ممنوع تصوير الربيع لمدة اسبوعين تكفون يا نقا هشال يا نفل وإلا؟

[المترو]

السلام عليكم ورحمة الله وبركاته
يا اعضاء مكشات تكفون خلوننجح للاختبارات بالكود مصبرين انفسنا هالاسبوعين لكن صور نقا هشال ونفل ولا يهون الباقين طيرتني من الديره الصبر انتهاء يالربع ترى نبطل دراسه اقسم بالله ان عدة البر منزلها بس عشان ما تساورني نفسي واخت برى الرياض لانه كل ما فكرت وانا بطرف الديره اتذكر ان العده بالبيت
والله ترى الاجازه للامتحانات بتفرغ لذلك نخسر النجاح والوظيفه ان ما لبيتوا طلبي
و اطلب من شيخ الابداع حفرلوجينا التدخل !!!!!!!!!!!!!!!!!!!!!!!!!!!

[كشات]

بسم الله الرحمن الرحيم
السلام عليكم ورحمة الله وبركاته

وانا اضم صوتي لصوتك يالرحال

وهذا اللي انت فيه من جهاد النفس وانا اخوك

تصبر ان ماطاعوك الربع

مالك الا الصبر

والله يعينك وينجحك ويرزقك ببنت الحلال اللي تجهز لك عدة البر من ترجع من دوامك يوم الاربعا ايلا كلش والم ومحمل بالموتر بعد:good:

[المربد]

الله يوفقك وعيالنا وباقي الأعضاء
وتصـبــّر وانا اخوك والربيع ملحوق. صدّ قني انا طلعت هالاسبوع وما لقينا شيء كل المسألة ان الشباب يتفننون بالتقاط الصور يعني الربيع وانا اخوك من العيد وطالع.
اخوي كشـّات ، اكو حريم بهالزمان تجهز لك العدة ؟

[نقا هشال]

اخوي الرحال

تامر امر بس علمنا متى بتخلص اختباراتك,,,,(: الله يوفقك!!!

اخوي المربد
اود ان اعرف الى اين طلعت!!!!!!!!!!
الربيع ولله الحمد ممتاز ولم نحاول ان نوهم احد الصور صحيحه 100% واتمنى منك عدم تكذيب احد,,,,,,!!!!!!

[حفرلوجيا]

أخوي الرحال 2003 : ابشر بسعدك وبحل مشكلتك .. مادام طلبت التدخل ..
ولكن على إعتبار أن منتدى مكشات والمبدعين فيه ظلال وارفة على كل الفئات لذلك نبي نقول لك بكل الحب .. تبيهم يوقفون ؟؟.. ( معصي ):D ) خلهم يستمرون وش حنا لولا هالمبدعين .. إلا أركوا .. وخلونا نستمتع .. واللي مايقدر أبرك له لأن أولياء الأمور والأطراف الأخرى ترفع التأهب والعناية وقت الإختبارات ( يعني مكسب ) ... :good:
بهالحالة حنا ( الشباب الكبار ) نتندح ونتنقى وين نروح ووين نجي ( مافيه زحمه ) ..:good:
وازين ماسويت انك خليت العدة بالبيت حتى لاتوزك ( النشوة المكشاتية ).
ولكن على إعتبار انك ( مكشاتي ) . . ويهمنا إنك والمكشاتيين الطلبه تشدون حيلكم لما هو أهم.... نبي نتعاطف معكم .. ونعلمك بالحل اللي يقولون انه العلاج اللي يستخدمه مشرف هالخيمة .. يوم هو كان طالب مثلك .. وش هو ؟ .. أقول لك :
1- توصي واحد من اللي يكشتون يجيب لك بابونج ونفل وحرف من البر ( ولو هو على أوله ) وتلفهن بالفراش اللي بسيارتك .
2- تختار ( وتراك تبي تحتار ) كم صورة من اللي يجيبونها مبدعين مكشات وتطبعهن وتحطهن على الطبلون ..
وأول ماتبدأ ( تحقرص ) وتشوف ان ( كيف مكشاتي ) يبي يوزك .. تستدني الفراش تشمشمه .. والصور تفرج عليهن .. وتبي تشوف انها كشتة على كيف كيفك.. ..:good:
و يقول الريس شقردي تراك تبي تدمن على هالحالة لكن ماعليك .. يوجد علاج بسيط ينصح به الطبيب الشعبي المكشاتي ( اخونا راعي عنيزه ) يقول :
اليوم اللي تنتهي به الإختبارات تروح لطراف الديرة تدور على عشب نظيف ( تفرك جبهتك به ) لمدة خمس دقايق كمرحلة أولى .
المرحلة الثانية أول خميس وجمعة تطلع مع من توده .. لوحدة من فياض الصمان ( شرط يكون به قيصوم لأنه هو اللي يحل الإدمان ) وتمارس ( التسدح ) لمدة ساعة ..
وتبي تلاحظ ان مشكلتك انحلت على طريقة شقردي وراعي عنيزه... :p:p
ومنا لحد تنتهي الإختبارات نبي نقوم يالمكشاتيين ( اللي ماحنا طلاب ) بالتسدح وشمشمة الفياض نيابة عنكم ( ونبي نتوصى )...:D

[كشات]

السلام عليكم ورحمة الله وبركاته

يا تسبدي عليك يالرحال

طاح بك حفرلوجيا وهذا اللي انت تبيه عون صار فرعون

بس تدري
جرب الطريقه اللي قاله وقل لنا النتيجه
كانه نفعت معك والا لا

انا ناوي اعبي النفل والقيصوم والربله والشيح والرمث والبسباس حتى السعيدان بغراش فيمتو وقواطي نيدو
وابسط بهن قدام المدارس ايام الاختبارات بس

واللي يبي زود
اشب له كسرة (غضى) يتبخر به :good:


اخوي المربد
ترى بنات الحلال كثير
واذا تبي وحده تسوي لك هالشي قل لي وانا اعلمك الخطه اللي تخليه تزهب عدتك من اول ماترجع من البر للطلعه الثانيه

:cool: <<<<<<< ........طعش سنه زواج

[صقر]

والله ياخوي حنا ما صدقنا يجي هالموسم تقول توقفوا

الا انت اللي ارحمنا قاعدين ننتظر هالوقت على احر من الجمر..

على العموم الله يوفقك وينجحك بالدنيا والاخرة.


وبارك الله فيك.......

[عبدالعزيز الدباسي]

حسبي الله عليكم من كشاته
الرجال طالب الفزعة والعونه
وما صدقتوا انكم تتخلصون من بعض الكشاته والله ما هقيت ان هذي سواتكم والحقيقة ما لكم حق ، وخصوصا حفرلوجيا ، اللي الرجال مسميه باسمه يبي منه الفزعة
صار هو اللي يبي يقطع قلبه ويحرق كبده بانواع الزهور .

واللي كملها عاد ( كشات ) يبي يفقع مرارتهم بغراش الفيمتو وقواطي النيدو ،،،

الا ما علمتنا كم سعر قوطي النيدو الكبير معبى نفل وخزام:p :p

اخوي الرحال 2003 انت طلبت الفزعة ، وسميت اشخاص ،،، وهذا ما جاك منهم ،،،

لو الله مريد وطالب الفزعة من راعين الفزاعات:) كان منع ادراج الصور في المنتدى لمدة اسبوعين وكان سوا عملية حظر على بعض الاعضاء ومنعهم من الكتابة لمدة اسبوعين .

وعلى فكرة ترا العرض ما زال ساري على بعض الاسماء ،،، اذا كان ودك تختار;)

[راعي الطويلة]

الأخوة الأعزاء

من الطلاب فقط ...... تبون حل ؟؟؟؟؟؟ بسيطة .... لا تدخلون عالنت ..

ما نفع .. ؟؟؟

جربوا وصفة الأخ حفرلوجيا ...

كلش ما نفع .. ؟؟

بكيفكم ..

أخوي حفرلوجيا .. ممكن ترسل الوصفة الثانية ((( للي عنده عيال يختبرون ))) وش يسوي ؟؟؟؟؟؟؟؟


أخوكم

راعي الطويلة

[بواردي الروضة]

يالرحال تعوذ من ابليس وخلك في اختباراتك ترى الربيع بهب طاير واذا خلصت من الاختبارات سو اللي تبي والله يوفقك ويستر عليك :)

[المترو]

السلام عليكم
هلا بالاخوة الكرام
الاخ كشات شكرا اما موضوع بنت الحلال رزقنا الله فيها قبل 13 سنه والحمد لله
الله يحفظك ولا نبي ثانيه على الاقل الوقت الحاضر (يعني بالعربي اخوكم شايب )
اما تجهيز العده فهذا من سابع المستحيلات ان ما رمتها بالشارع من كره ختاتي للبر وتويجع اذا شافتني جاهز للمشيه لكن عسفنها على الامر

الاخ المربد الصبر طيب اما موضوع مافيه ربيع اختلف معك لانه اخر مره قبل ثلاث اسابيع او اربعه والارض باديه تخضر بالفياض ومتوقع الان وكما بالصور الربيع افضل لكن قد لا تكون وفقت انت بفياض مربعه اما ملحوق فالمشكله انه بعطلة العيد اخوك بالعمل عدا اول يوم العيد وثاني

خلفهم نقا هشال وهذي حبه على الراس والعيون ولا يمر عليك عدو سلمت ولا سلم عدوك
حفرلوجيا (وحاف بعد)
انت شقيت ورقعت لكن اللي مصبرني عليك اني فعلا كنت متوقع تشطح بي هالشطحه الحفرولاجيه والى الأن هقوتي بك زينه
اما وصفاتك سوف اطبقها وان بديت اثغي تراك انت السبب ؟؟؟؟؟؟؟؟؟؟؟ لا تورط مشرف الخيمه وشقردي وراعي عنيزه بحفرلوجياتك الممتعه ولا يهونون والا ترى ارسل لك كم شب من شبابات التخصصي يمخشونك
اما قولك حنا الشباب ما اقول شيء؟؟؟؟
وتمشيك بالفياض نيابة عنا فلك الشكر الحال واحد ولا اوصيك كل ما حسيت انك منعنش بالربيع تمغط وقل هذه وحده وناسه عن الرحال2003

كشات مره ثانيه شكرا للوصفه بس ليش اخترت قواطي النيدو بالذات !!!!!!!!!!!!!!!

ثانيا يا كشات عطنا الخلطه اللي تخلي المره تزهب العده

الاخ الحبيب صقر شكرا وشكلك دايم تركب قدام جنب السواق

شقردي شكرا لك والمقصود الحفرلجه مع حفرلوجينا وابداعاته والا عرفين اهل مكشات و علومهم الزينه وترى تكفون يمكن لها معنى ثاني بلغة الحفرلوجيين بس يمكن حفرلوجيا متأثر بالقنص واهله اللي ما يبون احد يقرب حولهم والا يدلون احد على شيء والكشاته يجي منهم اكثر
ولا نبي نحرم الاخرين من الاستمتاع بصور الربيع الحل ترك مكشات فتره والعوده اليهم بعد الاختبارات

اما موضوع العرض الساري وكل الاسماء فيها الخير فشكرا لكن انا ابي اخذ اجازه من الدخول الى مكشات


راعي الطويله شكرا وسوف نجرب طريقتك
بواردي الروضه شكرا والمقصد سعة الصدر والحفرلجه مع الاحبه
الى اللقاء بعد الانتهاء من الاختبارات
اذا قدرت اصبر عن مكشاتي المنزلي مكشات
وسلامتكم الرحال2003

[نفل]

السلام عليكم ورحمة الله وبركاته

اخوي الرحال2003


:D ابشرك شريت كرت تخزين كاميرا جديد سعة 512 ميجا وناوي احلله هاليومين انشاءالله ومسألة
الاختبارات به طريقة تصبرك ويمكن قالوها الاخوان وهي سهلة ... خذلك كيس مخدة وعبه قيصوم وتوسده
واحلام سعيدة :D وتراي ما امزح هالطريقة يسونها شيبانا الله يخليهم لنا .........وترى وانا اخوك الربيع بأوله والفياض ما يزين ربيعها وتزهر الا بعد الاختبارات خاصة ان تبعلها انشاءالله بالامطار ..
وركز على الاختبارات واليوم اخر يوم نسمحلك بدخول الشبكة والله يوفقك ويوفق الجميع .

اخوك نفل

[جركل]

تصدقون ياعيال ان ماودي اتخرج من الجامعه الا عشان اذا جا الربيع ولا وقت الصيد الواحد يطلع متى مابغى ولا الوظيفة والزواج مافكرتبه
اللي يقطع قلوبنا صور الربيع
اذا قعدت تشوفهن وعليك بكرى اختبار





نقا هشال وش دعوى التغلي ماترد على الخاص