انا قررت اروح للصين واجيب اغراض البر(سوقنا غالي مره)

[شيروكي97]

السلام عليكم ورحمةالله وبركاته
يا جماعه الخير مو ملاحظين ان المحلات اسعارهم نااااار:confused: :confused: ؟؟؟!!!!
يعنى اذا بتجهز اغراضك للطلعه للبر لازم تكمل عدتك مثل
1_سليب باق
2_ثلاجه
3_دربيل من النوع الزين
4_ماجلان
5_محول كهرباء
6_ . . . . . . . . .ألخ من الاغراض الغاليه
لو تجمعهم راح يطلع عليك مبلغ مو بسيط في سبيل انك تروح للبر :mad:
حتى الاختراع الجديد اللي هي النتافه بسعر 1000 ريال:confused: :confused: :confused:
مع انى حاولت اصنع وحده لي خاصه لكن تحتاج اغراض واجد - وحاولت اصنع نتافه يدويه وهم تحتاج تعب ووقت---------------------- المهم
انا بصراحه يا شباب قررت اروح للصين بعد رمضان مباشره وحاب اجيب بضاعه لي ونفس اللي نستخدمها عندنا وسمعت انه فيه اغراض للحين ما وصلتنا:eek:
لكن فكرت وقلت ليش ما اجيب كم قطعه من الصين للشباب وبسعر( معقول :good2:) منها انا استفيد وانتم تستفيدون
حتى شغله النتافه اذا نصحتوني فيها ولقيت طلبات عليها واجد منكم راح اخليهم يصنعون مخصوص وراح اكتب عليها منتدى مكشات;)
والحين يا شباب ابي منكم الشور السنع او مقترح يفيدني ويفيد الجميع
----1_وش الاغراض اللي اجيبها ولها طلبات من قبل المنتدى او اهل البر؟؟؟
----2_وهل تنصحوني اخلي مصنع ينتج مكاين تنتيف طيور واجيبها للمملكه؟؟؟
بالله يا اعضاء مكشات اللي يمر عالموضوع ابيه يعلق او ينصح او يكتب اللي محتاجه من اغراض البر اللي غالي سعره عندنا عشان اعرف اكثر الاغراض المطلوبه بالسوق واجيبها
ولكم مني احلى تحيه(اخوكم)

[نيشان نجد]

ماشاء الله مر وحده الصين... والله فكره مش بطاله بس ما راح تكلفك الجمركه والنقل ولا الاغراض واجد ...ونشكر على خدمتك للمنتدى.....احجزلي مقعد جنبك,,, :)

[الدبل الثقيل]

جزاك الله خير .... قبل شهرين اشتريت مركاب غاز صغير زي مركاب الغاز اللي يجي اثنين وتنصفط بس صغير ومفرد ب25ريال من السنيدي .. قبل اسبوعين رحت للقصيم للسنيدي واشتريت واحد ثاني عشان أبغى أشبكهم ببعض ... اشتريته ب35ريال ويوم استفسرت من احد عيال السنيدي في المحل اللي بالجردة قالي روح للإداره في طريق الشاحنات!!!!!

[نبع الدموع]

يعطيك الف عافية و انكانها بالحجز اجل احجزلي نتافة بارك الله فيك و اقول ان
شاء الله رحلة موفقة و تفكيرك سليم باذن الله لاكن الجودة ثم الجودة هي الي
بتخليك تستمر و عقبال ما اشوف عندك محلات في جميع دول الخليج لادوات
البر و حط في بالك بطاقة مكشات للتخفيض :good: ولا ما راح نشتري منك انتبه
ههههههههههههههههههه

لا هنت

[ابوحماد]

قيمة التذكره 3600 ريال

5000 مصاريف

2500 أجور شحن

غير أجار مستودع أو معرض 20 الف الى 30 الف

____________________

اذا الموضوع تجارة أنا معك

غير كذا أقلبها سياحه بس الله يعينك على الاكل

[رغوه]

بالتوفيق للجميع

[(مواصل)]

اخوي شيروكي لعلمك ان اسعاد الاستهلاك بالصين اغلى منا بكثير
مثلا النتافه الي انت تقول تشتريشها من هنا بـ1000 ريال لكن بالصين تلاقيها اعلى من هالسعر لانك بتاخذ كميه بسيطه ومايعطونك اسعار زينه الا كمية 200 حبه وفوق

الشي الثاني لاتنس ان المصانع بالصين مايوزعون على اي تاجر لان لهم وكلاء بكل قاره بالعالم
مثل الشرق الاوسط لهم وكيل بالامارات معتمد ماتقدر تجيب شي الا عن طريقه او بعد موافقته

ولاتنسى الشحن والجمارك
واذا قدرت تجيب من هناك احسب لي حبه من اي نوع تجيبه لو تجيب فصفص
مجرد تشجيع ولاتخاف ترا حسابهن جاهز بس انت جب
وبالاخير اقول عساك على القوة والله يرزقنا واياك من واسع فضله

[صايد وفايد]

شيروكي 2008
اذا بتوفر على نفسك اشتر من منطقتك
ولا تنسى بتكلفك السفره في حدود 12000 ريال على اقل تقدير لاكن اذا تجاره انا معك جب معك ادوات جيده واسعار معقوله وبيع منها اذا نجحت معك كررها وش يدريك يمكن انه باب رزق لك
وقبل لاتروح اسال ناس يستوردون من الصين حتى تستفيد
اتمنى لك التوفيق

[باترول98]

هلا اخوي شروكي 2008
والله فكره حلوه انك تروح لصين وتجيب اغراض من هناك وتراى الروحه مايبيلها شي وانصحك انك ماتروح بعد رمضان لان شهر 10 فيه معرض وبتكون الاسعار هناك مرتفعه من ناحيه الاجار والتنقلات والمترجمين لانه موسم واغلب المصانع بتكون مشغوله بلمعرض يعني الوقت المناسب شهر 11 حلو مره وبرضه لا زم تاخذ معك بزنس كارد احسن لك واذا كنت تبي تروح على الخطوط الكينيه روحتك تبي تكلفك بلكثير 8000 ريال مع الاكل ولشرب والسكن والطيران ( بدون شحن )
والله يوفقك ان شاء الله ويرزقك

[جمعان 22]

بالتوفيق

خذها سياحة وتجربة تجارية صغيرة

وللفائدة ... اعرف شخص ذهب للصين

ويقول ...تسل الصيني عن سعر شيئ ..يقول لك 1000 ريال

قله لا نزل و امش عنه ..... بينزل لك لين تاخذه ب 100 ريال او اقل :)

[ابو تمام]

والله اذابتروح خلها تجارة وان شاءالله ماراح تخسر ربي يوفقك

بس اذا فتحت محل لازم تحط لأعضاء مكشات سعر خاص

[الخادم]

احجز لي محل باروح معك
ولو جنب الطيار او مساعدة

[منتعش]

أخي المحب والغالي : شروكي 97
أسأل الله لك التوفيق والسداد
السفر للصين بيكلفك كثير وإذا كنت أول مره فالله يعينك
يحتاج لك مرشد ومترجم ودليل عنده خبره بالمصانع وطرق الترحيل والجمرك
رحت للصين أربع مرات وحتى الآن لم أستطع معرفة طريقتهم
فمثلاُ :
أشتريت منهم بعض الأغراض وقال لي : هذا سعر الجملة في المصنع وكان سعرها بحدود 2.25 ريال
ولقيت نفس المنتج يباع عند أبوريالين
ويوم رحت للمرة الثانية للمصنع قال : أنت تعطيني آجل وغيرك يعطيني مقدم فأعطيه بأقل سعر لكي أستفيد من المبالغ
وعندهم طريقة عجيبة إذا قال لك سعر فلا تجادله وتطلب تخفيض سعر
لأنه سوف يخفض ولكن يعطيك أقل جودة ومواصفات .
فأنصحك تزور ( سوق التنين بالإمارات ) وهو عبارة عن سوق صيني وكبير جداً
وفيه جميع الصناعات الصينية ويوجد بعض المصانع هناك
وربما تجد مبتغاك هناك وتفتك من الخسائر .
وعذراً على الإطالة والله يوفقك .

[دغيم1]

السلام عليكم ورحمة الله وبركاته
حياك الله أخوي
إذا المسأله على تجهيزات بسيطة ، ماتسوى تروح للصين عشانها
وإذا المسأله على سياحة فنقول حج وقضا حاجة
لكن إذا الطلبية خصوصي راح تأخذ منك وقت
عموما فيه مكاتب في المملكة تقوم بالواجب عنك
بامكانك الاتصال بهم وطلب ماتريد
تمنياتي لك بالتوفيق
تقبل تحياتي

[شاعر المستقبل]

اخوي اهم شي النتفات و جهاز الي يطلع اصوات الطيور

[شيروكي97]

نيشان نجد جهز تذكرتك وازهل الباقي

الدبل الثقيل اذا تبي شي خاص لك ارسلي وانا اخوك بسعر التكلفه احسبه لك

نبع الدموع ابشر بالشي الطيب ان شاءالله واشكرك على الدعوه الله يسمع منك

ابو حماد اشكرك على التوضيح لكن انا بروح مع اولاد خالي لهم معارف بالصين وهم كل تجارتهم بالصين

رغوه الله يوفقك يا رب

الايدعشري اشكرك على مرورك الطيب لكن انا قالي ولد خالي غير عن كلامك-قالي الاسعار بلاش بالصين غير عن اسعار المحلات-انا بروح واقطع الشك باليقين(اذا ما لقحت ما ظرت)

صايد وفايد اشكر مرورك الطيب لكن الشي الغالي هناك حسب ما سمعت بس التذكره والشحن يعنى لو اجيب كميه وانباعت ما اظن راح تكون فيه خساره بأذن الله(وياليت تفيدني وش الاجهزه اللي اجيبها )

باترول اشكرك على ملاحظه المعارض راح احطها بالحسبان(تراني محفول مكفول بالسفره بس تذكرتي وبضاعتي

جمعان 22 اشكرك اخوي على مرورك الطيب ومثل ما قلت(خذها سياحه وتجربه تجاريه صغيره)

ابو تمام الله يوفق الجميع يا رب وابشر بالسعر الطيب

الخادم روح الغرفه فاضيه منها سياحه وكسب معرفه عن البضاعه

منتعش مشرفنا الغالي مرورك شجعنى على التجاره ومثل ما قلت للأخوان انا لي معارف ورايح مع ناس فاهمه بالامور هذي وراح احرص على النوعيه الطيبه اللي تبيض الوجه ان شاءالله وربي يوفقك الجميع لكن اللي منكم انكم تكتبون اللي تحتاجونه عشان اعرف ذوق المستهلك بالسلعه(يعني اطلب اي منتج-مثلا ثلاجه او نتافه او دربيل (منظار) او ما جلان او او او اي شي يخطر عالبال

[شيروكي97]

هلا وغلا بمشرفنا الغالي (دغيم1)
اشكر مرورك الطيب
اخ دغيم1 يمكن تذكر ان لي محاولات بصنع نتافه قبل اسبوعين-صحيح انها نجحت لكن بصراحه ما تخدم
شافني ولد خالي وقالي وش لك بدوخة الراس والتعب ويمكن تنجح ويمكن لا
وبصراحه اقنعني بالسفر للصين وقالي تقدر تخلي المصنع يصنعلك بالاحجام اللي تبيها و بأي عدد تبيه وبالجوده اللي تطلبها(طبعا هو عميل عن بعض المصانع بالصين)
وانا ابي اشكل باللي راح اجيبه زي ما وضحت للأخوان
وشكرا لك وننتظر تعليك منك ونستفيد من اخ نصوح


شاعر المستقبل اشكر مرورك وبصراحه ذكرتني بالجهاز اللي يطلع الاصوات اشكر اخوي لا خلى ولا عدم
وننتظر من الاخوان مثل الملاحظات الطيبه

[(مواصل)]

الايدعشري اشكرك على مرورك الطيب لكن انا قالي ولد خالي غير عن كلامك-قالي الاسعار بلاش بالصين غير عن اسعار المحلات-انا بروح واقطع الشك باليقين(اذا ما لقحت ما ظرت)

اجل وانا اخوك ابي حبه وحده من اي قطعه تجيبه حتى لو ماهي للمكاشيت اهم شي قطعه تجيبه احسب حسابي بحبه
ومثل ماقلت لك بالبدايه الغرض هو تشجيعك يالغالي والله يرزقك ويوفقك

[شيروكي97]

جزاك الله خير وابشر اذا جبت ابي اعرض الكل للمنتدى


لكن الرجاء وضع المطلوب عشان اعرف الرغبه واكثر منها
ارجو من الاخوان وضع اسم اي جهاز

[رفيع]

الله يوفقك يا شروكي ويجعله باب رزق لك ..

وانا بعد ابي لي من كل شيء حبه .. وأهم شيء النتافه ..

وودي اطرح بعض الاشياء الي اتوقع انها مطلوبه .

خيام + النتافه + جهاز الاصوات+ درابيل + أجهزة اتصال لاسلكي .+ لمبات + عزب + دوافير + اباريق ومواعين .. أشياء واجد .. وان كان قدرت تجيب صتم للساكتون فتراها ممتازه .


وهذي لو تجيبها وتصير رخيصة ياسلاام ..

http://i283.photobucket.com/albums/kk319/dhook1/B1/1.jpg

الي هي صاجات التغريز يلاستك يا زينها خفيفه واطلق من الصاجات الحديد الي تقطع القلب من ثقلها .

وابي وحده ..
يعني نتافه + هالصاجات ,,

ومثل ما قال الاخوان اهم شيء الجوده .,\\


الله يوفقك ياخوي ,,

[الصمان 2]

محول كهرب ممتاز


جهاز سحب الماء من الغدير


راس للدافور قوي


نـتافه الطيور .



وسلامك .




.

[قرم البر]

والله فكره مهب شينه بس اسال ازين مكان هناك تروحلوه

[لن أمل من العطاء]

على طارئ الاسعار والتكلفة القليلة في الصين


لي صديق غامدي وتعرفون الغمد ماشاء الله عليهم تفكيرهم اقتصادي
بناء عمارة في جده عظم صبات اعمده وسقوف وبنسان وتلييس.. داخلي

وحسب التكلفة الاجمالية للتشطيب بالكامل
وهو ناوي يروح للصين للسياحة

اخذ المخطط وراح للصين

واشترى كل شيء من الصين كل ادوات التشطيب والبويات والواجهات والادوات الكهربائية من تسليك ولمبات ومكيفات وسيراميك ورخام وبعض من الفرشات وابواب بالحلوق وحديد للشبابيك والمونيوم للشبابيك وكل شيء طبعا قد الرجال ماخذ المقاسات من من المنزل

طلعت التكلفة اقل من النصف مع الجمارك والشحن في الكونيرات للحماية

بما ان تفكيره اقتصادي

اشترى له ادوات لمنزل اخر (قصه يشتري ارض وعلى نفس المخطط)


الله اعلم الرد مناسب والا لقافة مني


اخوكم


لن امل من العطاء

[عبرووود]

اخوي شروكي 97 الله يوفقك وصل بفكرتك هذي فكرة ناجحة 100%

الله يوفقك ويخليك لاهلك ريردك سا لم

اي شي تشترية لك احسبني معك والسعي محفوظ

ومشكور الله يعطيك العافية وماقصرت

الله يوفقك

[شيروكي97]

السلام عليكم ورحمةالله وبركاته
اخ رفيع ماشاءالله عليك فاهمني حطيت اشياء ماكانت بالي وحطيت صوره مهمه ولازم اجيبها اذا لقيتها اشكرك طال عمرك لو عندك خبر عن الاسعار ياليت ترفقهم عشان اعرف السعر واشكر مرورك


الصمان 2 اشكر مرورك الطيب _وبدى الشباب يطلبون محول كهرب بكثر وهذا مأشر انه لازم اكثر منه واذا لقيت جهاز سحب ماء ابشر ابي اجيبه___بس كبير او حجم عادي يصلح للبر ؟؟؟؟


قرم البر اشكر مرورك الطيب -انا سألت عن الاماكن الطيبه اللي فيها اغراض-

[شيروكي97]

لن امل من العطاء مشاركتك طيبه بالعكس مهي لقافه -انا عندي خويا نفس طريقة الغمد يوقفون البيت عظم وكلن خذا حرمته وراح للصين والله مايخلون شي ما يجيبونه حتى ملابسهم والتكلفه ماتطلع شي واجدارخص من عندنا بكثير--وانا مابي اسافر الا هم اقنعوني
اجيب كونتينر واحط فيه بضاعه -مبدأيا من كا قطعه مثلا 20 حبه واذا نجحت ابي اجيب كميه كثيره

عبرووود اشكرك على الدعوه الصالحه الله يجزاك خير ان شاءالله وابشر والله ان جبت الاغراض ابي ارسل صور عالخاص وانت تختار وبسعر ارخص من السوق(او انك تجي عندي وانتغدا انا وياك ولك بسعر التكلفه)

[اح ب2267]

بالتوفيق للجميع

[شيروكي97]

شباب انا راسلت واحد من الصين وخليته يرسلي الاسعار(النتافه)
طبعا الرجال حاسب سعر النتافه +عمولته
وشوفوا الارسعار
الكميه 300 حبه ---------سعر الحبه130 دولار-----قيمه الشحن 2دولار للحبه وتصل بعد40 يوم
الكميه500 حبه-----------سعر الحبه110درلار------قيمه الشحن1,5دولار للحبه وتصل بعد 50 يوم
الكميه 1000 حبه--------سعر الحبه95 دولار------قيمه الشحن1دولار للحبه وتصل بعد50يوم


130 دولار = 489 ريال
110 دولار = 413 ريال
95 دولار = 365 ريال

وش رايكم بالاسعار ؟؟؟؟؟؟؟؟؟؟؟؟
انا اشوفها انها هم غاليه

[بيضا القاع]

مشاء الله فكره جيده والله يوفقك بس انت تلاحض ان كل ما كثر العدد قل السعر بس وين تودي كل هذا العدد واحسن طريقه شحن الي هي صندقه واحد من الربع سواها ارخص وافضل وارجوا اني افدتك وان شاء الله الاخوان ما يقصرون

[شيروكي97]

هلا اخ ذيب النقيان ممكن تفيدني اكثر جزاك الله خير عن الجهاز اللي سواه صاحبك؟؟وكم كلفه؟