&&حاجات دخيله على هواية الصيد بالسلق&&

[قشاع الرمث]

السلام عليكم ورحمة الله وبركاته

مساكم الله بالخير

انا يا اهل مكشات تركت السلق من ست سنين قريبا
وتقل حنيت على هالهوايه بعد ماشفت خوينا عبدالله
هدد بهالهوايه .
والغريبه لقيت الوضع متغير عن اول كثير للاسف
للاردى وبمده قصيره .

وهنا ابعد اغلب ما لاحضت :

اول شي كل من حط سلقتين او ثلاث قال انا
ماسك سلاله واذا انتج كم جرو قال هذي السلاله عندي
من مربطي الخاص وهو خالط بين ريش وملط ؟؟

والي يجيب سلوقي او سلقة ويقول هذى او هذي من اطيب
سلق الجزيره العربيه . وللاسف تلقا سلقه ما شافن
غير جربوع وحصني وحاكم على هالشي والارنب ما يعرفنه .

وسالفة هذا سلوقي سد وهذا قومه هالكلام هذا خرابيط ما فيه من الصحة شي
فيه سلوقي طيب ارنبه ما تروح وسلوقي فاشل ينزل عند اول محطة او هجرة
وانت راجع من المقناص . واعتقد ان سبب هالخربطه ناس ما تطلق السلقان
ثم يقولون هذا قومته زينه ونفسه قصير !!!!! وانا اقول المساله لياقة .

وسالفة المهدات هذي قضيه لحاله اقصد كل سلوقي عليه اشتراك بالقيمه
الفلانيه والفايز له كذا ( برايي الشخصي هذا قمار يعني حرام ) .
اما الي يهدون سوا خويا هذي اهون .

وكثرت السرقات بشكل ملفت للنظر اعتقد السبب هو المهدات .

وسالفه فلان لقى سلوقيه مذبوح برظوه بسبب المهدات والحقد .

وكثرت الالوان الغريبه جدا ولازالو يقولون عربيات اصايل
ما اخبر الوان العربيات الاصايل الا بيض حمر زرق والاسود نادر .
وصار فيه سلق مبقعة بهن الوان واجد .غريبة صح .


والصحيح هالامور تسيئ لهالهوايه
العريقة وتنفر الناس منها .

وانتظر تعليقاتكم .


والله يوفق الجميع .

[أبو أمين]

والله انك صادق وموضوعك جا في الوقت المناسب وألف شكر على الموضوع

[راعي الهدبا99]

ما اقول الا بيض بيض الله وجهك على الموضوع..وكلام صحيح ميه في الميه...لاهنت..

[سلطان العوني]

كلامك سليم ميه بالميه

وانا اقول كل كلامك اسبابه المهدات
سرقات
تهجين
تسميم

[راعي جدعان]

كلامك في محله وعزالله انك صادق

بالمهدات لاتنسى العين بعد معاناه معها

والشئ الثاني اللون

وفيه لون انقطع اللي يجيك لونه احمر من فوق العراقيب

ومن تحت ابيض ثلج

وتقبل تحياتي

[الـــباهـــلي]

][قشاع الرمث][

انا اشهد انك بيضتها بالهرج الزين

وكلامك صحيح ميه بالميه

ولي تعقيبات على كلامك..


اول شي كل من حط سلقتين او ثلاث قال انا
ماسك سلاله واذا انتج كم جرو قال هذي السلاله عندي
من مربطي الخاص وهو خالط بين ريش وملط ؟؟

كلامك صحيح انا ملاحظ هذا الشي في كثير من راعين السلق ..

ومنهم ناس اعرفهم يشبوون عربي وساحلي

وبعدين حتى لو انهن سواحل احيانا السلق مايجن على بعض يعني

الذيخ وصفه غير السلقه ولو تشبيهن مع بعض مايطلع شي زين

وهذا الي يخلي السلق تطلع مخاليط ...


وكثرت الالوان الغريبه جدا ولازالو يقولون عربيات اصايل
ما اخبر الوان العربيات الاصايل الا بيض حمر زرق والاسود نادر .
وصار فيه سلق مبقعة بهن الوان واجد .غريبة صح .

بس عاد في هذي اخالفك فيها شوي ..

لانه في ناس تجيب سلق من برا بس اصايل يعني وصف روعه

وطرد اروع يعني يصيرن ازين من الي عندنا ...

يعني مو اي شي من برا يصير مهوب زين بالعكس يصير طيب ..

لا هنت اخوي على الموضوع الروعه...

[أبوإبراهيم1]

كلامك صح ولا تجمع ولا تطرح
الله المستعـــــــــــــــــــــــــــان

[دليله القنوص]

كلامك صحيح 99%ورعنه عقب حمام ودجاج خاشين سلق ونسبه هايله يجيبون سلق خارجيات تقول مافيه عربي وبعدين اذا عنده سلوقي كنه دينصور ولى ماينوجد الى عنده ويجيبون ضباء مزارع او حديقه حيوان له ميت سنه ماطلع من القفص ويهدون عليه كل شعوب العالم عندهم سلقان اقول ورعنه وابلشونا بالسرق

[رحال]

الله يعطيك العافيه اخوي قشاع الرمث وانا معك بكل ماقلت وعندي اضافة بسيطه وهي ان مهدات الظبي جعلت بعض مربي السلق يتخلصوا من سلقانهم والسبب الرئيسي في نظره (السلق ماصاد الظبي او ماحقق نتيجة طيبه ) !!!!


انا اعرف اشخاص تخصلوا بعد كذا مهد للظبي من سلقانهم مع ان هذه السلقان طيبه بالحيل على ارانب النهار ..
يا اخوان بعض السلقان ماتنفع للظبي حتى لو فكيتها في مهدات كثيرة لكن على الارانب تطربك بمستواها .. البعض اصبح لايفكر وهمه الوحيد وشغله الشاغل صيد الظبي فقط وترك الأهم وهو مقناص الأرنب .


على العموم بارك الله فيك اخوي قشاع الرمث ونقاط مهمه ذكرتها في موضوعك ..
اتمنى لك التوفيق
اخوك بوخليفه

[شهاب حايل]

الناس ماهي مثل اول تغيرو بالحـيـل

[أبو هنطش]

كلامك صحيح ميه بالميه ولاهنت وبيض الله وجهك

[ط ع و]

الحين مايربي السلق الا عشان المهدات
وين يروحون لا فيه ارانب ولا شي مافيه الا الجوع
قال وش ارانب
ارانب رح دورها ان لقيت

[كلي سلوقيه]

وسالفة المهدات هذي قضيه لحاله اقصد كل سلوقي عليه اشتراك بالقيمه
الفلانيه والفايز له كذا ( برايي الشخصي هذا قمار يعني حرام ) .




اخوي اول شي الله لايهينك..

وثاني شي عندي تعليق...

مثلن الحين انت مشترك برياضه معينه وربحت فوس...هل هذا يعتبر قمار...؟

علا سبيل المثال..النوادي الصيفيه اشتراكها لا يقل عن 1000 ريال....لما تخلص منها جائزتك علا حسب مستواك..

الحين هذي هوايه ان فزت فيها لك جايزة تعبك وان مافزت شارك مره ثانيه وان شاء الله تفوز....


هذا النظام..


وثاني شي اكيد ومن حق اهل المهد انم يطالبون بشتراك اسلوقي ليش..؟ لأن كل هذا من تعبهم...مثل عدد الظبى الجوايز...السيارات محدد..هذا كله من وين يجيبونه من فلووسهم..


علا في كلا الحالتين المشترك اذا فاز بالمركز الاول بكون ربح اكثر من مقيم المهد..


تنويه:مشاركة السلق لا تزيد عن 50 ريال...



واقول عن اناس الي يقطون سلقهم بس عشانه ماصاد الظبي..هذا بالاحرى مهب راعي سلقان...ولايعرف شي..

فحبيت انوه علا هالنقطه..لأنك اخطيت فيها..

تقبل مروري

[أبو هنطش]

كلام صحيح وانا مع كلام اخوي رحال

[طلو]

اخوي قشاع الرمث
الموضوع يريد الصراحه ولا يريد المجامله
وكل يبدي وجه نضره حسب ما يراه
اخوي وجه نضرك قد تكون بنيتها على ماتراه من الجمهور او اصحاب السلق المبتدأين
وليس على اهل السلق الذين يعتبرون اهل ولع حقيقي
فلا تخلط بين الاثنين
وبالنسبه لكلامك اخي من ناحيه
الخلط والمدري ويش
كلن يبي يغطي حاجته من السلق
في ناس يصعب عليه يجد سلوقي او تجد راعي الذيخ لا يرضي انه يشبي لاحد فكيف تريدهم ان لا يخلطو السلق
ــــــــــــــــــــــــــــــــــــــــــــــــــ ـــــــ
ومن ناحيه المهدات وما تقوله انها هي السبب في السرقات فانا اقولك ان السرقات
ليس سببها المهدات
كانت السرقات موجوده قبل المهدات ولاكن غالبا لا تاتيك السرقه الى من الناس الذين يعرفونك وان لم يكن منهم يكونون سببا فيها
واكثر الناس الذين يسرقون معروفين وهناك ناس معروفين يمشون ويشبون الفتن بين اهل السلق
ــــــــــــــــــــــــــــــــــــــــــــــــــ ـــــــــــــــ
من ناحيه السلق والضبي
الضبي السبوق والصاحي لا تفكر ان فيه سلق تلحقه بجداره
والسلق الطيبه موجوده والسلايل الطيبه موجوده عند اهلها وتجدهم حريصون الا تخرج على الساحه ابتعاد عن الاحراجات والمطاليب

ــــــــــــــــــــــــــــــــ
يمكن انا وانت نقدر نقنص ونقدر من مركزنا الاجتماعي وصلتنا بالمسؤولين بالدوله والمكانه التي يكنونها لنا
نستطيع ان نقنص او ان ندبر تصاريح المقناص بسهوله
ونستمتع بالصيد والمقناص
ولاكن غيري وغيرك الكثير الذي لا يستطيع ان يقنص ولا يمتلك من المال ما يجعله يستطيع تغطيه تكاليف المقناص من سيارات وبنزين ومصاريف
والمهدات نوعا ما فرجت على الناس الباقين ولعلها نوعا ما من الترفيه
انت تتكلم عن المهدات عموما
والمهدات اذاكانت تحت يد منضم رائع ويجعلها تسير على برنامج يرسمها لها وله هدف يريد ان يوصلها اليه تكون افضل من ما تتوقع
ــــــــــــــــــــــــــ
وجه نضر من ما اراه من حولي من ملاك السلق الاصليين

[خياله الجدعا]

السلام عليكم ورحمة الله 000000000000الله يعين يا قشاع اصابعك مهيب سوا ولولا اختلاف الاراء لبار ت السلع وانااايد كلامك المفروظ الرجال الي ما يقنص ما يخلي عنده سلق واذا كان متولع تلقاه عنده شي الارنب ماتفر شبر يعني عليهن العلم لا نظره ولافعل وصح لسانك اما الي يحب الشغله ومايقدر يسوويها يكون متفرج لين الله يرزقة اماتقبلو مروري

[قنيب الذيب]

وش نسوي وأنا أخوك وهذا شي طبيعي أن الواحد معه سلعه ولا يفهم فيها أكيد بيمدحا وعلى ما قال ما لك ألا خشمك لو كا عوج.وشكراً..

[نفاج]

الله يعطيك العافيه اخوي قشاع الرمث وانا معك بكل ماقلت وعندي اضافة بسيطه وهي ان مهدات الظبي جعلت بعض مربي السلق يتخلصوا من سلقانهم والسبب الرئيسي في نظره (السلق ماصاد الظبي او ماحقق نتيجة طيبه ) !!!!



انا اعرف اشخاص تخصلوا بعد كذا مهد للظبي من سلقانهم مع ان هذه السلقان طيبه بالحيل على ارانب النهار ..
يا اخوان بعض السلقان ماتنفع للظبي حتى لو فكيتها في مهدات كثيرة لكن على الارانب تطربك بمستواها .. البعض اصبح لايفكر وهمه الوحيد وشغله الشاغل صيد الظبي فقط وترك الأهم وهو مقناص الأرنب .


على العموم بارك الله فيك اخوي قشاع الرمث ونقاط مهمه ذكرتها في موضوعك ..
اتمنى لك التوفيق



مشكور مقصرت وأنا أتفق مع كلام رحال كلام سديد

[عثمان المطيري]

كلأمك كله صحيح

بس وين الي يفهم !!!

[تميراوي 77]

كفو والله يا بو نايف

[طلو الشمري]

مشكور اخوي على الموضوع السليم

[راعي شاحوف]

مساء الخير ... مشكوور على طرحك للموضوع وبيض الله وجهك ووجيـــه اللي ردووو ... عندي نقطه بسيطه عن المهدات والسرقات بالنسبه للمــهدات محطووطه تشجـــيع للهوايه هذي ولكن للأسف البعض استغلــلها واو فهمها غلط .. مما ادى لسرق السلق كله عشان يشارك فيه في مهــد او غيره .. وصار كل شخـــص فينا يخاف انه يشارك في مهد خوف من الســـرقه وهذا السبب الوحيد الا منع اغلب الناس المشـــاركه في المهدات .. والعذر والسموحه على الاطــاله ...

[الشبح455]

والله الشباب مخلو شي ارد فيه غير اني اقول كلام صحيح

[حزيران]

تعجني الصراحه وحسن التعبير و الطرح البناء الذى يستفيد منه الاخرون.........

[حزيران]

تم التعليق

[الصارم1]

اول وين المهدات تقام بنروح نشارك

لا ارنب ولا جرابيع

هههههههههههههههههههههه


لاحد يعصب ياخي الوضوع سهل الدعوه كلها من المبزره


والله يعين

[صياد تكريت]

ازيدك من الشعر بيت عندنا قامو يجيبون الارنب باي طريقه يقتلوها باليل علا الضوه وبالبنادق والحفر بالقزمات والكارك ويطلعوها من الغار كلها طرق لتقرض هذا الحيوان

[يوسف ابالخيل]

انا شفت هذا السلوقي مع واحد بحارتنا وبعد مظروب مع رجله

[GX_V8]

السلام عليكم
اولا الله يعطيكم العافيه جميعآ على تفاعلكم مع الموضوع
الموضوع مهم والاهم منه ان كل كلامكم صحيح
لكن الصحيح هو تداخل السلالات في بعض العربي يشبونه من قري هاند ويطلع الوان غريبه وفي الاخر يقول السلاله بس عندي انا
والسرقات حدث ولا حرج والمشاكل والحقد
وهذا عند الناس اللي ناقصه عقل
واذا على السبق والقومه فعلا درب كلابك كل يوم وشوف اللياقه كيف تصير
حطها في مكان كبير وخلها مطلوقه
يخليها لي طول الاسبوع قاعده ويجي يوم يهلكها ويقول ماهي طيبه
انا عندي سلقان اطلقها كل يوم
واقل يوم تجري فيه ما يقل عن 20 كيلو
ولا مهم انك لازم تجربع عليها كل يوم ترا الجرابيع راحت فيها
والله بيخلصونها
انا اهد على ارنب وظبي وجربوع بس خلاص السلق عرفهم ما يحتاج انك تنتقم من الجرابيع والارانب
انا الحين اجري سلقاني العصريات
بدون ما ادمر المكان اللي انا فيه واخلص جرابيعه
واذا جاء احد من الربع وعزمو يطلعون يجربعون
نطلع نصيد 2 او 4 على حسب الجربوع اذا كان قوي
المقصد اتعب على سلقانك با الجري كل يوم وشوف النتيجه تنفع والا لا قويه والا لا
انت تقدر تقرر وهذا يعتمد على تعبك عليها
عذرا على الاطاله
تقبلو مروري

[قناص جواثا]

ما اقول الا بيض بيض الله وجهك على الموضوع..وكلام صحيح ميه في الميه...لاهنت