون الطير تصريفه ما زين يفرز رحيه ماهي زينه ...

وان شاء الله يفيدونك الاخوان وتقبل مروري لاهنت

انا مع اخوي صقار البحرين اتوقع فيها قلاع داخلي او بدايت قلاع

[الطبشي]

مثل ماقالو الاخوان مشلها كورس قلاع وبتشوف نتيجه ان شاء الله ....

[ابوميلاف]

الاخوان/نايف الخالدي/راعي بارود/بوخالدالكعبي/زناد1/الطبشي
ماقصرتوا وشاكر لكم المرور الغالي وآرائكم الغالية

تقبلوا تحياتي

[عبدالرحمن ‍]

أخواني قبلي ماقصروا ..

بس بغيت اذكر لك الاسباب المحتمله (على حد علمي) ممكن تطلع ريحه من فم الطير اذا:
1- كان فيه قلاع
2- اذا كان الطير عديد (اذا كانت عدة الطير أكثر من اللازم)
3- اذا كان الطير مخزن الروباجه لمدة طويله

بس حاب اسألك.. شلون عدة الطير .. وهل الطير يروبج والا لا.. واذا كان كل شي سليم.. الطير يغضي (يعني يسكر عينه نتيجة ألم)؟

ملاحظه: اذا كان الطير يخزن الروباجه لاتعطيه سكر نبات لأن السكر بيكون خطر عليه

تقبل مروري

[القطاوي 2008]

ما قصرو الاخوان

[قرناس ارامكو]

ماقصروا لخوان

[رامى السيد]

الاخوان ما قصروا حفظ الله طيرك وبارك لك فيه

[الهدهد]

اعتقد يكون فيها رباجه
عطها لحم صافي يومين
وبعدين عطها سكر نبات وانشاء الله تكون مثل ماتبي:cool:

[ابوميلاف]

الى كل من تكرم بالرد على موضوعي
الف الف شكر وما قصرتوا وعساكم على القوه
بالنسبه للطير ابشركم انه بخير وفي اتم الصحه
وقد قمت باعطائه سكر نبات لمرتين في يومين
وحلته وهو الان في اتم الصحه وانتهت منه الرائحه
وكل شي فيه على مايرام
وتقبلوا تحياتي

[الشرعي1]

اخوي ابو ميلاف
شوري عليك شنذرها وبتروح الريحه

[لوقه]

من الطبيعي وجود الرائحه وقت المقيض ويمكنك ترش في فمه ماء معه ملح